សហព័ន្ធខ្មែរអូស្ត្រាលីសាជីវកម្ម ធ្វើពិធីបុណ្យផ្កាទ្រទ្រង់ទិវាសិទ្ធិមនុស្សអន្តរជាតិ នៅថ្ងៃ១០ ខែធ្នូ នៅទីស្នាក់ការសមាគមខ្មែររដ្ឋវិចតូរីយ៉ា (Victoria) ដើម្បីរៃអង្គាសថវិកាជួយដល់បុគ្គលិកនៃក្រុមហ៊ុនណាហ្គាវើលដ៍ (Naga world) ដែលកំពុងប្រឈមបញ្ហាលំបាកផ្នែកជីវភាព និងការរំលោភសិទ្ធិធ្ងន់ធ្ងរ ដោយសារតែថៅកែក្រុមហ៊ុនមួយនេះ បានបញ្ឈប់ពួកគេពីការងារទាំងបំពានច្បាប់។ការប្រារព្ធពិធីនៅថ្ងៃទិវាសិទ្ធិមនុស្សអន្តរជាតិនេះ ក៏ធ្វើឡើងក្នុងគោលបំណងទាមទារយុត្តិធម៌ដល់ប្រធានសហជីពប្រចាំក្រុមហ៊ុនណាហ្គាវើលដ៍គឺកញ្ញា ឈឹម ស៊ីថរ ដែល ត្រូវបានអាជ្ញាធរក្រុងភ្នំពេញ ចាប់ឃុំខ្លួនដែរ។
ដោយមើលឃើញពីទុក្ខវេទនានិងភាពអយុត្តិធម៌របស់ថ្នាក់ដឹកនាំសហជីព និងបុគ្គលិកនៃក្រុមហ៊ុនណាហ្គាវើលដ៍នោះ សហព័ន្ធខ្មែរអូស្ត្រាលីសាជីវកម្ម បានរៀបចំពិធីបុណ្យផ្កាប្រាក់ក្នុងថ្ងៃទិវាសិទ្ធិមនុស្សអន្តរជាតិ ១០ ធ្នូ ដើម្បីប្រមូលថវិកាជួយដល់ពួកគាត់ដែលកំពុងដាច់ស្បៀង និងបង្ហាញការគាំទ្រចំពោះសកម្មភាពតស៊ូទាមទារសិទ្ធិសេរីភាពរបស់ខ្លួន។ពិធីនេះ មានការចូលរួមពីតំណាងអង្គការនានា និងប្រជាពលរដ្ឋខ្មែរប្រមាណ១០០នាក់ រួមទាំងសមាជិកសភាជាន់ខ្ពស់ អូស្ត្រាលី លោក ជូលៀន ហ៊ីល (Julian Hill) ផងដែរ។
ពិធីចាប់ផ្ដើមដោយមានព្រះសង្ឃសូត្រមន្ត និងការរាប់បាត្រប្រគេនចង្ហាន់ដល់ព្រះសង្ឃ។ បន្ទាប់មក អ្នកចូលរួមនាំគ្នាស្មិងស្មាធិ៍គោរពវិញ្ញាណក្ខន្ធអ្នកដែលបានលះបង់ជីវិតដើម្បីបុព្វហេតុជាតិ សិទ្ធិសេរីភាព ប្រជាធិបតេយ្យនិងយុត្តិធម៌សង្គម ដូចជាមេដឹកនាំសហជីពលោក ជា វិជ្ជា សកម្មជនបរិស្ថាន លោកឈុត វុទ្ធី ព្រះតេជព្រះគុណ សំ ប៊ុនធឿន និងអ្នកវិភាគនយោបាយបណ្ឌិត កែម ឡី។កម្មវិធីសំខាន់ជាបន្តទៀតនោះ គឺការថ្លែងសុន្ទរកថារបស់តំណាងរាស្ត្រអូស្ត្រាលី និងតំណាងសហគមន៍ខ្មែរមួយចំនួន។
សមាជិកសភាសហព័ន្ធមកពីគណបក្សកាន់អំណាច លោក ជូលៀន ហ៊ីល ឡើង ថ្លែងសារមុនគេថា ទើបតែពីសប្តាហ៍មុននេះទេ ដែលកញ្ញាឈឹម ស៊ីថរ បានមកទស្សនកិច្ចនៅតំបន់ស្ព្រីងវែល(Springvale) ហើយបន្ទាប់មកនាងត្រូវបានរដ្ឋាភិបាលកម្ពុជាចាប់ដាក់ពន្ធនាគារ ពេលត្រឡប់ទៅកម្ពុជាវិញ ដោយការប្រឌិតបទចោទប្រកាន់ក្លែងក្លាយតាមរយៈប្រព័ន្ធតុលាការដែលមានអំពើពុករលួយខ្លាំងបំផុតនៅក្នុងពិភពលោក។លោក យល់ថា ការចាប់ឃុំខ្លួនកញ្ញា ឈឹម ស៊ីថរ នេះ ដោយសារនាង ហ៊ានក្រោកឈរការពារសិទ្ធិការងារកម្មករខ្មែររាប់ពាន់ដែលថៅកែណាហ្គាវើលដ៍បញ្ឈប់ពីការងារ និងអាចជាការគំរាមដល់មេដឹកនាំសហជីពផ្សេងទៀត កុំឲ្យមកបំពេញការងាររបស់ខ្លួននៅប្រទេសអូស្ត្រាលី ឬមានទំនាក់ទំនងជាមួយសហជីពអន្តរជាតិនៅលើពិភពលោក។ តំណាងរាស្ត្រអូស្ត្រាលីរូបនេះ ចាត់ទុក ថា អ្វីដែលកើតឡើងលើរូបនាង គឺជារឿងដ៏អាក្រក់បំផុត ហើយលោក នឹងបន្តលើកឡើងនិងជំរុញឲ្យរដ្ឋាភិបាលអូស្ត្រាលី ធ្វើការជាមួយដៃគូនិងសម្ព័ន្ធមិត្តផ្សេង ទៀត ដើម្បីដាក់សម្ពាធលើរបបលោក ហ៊ុន សែន ឲ្យធ្វើរឿងត្រឹមត្រូវ ដោះលែងកញ្ញា ឈឹម ស៊ីថរ បើកលំហសេរីភាព និងប្រជាធិបតេយ្យនៅមុនការបោះឆ្នោត ឆ្នាំ២០២៣។
ជាមួយគ្នានេះ អតីតតំណាងរាស្ត្រអូស្ត្រាលីដើមកំណើតខ្មែរ និងជាប្រធានសហព័ន្ធខ្មែរអូស្ត្រាលីសាជីវកម្ម លោក ហុង លីម ថ្លែងរិះគន់ខ្លាំងៗដោយហៅរដ្ឋាភិបាលលោក ហ៊ុន សែន ថា ជារបបឃោរឃៅធ្វើបាបពលរដ្ឋស្លូតត្រង់ និងឃុបឃិតពុករលួយជាមួយថៅកែណាហ្គាវើលដ៍ ដែលសេដ្ឋីម៉ាឡេស៊ី ដើម្បីកេងប្រវ័ញ្ចជញ្ជក់ឈាមរាស្ត្រខ្មែរ។ លោក ថា ការធ្វើពិធីបុណ្យផ្កាប្រាក់ថ្ងៃទិវាសិទ្ធិមនុស្សអន្តរជាតិនេះ បង្ហាញពីការគាំទ្រក្រុម កូដករដែលតស៊ូទាមទារសេរីភាព និងបង្ហាញថា ពួកលោកមិនអាចទទួលយកបាន ទេចំពោះទង្វើរំលោភសិទ្ធិមនុស្សដោយអ្នកដឹកនាំកម្ពុជាសព្វថ្ងៃនេះ៖
«អ្វីដែលក្មួយៗស៊ីថរ ធ្វើនោះ យើងកុំភ្លេចគុណគាត់គឺមានតែស្រីៗណាហ្គាវើលដ៍ប៉ុន្មាននាក់នោះទេ ដែលនៅតស៊ូ ដែលជានិមិត្តរូបដែលជាពន្លឺបង្ហាញឲ្យឃើញថា នៅមានអ្នកតស៊ូអត់ខ្លាច ព្រោះគ្នាដឹងថាអយត្តិធម៌ណាស់ ចំពោះគ្នា ព្រោះអត់បាយអត់ទឹក។ ពេលគ្នាចេញមកម្តងៗ គឺគេចាប់បោះស្រីៗហា។ បងប្អូនគិតមើលបើជាកូនចៅរបស់បងប្អូនយើងវិញតើឈឺចាប់ប៉ុណ្ណា។ គេ(សន្តិសុខនិងសមត្ថកិច្ច)បោះក្រវាត់ទៅលើឡានដឹកទៅចោលរាប់សិបគីឡូ ហើយឲ្យដើរមកវិញ។ ពេលបោះទៅមានក្មេងស្រីម្នាក់រលូតកូនក្នុងផ្ទៃ ហើយក្មេងស្រីម្នាក់ទៀត បាក់ខ្ទង់ច្រមុះ និងខ្លះទៀតជាំដៃជើង។ ទាំងនេះ គឺជាអំពើហិង្សាប្រឆាំងលើស្ត្រីដែលពិភពលោកគេដឹង។ អ្នកមុខអ្នកការអូស្ត្រាលី ដែលបានជួប គឺគេក្រវីតែក្បាល ព្រោះគេហួសចិត្តដែលរបបលោក ហ៊ុន សែន លក់ខ្លួន លក់ព្រលឹងលក់អីដើម្បីតែលុយ»។
រីឯប្រធានសមាគមខ្មែររដ្ឋវិចតូរីយ៉ា លោក ជា យូហ៊ន លើកឡើងថា ការប្រមូល ថវិកាជួយដល់ក្រុមកូដករណាហ្គាវើលដ៍នេះ ដោយសារអាណិតពួកគាត់ដែលកំពុងដាច់ស្បៀង និងរងការរំលោភសិទ្ធិធ្ងន់ធ្ងរ បន្ទាប់ពីថៅកែបញ្ឈប់ពួក គាត់ពីការងារទាំងបំពាន៖
«ប្រជាពលរដ្ឋយើងទាំងអស់គ្នាដែលនៅខាងក្រៅនេះ នាំគ្នាជួយស្រែកជួយតវ៉ា ធ្វើយ៉ាងម៉េចឲ្យកម្ពុជាមានសុក្រិត្យភាព និងស្គាល់សេរីភាព ឲ្យស្គាល់សិទ្ធិមនុស្ស»។
កញ្ញា ឈឹម ស៊ីថរ ត្រូវបានអាជ្ញាធរចាប់ខ្លួនជាលើកទី២ កាលពីព្រឹកថ្ងៃទី២៦ ខែវិច្ឆិកា នៅប្រលានយន្តហោះអន្តរជាតិភ្នំពេញ បន្ទាប់ពីនាងវិលទៅកម្ពុជាវិញ ក្រោយចូលរួមសមាជពិភពលោកទី៥របស់សហព័ន្ធសហជីពអន្តរជាតិ ដែលបានរៀបចំធ្វើនៅទីក្រុងម៉ែលប៊ន (Melbourne ) ប្រទេសអូស្ត្រាលី (Australia)។ ពេល មកដល់ប្រទេសអូស្ត្រាលី ស៊ីថរ បានជួបតំណាងសហគមន៍និងជួបជាមួយតំណាងរាស្ត្រអូស្ត្រាលី ព្រមទាំងអ្នកមុខអ្នកការមួយចំនួនទៀត។ ហេតុដូច្នេះហើយទើប តំណាងសហគមន៍ខ្មែរ តំណាងរាស្ត្រអូស្ត្រាលី ព្រមទាំងស្ថានទូតអូស្ត្រាលី បង្ហាញក្តីអាណិតអាសូរ និងឈឺឆ្អាលជាខ្លាំងចំពោះការចាប់ឃុំខ្លួនមេដឹកនាំសហជីពជាស្ត្រីវ័យក្មេងរូបនេះ។
ទាក់ទងរឿងនេះដែរ តំណាងរាស្ត្ររដ្ឋវិចតូរីយ៉ាដើមកំណើតខ្មែរ លោក តាក់ ម៉េងហ៊ាង អំពាវនាវដល់ពលរដ្ឋខ្មែរដែលធ្លាប់រងគ្រោះបាត់បង់សិទ្ធិសេរីភាពក្រោមរបប ដឹកនាំជាច្រើនជំនាន់ហើយមានវាសនាមករស់នៅប្រទេសអូស្ត្រាលីដែលទទួលបានកិច្ចគាំពារនិងសិទ្ធិសេរីភាពពេញលេញ គួរតែចូលរួមគាំទ្រពលរដ្ឋខ្មែរ ក៏ដូចជាក្រុមកូដករណាហ្គាវើលដ៍នៅឯមាតុភូមិកំណើតដែលកំពុងតែរងគ្រោះនិងតស៊ូទាមទារយុត្តិធម៌និងសេរីភាពមកវិញ៖
«ខ្ញុំចង់និយាយបន្ថែមទៀតទាក់ទងនឹងក្រុមសន្តិភាព ដែលកំពុងតែវាទទីក្នុងទីក្រុងម៉ែលប៊ន ដែលអ្នកទាំងនោះ កំពុងតែរៀបចំកម្មវិធីអបអរ៧មករា នៅក្នុងខែក្រោយនោះ ឲ្យគាត់ឆ្លើយមើលនូវសំណួរសំខាន់ៗថា តើកម្មករជាស្ត្រីជាង២ពាន់នាក់ តើគាត់ឆ្លើយយ៉ាងម៉េច នៅក្នុងសម្បញ្ជៈរបស់គាត់ តើគាត់ឆ្លើយយ៉ាងម៉េចនៅពេលឃើញរូបភាពស្ត្រីដែល ខិតខំប្រឹងប្រែងតវ៉ាដើម្បីបានសិទ្ធិចូលធ្វើការងារវិញហើយត្រូវបានលាបពណ៌ថា ជាក្រុមបះបោ ក្រុមបដិវត្តពណ៌?តើគាត់ឆ្លើយជាមួយបងប្អូនគាត់ យ៉ាងម៉េចនៅពេលដែលការទាមទាររបស់ស្ត្រី ត្រូវបានគេធ្វើបាយយ៉ាងសាហាវយង់ឃ្នង»។
ក្នុងពេលដែលសហគមន៍ខ្មែរនៅប្រទេសអូស្ត្រាលី ជួបជុំរៃអង្គាសថវិកា និងលើកឡើងពីភាពអយុត្តិធម៌របស់ក្រុមកូដករណាហ្គាវើលដ៍នេះ នៅល្ងាចថ្ងៃទី១០ ធ្នូ ដដែលនេះ ក្រុមកូដករទាំងនោះ ក៏បានទៅប្រមូលផ្តុំគ្នាបង្ហោះប៉េងប៉ោងនៅខាងមុខពន្ធនាគារព្រៃស ដើម្បីទាមទារឲ្យដោះលែងមេដឹកនាំសហជីពរបស់ពួកគេ គឺកញ្ញាឈឹម ស៊ីថរ ដែរ។
ក្រោយការចាប់ឃុំខ្លួនកញ្ញា ឈឹម ស៊ីថរ ជាលើកទី២នេះ ក្រសួងការបរទេសអាមេរិក ស្ថានទូតអូស្ត្រាលី សហព័ន្ធសហជីពអន្តរជាតិ ព្រមទាំងក្រុមអង្គការ សមាគម សហជីពក្នុងស្រុកជិតមួយរយស្ថាប័ន ក៏បានចេញសេចក្តីថ្លែងការណ៍ជាបន្តបន្ទាប់ជំរុញឲ្យរដ្ឋាភិបាលកម្ពុជា ដោះលែងរូបនាង ហើយលុបចោលរាល់ការចោទប្រកាន់ និងឈានទៅដោះស្រាយបញ្ចប់វិវាទការងារយុត្តិធម៌និងសមធម៌៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។