ពលរដ្ឋ​ខ្មែរ​នឹង​តស៊ូ​មតិ​តាម​មធ្យោបាយ​ផ្សេងៗ​ដើម្បី​ទាមទារ​ឱ្យ​វៀតណាម​ដោះលែង​ព្រះសង្ឃ និង​សកម្មជន​ខ្មែរក្រោម

ដោយ សេក បណ្ឌិត
2024.04.09
ពលរដ្ឋ​ខ្មែរ​នឹង​តស៊ូ​មតិ​តាម​មធ្យោបាយ​ផ្សេងៗ​ដើម្បី​ទាមទារ​ឱ្យ​វៀតណាម​ដោះលែង​ព្រះសង្ឃ និង​សកម្មជន​ខ្មែរក្រោម (ស្តាំ) សាមណេរ យឿង ខាយ សកម្មជនសិទ្ធិមនុស្សខ្មែរកម្ពុជាក្រោម​ដែលទើប​ចូល​សាង​ភ្នួស​ជាព្រះសង្ឃ​កាល​ពី​ពេល​ថ្មីៗនេះ។
រូប​៖ ពលរដ្ឋ​ផ្តល់ឱ្យ

ពលរដ្ឋ​ខ្មែរ នឹង​តស៊ូ​មតិ​តាម​មធ្យោបាយ​ផ្សេងៗ​ រួមមាន​ការ​ដាក់​ញត្តិ​តាម​បណ្ដា​ទូត​ប្រទេស​ប្រជាធិបតេយ្យ​ និង​ការ​ធ្វើ​បាតុកម្ម​​​​ ដើម្បី​ទាមទារ​ឱ្យ​រដ្ឋាភិបាល​វៀតណាម​ដោះលែង​ព្រះសង្ឃ​ និង​​សកម្មជន​ខ្មែរ​ក្រោម។ ការ​តស៊ូ​មតិ​​នេះ​គឺ​​ឆ្លើយ​តប​នឹង​​ទង្វើ​របស់​អាជ្ញាធរ​វៀតណាម​​ដែល​បាន​​​ចាប់​ផ្សឹក​ព្រះសង្ឃ និង​ចាប់​ខ្លួន​ពលរដ្ឋ​ខ្មែរ​ក្រោម​នៅ​វត្ត​ទ្រនំ​សេក ចំនួន៨ អង្គ​នាក់​បន្ថែម​ទៀត ​កាល​ពី​ចុង​ខែ​មីន។

សកម្មជន​កិច្ច​ព្រម​ព្រៀង​សន្តិភាព​ទីក្រុង​ប៉ារីស ដែល​​ធ្លាប់​ដឹក​នាំ​យុវជន​​នៅ​កម្ពុជា​ទៅ​​ទស្សនកិច្ច​នៅ​​កម្ពុជា​ក្រោម​​ លោក ស្រ៊ុន ស្រ៊ន លើក​ឡើង​ថា រដ្ឋាភិបាល​វៀតណាម​​បន្ត​​កៀប​សង្កត់​ និង​​ប្រើ​អំពើ​ហិង្សា​​​​​មក​លើ​ពលរដ្ឋ​ខ្មែរ​ក្រោម​ជា​ពិសេស​ការ​​​ផ្សឹក​ព្រះសង្ឃ​ និង​ពលរដ្ឋ​ខ្មែរ​ក្រោម​នៅ​វត្ត​ទ្រនំ​សេក​​ក្នុង​​ខេត្ត​លង់ហោរ។ លោក ស្រ៊ុន ស្រ៊ន បន្ត​ថា លោក​ និង​ពលរដ្ឋ​ខ្មែរ​​​មួយ​ចំនួន​នឹង​យក​ច្បាប់​ និង​​ការ​តស៊ូ​មតិ​ដោយ​សន្តិវិធី​​ដើម្បី​ឆ្លើយ​តប​នឹង​ទង្វើ​ហិង្សា​របស់​អាជ្ញាធរ​វៀតណាម។

លោក ស្រ៊ុន ស្រ៊ន បន្ត​ថា លោក​​​នឹង​ដាក់​លិខិត​ទៅ​កាន់​រដ្ឋមន្ត្រី​ការបរទេស​ប្រទេស​កម្ពុជា​ ឯកអគ្គរាជទូត​​ខ្មែរ​​នៅ​ប្រទេស​វៀតណាម​ និង​អង្គការ​សិទ្ធិ​មនុស្ស​ជាតិ​ និង​អន្តរជាតិ​ថា អាជ្ញាធរ​វៀតណាម​បាន​ប្រើ​​​អំពើ​ឃោរឃៅ​មក​លើ​ព្រះសង្ឃ​ និង​ពលរដ្ឋ​ខ្មែរ​ក្រោម។ លោក ស្រ៊ុន ស្រ៊ន ថា លោក និង​ពលរដ្ឋ​ផ្សេង​ទៀត​នឹង​លើកឡើង​​ពី​ការ​រំលោភ​សិទ្ធ​ខ្មែរ​ក្រោម​នេះ នៅ​​​តាម​បណ្ដាញ​សង្គម​នានា​​ដើម្បី​ឱ្យ​​ នាយករដ្ឋមន្ត្រី​​ លោក​ ហ៊ុន ម៉ាណែត​ បាន​ដឹង​ និង​ចេញ​មុខ​ការ​ពារ​សិទ្ធិ​​ពលរដ្ឋ​ខ្មែរ​ក្រោម។ ​​​​​​

លោក ស្រ៊ុន ស្រ៊ន«អ៊ីចឹង​នេះ​គឺ​ជា​ជំហាន​ទី​មួយ​ដែល​ពួក​ខ្ញុំ​ធ្វើ​ គឺ​យើង​ធ្វើ​ជា​លិខិត​នានា​ដើម្បី​សម្ដែង​ការ​មិន​ពេញ​ចិត្ត​ ការ​សោកស្ដាយ​ និង​ទាម​ទារ​ឱ្យ​រដ្ឋាភិបាល​ខ្មែរ​ យក​ចិត្ត​ទុក​ដាក់​នឹង​ខ្មែរ​កម្ពុជា​ក្រោម​ហើយ​យុទ្ធនាការ​បន្ទាប់​​យើង​នឹង​ផ្ញើ​​សារ​​តាម​ (Messenger) តាម​(Telegram) តាម​ការ​ខល​ទៅ​លោក​ ហ៊ុន ម៉ាណែត​ ដែល​ជា​នាយករដ្ឋមន្ត្រី​ខ្មែរ​ឱ្យ​គាត់​​ចាប់​អារម្មណ៍​ និង​ប្រធាន​សភា​ខ្មែរ​ក្ដី​ឱ្យ​​ចាប់​អារម្មណ៍​ទៅ​ហ្នឹង​អ្វី​ដែល​បាន​កើត​ឡើង​ក្នុង​សង្គម​កម្ពុជា​ក្រោម»

ដោយ​ឡែក ប្រធាន​ស្ដីទី​លេខាធិការដ្ឋាន​​នៃ​​អង្គការ​សមាគម​ខ្មែរ​ក្រោម​​​​ លោក គឹម ស៊ីសំណា លើក​ឡើង​ថា អង្គការ​សមាគម​ខ្មែរ​ក្រោម​នៅ​កម្ពុជា​​គ្រោង​នឹង​សម្រេច​ជ្រើស​យក​​ការ​ដាក់​ញត្តិ​ទៅ​កាន់​​បណ្ដា​ទូត​ប្រទេស​​សេរី​ ឬ​មាន​សកម្មភាព​ផ្សេង​ទៀត​​​ដើម្បី​ធ្វើ​ការ​តស៊ូ​មតិ​ក្នុង​សប្ដាហ៍​ក្រោយនេះ​។ ទោះ​ជា​យ៉ាងណា​ លោក គឹម ស៊ីសំណា ថា កន្លង​មក​ស្ថានទូត​ប្រជាធិបតេយ្យ​នៅ​កម្ពុជា​​បង្ហាញ​ការ​យក​ចិត្ត​ដាក់​​ចំពោះ​សកម្មភាព​រំលោភ​សិទ្ធិ​របស់​អាជ្ញាធរ​វៀតណាម​ទៅ​លើ​ពលរដ្ឋ​ខ្មែរ​ក្រោម ក្រោយ​ពី​សមាគម​បាន​ដាក់​ញត្តិ។

លោក កឹម ស៊ីសំណា «ខ្ញុំ​មើល​ឃើញ​មាន​ស្ថានទូត​មួយ​ចំនួន​ដែល​គាត់​ទទួល​បាន​ ហើយ​គាត់​ពិចារណា​ ហើយ​គាត់​​យក​ចិត្ត​ទុក​ដាក់​ចំពោះ​បញ្ហា​សិទ្ធិ​មនុស្ស​ខ្មែរ​ក្រោម​ហ្នឹង​ដែរ​ ជាក់​ស្ដែង​ថ្មីៗ​នេះ​ ខាង​ក្រសួង​ការ​បរទេស​របស់​សហរដ្ឋអាមេរិក​បាន​ចេញ​សេចក្ដី​ថ្លែង​ការណ៍​ ហើយ​ទាមទារ​ឱ្យ​រដ្ឋាភិបាល​វៀតណាម​គាត់​ដោះ​លែង​ព្រះសង្ឃ​ និង​ពលរដ្ឋ​ខ្មែរ​ក្រោម​នៅ​កម្ពុជា​ក្រោម»

ចំណែក​អនុប្រធាន​សហព័ន្ធ​ខ្មែរ​កម្ពុជា​ក្រោម លោក ម៉ៅ មុនី លើក​ឡើង​ថា សហព័ន្ធ​ខ្មែរ​កម្ពុជា​ក្រោម​នឹង​នាំ​យក​សកម្មភាព​​​រំលោភ​សិទ្ធិ​របស់​អាជ្ញាធរ​វៀតណាម​​​ទៅ​​កាន់​​អង្គការ​សហប្រជាជាតិ រដ្ឋាភិបាល​អាមេរិក​ និង​រដ្ឋាភិបាល​ប្រទេស​ប្រជាធិបតេយ្យ​ផ្សេង​ទៀត​ឱ្យ​បាន​ដឹង។ ​​លោក ម៉ៅ មុនី បន្ត​ថា​សហព័ន្ធ​ខ្មែរ​កម្ពុជា​ក្រោម​​​គ្រោង​នឹង​ធ្វើ​បាតុកម្ម​នៅ​ទីក្រុង​​ញីវយ៉ក​ ​ជិត​ទីស្នាក់ការ​​អង្គការ​សហប្រជាជាតិ​នៅ​ថ្ងៃ​ទី​១៩ ខែ​មេសា ខាង​មុខ​នេះ។

លោក ម៉ៅ មុនី៖ «អង្គការ​សហព័ន្ធ​ខ្មែរ​កម្ពុជា​ក្រោម​នឹង​ខំ​អស់​សមត្ថភាព​​ក្នុង​នាម​យើង​ជា​អង្គការ​ទាមទារ​សិទ្ធិ​ឱ្យ​បង​ប្អូន​ខ្មែរ​ក្រោម​ហ្នឹង​ ជា​យើង​នឹង​ទំនាក់​ទំនង​ធ្វើ​ការ​ដិតដល់​ជា​មួយ​រដ្ឋាភិបាល​អាមេរិក​ ក្រសួង​ការបរទេស​ ហើយ​​អង្គការ​សហប្រជាជាតិ​ហើយ​យើង​សង្ឃឹម​ថា​អង្គការ​សហប្រជាជាតិ​នឹង​ចេញ​សេចក្ដី​ប្រកាស​អី​មួយ​ដើម្បី​ថ្កោល​ទោស​ទៅ​រដ្ឋាភិបាល​យួន​ឆាប់​ៗ ដើម្បី​រុញ​ច្រាន​ឱ្យ​រដ្ឋាភិបាល​យួន​ដោះ​លែង​ព្រះសង្ឃ​យើង​»

រីឯ​សហព័ន្ធ​ខ្មែរ​កម្ពុជា​ក្រោម​ប្រចាំ​ទ្វីប​អឺរុប (KKF) ​គ្រោង​នឹង​ធ្វើ​បាតុកម្ម​នៅ​មុខ​អង្គការ​សហ​ប្រជាជាតិ​ នា​ទីក្រុង​ហ្សឺណែវ ប្រទេស​ស្វីស នៅ​ថ្ងៃ​ទី​០៧ ខែ​ឧសភា ខាងមុខ ដើម្បី​ទាមទារ​ឱ្យ​មាន​ការ​ដោះលែង​ព្រះសង្ឃ និង​ពលរដ្ឋ​ខ្មែរ​ក្រោម។ គម្រោង​បាតុកម្ម​នេះ ​ក៏​ចំ​ពេល​ដែល​តំណាង​ប្រទេស​វៀតណាម​ធ្វើ​ដំណើរ​មក​ចូល​រួម ប្រជុំ​នៅ​ក្នុង​អង្គការ​សហ​ប្រជាជាតិ​ ស្តី​ពី​ការ​ពិនិត្យ​ឡើង​វិញ​តាម​កាល​កំណត់ (Universal Periodic Review) ឆ្នាំ​ទី ៤ ដើម្បី​ឆ្លើយ​បំភ្លឺ​ចំពោះ​អង្គការ​សហ​ប្រជាជាតិ (UN) អំពី​ការ​សន្យា​របស់​វៀតណាម​ក្នុង​ការ​អនុវត្ត​អនុសាសន៍​ដែល​ដាក់​ជូន​ដោយ​ប្រទេស​សមាជិក​អង្គការ​សហប្រជាជាតិ​ក្នុង​កិច្ច​ប្រជុំ​ត្រួត​ពិនិត្យ​ជុំ​ទី៣ កាល​ពី​ឆ្នាំ ២០១៩។

វិទ្យុ​អាស៊ី​សេរី​មិន​ទាន់​អាច​សុំ​ការ​ឆ្លើយ​តប​រឿង​នេះ​ពី​ស្ថាន​ទូត​វៀតណាម​ប្រចាំ​នៅ​កម្ពុជា​ និង​អ្នក​នាំ​ពាក្យ​នាយករដ្ឋមន្ត្រី​លោក មាស សោភ័ណ្ឌ បាន​ទេ នៅ​ថ្ងៃ​ទី៤ ខែ​មេសា។

សេចក្ដី​ថ្លែង​ការណ៍​របស់​​សហព័ន្ធ​ខ្មែរ​ក្រោម​​ កាល​ពី​ថ្ងៃ​ទី២ ខែ​មេសា​ បាន​ថ្កោល​ទោស​អាជ្ញាធរ​វៀតណាម​ដែល​បាន​វាយ​កម្ទេច​សាលាឆទាន​​នៅ​ខេត្ត​​លង់ហោ កាល​ពី​ថ្ងៃ​ទី​១ ខែ​មេសា។ សហព័ន្ធ​ខ្មែរ​​កម្ពុជា​ក្រោម​ចាត់​ទុក​ទង្វើ​របស់​អាជ្ញាធរ​វៀតណាម​នេះ​គឺ​ជា​សកម្មភាព​អមនុស្ស​ធម៌ ខណៈ​ពលរដ្ឋ​ខ្មែរ​ក្រោម​​កសាង​សាលាឆទាន​នេះ​ គឺ​​ដើម្បី​ធ្វើ​ជា​ទី​សក្ការ​បូជា ជា​កន្លែង​អប់រំ ភាសាខ្មែរ​ និង​ការ​អភិរក្ស​វប្បធម៌​ជា​ដើម។ សហព័ន្ធ​ខ្មែរ​ក្រោម​បញ្ជាក់​ថា​​​​ពលរដ្ឋ​ខ្មែរ​ក្រោម​ចាត់​ទុក​ថា ការ​ប្រតិបត្តិ​ព្រះពុទ្ធ​សាសនា​ថេរវាទ​មិនមែន​គ្រាន់​តែ​ជា​ការ​ប្រតិបត្តិ​សាសនា​ប៉ុណ្ណោះ​ទេ ប៉ុន្តែ​ជា​ផ្នែក​សំខាន់​មួយ​នៃ​អភិរក្ស​​អត្តសញ្ញាណ​វប្បធម៌​របស់​ពួកគេ។

ចំណែក​សេចក្ដី​​ថ្លែងការណ៍​របស់​​​មិត្ត​​សមាគម​ខ្មែរ​កម្ពុជា​ក្រោម​នៅ​ប្រទេស​​បារាំង ​កាល​ពី​ថ្ងៃ​ទី១ ខែ​មេសា ក៏​បាន​​​ថ្កោលទោស​នគរបាល​វៀតណាម​ដែល​ចាប់​ផ្សឹក​ និង​​ឃុំ​ខ្លួន​​ព្រះសង្ឃ​ និង​ពលរដ្ឋ​​ខ្មែរ​ក្រោម​កាល​ពី​ចុង​ខែ​មីនា​​ទាំង​បំពាន​ គោលការណ៍​សិទ្ធិ​មនុស្ស នឹង​សិទ្ធិ​ជនជាតិ​ដើម​នៃ​អង្គការ​សហ​ប្រជាជាតិ។ សេចក្ដី​​ថ្លែងការណ៍​ដដែល​​អំពាវនាវ​ដល់​អង្គទូត​នានា​ប្រចាំ​នៅ​ប្រទេស​វៀតណាម និង​អង្គការ​ជាតិ អន្តរជាតិ​​អន្តរាគមន៍​ទៅ​រដ្ឋាភិបាល​វៀតណាម បញ្ឈប់​ជា​បន្ទាន់​នូវ​រាល់​ទង្វើ គាបសង្កត់ សិទ្ធិ​ខ្មែរ​ក្រោម និង​គោរព​កាតព្វកិច្ច​របស់​ខ្លួន​ក្នុង​នាម​សមាជិក​នៃ​អង្គការ​សហ​ប្រជាជាតិ។

អាជ្ញាធរ​​វៀតណាម​ខេត្ត​លង់​ហោ​​​​​ដែល​វៀតណាម​ហៅ​ថា​ខេត្ត វិញឡុង (Vinh Long ) កាល​ពី​ថ្ងៃ​ទី​២៦ និង​​ថ្ងៃ​ទី​ ២៨ ខែ​មីនា​ ​បាន​ចាប់​ផ្សឹក​​ព្រះសង្ឃ​​​​គង់​នៅ​វត្ត​ប្រជុំ​ពល​មង្គលបូរី ឬ​ហៅ​ថា​វត្ត​ទ្រនំ​សេក​ចំនួន​៥អង្គ និង​​ចាប់​ឃុំ​ខ្លួន​​ពលរដ្ឋ​ខ្មែរ​ក្រោម​ចំនួន​​​បី​នាក់​​ក្រោម​បទ​ចោទ​ប្រកាន់«កេង​ចំណេញ​លើ​សិទ្ធិ​សេរីភាព និង​លទ្ធិប្រជាធិបតេយ្យ» តាម​មាត្រា ៣៣១ និង​ ​​ពី​បទ «ការ​ចាប់ខ្លួន ឃាត់ខ្លួន ឬ​ឃុំ​ខ្លួន​មនុស្ស​ដោយ​ខុស​ច្បាប់» តាម​មាត្រា ១៥៧ នៃ​ក្រម​ព្រហ្មទណ្ឌ​វៀតណាម។

ក្នុង​ចំណោម​ព្រះសង្ឃ​ទាំង​ ​៥​ អង្គ​នោះ​រួមមាន​ ព្រះចៅ​អធិការ​វត្ត​​​ទ្រនំ​សេក​ព្រះភិក្ខុ​​ ថាច់ ចន្ទតារា និង​ព្រះភិក្ខុ​​​ យឿង ខាយ​ ដែល​ជា​សកម្មជន​សង្ឃ​ខ្មែរ​ក្រោម​ធ្លាប់​​​បាន​ចូល​រួម​យ៉ាង​សកម្ម​​​​ក្នុង​ការ​ផ្សព្វផ្សាយ​សិទ្ធិ​ជនជាតិ​ដើម​ដល់​ពលរដ្ឋ​ខ្មែរ​ក្រោម និង​ធ្លាប់​ត្រូវ​បាន​អាជ្ញាធរ​វៀតណាម​ឃាត់​ខ្លួន​សួរ​ចម្លើយ​​នៅ​ប៉ុស្តិ៍​នគរបាល​ជា​ច្រើន​ដង។

គិត​មក​ទល់​ពេល​នេះ​ មាន​ព្រះសង្ឃ សកម្មជន និង​ពលរដ្ឋ​ខ្មែរ​ក្រោម​ចំនួន​ ១២​ អង្គ​នាក់​ហើយ​ត្រូវ​បាន​អាជ្ញាធរ​វៀតណាម​ចាប់​ដាក់​ពន្ធនាគារ។ ចំណែក​ព្រះសង្ឃ​ខ្មែរ​ក្រោម​មួយ​អង្គ​ទៀត​គឺ​ព្រះភិក្ខុ គឹម សំរិន្ទ ដែល​ជា​សកម្មជន​សង្ឃ និង​ជា​​អ្នក​ផ្ដួចផ្ដើម​កសាង​រូប​សំណាក​លោក​ឧកញ៉ា សឺន គុយ តម្កល់​ទុក​នៅ​ផ្ទះ​ក្នុង​ខេត្ត​ព្រះ​ត្រពាំង  កាល​ពី​ថ្ងៃ​ទី​២៥ មីនា ត្រូវ​បាន​គណៈ​សង្ឃ​ខេត្ត​ក្រោម​ឥទ្ធិពល​រដ្ឋ​វៀតណាម​ និង​អាជ្ញាធរ​ខេត្ត បាន​ប្រកាស​មិន​ទទួល​ស្គាល់​ព្រះអង្គ​ជា​អ្នក​បួស និង​មិន​អនុញ្ញាត​ឱ្យ​វត្ត​ទាំង ១៤៣ ក្នុង​ខេត្ត​ព្រះ​ត្រពាំង​ទទួល​យក​ព្រះអង្គ​គង់​នៅ។ បច្ចុប្បន្ន​ ព្រះភិក្ខុ គឹម សំរិន្ទ កំពុង​គង់​នៅ​ផ្ទះ​ជា​មួយ​ញោម​ស្រី និង​សាច់ញាតិ​របស់​ព្រះអង្គ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។