មន្ត្រីអង្គការសង្គមស៊ីវិលលើកឡើងថា នាយករដ្ឋមន្ត្រីកម្ពុជា និងថៃគួរតែលើកយកបញ្ហាសិទ្ធិមនុស្សមកពិភាក្សារួមគ្នាដោះស្រាយជាពិសេសបញ្ហាការបាត់ខ្លួនសកម្មជននយោបាយរបស់ថៃ លោក វ៉ាន់ឆាឡឺម សាតស័ក្ដិសិទ្ធិ (Wanchalerm Satsaksit) នៅកម្ពុជា ក្នុងជំនួបជំនួបរវាងមេដឹកនាំប្រទេសទាំងពីរ។ ការលើកនេះធ្វើឡើង បន្ទាប់ពីនាយករដ្ឋមន្ត្រីថៃ លោក សេដ្ឋា ថាវីស៊ីន (Srettha Thavisin) ជួបពិភាក្សាការងារជាមួយ លោក ហ៊ុន ម៉ាណែតនៅរាជធានីភ្នំពេញនៅព្រឹកថ្ងៃទី២៨កញ្ញា។
អ្នកការពារសិទ្ធិមនុស្សលើកឡើងថា ក្រៅអំពីបញ្ហាសេដ្ឋកិច្ចបញ្ហាសិទ្ធិមនុស្សក៏ជារឿងសំខាន់ដែរ ដែលមេដឹកនាំកម្ពុជានិងថៃគួរតែរួមគ្នាដោះស្រាយដើម្បីភាពសុខសាន្តរបស់ពលរដ្ឋប្រទេសទាំងពីរ។
នាយកទទួលបន្ទុកកិច្ចការទូទៅនៃអង្គការលីកាដូ (Licadho) លោក អំ សំអាត ប្រាប់វិទ្យុអាស៊ីសេរីនៅថ្ងៃទី២៨ កញ្ញា ថា ការបាត់ខ្លួនរបស់សកម្មជននយោបាយថៃលោក វ៉ាន់ឆាឡឺម សាតស័ក្ដិសិទ្ធិ មកទល់ពេលមានរយៈពេលជាង ៣ឆ្នាំហើយ អាជ្ញាធរពុំទាន់រកឃើញមូលហេតុនៃការបាត់ខ្លួន នៅឡើយ។ លោកថា ប្រមុខដឹកនាំរដ្ឋាភិបាលប្រទេសទាំងពីរគួរតែជជែកពិភាក្សាគ្នាដើម្បីដោះស្រាយបញ្ហានេះ។
លោក អំ សំអាត៖ «នេះគ្រាន់តែជាការគិតគូរ និងការយល់ឃើញរបស់សង្គមស៊ីវិលទេ ប៉ុន្តែការដែលជួបគ្នារវាងទស្សនកិច្ចរបស់នាយករដ្ឋមន្ត្រីថៃ មកកម្ពុជាមានការងារច្រើនណាស់ដែលនាយករដ្ឋមន្ត្រីទាំងពីរបានជជែកគ្នា។ ប៉ុន្តែអ្វីដែលយើងចង់ឃើញពីព្រោះបញ្ហាទាំងអស់នេះគឺជាបញ្ហាចម្រូងចម្រាសហើយមានការរិះគន់ជាច្រើន មកទាក់ទងនឹងការបាត់ខ្លួនរបស់លោក វ៉ាន់ ឆាឡឹម»។
ចំណែកប្រធានសមាគមការពារសិទ្ធិមនុស្សអាដហុក(Adhoc) លោក នី សុខា មានប្រសាសន៍ថា មេដឹកនាំកម្ពុជា និងថៃគួរតែពិភាក្សាគ្នាសម្រួលឱ្យជនភៀសខ្លួនប្រទេសទាំងពីរអាចភៀសខ្លួនបានដោយសុវត្ថិភាព ដោយមិនមានការធ្វើទុក្ខបុកម្នេញ និងការចាប់បញ្ជូនត្រឡប់ទៅប្រទេសកំណើត។
លោក នី សុខា៖ «យើងដឹងហើយថា នៅពេលដែលបញ្ហាវិបត្តិប្រទេសនីមួយៗវាតែងតែមានជនភៀសខ្លួន ដែលអាចគេចខ្លួន ដើម្បីរកការជ្រកកោននៅប្រទេសជិតខាង។ អីចឹងយើងចង់ឱ្យមានការពង្រឹងកិច្ចសហការក្នុងការដោះស្រាយបញ្ហាដែលធ្វើយ៉ាងណាដែលឱ្យជនភៀសខ្លួនទាំងអស់នឹងរស់នៅដោយមានសុវត្ថិភាព។ ជាជាងកុំឱ្យចូលមកដល់នៅក្នុងប្រទេសនីមួយៗហើយមានការភ័យខ្លាចមានការបាត់ខ្លួន ក៏ដូចជាមានការធ្វើបាប ឬក៏មានការចាប់បញ្ជូនត្រឡប់ទៅប្រទេសវិញអីជាដើម»។
ការលើករបស់មន្ត្រីសង្គមស៊ីវិលនេះ បន្ទាប់ពីនាយករដ្ឋមន្ត្រីថៃ លោក សេដ្ឋា ថាវីស៊ីន ធ្វើទស្សនកិច្ចទៅដល់កម្ពុជាហើយនៅព្រឹកថ្ងៃទី២៨ កញ្ញា ដែលជាដំណើរទស្សនកិច្ចផ្លូវការទៅកាន់ប្រទេសក្នុងតំបន់អាស៊ានដំបូងគេបង្អស់ ចាប់តាំងពីពេលលោកឡើងកាន់អំណាចក្នុងអំឡុងពេលជាង១ខែនេះ។ ហ្វេសប៊ុករបស់នាយករដ្ឋមន្ត្រី ហ៊ុន ម៉ាណែត ឱ្យដឹងថា នៅក្នុងជំនួបនៅវិមានសន្តិភាព មេដឹកនាំនៃប្រទេសទាំងពីរបានអបអរសាទរគ្នាទៅវិញទៅមក ដែលបានឡើងកាន់តំណែងនាយករដ្ឋមន្ត្រីថ្មីដូចគ្នា។ មេដឹកនាំប្រទេសទាំងពីរ ក៏បានពិភាក្សាគ្នា អំពីកិច្ចសហការទ្វេភាគីកម្ពុជា-ថៃ ដោយផ្តោតជាសំខាន់លើវិស័យពាណិជ្ជកម្ម វិនិយោគ ទេសចរណ៍ ការអប់រំ ការបណ្ដុះបណ្ដាលវិជ្ជាជីវៈ កិច្ចការទូត ទំនាក់ទំនងធុរកិច្ច ទំនាក់ទំនង ប្រជាពលរដ្ឋ និង ប្រជាពលរដ្ឋ។ បន្ថែមពីនេះក៏ជជែកគ្នាអំពីការតភ្ជាប់រវាងប្រទេសទាំងពីរ តាមផ្លូវអាកាស ផ្លូវរថភ្លើង និងផ្លូវថ្នល់ សេដ្ឋកិច្ចឌីជីថល និងសេដ្ឋកិច្ចបៃតង កិច្ចការពាក់ព័ន្ធនឹងអន្តោប្រវេសន៍ សន្តិសុខឆ្លងដែននិង សន្តិសុខអនឡាញជាដើម ។ ប៉ុន្តែមេដឹកនាំប្រទេសទាំងពីរពុំបានជជែកអំពីបញ្ហាសិទ្ធិមនុស្សនិងការបាត់ខ្លួនរបស់សកម្មជននយោបាយថៃនៅឡើយទេ បើទោះជាលោក វ៉ាន់ឆាឡឺម សាតស័ក្ដិសិទ្ធិ គឺជាសកម្មជននយោបាយថៃធ្លាប់គាំទ្រមុតមាំចំពោះគណបក្សភឿថៃ ដែលមានលោក សេដ្ឋា ថាវីស៊ីន កំពុងឡើងធ្វើនាយករដ្ឋមន្ត្រីនៅពេលនេះក្តី។
វិទ្យុអាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា និងអ្នកនាំពាក្យក្រសួងការបរទេស លោក អាន សុខខឿន ដើម្បីសុំអត្ថាធិប្បាយជុំវិញបញ្ហានេះបានទេនៅថ្ងៃទី២៨ កញ្ញា។
លោក វ៉ាន់ឆាឡឺម សាតស័ក្តិសិទ្ធ មានវ័យ ៣៧ឆ្នាំ ត្រូវបានជនប្រដាប់អាវុធមួយក្រុមចាប់ពង្រត់ កាលពីថ្ងៃទី៤ មិថុនា ឆ្នាំ២០២០ ក្នុងពេលដែលលោកកំពុងដើរតាមផ្លូវទៅទិញម្ហូបអាហារ នៅមុខអគារស្នាក់នៅរបស់លោកនៅរាជធានីភ្នំពេញ។ អ្នករិះគន់រដ្ឋាភិបាលថៃរូបនេះ បានរត់គេចចេញពីប្រទេសកំណើតរបស់ខ្លួន បន្ទាប់ពីរដ្ឋប្រហារយោធា ឆ្នាំ២០១៤ និងបានរស់នៅនិរទេសខ្លួនក្នុងប្រទេសកម្ពុជា ហើយលោកនៅតែបន្តរិះគន់រដ្ឋាភិបាលយោធាថៃនៅលើប្រព័ន្ធបណ្ដាញសង្គមរបស់ខ្លួន។
ចំណែកជនភៀសខ្លួនខ្មែរវិញ រយៈពេល២ឆ្នាំចុងក្រោយនេះមានជនភៀសខ្លួនខ្មែរជាច្រើននាក់ត្រូវបានជនមិនស្គាល់មុខវាយឱ្យរបួសនិងមួយចំនួនទៀតត្រូវបានអាជ្ញាធរថៃបញ្ជូនប្រគល់ឱ្យអាជ្ញាធរខ្មែរដាក់ពន្ធនាគារជាបន្តបន្ទាប់។
មន្ត្រីសង្គមស៊ីវិលទទូចឱ្យមេដឹកនាំប្រទេសទាំងពីរជជែកគ្នា និងដោះស្រាយបញ្ហានេះ ដោយផ្អែកលើការគោរពគោលការណ៍សិទ្ធិមនុស្សសាកលជាធំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។