ខ្មែរ​​នៅ​​ក្រៅ​​ប្រទេស​បន្ត​​ធ្វើ​​បុណ្យ​​ខួប​​៥​ឆ្នាំ​​និង​​ទាមទារ​​យុត្តិធម៌​​ជូន​​បណ្ឌិត​ កែម​ ឡី

ដោយ ជាតិ ចំណាន
2021-07-12
Share
ខ្មែរ​​នៅ​​ក្រៅ​​ប្រទេស​បន្ត​​ធ្វើ​​បុណ្យ​​ខួប​​៥​ឆ្នាំ​​និង​​ទាមទារ​​យុត្តិធម៌​​ជូន​​បណ្ឌិត​ កែម​ ឡី ពលរដ្ឋខ្មែរនៅប្រទេសអូស្ត្រាលីបានរៀបចំពិធីបុណ្យខួប ៥ ឆ្នាំលោកបណ្ឌិត កែម ឡី កាលពីថ្ងៃទី១០ ខែកក្កដា ឆ្នាំ២០២១។
រូប៖ ហ្វេសប៊ុក Rachna Bou

ពលរដ្ឋ​ខ្មែរ​នៅ​​​ប្រទេស​ជប៉ុន កូរ៉េ​ខាង​ត្បូង និង​ថៃ​ នៅ​តែ​រំពឹង​ថា ​នឹង​អាច​មាន​ឱកាស​​​​ធ្វើ​បុណ្យ​ឧទ្ទិស​កុសល​ជូន​បណ្ឌិត កែម ឡី​​ បើ​ទោះ​ជា​​ជំងឺ​កូវីដ​១៩ ​(Covid-19)​ កំពុង​ឆ្លង​​ខ្លាំង​ក៏​ដោយ​។

ប្រធាន​ចលនា​សង្គ្រោះ​ជាតិ​នៅ​ប្រទេស​ជប៉ុន​លោក ហៃ វណ្ណា ឲ្យ​ដឹង​ថា ​ពលករ​ប្រហែល ​៤០ ​នាក់​បាន​យក​ចង្ហាន់​ទៅ​ប្រគេន​ព្រះសង្ឃ​នៅ​វត្ត​ខ្មែរ​មួយ​ជិត​ទីក្រុង​តូក្យូ​នៅ​ថ្ងៃ​អាទិត្យ​ ដើម្បី​​ធ្វើ​បុណ្យ​បែប​សាសនា ឧទ្ទិសបុណ្យកុសល​ជូន​បណ្ឌិត កែម ឡី។ ប៉ុន្តែ​​ពួកគេ​មិន​អាច​ថ្លែង​សារ​​​ទាមទារ​យុត្តិធម៌ ឬ​​រំលឹក​​​ទស្សនៈ​របស់​បណ្ឌិត ​កែម ឡី នៅ​ក្នុង​វត្ត​បាន​ទេ ​ដោយ​សារ​​គណៈ​កម្មការ​​​វត្ត​មិន​អនុញ្ញាត​។

លោកបន្ត​ថា ​ពលករ​ក៏​មិន​អាច​ជួបជុំ​គ្នា​នៅ​ទី​សាធារណៈ​ដូច​រាល់​ឆ្នាំ​បាន​ដែរ​ព្រោះ​តែ​​ការ​ឆ្លង​ជំងឺ​កូវីដ​១៩​។ ដូច្នេះ​​ពួកគាត់​នាំ​គ្នា​​​បង្ហោះ​សារ​ទាមទារ​យុត្តិធម៌​និង​រំលឹក​ទស្សនៈ​របស់​បណ្ឌិត កែម ឡី​ តាម​បណ្ដាញ​សង្គម​ (facebook)៖ «ហើយ​យើង​សង្ឃឹម​ថា ​​ការ​ធ្វើ​កម្មវិធី​​ដែល​មាន​ភាព​​រលូន​អ៊ីចឹង​អាច​ញ៉ាំង​ឲ្យ​អ្នក​ដែល​មិន​ទាន់​​ស្គាល់​ពី​លទ្ធិ​ប្រជាធិបតេយ្យ​ហ្នឹង​​គាត់​នឹង​អាច​ជ្រួតជ្រាប​បន្តិច​ម្ដងៗ​​ហើយ​ខ្ញុំ​សង្ឃឹម​ថា ​ថ្ងៃ​អនាគត​យើង​អាច​នឹង​ធ្វើ​កម្មវិធី​នេះ​បាន​»។ 

​នៅ​ប្រទេស​កូរ៉េ​ខាង​ត្បូង ​ក្បែរ​នោះក្រុម​ពលករ ក៏​​មិន​អាច​ជួបជុំ​គ្នា​បាន​ទេ​ ​ព្រោះ​រលក​ថ្មី​នៃ​ការ​ឆ្លង​ជំងឺ​កូវីដ​១៩​​កំពុងផ្ទុះ​ឡើងវិញ​​។

តំណាង​ពលករលោក មាស ពិសាល និយាយ​ថា ​ទោះ​ជា​មិន​រំពឹង​ថា​ មាន​យុត្តិធម៌​ក៏​ពលករ​ខ្លះ​​​នៅ​តែ​បង្ហាញ​ភក្ដី​ភាព​និង​បង្ហោះ​សារ​តាម​ហ្វេសប៊ុក ​(facebook)​ទាមទារ​យុត្តិធម៌​ជូន​បណ្ឌិត​ កែម ឡី ​ដែរ។ ពលករ​រូប​នេះ​សោកស្ដាយ​ដែល​ច្រើន​ឆ្នាំ​ហើយ ​​រដ្ឋាភិបាល​​នៅ​តែ​មិន​អាច​ស៊ើប​អង្កេត​​រក​យុត្តិធម៌​ជូន​បណ្ឌិត កែម ឡី​ បាន​៖ «រឿង​យុត្តិធម៌​ហ្នឹង​ច្បាស់​ណាស់​ថា ​យើង​នៅ​តែ​ទាមទារ​ ហើយ​យើង​មាន​ការ​សោកស្ដាយ​ណាស់​ដែល​យើង​ទាមទារ​មិន​ទាន់​ទទួល​បាន​យុត្តិធម៌​ ហើយ​​យើង​មិន​អាច​ប្រារព្ធ​ពិធី​។ ដែល​យើង​ប្រារព្ធ​រាល់​ឆ្នាំ​ហ្នឹង​​ជាង​ការណ៍​ដែល​យើង​គ្រាន់​តែ​ធ្វើ​បុណ្យ​ឧទ្ទិស​ជូន​លោក​ហ្នឹង​ គឺ​យើង​ចង់​ដើម្បី​ទាមទារ​យុត្តិធម៌​ចំពោះ​លោក​ហ្នឹង​និង​យុត្តិធម៌​ចំពោះ​ពលរដ្ឋ​ដែល​គោរព​ស្រលាញ់​លោក​»។

​​​ក្នុង​ប្រទេស​ថៃ​ឯណោះ​វិញ​ ពលករ​​​​​​ជា​ច្រើន​កំពុង​ជាប់​ក្នុង​បម្រាមបិទ​ខ្ទប់​​។ ពួកគាត់​មិន​អាច​ទៅ​​ធ្វើ​ចង្ហាន់​ទៅ​វត្ត​ជួប​ជុំ​គ្នា​បាន​ទេ ​គឺ​បាន​ត្រឹម​តែ​បង្ហោះ​សារ​ទាមទារ​យុត្តិធម៌​ប៉ុណ្ណោះ​។​​ ឯ​ពលករ​ខ្លះ​ទៀត​មិន​ហ៊ាន​បញ្ចេញ​សកម្មភាព​​ទាមទារ​យុត្តិធម៌​ខ្លាំងក្លា​ទេ ​ព្រោះ​បារម្ភ​ពី​​សុវត្ថិភាព​ពេល​ត្រឡប់​​ចូល​​​ស្រុក​កំណើត​វិញ។

​តំណាង​​មូលនិធិ​ពលករ​ខ្មែរ​នៅ​ប្រទេស​ថៃលោកស្រី សេង ស្រីទូច អះអាង​ថា​ វីរភាព​របស់​បណ្ឌិត កែម ឡី ស្ថិត​នៅ​ក្នុង​ចិត្ត​របស់​ពលករ​ជានិច្ច​ហើយ​នរណា​ក៏​ដឹង​និង​ចង​ចាំ​វីរភាព​​​លោក​បណ្ឌិត​នៅ​ក្នុង​ចិត្ត​ដែរ​។ ប៉ុន្តែ​​ពលករ​មួយ​ចំនួន​​មិន​អាច​ធ្វើ​សកម្មភាព​ជួបជុំ​គ្នា ​​ឬ​ថ្លែង​សារ​​អំពី​ទស្សនៈ​លោក​បណ្ឌិត ​​​ឬ​​ការ​ទាមទារ​យុត្តិធម៌​ជូន​​បណ្ឌិត កែម ឡី ​​ដូច​រាល់​ឆ្នាំ​បាន​ទេ៖ «និយាយ​រួម​ទៅ​ គឺ​ចង់​បាន​ភាព​​យុត្តិធម៌​ហ្នឹង​ណាស់ ​តែ​ធ្វើ​វា​អត់​កើត​និយាយ​វា​អត់​កើត​ព្រោះ​យើង​វា​នៅ​ក្រោម​ការ​គាប​សង្កត់​របស់​គេ​អ៊ីចឹង​ណា»។

​​​​​ចំណែក​នៅ​កម្ពុជា​វិញ ​ការ​បង្ក្រាប​សំឡេង​រិះគន់​ទាំង​ឡាយ​​​បាន​ក្លាយ​ជា​ផ្នែក​មួយ​​​ធ្វើ​ឲ្យ​ប៉ះពាល់​ដល់​ពិធី​បុណ្យ​ខួប​បណ្ឌិត កែម ឡី ក្រៅពី​វិបត្តិ​ជំងឺ​កូវីដ​១៩។ រាល់​ឆ្នាំ​​សកម្មជន​បក្ស​ប្រឆាំង​និង​ពលរដ្ឋ​​ខ្លះ​បាន​​ជួបជុំ​គ្នា​​និមន្ត​ព្រះសង្ឃ​​​ធ្វើ​បុណ្យ​ខួប​បណ្ឌិត​ កែម​ ឡី តាម​មូលដ្ឋាន​របស់​​ខ្លួន​ ឬ​នាំ​គ្នា​ឡើង​មក​ភ្នំពេញ​ ដើម្បី​រំលឹក​​​បណ្ឌិត​ កែម ឡី នៅ​​ទីតាំង​ដែល​​ឃាតក​​បាញ់​សម្លាប់​លោក​បណ្ឌិត​​។​

ប្រពន្ធ​របស់​​សកម្មជន​​​បក្ស​ប្រឆាំង​កំពុង​ជាប់​ឃុំ​ម្នាក់លោក ស៊ុន ធន់ គឺ លោកស្រី សេង ចាន់​ថន ​​អះអាង​ថា​ មន្ត្រី​គណបក្ស​សង្គ្រោះ​ជាតិ​​​​ខ្លះ​ត្រូវ​បាន​ចាប់​ដាក់​ពន្ធនាគារ​ដូច្នេះ​​គ្មាន​​ឱកាស​បាន​ធ្វើ​បុណ្យ​ជូន​បណ្ឌិត​ កែម ឡី ដូច​រាល់​ឆ្នាំ​ឡើយ​។ ម្យ៉ាង​ទៀត​ ក្រុម​ស្ត្រី​តវ៉ា​ថ្ងៃ​សុក្រ​ក៏​មិន​អាច​ជួបជុំ​គ្នា​ធ្វើ​បុណ្យ​ជូន​បណ្ឌិត​កែម ឡី បាន​ដែរ​ដោយ​សារ​អាជ្ញាធរ​រាជធានី​ភ្នំពេញ​ដាក់​បម្រាម​ជួប​ជុំ​​កាល​ពី​ថ្ងៃ​ទី​៩ ខែ​កក្កដា៖ «សោកស្ដាយ​មែនទែន​ ដែល​យើង​មិន​បាន​ធ្វើ​បុណ្យ​ខួប​សម្រាប់​គាត់​​ដែល​ជា​អ្នក​ស្នេហា​ជាតិ ​ស្រលាញ់​ជាតិ​ ស្រលាញ់​ទឹក​ដី​ ហើយ​ពួក​យើង​ជា​អ្នក​គាំទ្រ​ហ្នឹង ​គឺ​សោកស្ដាយ​ហើយ​សោកស្ដាយ​ចំពោះ​អ្នក​ដែល​ធ្លាប់​គាំទ្រ​គាត់​ត្រូវ​គេ​ចាប់​យក​ទៅ​ដាក់​ពន្ធនាគារ​ គឺ​មាន​ការ​សោក​ស្ដាយ​មែន​ទែន»។

កាល​ពី​ថ្ងៃ​ទី​១០ ខែ​កក្កដា ​​ក្រុម​អង្គការ​សង្គម​ស៊ីវិល ​​​​ក៏​មិន​អាច​ជួប​ជុំ​គ្នា​ដាក់​កម្រង​ផ្កា​នៅ​​​​​ក្បែរ​ស្ដុក​បូកគោ​​​និង​​នៅ​​​ចេតិយ​របស់​​​បណ្ឌិត កែម ឡី​ បាន​ដែរ​ដោយ​សារ​​វិបត្តិ​ជំងឺ​កូវីដ​-១៩ ​ខណៈ​សមត្ថកិច្ច​​បាន​​ពង្រាយ​កង​កម្លាំង​រង់​​ចាំ​បង្ក្រាប​​​។

កាលពីថ្ងៃទី៩ ខែកក្កដា ក្រុម​អង្គការ​សង្គម​ស៊ីវិល សមាគម សហជីពទាំងជាតិ និងអន្តរជាតិ ​ចំនួន​ ៤៥ ​ស្ថាប័ន​​បាន​ចេញ​សេចក្ដី​ថ្លែងការណ៍​រួមគ្នា​ទាមទារ​ជាថ្មី​​​ឱ្យ​រដ្ឋាភិបាល​កម្ពុជា​បង្កើត​គណៈ​កម្មការ​ស៊ើប​អង្កេត​​ឯករាជ្យ​​ឥត​លម្អៀង ​ដើម្បី​​ស្រាវជ្រាវ​​ករណី​នេះ​ឲ្យ​មាន​ប្រសិទ្ធភាព​ព្រោះ​​ ៥​ឆ្នាំ​មក​នេះ​ ​​រដ្ឋាភិបាល​​បរាជ័យ​ក្នុង​ការ​ស្វែងរក​យុត្តិធម៌​ក្នុង​សំណុំ​រឿង​ដ៏​កក្រើក​មួយ​នេះ​​។​ រយៈ​ពេល​៥​ឆ្នាំ​មក​នេះ ​តុលាការ​​​​រក​ឃើញ​​​មនុស្ស​តែ​ម្នាក់​គត់ ​​ឈ្មោះ អឿត អាង ដែល​ហៅ​ខ្លួន​ឯង​ថា ជួប សម្លាប់ ​ថា​​ជា​ឃាតក​ហើយ​បាន​កាត់​ទោស​​​ឱ្យ​ជាប់​ពន្ធនាគារ​​​មួយ​ជីវិត។ ទោះជាយ៉ាងណា សហគមន៍​ជាតិ​អន្តរជាតិ​និង​ភរិយា​របស់​បណ្ឌិត​ កែម ឡី គឺ​អ្នកស្រី បូ រចនា គ្មាន​ជំនឿ​ថា ​តុលាការ​អាច​រក​យុត្តិធម៌​ក្នុង​សំណុំ​រឿង​នេះ​បាន​ឡើយ​ដោយសារ​ប្រព័ន្ធ​តុលាការ​ស្ថិត​ក្រោម​ឥទ្ធិពល​នៃ​គណបក្ស​កាន់​អំណាច៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល