មេធាវី​ការពារ​ក្តី ​ទាមទារ​ឲ្យ​តុលាការ​​ដោះលែង​​យុវជន​​ខ្មែរថាវរៈ ​និង​​យុវជន​​សង្គម​ផ្សេង​ទៀត ​ដោយសារ​​ឃុំខ្លួន​​រងចាំ​សវនាការ​​លើស​​កំណត់​​នៃ​ច្បាប់​

ដោយ មាន ឫទ្ធិ
2021-05-17
Share
មេធាវី​ការពារ​ក្តី ​ទាមទារ​ឲ្យ​តុលាការ​​ដោះលែង​​យុវជន​​ខ្មែរថាវរៈ ​និង​​យុវជន​​សង្គម​ផ្សេង​ទៀត ​ដោយសារ​​ឃុំខ្លួន​​រងចាំ​សវនាការ​​លើស​​កំណត់​​នៃ​ច្បាប់​ ពីឆ្វេង ១) លោក មាន ព្រហ្មមុនី អនុប្រធាន​សមាគម​សម្ពន្ធ​និស្សិត​បញ្ញវន្ត​ខ្មែរ និង​ជា​សមាជិក​ក្រុម​ការងារ ២) លោក ហ៊ុន វណ្ណៈ ៣) លោក ថុន រដ្ឋា ៤) ព្រះតេជព្រះគុណ កើត សារ៉ាយ ៥) នាង ឈឿន ដារ៉ាវី ៦) កញ្ញា ឡុង គន្ធា ៧) កញ្ញា សូ មេត្តា ៨) កញ្ញា ភួង កែវ ជា​សមាជិក​ខ្មែរ​ថាវរៈ។
រូប៖ ហ្វេសប៊ុក

ប្រសិន​បើ​​គ្មាន​អ្វីប្រែប្រួលទេ ​ចៅក្រមជំនុំជម្រះ​សាលាដំបូង​​រាជធានី​ភ្នំពេញ​​លោកទិត សុទ្ធីបូរ៉ាឆាត ​​នឹង​បើក​សវនាការ​លើបណ្តឹង​​សុំនៅ​ក្រៅឃុំ​​បណ្តោះ​​អាសន្ន​​របស់​​មេធាវី​ការ​ពារ​ក្តី​ឲ្យ​យុវ​ជន​ខ្មែរ​ថាវរៈ ​និង​យុវជន​​សមាគម​សម្ព័ន្ធ​​និស្សិត​​បញ្ញវ័ន្តខ្មែរ​​ចំនួន​ ​៧ រូប​ នៅ​ព្រឹកថ្ងៃទី​១៨ ​ខែឧសភា។

មេធាវី​​ការពារ​ក្តីឲ្យ​​ក្រុម​យុវជន​​សង្គម​ទាំង ៧ រូប គឺលោក​ សំ ចំរើន ​ថ្លែងថា ​ការ​ដាក់​​បណ្តឹង​​ស្នើសុំឲ្យ​ចៅក្រម​ជំនុំ​ជម្រះ​សម្រេច​​ដោះលែង​​កូនក្តី​របស់​លោក​​នៅ​ក្រៅ​ឃុំ​​បណ្តោះ​​អា​ស​ន្ននេះ​ ​ព្រោះ​តុលាការ ​​បាន​ឃុំ​ខ្លួន​​កូនក្តី​របស់​លោក​ទាំង ៧ រូប ​លើស​ពេល​កំណត់​នៃ​ច្បាប់​​ដោយ​​មិន​​បើក​​សវនាការ​ជំនុំជម្រះ​លើ​អង្គសេចក្តី​​ និង​គ្មាន​​សំអាង​​​ហេតុ​​ត្រឹមត្រូវ។ លោកបញ្ជាក់ថា ​តាមនីតិវិធីច្បាប់ ​គឺតុលាការ​មិនអាច​បន្តឃុំខ្លួន​ពួក​គាត់​លើស​ពី ៤ ខែ​ ដោយ​មិន​កាត់​ទោស​​នោះ​ទេ​ ព្រោះ​ខុស​ទៅ​​នឹង​​ការ​​កំណត់នៃ​ច្បាប់​ និង​បំពាន​សិទ្ធិ​កូន​ក្តី​របស់​​លោក។ មេធាវីរូបនេះ ​​រំពឹង​ថា ​ចៅក្រម​ជំនុំ​ជម្រះសាលា​ដំបូង​​ នឹង​​អនុញ្ញាត​​ឲ្យ​កូនក្តី​​របស់​លោក​​នៅ​ក្រៅ​​ឃុំ​​បណ្តោះ​​អាសន្ន៖ «ជាទូទៅគ្រប់រឿង គឺតុលាការ​ឃុំខ្លួន​រងការ​ជំនុំជម្រះ​រយៈពេលតែ​ ៤ ខែទេ ​ជារឿង​ធម្មតា​ទូទៅ។ មិនមាន​វិធានណាមួយ​អនុញ្ញាត​ឲ្យពន្យា​ពេលទេ នៅ​ដំណាក់​កាល​ចៅក្រមជំនុំជម្រះ​ តែបើឃុំ​បណ្តោះអាសន្ន​នៅដំណាក់កាល​ចៅក្រមស៊ើប ​អាហ្នឹង​អាចព​ន្យាពេល។ តែឃុំរងចាំ​សវនាការ​អត់មាន​នីតិវិធី​ណាមួយ​អនុញ្ញាត​ឲ្យ​ពន្យាពេលទេ។ កាលណា​មិនមាន​បញ្ញត្តិច្បាប់ ​គឺប៉ះពាល់​ដល់សិទ្ធិ​ហើយ»។ 

គិតមក​ទល់ពេលនេះ​ តុលាការក្រុងភ្នំពេញ ​បានឃុំខ្លួន​ក្រុមយុវ​ជន​ខ្មែរ​ថាវរៈ ​និង​​យុវជន​​សមាគម​សម្ព័ន្ធ​និស្សិត​​បញ្ញវ័ន្តខ្មែរ​ចំនួន​ ៧ រូប​ នៅក្នុង​ពន្ធនាគារ​ព្រៃស​រយៈពេល​ជាង ៨​ ខែមកហើយ ​ប៉ុន្តែ​មិនបាន​លើកយក​សំណុំរឿង​របស់ពួកគាត់ ​មកធ្វើ​ការ​ជំនុំ​ជម្រះ​រកខុស​ត្រូវ​នោះទេ​។ លោកមេធាវី​ សំ ចំរើន​ ឲ្យដឹងថា ​តុលាការ ក៏​មិនដែល​ចេញ​ដីកា​សំអាង​ហេតុ​​ពន្យល់​អំពី​ការ​ពន្យាពេល​បើកសវនា​លើអង្គសេចក្តី​នេះទេ។ យុវជន​សង្គម​ទាំង ៧ រូប​ ដែល​កំពុងជាប់​ឃុំ​នោះ​រួមមាន​ព្រះ​ភិក្ខុ កើត សារ៉ាយ លោក មាន ព្រហ្មមុនី​ កញ្ញា អេង ម៉ាឡៃ លោក ថា ឡាវី លោក មួង សុភ័ក្ត្រ លោក ហ៊ុន វណ្ណៈ និង​លោកស្រី ឈឿន ដារ៉ាវី។

ប្អូនស្រី​របស់​កញ្ញា​ អេង ម៉ាឡៃ​ គឺកញ្ញា​ អេង វណ្ឌី ​និយាយថា ​នាងមិន​បានជួបសួរ​សុខ​ទុក្ខបងស្រី ​សូម្បី​តាមទូរស័ព្ទ ​ចាប់តាំង​ពីផ្ទុះជំងឺកូវីដ​ក្នុងសហគមន៍​ជាលើក​ទី​ ៣​ មក ​ដូច្នេះ​នាង​សង្ឃឹមថា ​តុលាការនឹងបញ្ចូន​បងស្រី​និង​សកម្មជនផ្សេងទៀត​ ចូលរួមសវនាការ​នៅថ្ងៃទី១៨​ ខែឧសភានេះ។ កញ្ញា​ អេង វណ្ឌី ​បន្តទទូចឲ្យតុលាការ​ដោះ​លែង​​ពួកគាត់​ទាំង ៧ នាក់ឲ្យ​មានសេរីភាព​ឡើងវិញ៖ «ខ្ញុំសង្ឃឹមថា​ តុលាការ​នឹងទម្លាក់​ចោលការ​ចោទប្រកាន់ ទាំងអស់គ្នា ​ព្រោះពួកគាត់​អត់មាន​ទោសកំហុសអីទេ​ គាត់ធ្វើទៅ​តាមផ្លូវច្បាប់»

អាស៊ីសេរី ​មិនអាចទាក់ទង​អ្នកនាំពាក្យ​តំណាងអយ្យការ​អមសាលាដំបូង​រាជធាភ្នំពេញលោក ប្លង់ សុផល ​បានទេ ​ដោយទូរស័ព្ទ​ចូល​ពុំមានអ្នកទទួល។

រីឯប្រធាន​ផ្នែក​សិទ្ធិមនុស្ស​នៃ​សមាគម​ការពារ​សិទ្ធិមនុស្សអាដហុក (Adhoc) លោក នី សុខា វិញ ​មានប្រសាសន៍ថា ​តាមគោលការណ៍ច្បាប់ ​និង​គោលការណ៍ សិទ្ធិមនុស្ស​ គឺតុលាការ ​មិនអាចឃុំខ្លួន​នរណាម្នាក់​ ហើយ​យឺតយ៉ាវ​ក្នុងការបើ​ក​សវនា​ការ​រក​ខុស​រកត្រូវ​នោះទេ។ លោក​បន្តថា ​ទោះបីជាពេល​នេះ ​ស្ថិតក្នុងស្ថាន​ភាព​រាត​ត្បាត​ជំងឺកូ​វីដ-១៩ ក្តី​ ក៏តុលាការ ​ត្រូវតែរូតរះ​បើក​សវនាការ​ជំនុំជម្រះ​លើអង្គសេចក្តីឲ្យ​បានលឿន ​ដើម្បី​ឲ្យស្របតាមនីតិវិធីច្បាប់​ និងកុំឲ្យប៉ះ​ ពាល់​ដល់​សិទ្ធិ​ជនជាប់​ចោទ​៖ «យើងតែង​ទទូចជារឿយៗ ​យើងស្នើសុំឲ្យ​តុលការពិចារណា​ដោះលែង​ពួកគាត់​ឲ្យមានសេរីភាព ​ដោយសារតែ​យើងដឹងថា​ តាមសកម្មភាពដែល​ពួកគាត់​ធ្វើកន្លងមក ​មិនមានជា​កំហុសឆ្គង​ខាងផ្លូវច្បាប់អីទេ ​គឺពួកគាត់​គ្រាន់តែ​ប្រើប្រាស់​សិទ្ធិសេរីភាព​ក្នុងការ​ការពារ​ធនធានធម្មជាតិ​ និង​ការពារ​យុត្តិធម៌​សង្គមតែ​ប៉ុណ្ណឹង។​ នេះជាជំហររបស់សង្គមស៊ីវិលតាំងពីដើម តាំងពីពេលចាប់ខ្លួនគាត់ រហូតមកដល់ពេលនេះ ក៏យើងនៅតែរក្សាជំហរដដែល តែយើងឃើញថា បរិយាកាសនយោបាយ នៅមានភាពស្មុគស្មាញបែបនេះ យើងគិតថា ពិបាកសង្ឃឹមណាស់ក្នុងការដោះលែងពួកគាត់ឲ្យមានសេរីភាព»

អាជ្ញាធរ​របប​ក្រុងភ្នំពេញ​ បាន​ចាប់ខ្លួន​យុវជន​ខ្មែរ​ថាវរៈ​ និង​យុវជន​សមាគម​សម្ព័ន្ធ​និស្សិ​ត​បញ្ញវន្តខ្មែរ​ទាំង ៧ រូបដាក់​ពន្ធនាគារ​ជា​បន្តបន្ទាប់ ​កាលពីអំឡុង​ខែសីហា និង​ខែកញ្ញា ឆ្នាំ​២០២០។ ដើមហេតុនៃ​ការ​ចាប់​ខ្លួននេះ ​គឺដោយ​ពួកគាត់​​តវ៉ា​ដោយ​សន្តិវិធី​ទាម​ទារ​ឱ្យ​ដោះលែង​មេដឹកនាំ​សហជីព​លោក រ៉ុង ឈុន និង​មានគម្រោង​​ប្រមូល​ផ្តុំ​ធ្វើ​បាតុកម្ម​ទាមទារ​យុត្តិ​ធម៌សង្គម ​នៅទីលានប្រជាធិបតេយ្យ​។ តុលាការ​​បាន​ចោទ​ប្រ​កាន់​ពួក​គាត់ពីបទ​ “ញុះញង់ឱ្យ​ប្រព្រឹត្ត​បទឧក្រិដ្ឋ ឬញុះញង់​បង្ក​ឱ្យ​មាន​ភាពវឹកវរ​ធ្ងនធ្ងរ​ដល់​សន្តិសុខ​សង្គម​” ដែល​ប្រឈម​នឹង​ការ​ជាប់​ពន្ធនាគារ​ពី ៦ ខែ​ដល់​ ២ ឆ្នាំ។ 

ទោះជាយ៉ាងណា ​សង្គម​ស៊ីវិល​ជាតិ និង​អន្តរជាតិ ជាពិសេសទីភ្នាក់ងារ​អង្គការ​សហ​ប្រជាជាតិ ​បាន​ទាមទារ​ឱ្យ​របប​លោក ហ៊ុន សែន ដោះលែង​អ្នក​ទាំងនោះ​វិញ ព្រោះ​ពួកគាត់​មិនបាន​ប្រព្រឹត្ត​បទល្មើស​អ្វី​ឡើយ​។ ក្រៅ​ពី​នេះ សហគមន៍​ជាតិ និង​អន្តរជាតិ​តែងតែទទូច​ឱ្យ​របប​ក្រុងភ្នំពេញ បើក​លំហ​សេរីភាព និង​គោរព​សិទ្ធិ​ពលរដ្ឋ ដូច​មាន​ចែង​ក្នុង​ច្បាប់​ជាតិ និង​អន្តរជាតិ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល