អង្គការលីកាដូ រកឃើញថា ក្នុងស្ថានភាពនៃការរាតត្បាតជំងឺកូវីដ១៩ (Covid-19) លើកទី៣ ច្រើនខែមកនេះ កុមារមិនអាចទទួលបានសិទ្ធិ និងសុខុមាលភាពពេញលេញទេ ពិសេសសិទ្ធិក្នុងការអប់រំ និងអនីតិជនកំពុងស្ថិតក្នុងពន្ធនាគារ។ អង្គការនេះ ស្នើសុំរដ្ឋាភិបាលឱ្យយកចិត្តទុកដាក់បន្ថែម ចំពោះកុមារនៅក្នុងស្ថានភាពឆ្លងជំងឺកូវីដ១៩ នេះ។
អង្គការលីកាដូចេញសេចក្ដីថ្លែងការណ៍ក្នុងទិវាកុមារអន្តរជាតិ ១មិថុនា បញ្ជាក់ថា កុមាររងផលប៉ះពាល់ជាច្រើនក្នុងរយៈពេលនេះ ទាំងសិទ្ធិ សុខភាព ស្មារតី និងការអប់រំ ជាដើម។
នាយករងទទួលបន្ទុកកម្មវិធីឃ្លាំមើលនៃអង្គការលីកាដូ លោក អំ សំអាត ឲ្យដឹងបន្ថែមថា បញ្ហាទាំងនេះ បានបណ្ដាលឲ្យកុមារកែប្រែឥរិយាបថ និងបង្កើតភាពតប់ប្រមល់។ លោកទទួលស្គាល់ថា រដ្ឋាភិបាលបានបង្ហាញឆន្ទៈជាទូទៅ ពីការយកចិត្តទុកដាក់ចំពោះកុមារ តែជាក់ស្ដែង កុមារមិនទាន់ទទួលបានតម្រូវការពិតប្រាកដនោះទេ។
លោក អំ សំអាត បន្តថា កុមារទាំងអស់ មិនទទួលបានការសិក្សាស្មើភាពគ្នាទេ ក្នុងស្ថានភាពបិទខ្ទប់ និងការរាតត្បាតកូវីដកន្លងមកនេះ ដោយសារកុមារជាច្រើន គ្មានលទ្ធភាពបន្តការសិក្សាតាមប្រព័ន្ធឌីជីថល ពិសេសគឺកុមារនៅតាមជនបទ។ ចំណែកអនីតិជន និងកុមាររស់នៅជាមួយម្ដាយក្នុងមណ្ឌលឃុំឃាំង កាន់តែមានហានិភ័យជាងកុមារនៅក្រៅឃុំទៅទៀត គឺពួកគេប្រឈមនឹងហានិភ័យខ្ពស់នៃការផ្ទុះជំងឺកូវីដ១៩ នៅក្នុងពន្ធនាគារ ដែលមានស្ថានភាពគ្រោះថ្នាក់ និងចង្អៀតណែនខ្លាំង។
លោកអំពាវនាវដល់រដ្ឋាភិបាលឱ្យធានាថា កុមារទាំងអស់ នឹងទទួលបានការសិក្សាពីចម្ងាយតាមរយៈឌីជីថល ឬទូរទស្សន៍ ដោយស្មើភាពគ្នា ក្នុងស្ថានភាពការឆ្លងជំងឺកូវីដ-១៩នេះ។ លោកក៏ស្នើសុំអាជ្ញាធរឱ្យបង្កើនការយកចិត្តទុកដាក់ចំពោះអនីតិជន និងកុមារ ដែលរស់នៅក្នុងពន្ធនាគារជាមួយម្ដាយ៖ « យើងនៅតែឃើញថា កុមារកំពុងតែមានបញ្ហាច្រើន ដោយសារតែក្នុងអំឡុងពេលកូវីដ១៩ នេះ កុមារហាក់ដូចជា អាចត្រូវបានមើលរំលងផងដែរ អំពីសិទ្ធិ សុខុមាលភាព និងសំឡេងរបស់ពួកគាត់»។
អង្គការលីកាដូ លើកឡើងបន្តក្នុងសេចក្ដីថ្លែងការណ៍ថា អ្នកជាប់ពន្ធនាគារជាអនីតិជន និងក្មេងដែលតាមម្ដាយនៅក្នុងមណ្ឌលឃុំឃាំង មានជាង ១.០០០នាក់ កំពុងប្រឈមហានិភ័យនៃការឆ្លងជំងឺកូវីដ-១៩។ ចំណែកការបិទសាលារៀនទូទាំងប្រទេសជាងមួយឆ្នាំនេះ ប៉ះពាល់ដល់ការសិក្សារបស់កុមារជាងបីលាន (៣,២លាន) នាក់។
ឆ្លើយតបនឹងសេចក្ដីថ្លែងការណ៍នេះ តំណាងក្រសួងអប់រំស្វាគមន៍ ការសហការរបស់អង្គការស្ថាប័ននានា ក្នុងទិសដៅលើកកម្ពស់វិស័យអប់រំនៅកម្ពុជា។ អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បញ្ជាក់ថា បុគ្គលិកអប់រំទាំងអស់ នៅតែបន្តបង្រៀនសិស្សានុសិស្សជាធម្មតា តាមកម្មវិធីសិក្សាពីចម្ងាយ ដែលដាក់ចេញដោយក្រសួង និងមានការចាក់ផ្សាយតាមទូរទស្សន៍ជាដើម។
លោកបន្តថា ចំពោះសិស្សនៅតាមជនបទ ដែលគ្មានលទ្ធភាពរៀនតាមប្រព័ន្ធឌីជីថល ខាងមន្ទីរអប់រំអាចអនុញ្ញាតឲ្យបែងចែកគ្រូឱ្យដើរបង្រៀនសិស្សជាក្រុមតូចៗ នៅតាមសហគមន៍ តាមភូមិរបស់ពួកគេ។ មន្ត្រីដដែល អះអាងថា គុណភាពអប់រំ ក្នុងឆ្នាំសិក្សា ២០២១ កើនឡើងជាងគុណភាពសិក្សា កាលឆ្នាំ២០២០។ តែយ៉ាងណាក្ដី លោកថា ការសិក្សានេះ មិនអាចយកប្រៀបនឹងមុនពេលមានវិបត្តិជំងឺកូវីដ-១៩ បានទេ៖ « ការសិក្សាជាបណ្ដុំនេះ ត្រូវបានប្រកាសជាសាធារណៈ ដោយក្រសួងអប់រំ យុវជន និងកីឡា អាចធ្វើទៅបាន បើគណៈគ្រប់គ្រងនៅតាមមន្ទីរអប់រំ យុវជន និងកីឡា បានធ្វើចំណាត់ថ្នាក់ថា ជាហានិភ័យមានកម្រិតទាប ដែលនឹងទទួលជាពណ៌លឿង នោះគឺការសិក្សាជាបណ្ដុំតូចៗ នោះ អាចធ្វើទៅបានហើយ»។
ប៉ុន្តែផ្ទុយពីការអះអាងនេះ មន្ត្រីសង្គមស៊ីវិល ឃ្លាំមើលវិស័យអប់រំ និងសិទ្ធិគ្រូបង្រៀននៅកម្ពុជាសង្កេតឃើញថា កុមារមិនទទួលបានការអប់រំប្រសើរនោះទេ។ ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយាវី យល់ថា កុមារជាច្រើនបានបោះបង់ចោលការសិក្សា ក្នុងរយៈពេលបិទសាលារៀនច្រើនខែមកនេះ។ អ្នកស្រីអះអាងថា មានសិស្សតែប្រមាណ ២០ភាគរយ ប៉ុណ្ណោះ មានលទ្ធភាព និងទទួលបានការសិក្សាពេញលេញ៖ « លោកគ្រូ អ្នកគ្រូ យើងគាត់ចាស់ៗ ហើយ។ ពេលខ្លះគាត់អត់ទាន់ចេះទាំងរបៀបចូលបង្រៀន ឬក៏បង្កើតតាមអនឡាញហ្នឹងផង។ កុំថាឡើយសិស្សានុសិស្ស សូម្បីតែលោកគ្រូ អ្នកគ្រូយើងក៏គាត់ខ្វះខាត ក្នុងការចូលបង្រៀនតាមប្រព័ន្ធអនឡាញហ្នឹងដែរ។ នេះហើយ ជាកត្តាមួយ ដែលខ្ញុំគិតថា វិស័យអប់រំ បានធ្លាក់ចុះដល់កម្រិតនេះណា»។
លោកនាយករដ្ឋមន្ត្រី ហ៊ុន សែន ក៏បានចេញលិខិតចំហមួយក្នុងទិវាកុមារអន្តរជាតិនេះដែរ ដោយបញ្ជាក់ថា រដ្ឋាភិបាលប្ដេជ្ញាលុបបំបាត់អំពើហិង្សាលើកុមារទាំងផ្លូវកាយ ផ្លូវចិត្ត ផ្លូវភេទ និងបញ្ហាប្រឈមនានា ហើយកម្ពុជាបានសហការជាមួយប្រទេសជាដៃគូសកល រួមគ្នាអនុវត្តអនុសញ្ញាស្ដីពីសិទ្ធិកុមារ។ លោកអំពាវនាវដល់អាជ្ញាធរពាក់ព័ន្ធគ្រប់លំដាប់ថ្នាក់ និងដៃគូអភិវឌ្ឍន៍ជួយពង្រឹងផ្តល់សេវាគាំពារដល់កុមារតូចៗ រួមមានអាហារូបត្ថម្ភ សុខភាពបន្តពូជ ការបណ្ដុះបណ្ដាលជំនាញវិជ្ជាជីវៈបំណិនជីវិត ការបង្ការ ការលុបបំបាត់ការជួញដូរមនុស្ស និងរូបភាពអាសអាភាសកុមារ និងបង្កើនការអប់រំ និងផ្សព្វផ្សាយ ពង្រឹងការពារ និងតាមដានការអនុវត្តសិទ្ធិកុមារពីថ្នាក់ជាតិដល់ថ្នាក់ក្រោមជាតិ។
ទោះជាយ៉ាងណា អង្គការលីកាដូសំណូមពរឲ្យរដ្ឋាភិបាល និងភាគីពាក់ព័ន្ធទាំងអស់ លើកកម្ពស់សិទ្ធិនិងតម្រូវការរបស់កុមារ ជាបញ្ហាស្នូល ចំពោះស្ថានភាពជំងឺកូវីដ-១៩ និងធានាថា គ្មានកុមារណាម្នាក់ ត្រូវបានមើលរំលង។ អង្គការនេះ ក៏ជំរុញឲ្យរដ្ឋាភិបាល ផ្ដល់ការគាំទ្រ ទាំងមធ្យោបាយចាំបាច់ ការប្រឹក្សាផ្នែកសង្គម និងហិរញ្ញវត្ថុ ដើម្បីឲ្យកុមារទទួលបានសិទ្ធិ និងសុខុមាលភាព ក្នុងអំឡុងពេលមានវិបត្តិជាសកលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។