សម្ព័ន្ធអ្នកសារព័ត៌មានកម្ពុជា ស្នើសុំឲ្យរដ្ឋាភិបាល ធានាថា សិទ្ធិ សេរីភាព និងសុវត្ថិភាពរបស់អ្នកសារព័ត៌មាន អាចរាយការណ៍បទល្មើសនានា ដោយគ្មានការគំរាមកំហែង ឬធ្វើបាប។ សំណើនេះ ធ្វើឡើងក្រោយពេល ដែលអ្នកសារព័ត៌មានម្នាក់បានស្លាប់ក្នុងភាពមន្ទិលសង្ស័យ និងមួយចំនួនទៀតបានរងអំពើហិង្សា។ រីឯអ្នកសារព័ត៌មានក៏ស្នើឲ្យរដ្ឋាភិបាលចាត់វិធានការ ចាប់ជនល្មើស ដែលតែងតែបង្កការគំរាមកំហែង និងហិង្សាលើអ្នកសារព័ត៌មាន ដើម្បីធានាថា កម្ពុជាចូលរួមលើកស្ទួយការបំពេញវិជ្ជាជីវៈសារព័ត៌មានដោយគ្មានការភ័យខ្លាច និងមិនលំអៀង។
សម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា (CamboJA) ចេញសេចក្ដីថ្លែងការណ៍នៅថ្ងៃទី៣០ កញ្ញា បង្ហាញក្ដីព្រួយបារម្ភ ចំពោះហេតុការណ៍គំរាមកំហែងអ្នកសារព័ត៌មានជាបន្តបន្ទាប់។ ក្នុងនោះ មានករណី ជនមិនស្គាល់មុខព្រួតគ្នាវាយដំក្រុមអ្នកសារព័ត៌មាននៅខេត្តត្បូងឃ្មុំ និងករណីអ្នកសារព័ត៌មានម្នាក់ស្លាប់នៅតាមផ្លូវ ពេលចេញពីកន្លែងការងារ កាលពីពេលថ្មីៗ នេះ។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា លោក ណុប វី សង្កេតឃើញថា មួយរយៈពេលចុងក្រោយនេះ អ្នកសារព័ត៌មាននៅកម្ពុជា រងការគំរាមកំហែងជាបន្តបន្ទាប់ ដោយសារការរាយការណ៍របស់ខ្លួន ពាក់ព័ន្ធនឹងបទល្មើស។ លោក ចង់ឲ្យរដ្ឋាភិបាល ធានាថា អ្នកសារព័ត៌មានអាចប្រើប្រាស់សិទ្ធិសេរីភាពរាយការណ៍ព័ត៌មាន ដោយគ្មានការរំលោភបំពាន និងគ្មានការភ័យខ្លាច។ លោកបន្តថា នៅពេលអ្នកសារព័ត៌មានរងការគំរាមកំហែងបែបនេះ និងធ្វើឲ្យរដ្ឋាភិបាលបាត់បង់នូវប្រភពដំណឹងដ៏សំខាន់ ដែលត្រូវយកមកពិចារណា និងធ្វើសេចក្ដីសម្រេចចិត្តក្នុងការដោះស្រាយបញ្ហា៖ « ការគំរាមកំហែង ឬមួយការ ដែលរហូតបណ្ដាលឲ្យមានអ្នកសារព័ត៌មានស្លាប់ គឺជាចំណុចមួយ ដែលអាចនឹងរាំងខ្ទប់ ចំពោះការអនុវត្តការងាររបស់ក្រុមអ្នកសារព័ត៌មាន ជាពិសេស អ្នកសារព័ត៌មានឯករាជ្យ អ្នកសារព័ត៌មាន ដែលគាត់ហានធ្វើសេចក្ដីរាយការណ៍ពីបទល្មើសព្រៃឈើអីហ្នឹង ! វាប៉ះពាល់ទៅដល់សិទ្ធិទទួលបានព័ត៌មានរបស់ប្រជាពលរដ្ឋយើងផងដែរ » ។
កាលពីយប់ថ្ងៃទី២៨ កញ្ញា ជនមិនស្គាល់មុខមួយក្រុម បានព្រួតគ្នាគប់បំបែកកញ្ចក់ឡាន និងប្រើហិង្សាលើក្រុមអ្នកសារព័ត៌មានដែល កំពុងធ្វើដំណើរនៅខេត្តត្បូងឃ្មុំ ។ ខេមបូចា បានស្រង់សំដីអ្នកសារព័ត៌មានម្នាក់ ក្នុងហេតុការណ៍នោះថា ជនមិនស្គាល់មុខ មានគ្នាប្រហែល ៧នាក់ ប្រដាប់ដោយកាំបិត ពូថៅ និងដំបង បានធ្វើសកម្មភាពហិង្សាលើក្រុមអ្នកសារព័ត៌មានចំនួន ៥នាក់ នៃស្ថាប័នផ្សេងៗគ្នា បណ្ដាលឲ្យអ្នកសារព័ត៌មាន ៤នាក់ រងរបួសធ្ងន់ត្រង់ឆ្អឹងជំនីរ និងម្នាក់រងរបួសស្រាល។
ចំណែកករណីដាច់ដោយឡែកមួយទៀត គឺអ្នកសារព័ត៌មានម្នាក់ នៃសារព័ត៌មាន ស៊ីប៊ីអ៊ិន (CBNTV Online) ឈ្មោះ គួយ ពិសិត អាយុ ២៤ ឆ្នាំ ត្រូវគេប្រទះឃើញដេកស្លាប់លើថ្នល់ កាលពីយប់ថ្ងៃទី២៩ កញ្ញា នៅក្នុងសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។ ខេមបូចា បានស្រង់សំដី និពន្ធនាយក នៃសារព័ត៌មាននេះ គឺលោក ឆៃ សុចិត្ត ថា បុគ្គលិករបស់លោកបានស្លាប់ពេលរូបគេធ្វើដំណើរចេញពីកន្លែងការងារ នៅម៉ោង ១១កន្លះយប់។
ក្រោយករណីស្លាប់នេះ សារព័ត៌មានក្នុងស្រុកខ្លះ (សារព័ត៌មានហង្សតូច) ចុះផ្សាយថា អ្នកកាសែតដែលស្លាប់នោះ ត្រូវគេលបវាយចំក្បាល ពេលកំពុងជិះម៉ូតូបណ្ដាលឲ្យស្លាប់ ហើយនៅកន្លែងកើតហេតុ មានបន្សល់ទុកឈើជ្រុងមួយកំណាត់ប្រហែល ៣ចង្អាម មួយដើម រួមជាមួយសម្ភារៈផ្សេងទៀតរបស់ជនរងគ្រោះ។
តែយ៉ាងណា អាជ្ញាធរ អះអាងថា ករណីនេះ គឺអ្នកកាសែត ដែលស្លាប់នោះ ជិះម៉ូតូដួល ដោយខ្លួនឯង ហើយប៉ូលិស បានបញ្ចប់ការស្រាវជ្រាវសំណុំរឿងនេះហើយ ដោយសន្មតថា គឺជាករណីគ្រោះថ្នាក់ចរាចរណ៍។
ជុំវិញករណី អំពើហិង្សា និងការស្លាប់របស់អ្នកកាសែត អ្នកនាំពាក្យក្រសួងព័ត៌មាន លោក មាស សុភ័ណ្ឌ ប្រាប់អាស៊ីសេរីដោយខ្លីថា ក្រសួងទុករឿងនេះឱ្យអាជ្ញាធរមានសមត្ថកិច្ចជាអ្នកដោះស្រាយ។
អ្នកសារព័ត៌មាននៃវិទ្យុសំឡេងប្រជាធិបតេយ្យវីអូឌី (VOD) កញ្ញា ខាន់ លក្ខិណា និយាយថា ហេតុការណ៍កើតឡើងលើអ្នកសារព័ត៌មាននាពេលថ្មីនេះ ធ្វើឲ្យកញ្ញាព្រួយបារម្ភពីសុវត្ថិភាពក្នុងពេលចុះយកព័ត៌មានម្តងៗ។ កញ្ញាបន្ថែមថា អំពើហិង្សា និងការគំរាមកំហែងលើអ្នកសារព័ត៌មានកន្លងមក គឺទាន់ដែលឃើញជនល្មើសត្រូវចាប់យកមកផ្ដន្ទាទោសនោះទេ។ ទោះជាយ៉ាងណា កញ្ញាអះអាងថា នឹងនៅតែបន្តរាយការណ៍ព័ត៌មានពិតតាមវិជ្ជាជីវៈ ដើម្បីផ្តល់ព័ត៌មានពិតដល់អ្នកស្ដាប់របស់កញ្ញាដដែល៖ « សារព័ត៌មានបច្ចុប្បន្នហ្នឹង ខ្ញុំបារម្ភពីសុវត្ថិភាពក្នុងការចុះទៅយកព័ត៌មាន ឬខ្ញុំចុះធ្វើបទយកការណ៍ ឬព័ត៌មានស៊ើបអង្កេតអីហ្នឹង ខ្ញុំបារម្ភពីសុវត្ថិភាព ខណៈពេលដែលប្រទេសយើងបច្ចុប្បន្នវាអត់ទាន់មានការការពារផ្លូវច្បាប់ ឬការដោះស្រាយបញ្ហានៅពេលដែលអ្នកសារព័ត៌មានជួបបញ្ហា ដូចជា គេវាយ ចោទប្រកាន់អីចឹង ច្បាប់យើងហ្នឹងអត់ទាន់មាន មានន័យថា នៅលំអៀង នៅមានការខ្វះចន្លោះណាបង » ។
របាយការណ៍របស់អង្គការលីកាដូ ចេញផ្សាយ នៅខែឧសភាបង្ហាញថា ស្ថានភាពអ្នកសារព័ត៌មាននៅកម្ពុជា នៅតែប្រឈម ការចាប់ចង ការចោទប្រកាន់តាមផ្លូវច្បាប់ និងប្រព័ន្ធតុលាការដែលរំលោភធ្ងន់ធ្ងរទៅលើសិទ្ធិពលរដ្ឋក្នុងការទទួលបានព័ត៌មាន។ អង្គការសិទ្ធិមនុស្សមួយនេះ រកឃើញទៀតថា អ្នកសារព័ត៌មានមួយចំនួន បានកម្រិតសិទ្ធិសេរីភាព ខ្លួនឯងក្នុងការរាយការណ៍ព័ត៌មានដែលរសើប និងព័ត៌មានដែលខូចប្រយោជន៍អ្នកមានអំណាចមួយចំនួន។
គិតចាប់តាំងពីឆ្នាំ១៩៩៣ មក អ្នកសារព័ត៌មានចំនួន ១៣នាក់យ៉ាងតិច ត្រូវបានគេធ្វើឃាត ក្នុងនោះករណីភាគច្រើន អាជ្ញាធរមិនបានចាប់ខ្លួនជនដៃដល់ណាម្នាក់យកមកផ្ដន្ទាទោសនោះឡើយ ដែលនេះ គឺជាការបង្កើតឱ្យមានវប្បធម៌និទណ្ឌភាពដ៏រ៉ាំរ៉ៃនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។