យុវជនសង្គមម្នាក់ដែលសកម្មការងារបរិស្ថាន និងសង្គមរក្សាជំហរមិនចុះចូលជាមួយគណបក្សកាន់អំណាចនោះទេ។ លោកប្ដេជ្ញាបន្តការងារជួយពលរដ្ឋខ្មែរស្របតាមឆន្ទៈរបស់ខ្លួនដោយមិនត្រូវការដោះដូរបុណ្យស័ក្តិ តួនាទីនោះឡើយ។ ប្រតិកម្មនេះធ្វើឡើយបន្ទាប់ពីយុវជនគាំទ្រលោក ហ៊ុន សែន បានបង្ហោះរូបមួយសន្លឹក ដែលបង្ហាញពីជំនួបលោកនឹងលោក ហ៊ុន សែន ដែលធ្វើឲ្យមហាជនយល់ថា លោកចុះចូលរដ្ឋាភិបាលសព្វថ្ងៃ។
យុវជនសង្គមដែលយកចិត្តទុកដាក់ឈឺឆ្អាលរឿងបញ្ហាបរិស្ថាន និងធនធានធម្មជាតិអះអាងថាលោក និងយុវជនផ្សេងទៀតពិតជាបានជួបលោក ហ៊ុន សែន នៅគេហដ្ឋានរបស់លោកនៅក្រុងតាខ្មៅកាលពីថ្ងៃទី១០ ខែមីនា ដើម្បីជជែក អំពីបញ្ហាតំបន់អារ៉ែង និងស្នើរដ្ឋាភិបាលជួយដោះស្រាយ។ ប៉ុន្តែលោកខកចិត្តចំពោះយុវជនមួយចំនួនដែលយករូបទៅបង្ហោះនៅលើបណ្តាញសង្គមដើម្បីគេងចំណេញនយោបាយ និងធ្វើឱ្យមហាជនយល់ច្រឡំថាលោកចុះចូលរដ្ឋាភិបាលដឹកនាំដោយគណបក្សប្រជាជនកម្ពុជា។
យុវជនសកម្មក្នុងកិច្ចការងារសង្គម និងអតីតយុវជនខ្មែរថាវរៈ លោក ស្វាយ សំណាង ប្រាប់វិទ្យុអាស៊ីសេរីនៅថ្ងៃទី៦ ខែឧសភា ថា ជំនួបរវាងយុវជននិងលោក ហ៊ុន សែន កន្លងទៅគឺគ្រាន់តែជជែកអំពីរឿងរ៉ាវនៅតំបន់អារ៉ែង ដោយពុំបាននិយាយរឿងចុះចូលរដ្ឋាភិបាលនោះទេ។ លោកបញ្ជាក់ថា លោកនៅតែរក្សាឆន្ទៈមិនចុះចូល ហើយប្ដេជ្ញាចូលរួមសកម្មភាពទាមទារយុត្តិធម៌សង្គម ការពារជនរងគ្រោះ ការពារបរិស្ថាន និងធនធានធម្មជាតិដដែល ពីព្រោះលោកមិនចូលចិត្តស្តាប់ការបង្គាប់បញ្ជាពីអ្នកនយោបាយឡើយ។
លោក ស្វាយ សំណាង៖ «ខ្ញុំសុំបញ្ជាក់ជំហរថាខ្ញុំមិនបានចុះចូលជាមួយគណបក្សនយោបាយណាមួយទេ ខ្ញុំនៅតែរក្សាជំហរជាយុវជនឯករាជ្យ ខ្ញុំរក្សាជំហរនៅជាមួយជនរងគ្រោះ និងនៅជាមួយបញ្ហាដែលត្រូវដោះស្រាយ ដូចជាបញ្ហាបរិស្ថាន រឿងធនធានធម្មជាតិ និងសិទ្ធិមនុស្សនៅក្នុងប្រទេសកម្ពុជាដដែល ដោយសារខ្ញុំមានឆន្ទៈមួយចង់បានប្រទេសកម្ពុជារបស់យើងគោរពសិទ្ធិមនុស្ស ការប្រើប្រាស់ធនធានធម្មជាតិដោយតម្លាភាព ហើយវាមិនប៉ះពាល់ដល់ប្រទេស»។
ប្រតិកម្មបែបនេះ បន្ទាប់ពីក្រុមយុវជនដែលចុះចូលជាមួយគណបក្សកាន់អំណាចបាននាំគ្នាយករូបសកម្មជនអារ៉ែង និងក្រុមយុវជនខ្មែរថាវរៈឈរទន្ទឹមនឹងលោក ហ៊ុន សែន ទៅបង្ហោះ និងចែករំលែកនៅលើបណ្តាញសង្គមកាលពីថ្ងៃទី៤ ខែឧសភា។ ពួកគេសរសេរថា ក្រោមការដឹកនាំរបស់លោកនាយករដ្ឋមន្រ្តី ហ៊ុន សែន គឺមានយុវជនជាច្រើនបានចូលរួមជាបន្តបន្ទាប់។ រឿងនេះហើយដែលនាំឱ្យអ្នកលេងហ្វេសប៊ុកយល់ថា លោក ស្វាយ សំណាង បានចូលជាមួយរដ្ឋាភិបាល។
វិទ្យុអាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាលលោក ផៃ ស៊ីផាន និងអ្នកនាំពាក្យគណបក្សកាន់អំណាចលោក សុខ ឥសាន ដើម្បីឆ្លើយតបរឿងនេះបានទេនៅថ្ងៃទី៦ ខែឧសភា។
ទោះយ៉ាងណា លោក ស្វាយ សំណាង យល់ថា ការណ៍ដែលយុវជនមួយចំនួនសម្រេចចិត្តចូលរួមជាមួយរដ្ឋាភិបាល គឺជាសិទ្ធិរបស់ពួកគេ ប៉ុន្តែលោកចាត់ទុកការយករូបថតទៅបង្ហោះជាសាធារណៈដែលនិយាយខុសពីន័យដើមដែលបង្កឱ្យពលរដ្ឋយល់ច្រឡំលើលោកពេលនេះថាជាការកេងចំណេញផ្នែកនយោបាយ ពីព្រោះលោកពុំបានចុះចូលបក្សកាន់អំណាចនោះទេ។
ស្ថានភាពសិទ្ធិមនុស្ស និងប្រជាធិបតេយ្យនៅកម្ពុជាកំពុងធ្លាក់ចុះ ស្របពេលការបោះឆ្នោតជ្រើសតាំងតំណាងរាស្ត្រអាណត្តិទី៧កាន់ខិតជិតលោក ហ៊ុន សែន បង្កើនការរិតត្បិតលើសិទ្ធិពលរដ្ឋ សិទ្ធិនយោបាយ ជាពិសេសលោកបើកយុទ្ធនាការអូសទាញក្រុមយុវជនសង្គមឱ្យងាកមកគាំទ្រនយោបាយរបស់លោកវិញជាថ្នូរផ្តល់តួនាទី លោភសក្តារៈជាដើម។ យុវជនទាំងនោះមិននៅស្ងប់នោះទេពួកគេបាននាំគ្នានិយាយចោទប្រកាន់ក្រុមអង្គការសិទ្ធិមនុស្ស និងក្រុមយុវជនសង្គមស៊ីវិល ក្រុមគណបក្សប្រឆាំងថា ជាក្រុមបដិវត្តន៍ពណ៌តាមបំណងដែលលោក ហ៊ុន សែន ចង់បាន។
ជុំវិញរឿងនេះ ប្រធានសមាគមនិស្សិតបញ្ញវន្តខ្មែរលោក កើត សារ៉ាយ គាំទ្រចំពោះយុវជនប្រកាន់ជំហរធ្វើការងារសង្គមដោយឯករាជ្យ ពីព្រោះបរិបទនយោបាយសព្វថ្ងៃនេះពួកគេគួរគិតឱ្យបានវែងឆ្ងាយ។ លោកសង្កេតឃើញថា យុវជនដែលចុះចូលរដ្ឋាភិបាលកន្លងមកហាក់ពុំបានជំរុញឱ្យរដ្ឋាភិបាលដោះស្រាយបញ្ហាសិទ្ធិមនុស្ស និងបរិស្ថានឱ្យប្រសិទ្ធភាពនោះទេ ផ្ទុយទៅវិញលោកថា បច្ចុប្បន្នរឿងចោទប្រកាន់លាបពណ៌ និងរើសអើងនិន្នាការកំពុងកើតឡើងនៅកម្ពុជាគួរឱ្យព្រួយបារម្ភជាខ្លាំង។
លោក កើត សារ៉ាយ៖ «កាលណាគ្មានកែទម្រង់ប្រព័ន្ធយុត្តិធម៌ និងច្បាប់ឱ្យបានត្រឹមត្រូវទេ ការត្រួតពិនិត្យប្រព័ន្ធការងារឱ្យមានឱ្យមានតម្លាភាព គណនេយ្យភាពទេ កុំប្រើពាក្យថាទៅចូលរួមកែលម្អ គឺគ្មានលទ្ធភាពទេ ក្នុងស្ថានភាពនេះសូមឱ្យយុវជនខ្មែរដែលគិតគូពីបញ្ហាជាតិមាតុភូមិនៅឱ្យចំកណ្តាលដោយកុំផ្អៀងទៅនិន្នាការណាមួយ ហើយសូមរក្សាឆន្ទៈរបស់ខ្លួនក្នុងការចូលរួមកែប្រព័ន្ធយុត្តិធម៌»។
កាលពីចុងខែមេសាលោក ស្វាយ សំណាង និងក្រុមយុវជនករុណាព្រៃអារ៉ែង ជិត ៣០នាក់បានចុះការពារតំបន់អារ៉ែង។ ទន្ទឹមនឹងនេះ លោក ស្វាយ សំណាង បានរកឃើញឈើធំៗជាង២០ដើមនៅតាមបណ្តោយដងស្ទឹងអារ៉ែង មានមុខកាត់កន្លះម៉ែត្រដល់ជាង ១ម៉ែត្រ ភាគច្រើនជាប្រភេទឈើគគីរ ឈើទាល ត្រូវបានគេអារផ្តួលរំលំធ្វើអាជីវកម្ម ខណៈទំហំដីព្រៃប្រមាណ១០ហិកតារ គេកាប់ទន្រ្ទានយកដីកាន់កាប់ ដោយគ្មានអាជ្ញាធរពាក់ព័ន្ធចាត់វិធានការទប់ស្កាត់ឱ្យមានប្រសិទ្ធភាពឡើយ។
យុវជន ស្វាយ សំណាង ឱ្យដឹងរហូតមកដល់ពេលនេះបញ្ហានៅតំបន់អារ៉ែងនេះ រដ្ឋាភិបាលមិនបានដោះស្រាយនៅឡើយទេ ទោះបីកន្លងមកលោកធ្លាប់ប្រាប់លោក ហ៊ុន សែន ដោយផ្ទាល់ក៏ដោយ។ ទោះយ៉ាងណាលោក និងយុវជនផ្សេងទៀតនឹងចូលរួមកិច្ចការងារសង្គម និងបរិស្ថានបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។