មជ្ឈមណ្ឌល​​សិទ្ធិមនុស្ស​កម្ពុជា​(CCHR) ​អំពាវនាវ​​ឲ្យ​បញ្ឈប់​​ការ​​ប្រើ​​អំពើ​​ហិង្សា​​លើ​​ស្ត្រី

ដោយ ម៉ៅ សុធានី
2021-11-25
Share
មជ្ឈមណ្ឌល​​សិទ្ធិមនុស្ស​កម្ពុជា​(CCHR) ​អំពាវនាវ​​ឲ្យ​បញ្ឈប់​​ការ​​ប្រើ​​អំពើ​​ហិង្សា​​លើ​​ស្ត្រី រូបភាព​សិល្បៈបង្ហាញ​ពីការ​ប្រឆាំង​អំពើ​ហិង្សា​លើ​ស្ត្រី​និង​ក្មេងស្រី រៀបចំ​ដោយ​ស្ថានទូត​បារាំង​ប្រចាំ​នៅ​កម្ពុជា​កាលពី​ថ្ងៃទី២២ ខែវិច្ឆិកា ឆ្នាំ២០២១។
រូប៖ ហ្វេសប៊ុកស្ថានទូតបារាំងប្រចាំនៅកម្ពុជា។

មជ្ឈមណ្ឌល​សិទ្ធិមនុស្ស​កម្ពុជា (CCHR) អំពាវនាវ​ឲ្យ​រដ្ឋាភិបាល​កម្ពុជា​ពង្រឹង​វិធានការ​ច្បាប់​ ដើម្បី​បញ្ឈប់​អំពើ​ហិង្សា​លើ​ស្ត្រី។ ការអំពាវនាវ​នេះ​ ធ្វើឡើង​ក្នុង​ឱកាស​ប្រារព្ធ​ទិវា​អន្តរជាតិ​ដើម្បី​បំបាត់​អំពើ​ហិង្សា​លើ​ស្ត្រី ថ្ងៃទី២៥ ខែវិច្ឆិកា។

សេចក្ដី​ប្រកាសព័ត៌មាន​របស់​មជ្ឈមណ្ឌល​សិទ្ធិមនុស្ស​កម្ពុជា ​កាល​ពីថ្ងៃទី២៤ ខែវិច្ឆិកា ម្សិលមិញ ​អោយ​ដឹងថា ​ស្ត្រីម្នាក់​ក្នុង​ចំណោម​៥​នាក់នៅ​ប្រទេស​កម្ពុជា រង​ការ​វាយ​ធ្វើបាប​ពី​ដៃគូ​របស់​គេ​ ដែល​ចំនួន​នេះ ត្រូវ​បាន​គេ​ជឿជាក់​ថា បាន​កើន​ឡើង​ចាប់​តាំង​ពី​ការ​រាតត្បាត​នៃ​ជំងឺ​កូវីដ-១៩។

មជ្ឈមណ្ឌល​សិទ្ធិមនុស្ស​កម្ពុជា ផ្តើមធ្វើ​យុទ្ធនាការ​មួយ​ដែល​មាន​ឈ្មោះ​ថា «សកម្មភាព​១៦​ថ្ងៃ ដើម្បី​បញ្ចប់​អំពើ​ហិង្សា​ផ្អែក​ទៅ​លើ​យេនឌ័រ» ដែល​នឹង​ចាប់​ផ្តើមពីថ្ងៃទី២៥ ខែវិច្ឆិកា រហូត​ដល់​ថ្ងៃទិវា​សិទ្ធិមនុស្ស​អន្តរជាតិ​១០​ធ្នូ។ មជ្ឈមណ្ឌល​សិទ្ធិមនុស្ស​កម្ពុជា បន្តថា យុទ្ធនាការ​នេះ​ ដើម្បី​លើក​កម្ពស់​ការ​យល់​ដឹង​អំពី​សិទ្ធិស្ត្រី និង​ផលប៉ះពាល់​នានា​នៃ​អំពើ​ហិង្សា នៅ​ក្នុង​សហគមន៍​ ព្រមទាំង​ជំរុញ​ឲ្យ​រដ្ឋាភិបាល​ចាត់​វិធានការ​ច្បាស់លាស់​និង​ទាន់​ពេល​វេលា​ ដើម្បី​បញ្ចប់​អំពើ​ហិង្សា​ទាក់ទង​នឹង​យេនឌ័រ​នៅ​កម្ពុជា។

ប្រភព​ដដែល​បន្តថា ក្នុង​អំឡុង​១៦​ថ្ងៃ​នេះ មជ្ឈមណ្ឌល​សិទ្ធិមនុស្ស​កម្ពុជា នឹង​ចូលរួម​ប្រារព្ធ​ទិវា​សិទ្ធិ​មនុស្ស​អន្តរជាតិ​សំខាន់ៗ​មួយ​ចំនួន​ទៀត រួម​មាន ទិវា​អន្តរជាតិ​នៃការ​ការពារ​សិទ្ធិមនុស្ស​ជា​ស្ត្រី ២៨ ខែវិច្ឆិកា, ទិវា​អ្នក​ការពារ​សិទ្ធិមនុស្ស​អន្តរជាតិ​៩​ធ្នូ និង​ទិវា​សិទ្ធិមនុស្ស​អន្តរជាតិ ១០ ធ្នូ។ ចំណែក​ប្រធាន​បទ​នៃ​ទិវា​សិទ្ធិ​មនុស្ស​អន្តរជាតិ​ឆ្នាំ​នេះផ្តោត​លើ «កាត់​បន្ថយ​វិសមភាព​ តាម​រយៈការ​ជំរុញ​ការ​គោរព​សិទ្ធិ​មនុស្ស» ដែល​ជា​ឱកាស​របស់​អង្គការ​សង្គម​ស៊ីវិល ចូលរួម​ក្នុងការ​លុបបំបាត់​វិសមភាព​ និង​តស៊ូមតិ​ដើម្បី​សិទ្ធិស្មើគ្នា​នៅក្នុង​ប្រទេស​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល