អាជ្ញាធរ​ក្រុង​ភ្នំពេញ​បញ្ជា​ឱ្យ​ពលរដ្ឋ​ម្នាក់​សុំទោស​ករណី​រិះគន់​ចំណាត់ការ​របស់​ប៉ូលិស​ចរាចរណ៍

ដោយ ​ជាតិ ចំណាន
2020-07-31
អ៊ីម៉ែល
មតិ
Share
បោះពុម្ព
មន្ត្រី​ជាន់​ខ្ពស់​ផ្នែក​ស៊ើប​អង្កេត​នៃ​សមាគម​អាដហុក (ADHOC) លោក ស៊ឹង សែនករុណា ផ្ដល់​បទសម្ភាសន៍​កាល​ពី​​ថ្ងៃ​ទី​៩ ខែ​សីហា ឆ្នាំ​២០១៧។
មន្ត្រី​ជាន់​ខ្ពស់​ផ្នែក​ស៊ើប​អង្កេត​នៃ​សមាគម​អាដហុក (ADHOC) លោក ស៊ឹង សែនករុណា ផ្ដល់​បទសម្ភាសន៍​កាល​ពី​​ថ្ងៃ​ទី​៩ ខែ​សីហា ឆ្នាំ​២០១៧។
Photo: RFA

មន្ដ្រី​ធ្វើការ​ផ្នែក​សិទ្ធិមនុស្ស​ថា ការ​ហៅ​ពលរដ្ឋ​ដែល​រិះគន់​ទង្វើ​របស់​សមត្ថកិច្ច​ចរាចរណ៍ ទៅធ្វើ​វីដេអូ​សុំទោស ជា​រឿង​មិនគួ​ធ្វើ។ ការ​លើកឡើង​នេះ ដោយ​តែ អាជ្ញាធ​របប​ក្រុងភ្នំពេញ បាន​បញ្ជា​ឱ្យ​ពលរដ្ឋ​ម្នាក់ទៀត​ធ្វើ​វីដេអូ​សុំទោស​ជា​សាធារណៈ ក្រោយពី​នាង​បាន​រិះគន់​សមត្ថកិច្ច ករណី​ផាក​ពិន័យ​របស់​ប៉ូលិស​ចរាចរណ៍

កាលពី​ថ្ងៃទី​៣០ ខែកក្កដា ស្នងការដ្ឋាន​នគរបាល​ក្រុងភ្នំពេញ បាន​ហៅ​ស្ដ្រី​ម្នាក់​មក​សាកសួរ និង​បាន​ឱ្យ​ចេញ​វីដេអូ​សុំទោស​ជា​សាធារណៈ ទាក់ទង​នឹង​ការ​បង្ហោះ​វីដេអូ រិះគន់​ចំណាត់ការ​របស់​សមត្ថកិច្ច​លើ​រូបនាង កាល​ពីថ្ងៃ​ទី​២៧ ខែ​កក្កដា​។

អ្នកនាំពាក្យ​ស្នងការដ្ឋាន​នគរបាល​ក្រុង​ភ្នំពេញ ប្រាប់​សារព័ត៌មាន​ក្នុងស្រុក​ថា ស្ដ្រី​រូបនេះ បាន​ប្រើ​ហ្វេសប៊ុក​បង្ហោះ​វីដេអូ​ប្រមាថ​មើលងាយ លើ​សមត្ថកិច្ច​ក្នុងពេល​អនុវត្ដ​ច្បាប់​កាលពី​ថ្ងៃ​២៩ ខែកក្កដា។អ្នកនាំពាក្យ​សមាគម​ការពារ​សិទ្ធិមនុស្ស​អាដហុក​លោក ស៊ឹង សែនករុណា ប្រាប់​អាស៊ីសេរី​កាលពី​ថ្ងៃទី​៣០ ខែកក្កដា ថា ចំណាត់ការ​របស់​អាជ្ញាធរ​នេះ គឺជា​ការ​គម្រាមកំហែង​ដល់​សិទ្ធិ​របស់​ប្រជាពលរដ្ឋ«មន្ដ្រីនគរបាល​មួយចំនួន​គាត់​បានធ្វើ​ល្អ​ត្រឹមត្រូវ​របស់គាត់​ហើយ ប៉ុន្ដែ​ដោយឡែក​មួយចំនួនទៀត​ហ្នឹង​បានធ្វើ​មិន​ត្រឹមត្រូវ អ៊ីចឹង​បើ​ធ្វើ​មិន​ត្រឹមត្រូវ ហើយ​រង​ការរិះគន់ ការ​លើកឡើង​ពី​អំពី​អំពើ​មិន​ត្រឹមត្រូវ​ហ្នឹងហើយ ត្រូវ​បាន​ហៅ​ទៅ​សាកសួរ វា​ជាការ​គម្រាមកំហែង​ទៅ​លើសិទ្ធិ​សេរីភាព​របស់​ពួកគាត់ នៅ​ក្នុងការ​បញ្ចេញមតិ​។ មិនគួរ​មាន​ចំណាត់ការ​បែប​ហ្នឹង​ទេ​! គួរតែមាន​ការពិនិត្យ​មើល​ទៅលើ​ការ​អនុវត្ដ​របស់​មន្ដ្រី​ទាំងអស់​ហ្នឹង វា​ជា​ការណ៍​ល្អ​ជាង»

លោក ស៊ឹង សែនករុណា បន្ថែម​ថា ទង្វើ​របស់​អាជ្ញាធរ​បែបនេះ​នឹង​ធ្វើ​ឱ្យ​ពលរដ្ឋ​មិន​ហ៊ាន​រិះគន់​សមត្ថកិច្ច​ដែល​ធ្វើ​ខុស​នៅ​ថ្ងៃក្រោយ«ខ្ញុំ​គិត​ថា ថ្ងៃក្រោយ នៅពេលដែល​សមត្ថកិច្ច​អស់ហ្នឹង​ធ្វើការ​បំពេញ​តួនាទី​របស់​ពួកគេ​ខុសច្បាប់ អ៊ីចឹង​ពួកគេ​មិន​ហ៊ាន​រិះគន់​តទៅ​ទៀត​ទេ អ៊ីចឹង​វា​ធ្វើ​ឱ្យ​មន្ដ្រី​ទាំងអស់​ហ្នឹង​បានដៃ ក្នុងការ​អនុវត្ដ​ទៅ​ដោយ​មិន​ទៅ​តាម​ច្បាប់​ជាដើម ហើយ​អ្នក​ដែល​រិះគន់​គឺ​មិន​ហ៊ាន​រិះគន់​ទេ។ អាជ្ញាធរ​ថ្នាក់​ជាតិ​គួរតែ​ពិនិត្យ​ទៅ​លើ​ការ​អនុវត្ដ​ទាំងអស់​ហ្នឹង ដើម្បី​ធ្វើ​យ៉ាងណា​ឱ្យ​មាន​ភាព​ល្អប្រសើរ​ឡើង ដើម្បី​កុំ​ឱ្យ​មាន​អំពើ​បែប​ហ្នឹង​កើត​ឡើង​តទៅ​ទៀត ហើយ​ផ្ទុយទៅវិញ​គួរតែ​មាន​ការលើក​ទឹក​ចិត្ដ​អ្នក​ដែល​ហ៊ាន​រិះគន់​ទាំងអស់​ហ្នឹង»

កាលពី​ថ្ងៃទី​២៨ ខែកក្កដា អាជ្ញាធរ​របប​ក្រុងភ្នំពេញ ក៏បាន​ហៅ​ពលរដ្ឋ​ម្នាក់​ទៅ​សាកសួរ និង​បញ្ជា​ឱ្យ​ចេញ​វីដេអូ​សុំទោស​ជា​សាធារណៈ ពាក់ព័ន្ធ​នឹង​វីដេអូ​រិះគន់​របស់​នាង ពី​ចំណាត់ការ​របស់​សមត្ថ​កិច្ច ក្នុង​បណ្ដាញ​សង្គម​តីកតុក (Titok)។

មាត្រា​៤១ នៃ​រដ្ឋធម្មនុញ្ញ​របស់​ព្រះរាជាណាចក្រ​កម្ពុជា​ចែងថា ប្រជាពលរដ្ឋ​ខ្មែរ​មាន​សេរីភាព ខាង​ការ​បញ្ចេញមតិ​របស់ខ្លួន សេរីភាព​ខាង​សារព័ត៌មាន សេរីភាព​ខាង​ការបោះពុម្ពផ្សាយ និង​សេរីភាព ខាង​ការជួបជុំ​។ ចំពោះ​សិទ្ធិ​ក្នុងការ​បញ្ចេញមតិ គឺ​ត្រូវ​បាន​ធានា​ក្រោម​សន្ធិសញ្ញា​អន្ដរជាតិ ស្ដីពី​សិទ្ធិមនុស្ស​ផង​ដែរ

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល