ក្រុម​ប្រទេស​និយម​ប្រជាធិបតេយ្យ ជំរុញ​កម្ពុជា​​ឱ្យ​បើក​ចំហ​សិទ្ធិពលរដ្ឋ និង​នយោបាយ​នៅមុន​ការ​​បោះឆ្នោត​ខាងមុខ

ដោយ មាន ឫទ្ធិ
2021.10.17
Share on WhatsApp
Share on WhatsApp
ក្រុម​ប្រទេស​និយម​ប្រជាធិបតេយ្យ ជំរុញ​កម្ពុជា​​ឱ្យ​បើក​ចំហ​សិទ្ធិពលរដ្ឋ និង​នយោបាយ​នៅមុន​ការ​​បោះឆ្នោត​ខាងមុខ លោក វិទិត មុនតាប៊ន (Vitit Muntabhorn) ​អ្នករាយការណ៍​ពិសេស​ស្ដីពី​សិទ្ធិមនុស្ស​នៅ​កម្ពុជា ថ្លែង​​ក្នុង​កិច្ចពិភាក្សា​ប្រចាំ​ឆ្នាំ​ជា​លើក​ដំបូងតាម​អនឡាញ​ នៅ​ក្នុង​កិច្ចប្រជុំ​ក្រុមប្រឹក្សា​សិទ្ធិមនុស្ស​អង្គការ​សហប្រជាជាតិ កាល​ពី​ថ្ងៃ​ទី៦ ខែតុលា ឆ្នាំ២០២១។
រូប៖ ពី UN Web TV

ក្រុម​ប្រទេស​និយម​ប្រជាធិបតេយ្យ ចង់​ឃើញ​កម្ពុជា​បើក​ចំហ​សិទ្ធិពលរដ្ឋ និង​សិទ្ធិ​នយោបាយ​ឡើងវិញ​នៅមុន​ការបោះឆ្នោត​ឃុំ-សង្កាត់ និង​ការបោះឆ្នោត​ជាតិ​ខាងមុខនេះ។ ពួកគេ ជំរុញ​ឱ្យ​កម្ពុជា​​ធានា​ឱ្យ​បាន​នូវ​បរិយាកាស​បោះឆ្នោត​ប្រកប​ដោយ​យុត្តិធម៌ តម្លាភាព និង​មាន​ការចូលរួម​ពី​គ្រប់​ភាគី​ពាក់ព័ន្ធ។ ការ​ជំរុញ​នេះ ធ្វើឡើង​នៅ​ក្នុង​កិច្ចពិភាក្សា​អន្តរសកម្ម​ប្រចាំ​ឆ្នាំ​ជាមួយ​អ្នករាយការណ៍​ពិសេស​របស់​អង្គការ​សហប្រជាជាតិ នៅទីក្រុងហ្សឺណែវ (Geneva) ប្រទេស​ស្វីស (Switzerland) កាលពី​សប្ដាហ៍​មុន។

ប្រធាន​បទ​ថា តើ​សហគមន៍​អន្តរជាតិ គួរ​ធ្វើ​យ៉ាង​ណា ដើម្បី​ឱ្យ​កម្ពុជា​ធានា​ឱ្យ​បាន​នូវ​សិទ្ធិពលរដ្ឋ និង​សិទ្ធិ​នយោបាយ​នៅមុន​ការបោះឆ្នោត​ឃុំ-សង្កាត់ ឆ្នាំ២០២២ និង​ការបោះឆ្នោត​ជាតិ​ឆ្នាំ២០២៣ ខាងមុខ​នេះ បាន​ក្លាយ​ជា​រឿងរ៉ាវ​សំខាន់​មួយ​នៅ​ក្នុង​កិច្ចពិភាក្សា​ប្រចាំ​ឆ្នាំ​ជា​លើក​ដំបូង​ជាមួយ​អ្នករាយការណ៍​ពិសេស​ថ្មី លោក វិទិត មុនតាប៊ន (Vitit Muntabhorn) នៅ​ឯ​កិច្ចប្រជុំ​នៅ​ក្នុង​ក្រុមប្រឹក្សា​សិទ្ធិមនុស្ស​អង្គការ​សហប្រជាជាតិ។ ប្រធានបទ​នេះ​ត្រូវ​បាន​ក្រុម​ប្រទេស​និយម​ប្រជាធិបតេយ្យ ឬ​ប្រទេស​លោកសេរី​លើក​យក​មក​និយាយ​ព្រមៗ គ្នា មិន​ទុក​មុខ​ឱ្យ​កម្ពុជា​ឡើយ។ លើកលែង​តែ​ក្រុម​ប្រទេស​ដែល​មាន​និន្នាការ​ផ្ដាច់ការ ឬ​កុម្មុយនិស្ត​​នាំមុខ​ដោយ​ប្រទេស​ចិន (China) និង​រុស្ស៊ី (Russia) ជាដើម​ប៉ុណ្ណោះ ដែល​ធ្វើ​មិន​ដឹង​មិន​ឮ ហើយ​ថ្លែង​ចាំ​ជួយ​កម្ពុជា បើ​ទោះ​បី​ជា​នៅ​ក្នុង​ប្រទេស​របស់​ពួកគេ​ខ្លួនឯង​គ្មាន​ការ​គោរព​សិទ្ធិមនុស្ស​យ៉ាងណា​ក៏​ដោយ​នោះ។

នៅ​ឯ​កិច្ចប្រជុំ​លើកទី៣៧ នៃ​សម័យ​ប្រជុំ​ទូទៅ​លើកទី៤៨ របស់​ក្រុមប្រឹក្សា​សិទ្ធិមនុស្ស​អង្គការ​សហប្រជាជាតិ កាលពី​ថ្ងៃទី៦ តុលា នៅ​ទីក្រុង​ហ្សឺណែវ ប្រទេស​ស្វីស បញ្ហា​រំលោភបំពាន​សិទ្ធិមនុស្ស​នៅ​កម្ពុជា​ត្រូវ​បាន​សហគមន៍​អន្តរជាតិ​លើក​យក​មក​ពិភាក្សា និង​ព្យាយាម​រិះរក​មធ្យោបាយ​ដោះ​ស្រាយ ដោយ​មាន​ការ​ចូលរួម​ផ្ទាល់​ពី​តំណាង​កម្ពុជា និង​ការចូលរួម​តាម​ប្រព័ន្ធ​អនឡាញ​ពី​អ្នករាយការណ៍​ពិសេស​ទទួលបន្ទុក​សិទ្ធិមនុស្ស​នៅ​កម្ពុជា ព្រមទាំង​តំណាង​ប្រទេស​ពាក់ព័ន្ធ និង​អង្គការ​សង្គម​ស៊ីវិល​អន្តរជាតិ​ដែល​ធ្វើការ​ពាក់ព័ន្ធ​វិស័យ​សិទ្ធិមនុស្ស​ផ្សេងៗ ទៀត។

សហភាព​អឺរ៉ុប ដែល​បាន​សម្រេច​ដកហូត​ប្រព័ន្ធ​អនុគ្រោះ​ពន្ធ EBA ២០% ពី​កម្ពុជា​កាលពីឆ្នាំ២០២០ ដោយសារ​តែ​កំណត់ត្រា​អាក្រក់​នៃ​ការរំលោភ​សិទ្ធិមនុស្ស​នេះ នៅតែ​ថ្លែង​កត់សម្គាល់​ដោយ​ក្តី​ព្រួយ​បារម្ភ​ចំពោះ​ស្ថានភាព​ធ្លាក់​ចុះ​ដុនដាប​នៃ​បញ្ហា​សិទ្ធិមនុស្ស​នៅ​កម្ពុជា។ ទន្ទឹម​នឹង​នេះ តំណាង​សហភាព​អឺរ៉ុប ក៏បាន​លើកឡើង​ពី​ការ​រួម​តូច​នៃ​លំហ​ប្រជាធិបតេយ្យ និង​សង្គម​ស៊ីវិល ការ​បង្ក្រាប​មក​លើ​គណបក្ស​ប្រឆាំង ការ​បង្កើន​ការឈ្លបយកការណ៍​តាម​អនឡាញ កង្វះ​ប្រព័ន្ធ​ផ្សព្វផ្សាយ​ឯករាជ្យ និង​ការ​រឹតត្បិត​មក​លើ​សេរីភាព​នៃ​ការ​បញ្ចេញ​មតិ សេរីភាព​នៃ​ការ​ជួបជុំ និង​ការ​ប្រមូល​ផ្តុំ​ដោយ​សន្តិវិធី។ តំណាង​សហភាព​អឺរ៉ុប ជំរុញ​ឱ្យ​កម្ពុជា​ធានា​ឱ្យ​បាន​នូវ​ការបោះឆ្នោត​ប្រកបដោយ​យុត្តិធម៌​នាពេល​ខាង​មុខ៖ «ការបោះឆ្នោត​ឆ្នាំ២០២២ និង​ឆ្នាំ២០២៣​ខាងមុខ នៅ​កម្ពុជា គឺជា​មូលដ្ឋានគ្រឹះ​នៃ​ការពង្រឹង​លទ្ធិប្រជាធិបតេយ្យ។ ដូច្នេះ​ហើយ យើង​លើកទឹកចិត្ត​ឱ្យ​កម្ពុជា​ត្រូវ​ធានា​ឱ្យ​បាន​នូវ​ការបោះឆ្នោត​ប្រកប​ដោយ​យុត្តិធម៌ មាន​ការចូលរួម​ពី​គ្រប់​ភាគី និង​ប្រកប​ដោយ​តម្លាភាព ដោយ​គោរព​ឱ្យ​បាន​យ៉ាង​ខ្ជាប់​ខ្ជួន​នូវ​ការ​ការពារ​សិទ្ធិពលរដ្ឋ និង​សិទ្ធិ​នយោបាយ​ទាំងស្រុង។ ជា​ការសំខាន់​មែនទែន​ដែល​រដ្ឋាភិបាល​ត្រូវ​អនុញ្ញាត​ឱ្យ​មាន​ប្រព័ន្ធ​ផ្សព្វផ្សាយ​និង​អ្នកសារព័ត៌មាន​ឯករាជ្យ ក្រុម​អ្នក​ការពារ​សិទ្ធិមនុស្ស សហជីព​ឯករាជ្យ គណបក្ស​ប្រឆាំង សង្គម​ស៊ីវិល និង​តួអង្គ​សង្គម​ស៊ីវិល​ដទៃ​ទៀត ក្នុង​ការ​អនុវត្ត​នូវ​សិទ្ធិ​របស់​ពួកគេ​ដោយ​គ្មាន​ការភ័យខ្លាច គ្មាន​ការ​បំភិតបំភ័យ គ្មាន​ការ​យាយី គ្មាន​ការ​ឃុំខ្លួន​តាម​ទំនើងចិត្ត ឬ​ការសងសឹក​ណា​មួយ​ឡើយ»

EU_in_UN_48th_Session_on_Human_Rights_100621.jpg
តំណាង​សហភាព​អឺរ៉ុប ថ្លែង​តាម​អនឡាញ ក្នុង​កិច្ច​ប្រជុំក្រុមប្រឹក្សា​សិទ្ធិមនុស្ស​អង្គការ​សហប្រជាជាតិ កាល​ពី​ថ្ងៃ​ទី៦ ខែតុលា ឆ្នាំ២០២១ ស្ដីពី​បញ្ហាសិទ្ធិមនុស្ស​នៅ​កម្ពុជា។ រូប៖ ពី UN Web TV

ដូច​គ្នា​នេះ​ដែរ ចក្រភព​អង់គ្លេស​ដែល​ទើប​ចាកចេញ​ពី​សហភាព​អឺរ៉ុប​នោះ ក៏​បាន​លើកឡើង​ពី​កង្វល់​យ៉ាង​ជ្រាលជ្រៅ​របស់​ខ្លួន​​ចំពោះ​ការ​ដើរ​ថយក្រោយ​នៃ​លំហ​ប្រជាធិបតេយ្យ សិទ្ធិពលរដ្ឋ សិទ្ធិ​នយោបាយ និង​សេរីភាព​នៅ​កម្ពុជា​នេះ​ដែរ ស្រប​ពេល​ដែល​កម្ពុជា​កំពុង​ធ្វើដំណើរ​ឆ្ពោះ​ទៅ​រក​ការបោះឆ្នោត​នា​ពេល​ខាងមុខ។ អង់គ្លេស ជំរុញ​ឱ្យ​រដ្ឋាភិបាល​បើក​ឱ្យ​មាន​នូវ​កិច្ច​សន្ទនា​ជាមួយ​សង្គម​ស៊ីវិល គណបក្ស​ប្រឆាំង និង​ក្រុម​អ្នក​គាំទ្រ​របស់​ពួកគេ​ឡើងវិញ។

ដោយឡែក សហរដ្ឋអាមេរិក​ឯ​ណោះ​វិញ ដែល​បច្ចុប្បន្ន​សមាជិក​សភា និង​ព្រឹទ្ធសភា​របស់​ខ្លួន​កំពុង​ប្រឹងប្រែង​ជំរុញ​ឱ្យ​មាន​ការ​អនុម័ត​សេចក្ដី​ស្នើ​ច្បាប់​ដាក់ទណ្ឌកម្ម​ក្រុម​មេដឹកនាំ​នៅ​កម្ពុជា​ដោយសារ​ការបំផ្លាញ​ប្រជាធិបតេយ្យ និង​សិទ្ធិមនុស្ស​ចាប់​តាំង​ពី​ឆ្នាំ២០១៧ រហូត​មក​ទល់​បច្ចុប្បន្ន​នេះ បាន​ចែករំលែក​នូវ​កង្វល់​របស់​ខ្លួន​ជាមួយ​នឹង​អ្នករាយការណ៍​ពិសេស លោក វិទិត មុនតាប៊ន ជុំវិញ​ការ​រអិល​ធ្លាក់​ថយក្រោយ​នៃ​លទ្ធិប្រជាធិបតេយ្យ និង​ការ​រួម​តូច​នៃ​លំហ​សង្គម​ស៊ីវិល​នៅ​កម្ពុជា៖ «យើង​ខ្វល់ខ្វាយ​ជាពិសេស​ចំពោះ​ការ​បន្ត​ផ្ដន្ទាទោស​លោក កឹម សុខា ដំណើរការ​សវនាការ​កាត់​ក្ដី​មនុស្ស​ទាំងហ្វូង និង​ការ​កាត់​ទោស​សមាជិក​ដទៃ​ទៀត​មកពី​គណបក្សប្រឆាំង​ធំ​ជាង​គេ ព្រមទាំង​ការ​បន្ត​ការ​រឹតត្បិត​ចំពោះ​សកម្មភាព​ចូលរួម​ផ្នែក​នយោបាយ​នៅមុន​ការបោះឆ្នោត​ឃុំ-សង្កាត់​ឆ្នាំ២០២២។ យើង​ជំរុញ​ឱ្យ​អាជ្ញាធរ​កម្ពុជា​បញ្ឈប់​ការ​ដាក់​គោលដៅ​កម្ចាត់​ក្រុម​មេ​ដឹក​នាំ​គណបក្ស​នយោបាយ​ប្រឆាំង។ កម្ពុជា​ក៏​គួរ​តែ​កែប្រែ​ច្បាប់​ស្ដីពី​គណបក្ស​នយោបាយ និង​បង្កើត​ឱ្យ​មាន​នូវ​ការកែទម្រង់​ដទៃ​ទៀត​ពាក់ព័ន្ធ​នឹង​ការបោះឆ្នោត ដើម្បី​ផ្តល់​ឱកាស​ឱ្យ​គ្រប់​គណបក្ស​នយោបាយ​ទាំងអស់​អាច​ចូលរួម​ក្នុង​ឆាក​នយោបាយ​បាន​ដោយ​ស្មើភាព​គ្នា ស្របតាម​កិច្ចព្រមព្រៀង​សន្តិភាព​ក្រុង​ប៉ារីស និង​រដ្ឋធម្មនុញ្ញ»

មិន​ខុស​ពី​សហរដ្ឋអាមេរិក ការ​ជំរុញ​ឱ្យ​កម្ពុជា​ធានា​ឱ្យ​បាន​នូវ​សិទ្ធិពលរដ្ឋ សិទ្ធិ​នយោបាយ និង​បរិយាកាស​បោះឆ្នោត​ដោយ​សេរី​យុត្តិធម៌​នេះ ក៏​ត្រូវ​ប្រទេស​លោកសេរី​មួយទៀត គឺ​អូស្ត្រាលី លើក​យក​មក​និយាយ​ផង​ដែរ។ អូស្ត្រាលី​ថា ខ្លួន​​នៅតែ​មាន​កង្វល់​យ៉ាង​ខ្លាំង​ចំពោះ​ការ​រឹតត្បិត​សិទ្ធិពលរដ្ឋ និង​សិទ្ធិ​នយោបាយ ការកាត់បន្ថយ​សេរីភាព​សារព័ត៌មាន និង​ការ​ចាប់​ខ្លួន​សកម្មជន​បរិស្ថាន មន្ត្រី​គណបក្ស​ប្រឆាំង និង​សង្គម​ស៊ីវិល។ អូស្ត្រាលី​បារម្ភ​អំពី​បទចោទប្រកាន់​នានា​​ប្រឆាំង​នឹង​បុគ្គល​មួយចំនួន​ដោយសារតែ​ទំនាក់ទំនង​ផ្នែក​នយោបាយ​របស់​ពួក​គេ ការងារ​សិទ្ធិមនុស្ស ឬ​ការ​សម្ដែង​មតិ​ជា​សាធារណៈ រួម​ទាំង​ការ​សម្តែង​មតិ​នៅ​លើ​អនឡាញ និង​នៅ​ក្រៅ​ប្រទេស​កម្ពុជា​ផង៖ «យើង​អំពាវនាវ​ឱ្យ​កម្ពុជា​គោរព និង​ការពារ​សិទ្ធិ​របស់​បុគ្គល​គ្រប់​រូប​ពាក់ព័ន្ធ​នឹង​សេរីភាព​នៃ​ការ​បញ្ចេញមតិ ការ​ជួបជុំ និង​ការ​ប្រមូលផ្តុំ។ យើង​អំពាវនាវ​ឱ្យ​កម្ពុជា​ពន្លឿន​ការ​ដោះ​ស្រាយ​ករណី​សំណុំរឿង​លោក កឹម សុខា ប្រកបដោយ​តម្លាភាព និង​ស្របតាម​នីតិវិធី​នៃ​ការ​ទទួល​បាន​យុត្តិធម៌​ត្រឹមត្រូវ។ អូស្ត្រាលី ចង់បាន​ការយល់ឃើញ​របស់​អ្នករាយការណ៍​ពិសេស​ជុំវិញ​វិធីសាស្ត្រ​ដែល​ក្រុមប្រឹក្សា​សិទ្ធិមនុស្ស​អង្គការសហប្រជាជាតិ​អាច​លើកទឹកចិត្ត​កម្ពុជា​ឱ្យ​បញ្ឈប់​ការ​រឹតត្បិត​មក​លើ​សេរីភាព​នៃ​ការ​បញ្ចេញ​មតិ កសាង​ឡើងវិញ​នូវ​ទំនាក់ទំនង​ប្រកបដោយ​អត្ថន័យ​ជាមួយ​អង្គការ​សង្គម​ស៊ីវិល ហើយ​ធានា​ឱ្យ​បាន​នូវ​បរិយាកាស​បើកចំហ​នៅ​មុន​ការបោះឆ្នោត​ខាងមុខនេះ»

ឆ្លើយតប​នឹង​កង្វល់ និង​ការ​ជំរុញ​របស់​ក្រុម​ប្រទេស​និយម​ប្រជាធិបតេយ្យ​ទាំងនេះ តំណាង​ភាគី​រដ្ឋាភិបាល​កម្ពុជា លោក អាន សុខឃឿន មិនបាន​បង្ហាញ​ឥរិយាបថ​ព្យាយាម​កាត់​គេ​កាត់​ឯង ឬ​ប៉ុនប៉ង​មិន​ឱ្យ​គេ​និយាយ ដូចដែល​លោក​ធ្លាប់​បាន​ធ្វើ​កាល​ពី​ឆ្នាំ​កន្លងទៅ​ប្រឆាំង​នឹង​ព្រះតេជព្រះគុណ លួន សុវ៉ាត នោះ​ទេ។ ឥរិយាបថ​របស់​តំណាង​កម្ពុជា​កាលណោះ ត្រូវ​ក្រុម​អ្នក​វិភាគ​មើល​ឃើញ​ថា រឹតតែ​ធ្វើ​ឱ្យ​កម្ពុជា​រង​នូវ​ភាព​អាម៉ាស់ និង​បាក់​មុខ​មាត់​ខ្លាំង​នៅ​លើ​ឆាក​អន្តរជាតិ ដោយសារ​លោក​បាន​នាំចេញ​នូវ​វប្បធម៌​ផ្ដាច់ការ​នៅ​ចំពោះ​មុខ​អន្តរជាតិ។ ក៏ប៉ុន្តែ អ្វី​ដែល​នៅតែ​ដដែល​នោះ គឺ​តំណាង​កម្ពុជា​រូប​នេះ​នៅតែ​សូត្រ​មេរៀន​បដិសេធ និង​ការពារ​ថា​មិន​មាន​ការ​រឹតត្បិត​លំហ​សិទ្ធិពលរដ្ឋ សិទ្ធិ​នយោបាយ និង​សេរីភាព​សង្គម​ស៊ីវិល​នោះ​ទេ។ តំណាង​កម្ពុជា​ចោទ​អ្នករាយការណ៍​ពិសេស និង​ក្រុម​ប្រទេស​លោក​ខាង​លិច ថា បាន «បិទ​ភ្នែក​ធ្វើ​មិន​ឃើញ» ខណៈ​អតីត​អ្នកនយោបាយ​បក្ស​ប្រឆាំង​ចំនួន ២៦រូប បាន​ទទួល​សិទ្ធិ​ធ្វើនយោបាយ​ឡើងវិញ ហើយ​ក្នុង​ចំណោម​នោះ អ្នក​ទាំង​នោះ​ខ្លះ​បាន​បង្កើត​គណបក្ស​នយោបាយ​ថ្មីចំនួន ៦ ដើម្បី​ចូលរួម​ប្រកួតប្រជែង​ការបោះឆ្នោត​ខាងមុខ។ លោក អាន សុខឃឿន អះអាង​ថា លំហ​នយោបាយ «បើកទូលាយ» នេះ បែរជា​ត្រូវ​រារាំង​ដោយ​មេដឹកនាំ​បក្ស​ប្រឆាំង​ដែល​លោក​ថា បាន​ចាត់​ទុក​រាល់​សមាជិក​ទាំងឡាយ​ដែល​ស្នើសុំ​សិទ្ធិ​ធ្វើ​នយោបាយ​ឡើង​វិញ​នោះ​ថា​ជា «ជន​ក្បត់» «អាយ៉ង»

យ៉ាងណាក៏ដោយ ផ្ទុយពី​ការ​បកស្រាយ​របស់​តំណាង​កម្ពុជា​នេះ អ្នករាយការណ៍​ពិសេស លោក វិទិត មុនតាប៊ន នៅតែ​រក្សា​ការ​ជំហរ​របស់​លោក​ជុំវិញ​ការ​រក​ឃើញ​អំពី​ស្ថានភាព​ពិតប្រាកដ​នៃ​ការរំលោភ​សិទ្ធិមនុស្ស​នៅ​កម្ពុជា។ លោក​ផ្តល់​អនុសាសន៍​ឱ្យ​កម្ពុជា​ស្តា​សិទ្ធិ​នយោបាយ​ឡើងវិញ និង​ធានា​នូវ​បរិយាកាស​បោះឆ្នោត​ប្រកប​ដោយ​ឯករាជ្យ​នា​ពេល​ខាងមុខ៖ «សូម​មេត្តា​បញ្ឈប់​ចោល​ទៅ​ច្បាប់​ដែល​មាន​លក្ខណៈ​ជា​ការ​រឹតត្បិត​ធ្ងន់ធ្ងរ​នោះ។ សូម​ទម្លាក់​ចោល​សំណុំរឿង​តុលាការ​ប្រឆាំង​នឹង​គណបក្ស​ជំទាស់។ សូម​​ស្តា​សិទ្ធិ​នយោបាយ​ឡើងវិញ។ សូម​ធ្វើ​កំណែទម្រង់​ច្បាប់​ស្ដីពី​គណបក្ស​នយោបាយ និង​ធានា​ឱ្យ​បាន​នូវ​គណៈកម្មាធិការ​ជាតិ​រៀបចំ​ការបោះឆ្នោត​មួយ​ប្រកបដោយ​ឯករាជ្យ។ មកទល់​ពេលនេះ យើង​មិន​ប្រាកដ​ទេ​ថា តើ គ..ប នេះ​ឯករាជ្យ​ប៉ុណ្ណា ហើយ​ថា តើ​ស្ថាប័ន​នេះ​មាន​តម្លាភាព​ចំពោះ​ការបោះឆ្នោត​ឃុំ-សង្កាត់ និង​ការបោះឆ្នោត​ជាតិ​នា​ពេល​ខាងមុខនេះ​ដែរ​ឬ​ទេ»

នៅ​ក្នុង​របាយការណ៍​ប្រចាំ​ឆ្នាំ​ដែល​លោក​បាន​ដាក់​ជូន​ក្រុមប្រឹក្សា​សិទ្ធិមនុស្ស​អង្គការ​សហប្រជាជាតិ លោក វិទិត មុនតាប៊ន ចង់​ឃើញ​រដ្ឋាភិបាល​ធ្វើ​យ៉ាង​ណា​​បើក​​លំហ​​ដើម្បី​ឱ្យ​មាន​កិច្ច​សន្ទនា ការ​ផ្សះផ្សា​ជាតិ និង​ការ​ស្តា​ស្ថាប័ន​ជាតិ​ឡើង​វិញ។ លោក​ព្រមាន​ថា សុខ​សន្តិភាព សិទ្ធិមនុស្ស លទ្ធិប្រជាធិបតេយ្យ និង​ការអភិវឌ្ឍន៍​ប្រកប​ដោយ​ចិរភាព មិន​អាច​សម្រេច​ទៅ​បាន​នៅ​កម្ពុជា​នោះ​ទេ លុះ​ត្រា​ណា​តែ​អំណាច​ត្រូវ​បាន​ចែករំលែក​ក្នុងចំណោម​គ្រប់​ភាគី​ពាក់ព័ន្ធ​ដែល​មាន​ភាព​ចម្រុះ ដើម្បី​ឱ្យ​ពួកគេ​ម្នាក់ៗ ទទួល​បាន​អារម្មណ៍​ថា ​ពួកគេ​គឺ​ជា​ម្ចាស់​កំណត់​ជោគវាសនា​របស់​ប្រទេសជាតិ​ទាំង​អស់​គ្នា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។