ប្រជាពលរដ្ឋខ្មែររងគ្រោះមួយគ្រួសារដែលត្រូវជនជាតិវៀតណាម លើកគ្នាទៅព្រួតវាយសម្លាប់ដល់ក្នុងផ្ទះ នៅឃុំព្រែកខ្សាយខ ស្រុកពាមរក៍ ខេត្តព្រៃវែង នោះ បានទទូចឲ្យអាជ្ញាធរជួយរកយុត្តិធម៌ជូនពួកគាត់។ អាជ្ញាធរថាកំពុងបន្តស៊ើបអង្កេតករណីនេះដោយយកចិត្តទុកដាក់។ រីឯសង្គមស៊ីវិល ថាការប្រើអំពើហិង្សាជាក្រុមរហូតឈានដល់ការសម្លាប់ គឺរំលោភសិទ្ធិមនុស្ស និងច្បាប់កម្ពុជា យ៉ាងធ្ងន់ធ្ងរ។
មកដល់ពេលនេះ មានបុរសជនជាតិវៀតណាម ចំនួន ៦នាក់ហើយដែលអាជ្ញាធរកម្ពុជា ចាប់ខ្លួន បន្ទាប់ពីពួកគេបានកៀរគរជនជាតិវៀតណាម ដូចគ្នាជាច្រើននាក់ ទៅដេញវាយប្រហារលើពលរដ្ឋកម្ពុជា មួយគ្រួសារ ដែលរស់នៅភូមិក្បែរគ្នា បណ្ដាលឲ្យបុរសម្នាក់ជាប្ដីស្លាប់ និងស្ត្រីជាប្រពន្ធដែលមានផ្ទៃពោះ ៩ខែរងរបួសធ្ងន់។ នេះបើតាមប្រសាសន៍របស់អធិការស្រុកពាមរក៍ លោក សេង ពន្លក។
ភរិយាជនរងគ្រោះ គឺលោកស្រី ចាន់ ស៊ីណា អាយុ ៣១ឆ្នាំ អំពាវនាវឲ្យអាជ្ញាធរជួយរកយុត្តិធម៌ជូនពួកគាត់ ដោយផ្ដន្ទាទោសជនល្មើសទៅតាមច្បាប់ និងទាមទារសំណងចំនួន ១០ម៉ឺនដុល្លារអាមេរិក។ ប្ដីលោកស្រីដែលត្រូវជនជាតិវៀតណាម ព្រួតវាយសម្លាប់នោះ មានឈ្មោះ សេង រត្នធី អាយុ ៣៣ឆ្នាំ។ ពួកគាត់រស់នៅភូមិអ្នកលឿង ឃុំអ្នកលឿង ស្រុកពាមរក៍ ខេត្តព្រៃវែង៖ « ជួយរកយុត្តិធម៌ឲ្យប្ដីខ្ញុំផង ព្រោះខ្ញុំក្រណាស់ ! ខ្ញុំគ្មានអី។ សូមរកយុត្តិធម៌ឲ្យខ្ញុំឲ្យបានច្បាស់លាស់ »។
លោកស្រី ចាន់ ស៊ីណា រៀបរាប់ពីដំណើររឿងដែលជនជាតិវៀតណាម ព្រួតវាយសម្លាប់ប្ដីរបស់គាត់កាលពីម៉ោងជាង ៩យប់ថ្ងៃអាទិត្យ ទី៧ សីហា ថា ដំបូងឡើយប្ដីរបស់គាត់បានដើរទៅទិញបារី ហើយត្រូវជនជាតិវៀតណាម សម្លុតទារបារី តែប្ដីលោកស្រីមិនឲ្យ។ ពេលឮដូច្នេះ ក្រុមជនសង្ស័យបានស្ទុះទៅដាល់ជនរងគ្រោះមួយដៃចំមុខ ជាហេតុនាំឲ្យជនរងគ្រោះខឹង ហើយជេរម្តាយក្រុមជនសង្ស័យ។ បន្ទាប់មកត្រូវបានក្រុមជនសង្ស័យដេញវាយដល់ផ្ទះតែម្តង៖ « វាកាន់ដែកគាស់មកគប់ប្ដីខ្ញុំនៅមុខផ្ទះ ហើយប្ដីខ្ញុំគាត់ខឹង ក៏ទាញដែកគាស់នោះគប់ទៅវិញ តែអត់ត្រូវគេទេ តែមានជនជាតិវៀតណាម មួយនោះ ផុងលូនៅថ្នល់នោះ ក៏វាខឹងប្ដីខ្ញុំ ហើយវាស្រែកហៅគ្នាថា អាហ្នឹងគប់អញត្រូវមួយកាំបិតដាច់ជើងចេញឈាម ស្រាប់តែពួកវាមកមួយហ្វូងធំតែម្តង ច្រើនណាស់ ! ពេលមកដល់ វាយប្ដីខ្ញុំមួយដែកគាស់ចំពីក្រោយ បណ្ដាលឲ្យសន្លប់ ហើយនៅតែបន្តវាយទៀត តែខ្ញុំរង ក៏ត្រូវចំដៃ។ វាយប្ដីខ្ញុំសន្លប់ហើយ វាថាប្ដីខ្ញុំធ្វើពុត។ ពេលនោះមានតាមួយត្រូវជាឪរបស់អ្នកវាយប្ដីខ្ញុំនោះ បានប្រាប់ថា ឲ្យវាយសម្លាប់ទាំងប្ដីទាំងប្រពន្ធតែម្តងទៅ ទុកអញអ្នកបង់លុយ។ ដល់ពេលអ៊ីចឹងទៅ វាយកឈើប្រហែលមួយម៉ែត្រដែលជាប់ដែកគោល មកវាយប្ដីខ្ញុំនៅចំក្រោមច្រមុះ ក៏ជាប់តែម្តង។ ពេលដែលខ្ញុំដកដែកគោល ក៏ប្ដីខ្ញុំផុតតែម្តងទៅ »។
លោកស្រីបន្តថា ជនជាតិវៀតណាម មានគ្នាលើសពី ២០នាក់ដែលប្រដាប់ដោយដំបង ឈើមូល ឈើជ្រុង ដែកគាស់ និងកាំបិត នៅតែមិនដកថយទេ ទាល់តែអ្នកភូមិជនជាតិខ្មែរនាំគ្នាស្រែកប្ដឹងសមត្ថកិច្ច ទើបពួកគេនាំគ្នាដកថយ។ ជនសង្ស័យទាំងនោះនៅក្នុងភូមិ៦ ឃុំព្រែកខ្សាយខ ស្រុកពាមរក៍ ខេត្តព្រៃវែង។
អាស៊ីសេរី មិនទាន់អាចស្វែងរកការឆ្លើយតបពីខាងគ្រួសារជនសង្ស័យជាជនជាតិវៀតណាម បាននៅឡើយនៅថ្ងៃទី៩ ខែសីហា។
ថ្លែងប្រាប់សារព័ត៌មានក្នុងស្រុក អ្នកនាំពាក្យក្រសួងមហាផ្ទៃ លោក ខៀវ សុភ័គ បានបញ្ជាឲ្យអាជ្ញាធរមូលដ្ឋានតាមចាប់ជនជាតិវៀតណាម ដែលវាយសម្លាប់ពលរដ្ឋកម្ពុជា ដល់ផ្ទះនោះ យកមកផ្ដន្ទាទោសតាមច្បាប់ឲ្យខាងតែបាន។
រីឯអធិការស្រុកពាមរក៍ លោក សេង ពន្លក មានប្រសាសន៍ថា លោកកំពុងស៊ើបអង្កេតករណីនេះ ដើម្បីឈានដល់ការចាប់ខ្លួនជនសង្ស័យបន្តទៀត៖ « រឿងនេះថ្ងៃស្អែកខ្ញុំស៊ើបអង្កេតចប់ហើយ ខ្ញុំនឹងបញ្ជូនទៅតុលាការ »។
ប្រជាពលរដ្ឋកម្ពុជា អះអាងថា នៅភូមិលេខ៦ ជិតផ្សារអ្នកលឿងនោះ ភាគច្រើនជាជនជាតិវៀតណាម សញ្ជាតិកម្ពុជា ដែលរស់នៅយ៉ាងអនាធិបតេយ្យ ហើយអាជ្ញាធរហាក់មិនសូវហ៊ានតតាំងជាមួយជនជាតិវៀតណាម នោះទេ។ ចាប់តាំងពីខែមេសា ឆ្នាំ២០១៤ មក មន្ត្រីអន្តោប្រវេសន៍កម្ពុជា បានបញ្ជូនជនជាតិវៀតណាម រស់នៅខុសច្បាប់នៅកម្ពុជា ជិត ១ម៉ឺននាក់ទៅវៀតណាម វិញ។ តែថ្មីៗនេះ រដ្ឋាភិបាលវៀតណាម បានអំពាវនាវដល់រដ្ឋាភិបាលកម្ពុជា ឲ្យយកចិត្តទុកដាក់ដល់ជនជាតិរបស់ខ្លួនដែលកំពុងរស់នៅក្នុងប្រទេសកម្ពុជា ដោយធានានូវសិទ្ធិស្របច្បាប់របស់ពួកគេ។
អ្នកគ្រប់គ្រងបច្ចេកទេសការិយាល័យស៊ើបអង្កេតនៃអង្គការសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា ការប្រើអំពើហិង្សាជាក្រុមរហូតឈានដល់ការសម្លាប់នេះ គឺជាអំពើសាហាវឃោរឃៅបំផុត។ លោកជំរុញឲ្យអាជ្ញាធរបន្តចាប់ខ្លួនជនពាក់ព័ន្ធដទៃទៀត ដើម្បីទប់ស្កាត់កុំឲ្យមានគំនុំ និងការរើសអើងជាតិសាសន៍៖ « ទង្វើទាំងអស់ទាំងនេះ ប្រសិនបើអាជ្ញាធរ និងរដ្ឋាភិបាលមិនមានវិធានការទប់ស្កាត់ឲ្យបានទាន់ពេលវេលា ហើយនិងចាត់វិធានការតាមផ្លូវច្បាប់ទេ វានឹងអាចរីករាលដាលបន្តិចម្តងៗ ហើយវានឹងក្លាយជាគំនុំសងសឹក ហើយអាចក្លាយទៅជាការរើសអើងជាតិសាសន៍ទៀតផង។ នេះគឺជាបញ្ហាដែលគួរឲ្យព្រួយបារម្ភ »។
លោក អំ សំអាត លើកឡើងថា ករណីជនជាតិវៀតណាម វាយសម្លាប់ពលរដ្ឋខ្មែរនេះ គឺត្រូវអនុវត្តតាមច្បាប់ព្រហ្មទណ្ឌកម្ពុជា និងពិនិត្យលើច្បាប់អន្តោប្រវេសន៍ និងច្បាប់សញ្ជាតិ ដើម្បីបញ្ជាក់ថា ជនជាតិវៀតណាម ទាំងនេះរស់នៅកម្ពុជា ស្របច្បាប់ដែរឬទេ។
មាត្រា២០៥ នៃក្រមព្រហ្មទណ្ឌកម្ពុជា ចែងថា ឃាតកម្មដែលកើតក្នុងពេល ឬក្រោយពេលប្រព្រឹត្តអំពើទារុណកម្ម អំពើឃោរឃៅ ឬអំពើរំលោភសេពសន្ថវៈ ត្រូវផ្ដន្ទាទោសដាក់ពន្ធនាគារអស់មួយជីវិត។ បើទោះជាក្រមព្រហ្មទណ្ឌចែងពីស្ថានទម្ងន់ទោសធ្ងន់ធ្ងរយ៉ាងណាក៏ដោយ ក៏គេកម្រឃើញសមត្ថកិច្ច ឬតុលាការអាចស្វែងរកយុត្តិធម៌ជូនក្រុមគ្រួសារជនរងគ្រោះណាស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។