កូដករ​ណាហ្គាវើលដ៍​ដាក់​បណ្ដឹង​ទៅ​តុលាការ​កំពូល​ទោះ​មាន​ក្ដី​រំពឹង​តិចតួច

ដោយ ថា ថៃ
2023.10.21
កូដករ​ណាហ្គាវើលដ៍​ដាក់​បណ្ដឹង​ទៅ​តុលាការ​កំពូល​ទោះ​មាន​ក្ដី​រំពឹង​តិចតួច ប្រធានសហជីពឯករាជ្យនៅក្រុមហ៊ុនបនល្បែង ណាហ្គាវើលដ៍ (NagaWorld) កញ្ញា ឈឹម ស៊ីថរ។
រូប៖ ហ្វេសប៊ុកកញ្ញា ឈឹម ស៊ីថរ

ថ្នាក់ដឹកនាំ​សហជីព និង​ក្រុម​កូដករ​នៃ​ក្រុមហ៊ុន​ណាហ្គាវើលដ៍ (Naga World) លើកឡើង​ថា​ពួកគាត់ នឹង​បន្ត​ប្រើប្រាស់​សិទ្ធិ​តាមផ្លូវ​ច្បាប់​ក្នុង​ការ​បន្ត​ធ្វើ​កូដកម្ម និង​ដាក់​ពាក្យ​បណ្ដឹង​សាទុក្ខ​ទៅ​តុលាការ​កំពូល បន្ទាប់ពី​តុលាការ​ជាន់​ទាប សម្រេច​ឱ្យ​កញ្ញា ឈឹម ស៊ីថរ និង​កូដករ​មួយ​ចំនួន​ទៀត បន្ត​មានទោស​ទណ្ឌ។ មន្ត្រី​សង្គម​ស៊ីវិល​ថា តុលាការ​គួរ​ទម្លាក់​ការចោទប្រកាន់​លើ​ពួកគាត់ និង​ដោះលែង​លែង កញ្ញា ឈឹម ស៊ីថរ ឱ្យ​មាន​សេរីភាព​ឡើងវិញ។

បើ​ទោះបី​ជា​ថ្នាក់ដឹកនាំ​សហជីព និង​ក្រុម​កូដករ​នៃ​ក្រុមហ៊ុន​ណាហ្គាវើលដ៍ បាន​ដឹង​ជាមុន​ថា តុលាការ​ជាន់​ខ្ពស់ មិនអាច​ផ្ដល់​យុត្តិធម៌ និង​មិនអាច​សម្រេច​ក្តី​ខុសប្លែក​ពី​តុលាការ​ជាន់​ទាប​សម្រាប់​សំណុំរឿង​ដែល​មាន​ចរិត​នយោបាយ និង​រំលោភ​សិទ្ធិមនុស្ស​ក្តី ក៏​ពួកគាត់​គ្មាន​ជម្រើស​អ្វី ក្រៅពី​ការ​តស៊ូ​មតិ​តាម​ដងផ្លូវ​ដោយ​អហិង្សា និង​ការ​ប្ដឹង​តវ៉ា​តាម​ប្រព័ន្ធ​តុលាការ​ឡើយ។

ទីប្រឹក្សា​សហជីព​លោកស្រី ឃ្លាំង សុបិន្ត ថា ទោះ​សាលាឧទ្ធរណ៍​នៅ​រក្សា​បទចោទប្រកាន់​លើ​លោកស្រី និង​ថ្នាក់ដឹកនាំ​សហជីព ប៉ុន្តែ​ពួកគាត់​នឹង​បន្ត​ប្រើប្រាស់​សិទ្ធិ​ធ្វើ​កូដកម្ម និង​ដាក់​បណ្ដឹងតវ៉ា​ទៅ​តុលាការ​កំពូល រហូត​ទទួល​បាន​យុត្តិធម៌ និង​រហូត​ទទួល​បាន​ដំណោះស្រាយ​ការងារ។

លោកស្រី ឃ្លាំង សុបិន្ត៖ «នៅ​គេ​អ្នក​វាស​ឱ្យ​យើង​ដដែល​ទេ ប៉ុន្តែ​ចង់​និយាយ​ថា សម្រាប់​យុត្តិធម៌​មួយ វា​មិន​ងាយស្រួល​ក្នុង​ការ​ស្វែងរក​ទេ ព្រោះ​អី​អ្នក​ដែល​យក​យុត្តិធម៌​ហ្នឹង​ទៅ​លាក់​ទុក​ទៅ ក៏​គេ​មាន​កន្លែង​លាក់​របស់​គេ​ឆ្ងាយ អ៊ីចឹង​សម្រាប់​យើង​អ្នក​ដែល​រងគ្រោះ​ក៏​យើង​មិន​បោះបង់​ទេ​ទាមទារ​យុត្តិធម៌​របស់​យើង ពីព្រោះ​យើង​ចង់​បញ្ជាក់​ថា យើង​អត់​បាន​ធ្វើ​អ្វី​ខុស​ទេ យើង​មិន​ខ្លាច​នឹង​ការ​ដើរ​តាម​នីតិវិធី ព្រោះ​ទៅ​ដល់​ណា​ក៏​ទៅ​ដែរ»

កាលពី​ថ្ងៃទី​១៩ តុលា ប្រធាន​ក្រុមប្រឹក្សា​ជំនុំជម្រះ​សាលាឧទ្ធរណ៍​ភ្នំពេញ លោក យន់ ណារ៉ុង បាន​បើក​សវនាការ​ជំនុំជម្រះ​ពេញ​មួយថ្ងៃ​លើ​បណ្ដឹងឧទ្ធរណ៍​របស់​ថ្នាក់ដឹកនាំ និង​សកម្មជន​សហជីព​ក្រុមហ៊ុន​ណាហ្គា​វើលដ៍​៨​រូប រួមមាន​ទាំង​កញ្ញា ឈឹម ស៊ីថរ ដែល​ពួកគាត់ មិន​ពេញចិត្ត​ចំពោះ​សាលក្រម​របស់​សាលាដំបូង​រាជធានី​ភ្នំពេញ​។ ក្រុម​កូដករ​ប្រមាណ​២០​នាក់ ឈរ​នៅ​ខាងក្រៅ​របង​តុលាការ​ដើម្បី​លើកទឹកចិត្ត និង​លើក​បដា​បង្ហាញ​ពី​ភាព​អយុត្តិធម៌​ថា “​ពី​ជនរងគ្រោះ ក្លាយជា​អ្នកទោស​”​នៅក្នុង​វិវាទ​ការងារ​ជាមួយ​ក្រុមហ៊ុន​ណាហ្គាវើលដ៍ ។ ដោយឡែក តំណាង​ស្ថានទូត ប្រទេស​លោក​សេរី និង​តំណាង​អង្គការសិទ្ធិមនុស្ស​នានា ពួកគាត់ ក៏បាន​ចូលរួម​ឃ្លាំមើល​សវនាការ​នេះ​ដែរ។

នៅក្នុង​បន្ទប់​សវនាការ​នៃ​សាលាឧទ្ធរណ៍ ចៅក្រម និង​តំណាង​អយ្យការ បាន​ព្យាយាម​ចោទសួរ​ដាក់បន្ទុក និង​ហាក់​សន្និដ្ឋាន​ជាមុន​ថា កញ្ញា ឈឹម ស៊ីថរ និង​សកម្មជន​សហជីព​ទាំងនោះ មានទោស ដោយ​មិន​គិត​ទៅលើ​ភាព​រងគ្រោះ និង​សិទ្ធិ​សេរីភាព​របស់​ពួកគាត់​នោះ​ទេ។ ចៅក្រម និង​តំណាង​អយ្យការ បាន​ដេញដោល​សួរ​តែ​រឿង​សារ​សន្ទនា​ខ្លីៗ​ក្នុង​ទូរស័ព្ទ​ដៃ​របស់​ពួកគាត់ ក្នុ​ងពេល​រៀបចំ​ធ្វើ​កូដកម្ម​ដោយ​សន្តិវិធី​ទាមទារ​ដំណោះស្រាយ​ការងារ និង​រឿង​លុយ​ជំនួយ​ពី​សប្បុរសជន​ជាដើម​។ លើស​ពី​នេះ តំណាង​អយ្យការ លោក អ៊ឹម សុផាន បាន​ចោទប្រកាន់​កញ្ញា ឈឹម ស៊ីថរ ម្តង​ហើយ​ម្តង​ទៀត​ថា កញ្ញា​បាន​ញុះញង់​ឱ្យ​ក្រុម​កូដករ​ស្ត្រី​ចេញ​តវ៉ា ដើម្បី​ឱ្យ​អាជ្ញាធរ​ប្រើ​ហិង្សា​មក​លើ​ស្ត្រី ដើម្បី​បង្ហាញ​រូបភាព​អាក្រក់​ទាំងនេះ​ទៅ​អន្តរជាតិ​។ ប៉ុន្តែ​លោក​មិន​បាន​គិត​ទៅ​ទង្វើ​របស់​អាជ្ញាធរ​ដែល​ប្រើ​ហិង្សា​វាយដំ​ទាំង​កម្រោល​បណ្ដាល​ឱ្យ​ស្ត្រី​កូដករ​ម្នាក់​រលូត​កូន​ក្នុង​ផ្ទៃ ដោយសារតែ​ពួកគាត់​តវ៉ា​ដោយ​សន្តិវិធី​ដើម្បី​ស្វែងរក​ដំណោះស្រាយ​ឡើយ។

កញ្ញា ឈឹម ស៊ីថរ ដែល​មាន​ទឹកមុខ​ស្លេកស្លាំង​ឡើង ឈរ​ក្នុង​រង្វង់​ក្រចកសេះ បាន​ឆ្លើយ​ថា សារ​សន្ទនា​ខ្លីៗ​ក្នុង​ទូរស័ព្ទ​ដែល​សមត្ថកិច្ច​រឹបអូស​ក្នុង​អំឡុង​ពេល​ចាប់ខ្លួន​នោះ ត្រូវ​បាន​សមត្​កិច្ច​កាត់​ចេញ​ពី​ខ្លឹមសារ​ពេញ​ក្នុង​ន័យ​ដាក់បន្ទុក​មក​លើ​ក្រុម​សហជីព​ហើយ​។ កញ្ញា ឈឹម ស៊ីថរ បន្ត​ថា សារ​សន្ទនា​នោះ គឺ​ពួកគាត់ គ្រាន់តែ​ប្រជុំ ដើម្បី​ធានា​ថា គ្រប់​កូដកម្ម​គឺ​សន្តិវិធី​។ ចំពោះ​លុយ​ជំនួយ​វិញ កញ្ញា ឈឹម ស៊ីថរ និង​ជនជាប់ចោទ​ផ្សេងទៀត អះអាង​ថា ក្រុម​កម្មករ បាន​ទទួល​ពី​សប្បុរស​ជន និង​អង្គការ​អន្តរជាតិ​មួយចំនួន​ដូចជា​អង្គការ​សិទ្ធិ​ស្ត្រី និង​ការ​អង្គការ​ការពារ​សិទ្ធិ​កម្មករ​ជាដើម គឺ​ដើម្បី​ជួយ​ក្រុម​កូដ​ករ​ដែល​បាត់បង់​ការងារ​ធ្វើ​ក្នុងអំឡុងពេល​កូ​វីដ-១៩ និង​សម្រាប់​ទិញ ដូច​ជា​ការ​ផ្ដល់​នូវ​អង្ករ ទឹកដោះគោ​កូន និង​អាហារ​ប៉ុណ្ណោះ​។ ពួកគាត់​បន្ថែម​ទៀត​ថា សម្រាប់​ថវិកា​ធ្វើ​បាតុកម្ម ដូចជា​បដា ឬ​ឧបករណ៍​ផ្សេងៗ ទៀត គឺ​ពួកគាត់​ប្រាក់​រៃអង្គាស​ពី​សមាជិក​សហជីព។

បន្ថែម​ពី​នេះ មុន​ពេល​ប្រកាស​សាលដីកា កញ្ញា ឈឹម ស៊ីថរ មាន​សំណូមពរ​ថា​៖«​បើសិន​ពួកគាត់ គ្រាន់តែ​អនុវត្ត​សិទ្ធិ តែ​ប្រែក្លាយ​ជា​បទល្មើស​គឺជា​រឿង​អយុត្តិធម៌​បំផុត»

បន្ទាប់ពី​សវនាការ ប្រធាន​ក្រុមប្រឹក្សា​ជំនុំជម្រះ​សាលាឧទ្ធរណ៍​ភ្នំពេញ លោក យន់ ណារ៉ុង បាន​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ ដែល​បាន​ផ្ដន្ទាទោស កញ្ញា ឈឹម ស៊ីថរ ដាក់​ពន្ធនាគារ​រយៈពេល​២​ឆ្នាំដដែល​។ ចំណែក​លោកស្រី ឈឹម សុខន លោកស្រី សុន ស្រីពេជ្រ លោកស្រី ហៃ សុភាព លោកស្រី ឃ្លាំង សុបិន្ត និង​កញ្ញា ទូច សេរីមាស ត្រូវ​បាន​ផ្ដន្ទាទោស​ដាក់​ពន្ធនាគារ​រយៈពេល ១៨​ខែ ប៉ុន្តែ​តម្រូវ​ឱ្យ​ស្ថិត​ក្រោម​ការ​ត្រួតពិនិត្យ​របស់​តុលាការ​ដោយ​មិន​ឃុំខ្លួន​ក្នុង​ពន្ធនាគារ។ តុលាការ ក៏​សម្រេច​ផ្ដន្ទាទោស​ដាក់​ពន្ធនាគារ​រយៈពេល​មួយ​ឆ្នាំ​លើ​លោកស្រី រី សុវណ្ណឌី លោក សុខ ណារិទ្ធិ និង​លោក សុខ គង្គារ ប៉ុន្តែ​ទោស​ជាប់ពន្ធនាគារ​ត្រូវ​ព្យួរ។

ក្រោយ​ស្តាប់​ការប្រកាស​សាលដីកា កញ្ញា ឈឹម ស៊ីថរ ថ្លែង​ទាំង​ហួសចិត្ត​ថា កញ្ញា នៅតែ​មិនអាច​ទទួល​បាន​យុត្តិធម៌​ពី​ប្រព័ន្ធ​តុលាការ​។

អនុប្រធាន​សហជីព​ប្រចាំ​នៅ​ក្រុមហ៊ុន​ណាហ្គាវើលដ៍ គឺ កញ្ញា ឈឹម សុខន បាន​លើកឡើង​ថា​ការ​សម្រេច​នេះ គឺជា​រឿង​អយុត្តិធម៌ ហើយ​ទោះបី​ពួកគាត់​ទាំង ៧នាក់​នៅ​ក្រៅ​ឃុំ តែ​ពួកគាត់​ស្ថិត​ក្រោម​ការ​ត្រួតពិនិត្យ​របស់​តុលាការ​ប្រៀប​ដូច​នឹង​ជាប់គុក​ឥត​ជញ្ជាំង។

កញ្ញា ឈឹម សុខន៖ «មាន​អារម្មណ៍​សោកស្ដាយ និង​ខកចិត្ត​ណាស់​ដែល​ប្រព័ន្ធ​តុលាការ​ស្រុក​យើង គឺ​អត់​បាន​ផ្ដល់​ភាព​យុត្តិធម៌​ដល់​អ្នក​ដែល​ស្អាត​សំ ហើយ​ពួក​បង និយាយ​ទៅ​ពួក​បង​ធ្វើ​ការងារ​សហជីព​នេះ​គឺជា​ការងារ​សង្គម ហើយ​ជា​ការងារ​ដែល​ជួយ​ដល់​ប្រជាពលរដ្ឋ កម្មករ ដែល​គាត់​រងគ្រោះ​ដោយសារ​រំលោភសិទ្ធិ​ពី​ថៅកែ​អីហ្នឹង​ឯង យើង​ដូចជា​អត់​មាន​ការងារ​ណា​ដែល​មហន្តរាយ​ដល់​រដ្ឋាភិបាល នេះ​ដែល​ជួយ​ការងារ​សម្រាល​រដ្ឋាភិបាល​ផង»

សហ​មេធាវី​ការពារ​ក្ដី​ឱ្យ​ថ្នាក់ដឹកនាំ​សហជីព​ទាំងនេះ​គឺ លោក សំ ចំរើន ថា លោក​នឹង​ពិភាក្សា​ជាមួយ​កូនក្ដី និង​សហ​មេធាវី​ដទៃទៀត​ដើម្បី​ប្ដឹង​សាទុក្ខ​ទៅ​តុលាការ​កំពូល​ឆាប់ៗ។

ជុំវិញ​ករណីនេះ នាយក​ទទួលបន្ទុក​កិច្ចការ​ទូទៅ​នៃ​អង្គការ​ឃ្លាំមើល​សិទ្ធិមនុស្ស​លីកាដូ (LICADHO) លោក អំ សំអាត ដែល​បាន​ឃ្លាំមើល​សវនាការ​ថា ការ​សម្រេចសេចក្ដី​របស់​ចៅក្រម​គឺជា​ការ​បំបិទ​សិទ្ធ​លើ​ពលរដ្ឋ​ដែល​ទាមទារ​សិទ្ធិ​ការងារ ខណៈ​ដែល​សកម្មភាព​កន្លង​មក​របស់​សហជីព​បាន​ធ្វើ​កូដកម្ម​ដោយ​សន្តិវិធី​តាមច្បាប់។

លោក អំ សំអាត៖ «ការ​ផ្ដន្ទាទោស​នេះ គឺជា​ការ​រឹតត្បិត សេរីភាព​របស់​សហជីព​នៅក្នុង​ការ​ធ្វើ​កូដកម្ម​ដោយ​សន្តិវិធី​តាមច្បាប់​ការងារ ហើយ​ជា​ការ​រំលោភបំពាន​ទៅលើ​សិទ្ធិ​មូលដ្ឋាន​របស់​ប្រជាពលរដ្ឋ​ដែល​ធានា​ដោយ​រដ្ឋធម្មនុញ្ញ និង​បទដ្ឋាន​អន្តរជាតិ​ដែល​កម្ពុជា​បាន​ទទួល​ស្គាល់»

មួយថ្ងៃ​ក្រោយ​ការ​កាត់ទោស​ទៅលើ​ថ្នាក់ដឹកនាំ​សហជីព​ទាំងនេះ នាយករង​ប្រចាំ​តំបន់​អាស៊ី​នៃ​អង្គការ​ឃ្លាំមើល​សិទ្ធិមនុស្ស​អន្តរជាតិ យូមែន រ៉ៃត៍ វ៉ច្ឆ លោក ហ្វីល រ៉ូប៉ឺតសុន (Phil Robertson) លើកឡើង​ក្នុង​សេចក្ដីថ្លែងការណ៍​នៅ​រដ្ឋាភិបាល​កម្ពុជា​ប្រើ​ហេតុផល​នយោបាយ រំលោភសិទ្ធិ និង ធ្វើ​ទុក្ខបុកម្នេញ​លើ កញ្ញា ឈឹម ស៊ីថា និង​ថ្នាក់ដឹកនាំ​សហជីព​ផ្សេងទៀត ដោយ​បំពាន​លើ​អនុសញ្ញា​អង្គការ​អន្តរជាតិ​ខាង​ការងារ (ILO)

លោក ហ្វីល រ៉ូប៉ឺតសុន បន្ថែម​ថា ក្រោម​ការគាបសង្កត់​លើ​សិទ្ធិ​ការងារ ដៃគូ​ពាណិជ្ជកម្ម​កម្ពុជា​គួរតែ​ដាក់​លក្ខខណ្ឌ​ឱ្យ​មាន​ការគោរព​សិទ្ធិ​កម្មករ ដោយ​ចាប់ផ្ដើម​ពី​សហភាព​អឺរ៉ុប ដែល​គួរតែ​ដក​ប្រព័ន្ធ​អនុគ្រោះ​ពន្ធ (EBA) បន្ថែម​។ លោក ហ្វីល រ៉ូប៉ឺតសុន ថា សហរដ្ឋអាមេរិក អូស្ត្រាលី កាណាដា និង ប្រទេស​ផ្សេងទៀត​គួរតែ​ចូលរួម​ទាមទារ​ឱ្យ​រដ្ឋាភិបាល​កម្ពុជា​ថ្មី ទម្លាក់​ការចោទប្រកាន់​លើ កញ្ញា ស៊ីថរ និង​ថ្នាក់ដឹកនាំ​សហជីព​ផ្សេងទៀត និង​ដោះលែង​កញ្ញា ឈឹម ស៊ីថរ ជា​បន្ទាន់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។