"សេរីភាព​បញ្ចេញមតិ​របស់​ពលរដ្ឋ​កម្ពុជា​និង​ថៃ​ខុសគ្នា​ស្រឡះ​ក្នុង​ពេល​រាតត្បាត​ជំងឺ​កូវីដ​១៩"

ដោយ មាន ឫទ្ធិ
2021-09-03
Share
"សេរីភាព​បញ្ចេញមតិ​របស់​ពលរដ្ឋ​កម្ពុជា​និង​ថៃ​ខុសគ្នា​ស្រឡះ​ក្នុង​ពេល​រាតត្បាត​ជំងឺ​កូវីដ​១៩" លោក​នាយក​រដ្ឋមន្ត្រី ហ៊ុន សែន (ស្ដាំ) និង​លោក​នាយក​រដ្ឋមន្ត្រី​ថៃ បា្រយុទ្ធ ចាន់អូចា (Prayut Chan-O-cha) ធ្វើ​សន្និសីទ​កាសែត​រួម​គ្នា​នៅ​រាជធានី​ភ្នំពេញ ថ្ងៃ​ទី​៧ ខែ​កញ្ញា ឆ្នាំ​២០១៧។ Photo courtesy of Hun Sen's Facebook Page
Photo courtesy of Hun Sen's Facebook Page

កម្ពុជា និង​ថៃ​ជា​ប្រទេស​មាន​ព្រំប្រទល់​ជាប់ ប៉ុន្តែ​អំឡុង​ពេល​ផ្ទះ​ការ​រាតត្បាត​ជំងឺ​កូ​វីដ​១៩​ខ្លាំង​នេះ សេរីភាព​ខាង​ការ​បញ្ចេញមតិ​របស់​ពលរដ្ឋ​ប្រទេស​ទាំងពីរ​ហាក់​ខុសគ្នា​ដាច់​ស្រឡះ​។ ពលរដ្ឋ​ខ្មែរ​មិនអាច​ប្រមូល​ផ្ដុំ​គ្នា​តវ៉ា​បង្ហាញ​ពី​ទុក្ខ​កង្វល់​របស់​ខ្លួន​បានទេ ជាពិសេស​អ្នក​ពាក់ព័ន្ធ​រឿង​នយោបាយ ខុសពី​ប្រទេស​ថៃ ដែល​ប្រជាពលរដ្ឋ​របស់​គេ​រាប់ពាន់​នាក់ ចេញ​តវ៉ា​បណ្ដេញ​នាយករដ្ឋមន្ត្រី​ចេញពី​តំណែង​បាន​ដោយ​សេរី​។ អ្នកវិភាគ​នយោបាយ មើលឃើញ​ថា បញ្ហា​នេះ​ដោយសារ​កម្ពុជា​ងាក​ទៅ​រក​ការគ្រប់គ្រង​បែប​កុម្មុយនិស្ត ច្រើន​ជាង​ប្រទេស​ថៃ។

ប្រទេស​កម្ពុជា​និង​ថៃ​មាន​វិបត្តិ​នយោបាយ​ដូចគ្នា ប៉ុន្តែ​ការអនុវត្ត​សិទ្ធិ​សេរីភាព​របស់​ប្រជាពលរដ្ឋ​ប្រទេស​ទាំងពីរ​មាន​លក្ខណៈ​ខុសគ្នា​ដាច់​ស្រឡះ អំឡុង​ពេល​កំពុង​មាន​ការ​រាតត្បាត​ជំងឺ​កូ​វីដ​១៩​ខ្លាំង​នេះ។

អាជ្ញាធរ​កម្ពុជា​បង្កើន​ការ​រឹតត្បិត​ខ្លាំង​លើ​សិទ្ធិ​សេរីភាព​ជា​មូលដ្ឋាន​របស់​ពលរដ្ឋ​រហូតដល់​ប្រជា​ពលរដ្ឋ​មិន​អាច​ចូលរួម​សម្ដែង​មតិ​បាន​ឡើយ​។ ជារឿយៗ​អាជ្ញាធរ​តែងតែ​បង្ក្រាប​លើ​ក្រុម​យុវជន និង​ប្រជា​ពលរដ្ឋ ជាពិសេស​ក្រុម​ស្ត្រី​ដែល​ជា​ប្រពន្ធ និង​កូន​របស់​ជន​ជាប់ឃុំ​នយោបាយ សូម្បីតែ​ពួកគេ​សម្ដែង​មតិ​ដោយ​សន្តិវិធី​មាន​គ្នា​មិន​ដល់ ១០​នាក់ ក៏​អាជ្ញាធរ​មិន​លើកលែង​ដែរ ។ អាជ្ញាធរ​តែងតែ​ចាត់ទុក​ការ​បង្ក្រាប​នេះ ថា ជា​ការ​អនុវត្ត​ច្បាប់ ដើម្បី​រក្សា​សណ្ដាប់​សង្គម ទោះជា​ក្នុង​រូបភាព​ហិង្សា​ក៏ដោយ។

ប្រពន្ធ​សកម្មជន​បក្ស​ប្រឆាំង​ដែល​កំពុង​ជាប់​នៅ​ពន្ធនាគារ​ព្រៃស លោកស្រី ព្រុំ ចាន់ថា ថ្លែង​ថា បច្ចុប្បន្ន​សិទ្ធិ​សេរីភាព​សម្ដែង​មតិ​នៅ​កម្ពុជា​រួញ​តូច​ខ្លាំង ធ្វើ​ឱ្យ​លោកស្រី​ពិបាក​ក្នុង​ការ​អនុវត្ត​សិទ្ធិ​មួយ​នេះ​។ ស្ត្រី​វ័យ​៤៩​ឆ្នាំ​រូប​នេះ ប្រាប់​ថា ការ​តវ៉ា​កន្លងមក​កង​សន្តិសុខ និង​ប៉ូលិស​ក្រុងភ្នំពេញ​តែង​បង្ក្រាប​ដោយ​ហិង្សា​និង​ជេរប្រមាថ​មក​លើ​ពួក​លោកស្រី​ជាប្រចាំ​។ លោកស្រី​បញ្ជាក់​ថា ការ​តវ៉ា​កន្លង​មក គឺ​ដោយសារ​មិន​ពេញ​ចិត្តនឹង​តុលាការ ដែល​បាន​ចាប់​ប្ដី​និង​កូន​របស់​ពួក​លោក​ស្រី​ដាក់​ពន្ធនាគារ​ដោយ​អយុត្តិធម៌៖ «ធ្វើ​គ្រប់​រូបភាព​ទាំងអស់ ប៉ុន្តែ​ពួក​ខ្ញុំ​នៅតែ​មិន​ខ្លាច​ដដែល ដោយសារ​អ្វី​ដែល​ជំរុញ​ឱ្យ​គឺ ការឈឺចាប់​និង​ទឹកចិត្ត​យើង​ដែល​រង​អំពើ​អយុត្តិធម៌​សម្រាប់​ក្រុម​គ្រួសារ​ពួក​ខ្ញុំ។អីចឹង​ពួក​ខ្ញុំ​ត្រូវតែ​តវ៉ា​មិន​រាថយ​មិន​ញញើត ហើយក៏​មិន​ខ្លាច​នឹង​ការ​គំរាមកំហែង ទោះបី​គាត់​ចាប់​ក៏​ខ្ញុំ​អត់​ខ្លាច​ដែរ»

ទន្ទឹម​នឹង​នេះ អាជ្ញាធរ​ខ្មែរ​ហាក់​ឆ្លៀតឱកាស​នៃ​ការ​រាតត្បាត​ជំងឺ​កូ​វីដ​១៩​នេះ បង្ក្រាប​លើ​ប្រជាពលរដ្ឋ​ទាំងឡាយ​ដែល​មាន​មតិផ្ទុយ​ពី​រដ្ឋាភិបាល​ដោយ​សូម្បីតែ​កសិករ​រិះគន់​អាជ្ញាធរ​ពាក់ព័ន្ធ​នឹង​ការទិញ​ផ្លែ​មៀន ឬ​ផ្លែ​តាង៉ែន​តាម​បណ្ដាញ​សង្គម​ហ្វេសប៊ុក ក៏​អាជ្ញាធរ​ចាប់​ដាក់​ពន្ធនាគារ​បាន​ដែរ ។ កាលពី​ថ្ងៃទី​២៤ សីហា​កសិករ​ម្នាក់​ឈ្មោះ ងួន លី អាយុ​៣១ នៅ​ស្រុក​កំរៀង ខេត្តបាត់ដំបង ត្រូវ​បាន​តុលាការ​ខេត្ត​មួយ​នេះ​ផ្ដន្ទាទោស​ដាក់​ពន្ធនាគារ​១០​ខែ ដោយសារតែ​លោក​បាន​បង្ហោះ​វីដេអូ​ឃ្លិប​នៅក្នុង​ហ្វេសប៊ុក​របស់​លោក​ថា អាជ្ញាធរ​មូលដ្ឋាន​ឱ្យ​ប្រជាពលរដ្ឋ​បេះ​ផ្លែ​តាង៉ែន​ហើយ ប៉ុន្តែ​មិន​មក​ទិញ​កសិផល​របស់​ពួកគាត់​នោះ​ទេ។

ចាប់តាំងពី​ឆ្នាំ​២០១៩ រហូត​មក​ទល់​ពេលនេះ អាជ្ញាធរ​បាន​ចាប់ខ្លួន​សកម្មជន យុវជន និង​សកម្មជន​នយោបាយ​ជិត ៩០​នាក់​ដាក់​ពន្ធនាគារ ដោយ​ភាគ​ច្រើន​អាជ្ញាធរ​ចោទប្រកាន់​ពួកគេ​ពី​បទ​ញុះញង់។

ទាក់ទង​នឹង​បញ្ហា​នេះ អ្នកនាំពាក្យ​គណៈកម្មាធិការ​សិទ្ធិមនុស្ស​កម្ពុជា​លោក កត្តា អ៊ន ប្រាប់​វិទ្យុ​អាស៊ីសេរី​ថា ការ​ចាប់ចង​ទាំងអស់​នេះ គឺជា​ការអនុវត្ត​ច្បាប់ ដែល​លោក​អះអាង​ថា ពួកគេ​បាន​ប្រព្រឹត្ត​ខុស​ច្បាប់​ធ្ងន់ធ្ងរ៖ «ប្រទេស​មួយ​យើង​មាន​ច្បាស់​ប្រទេស​រៀងៗ​ខ្លួន យើង​មិន​អាច​វាយតម្លៃ ដោយ​ការ​យល់ឃើញ​ការវិភាគ​របស់​យើង​ពឹង​ផ្អែកលើ​បរិបទ​នៃ​ប្រទេស​នេះ​ប្រទេស​នោះ ដោយ​គ្មាន​ពឹង​ផ្អែក​ទៅ​លើ​ក្របខ័ណ្ឌ​ច្បាប់​ទេ។ ដូច្នេះ​កម្ពុជា​យើង​មាន​រដ្ឋធម្មនុញ្ញ​មាន​ក្រមព្រហ្មទណ្ឌ និង​មានច្បាប់​ផ្សេងៗ​ទៀត។ ដូច្នេះ​សកម្មភាព​ដែល យើង​ម្នាក់ៗ​ធ្វើ​នេះ​យើង​ត្រូវ​ពិនិត្យ​មើល​ថា នៅក្នុង​បទ​បញ្ញត្ត​ច្បាប់​នោះ គេ​បាន​ហាម​ឬទេ​។ បើសិនជា​យើង​ធ្វើ​សកម្មភាព វា​រំលោភ​បទ​បញ្ញត្ត​ច្បាប់ អាហ្នឹង​គែ​អំពើ​ខុស​ច្បាប់​ហើយ»

ទោះជា​យ៉ាងណា​ថ្មីៗ​នេះ​ស្ថានទូត​ប្រទេស​សេរី​ប្រចាំ​នៅ​កម្ពុជា និង​ក្រុម​អ្នកជំនាញ​សិទ្ធិមនុស្ស​របស់​អង្គការសហប្រជាជាតិ​បាន​លើកឡើង​ថា ការ​បកស្រាយ​របស់​តំណាង​រដ្ឋាភិបាល មិន​សម​ហេតុផល និង​មិន​ស្របតាម​ក្រម​នីតិវិធី​ព្រហ្មទណ្ឌ ដែល​ធានា​ការពារ​សិទ្ធិ​ជនជាប់ចោទ​ឡើយ​។ លើស​ពី​នេះ ពួកគាត់​ចាត់ទុកថា ទង្វើ​របស់​រដ្ឋាភិបាល កំពុងតែ​ប្រើ​វិបត្តិ​កូវីដ​១៩ ដើម្បី​អូស​បន្លាយ​ពេល​ឃុំខ្លួន​ជន​ជាប់​ឃុំ ដោយ​គ្មាន​ការ​កាត់​ក្ដី ដែល​ជា​ការបំពាន​សិទ្ធិ និង​នាំ​ឲ្យ​ប៉ះពាល់​ដល់​ភាព​សុខភាព​ផ្លូវកាយ និង​ផ្លូវចិត្ត​របស់​ពួកគេ​ធ្ងន់ធ្ងរ។

ងាក​មក​មើល​ប្រទេស​ថៃ​វិញ​ម្ដង ក្នុង​រយៈពេល​២​ខែ​ចុង​ក្រោយនេះ​មាន​អ្នក​ឆ្លង​ជំងឺ​កូ​វីដ​១៩ ចន្លោះ​ពី​ជាង ១​ម៉ឺន ៤​ពាន់​នាក់​ទៅ​ជាង​២​ម៉ឺន​នាក់​(២៣.៥០០)​ក្នុង​មួយថ្ងៃ គឺ​ច្រើនជាង​កម្ពុជា​ដែល​មាន​អ្នក​ឆ្លង​ប្រមាណ​ពី​៤០០ នាក់ ទៅ​ជាង ១​ពាន់​នាក់​ក្នុង​មួយថ្ងៃ​។ ថ្វីត្បិតតែ​ប្រទេស​ថៃ​មាន​អ្នក​ឆ្លង​ជំងឺ​កូ​វីដ​១៩​ច្រើន​ជាង​ខ្មែរ​ដល់​ទៅ ១០​ដង​យ៉ាងនេះ​ក្ដី ក៏​រដ្ឋាភិបាល​ថៃ​បើក​ឱ្យ​ប្រជាពលរដ្ឋ​របស់​គេ​អាច​សម្ដែង​មតិ​តាម​ដងផ្លូវ​ដោយ​សេរី​បាន​ដែរ។

បច្ចុប្បន្ន​មាន​យុវជន​ថៃ​ប្រមាណ​ពី ២​ពាន់ ទៅ ៥​ពាន់​នាក់​(.០០០)​ក្នុង​មួយថ្ងៃ​ចេញ​ធ្វើ​បាតុកម្ម​តវ៉ា​តាម​ដងផ្លូវ​នៅ​កណ្ដាល​ទីក្រុង​បាងកក។ ពួកគេ​ទាមទារ​ឱ្យ​នាយករដ្ឋមន្ត្រី​ថៃ​លោក ប្រាយុទ្ធ ចាន់អូចា (Prayuth Chan O Cha) ចុះ​ចេញពី​តំណែង ដោយសារ​បរាជ័យ​ក្នុង​ការ​ទប់ស្កាត់​ការ​រាលដាល​ជំងឺ​ក​វីដ ដែល​ធ្វើ​ឱ្យ​សេដ្ឋកិច្ច​របស់​ថៃ​ធ្លាក់ចុះ​។ កន្លង​មក​ក្រុម​បាតុករ​បាន​ប៉ះទង្គិច​ជាមួយ​ប៉ូលិស​ជា​ញឹកញាប់​ដែរ ប៉ុន្តែ​ពួកគេ​នៅតែ​អាច​ធ្វើ​សកម្មភាព​សម្ដែង​មតិ​បាន​ដដែល និង​មាន​សកម្មភាព​ផុសផុល​ទៀត​ផង​។ ការ​តវ៉ា​នេះ​ពលរដ្ឋ​ថៃ​បាន​ដាក់​ឧបករណ៍​បំពង​សំឡេង ហើយ​ផ្លាស់ប្ដូរ​គ្នា​ឡើង​បញ្ចេញ​មតិ អម​ដោយ​ការ​ប្រគំ​តន្ត្រី​នៅ​តាម​ដង​សំខាន់ៗ​នៅក្នុង​ទីក្រុង​បាងកក។ ពលករ​ខ្មែរ​ម្នាក់​ធ្វើការ​នៅ​ប្រទេស​ថៃ ដែល​តែង​ចុះ​ឃ្លាំមើល​ពលរដ្ឋ​ថៃ​ធ្វើ​បាតុកម្ម​នៅ​ទីក្រុង​បាងកក លោក ជិម សុផាត ថ្លែង​ថា លោក​ពេញ​ចិត្តនឹង​យុវជន​ថៃ​ដែល​បាន​នាំ​គ្នា​សម្ដែង​មតិ​ទាមទារ​ឱ្យ​មេដឹកនាំ​របស់​គេ​ចុះចេញ​ពី​តំណែង។ លោក​បញ្ជាក់​ទៀត​ថា ការ​តវ៉ា​នេះ​មិនមែន​ពលរដ្ឋ​ថៃ​ក្លាហាន​ជាង​ពលរដ្ឋ​ខ្មែរ​នោះ​ទេ ប៉ុន្តែ​ដោយសារ​អាជ្ញាធរ​ថៃ​ផ្ដល់​សេរីភាព​ដល់​ប្រជាពលរដ្ឋ​របស់​ពួកគេ​ច្រើន​ជាង​កម្ពុជា៖ «នៅ​ពេល​ដែល​ឃើញ​យុវជន​គេ​សាមគ្គី​គ្នា​រួម​ជា​ទ្រង់ទ្រាយ​ធំ គេ​ចេះ​ស្រលាញ់​ជាតិ ក្រុម​បាតុករ​នេះ​មិនមែន​ត្រឹមតែ​ប្រជាពលរដ្ឋ​ធម្មតា​ទេ សូម្បីតែ​ពួក​តារា​ចំរៀង​ល្បីៗ អ្នកកាសែត​ក៏​ចូលរួម​ដែរ។ នៅ​ស្រុក​ខ្មែរ​យើង​អត់​មាន​តារា​ណា​មក​ចូលរួម​ទេ និយាយ​ឱ្យ​ចំ​ទៅ​ខ្ញុំ​រំភើប​ណាស់​ចង់ឱ្យ​ស្រុក​ខ្មែរ​ធ្វើ​បែប​ហ្នឹង​បើសិនជា​យើង​គិតថា​លោក​ហ៊ុន សែន សព្វថ្ងៃ​គឺជា​របប​ផ្ដាច់ការ រំលោភ​ទៅលើ​សិទ្ធិមនុស្ស​ខ្លាំង​ទៅ​ហើយ​ហ្នឹង យើង​អត់​អាច​ការបោះឆ្នោត​អី​ឈ្នះ​ជាមួយ​លោក ហ៊ុន សែន»

ក្រៅពី​បើក​សិទ្ធិ​ដល់​ពលរដ្ឋ​ខ្លួន​ហើយ អាជ្ញាធរ​ថៃ​ក៏បាន​បើក​សិទ្ធិ​ឱ្យ​ជនជាតិ​ដទៃ​ដែល​កំពុង​ស្នាក់​នៅ​ប្រទេស​ថៃ អាច​ប្រមូល​ផ្តុំ​សម្ដែង​មតិ​បាន​ដែរ ប្រសិនបើ​ពួកគេ​ជួបប្រទះ​បញ្ហា​អ្វីមួយ​។ ជា​ឧទាហរណ៍ ពលករ​ខ្មែរ​បានជា​ច្រើន​នាក់​ធ្លាប់​បាន​ប្រមូល​ផ្តុំ​គ្នា​តវ៉ា​ដាក់​ញត្តិ​នៅ​ក្រសួង​ការងារ​របស់​ថៃ​ជាច្រើន​ដង ដើម្បី​ស្នើ​សុំ​ឱ្យ​អាជ្ញាធរ​ថៃ​ជួយ​ដោះស្រាយ​បញ្ហា​រំលោភសិទ្ធិ​ការងារ​លើ​ពួកគាត់។

អ្នកវិភាគ​នយោបាយ​លោក​បណ្ឌិត ឡៅ ម៉ុងហៃ មើលឃើញ​ថា មូលហេតុ​ដែល​ការ​បញ្ចេញមតិ​របស់​ពល​រដ្ឋ​កម្ពុជា​ខុសពី​ថៃ ដោយសារ​ស្ថាប័ន​តុលាការ​នៅ​ប្រទេស​ថៃ​ឯករាជ្យ និង​មិន​ស្ថិត​ក្រោយ​សម្ពាធ​របស់​អ្នកនយោបាយ​ដូច​នៅ​កម្ពុជា​។ បន្ថែម​ពី​នេះ​លោក​ថា ថ្នាក់​ដឹកនាំ និង​ពលរដ្ឋ​ថៃ បាន​ដើរ​តាម​គន្លង​ធម៌​ព្រះពុទ្ធ​ច្រើន មានចិត្ត​ធម៌​ច្រើន អត់ឱន​និង​បើកទូលាយ​ច្រើន ព្រមទាំង​មាន​សមត្ថភាព​និង​ការ​ទុក​ចិត្ត​លើ​ខ្លួនឯង ជាពិសេស​អាជ្ញាធរ​ថៃ​ស្រឡាញ់​ប្រជាពលរដ្ឋ​របស់​គេ៖ «ព្រះពុទ្ធសាសនា​នៅ​ថៃ​នេះ​ជា​កត្តា​លំនឹង​ស្ថិរភាព​សង្គម​ព្រោះ​គេ​ជឿ​ដូចៗ​គ្នា ហើយ​គេ​បដិបត្តិ​។ យើង​ណេះ​បាន​តែ​ជឿ បានតែ​មាត់​បានតែ​សូត្រធម៌​សូត្រ​អី​តែ​មាត់ ប៉ុន្តែ​កាយវិការ​ជាក់ស្ដែង​សឹងតែ​អត់ ម្ល៉ោះហើយ​គឺ​ខុសគ្នា​អីចឹង។ ម្ល៉ោះហើយ​សង្គម​ហ្នឹង​វា​អត់​មានអី​រឹងមាំ​មាន​លំនឹង រួច​ស្ថាប័ន​ស្ដេច​គេ​ក៏​ជា​លំនឹង​មួយ​ដែរ»

ដោយឡែក​នៅ​កម្ពុជា​វិញ​អ្នក​វិភាព​នយោបាយ​ជើងចាស់​រូប​នេះ​មាន​ប្រសាសន៍​ថា រដ្ឋាភិបាល​របប​ឯក​បក្ស​កំពុង​ដើរ​តាម​គន្លង​របប​កុម្មុយនិស្ត​ផ្ដាច់ការ​។ លោក​ថា ការ​ដឹកនាំ​បែប​នេះ គឺ​រដ្ឋាភិបាល​រក​វិធី​គ្រប់យ៉ាង​មិន​ឱ្យ​ប្រជាពលរដ្ឋ​មាន​សិទ្ធិ​សេរី​ខាង​បញ្ចេញមតិ​នោះ​ឡើយ៖ «អីចឹង​ហើយ​បានជា​គេ​ឱ្យ​សារ​សំខាន់​ទៅ​លើ​កង​ប្រដាប់​អាវុធ ដូច​សព្វថ្ងៃ តើ​គេ​ឱ្យ​សារសំខាន់​ទៅដល់​កងទ័ព​យ៉ាងម៉េច ហើយ​នគរបាល​យ៉ាងម៉េច។ ព្រោះ​អាហ្នឹង​ជា​ឧបករណ៍​ដើម្បី​យក​អំណាច​ផង​ដើម្បី​ទ្រទ្រង់​រក្សា​ការពារ​អំណាច ពង្រឹង​អំណាច​បន្ថែម​ទៅទៀត​ទៅ​។ ចំណែក​អ្នកណា​ដែល​ជំទាស់​ឬមួយ​ធ្វើ​ឱ្យ​រង្គោះរង្គើ​អំណាច​របស់​គេ​ហ្នឹង​គេ​សម្លាប់ ឬ​ចាប់​ចង​ទៅ ហើយ​ច្បាប់​នេះ គឺ​ច្បាប់​កុម្មុយនីស្ត ដើម្បី​ប្រឆាំង​ហ្នឹង​កម្ទេច​អ្នក​ទិតៀន អ្នក​ដែល​ប្រឆាំង​នឹង​អំណាច​វណ្ណៈ​អធន»

លោក​បណ្ឌិត ឡៅ ម៉ុងហៃ ជឿ​ថា ដើម្បី​ដោះស្រាយ​បញ្ហា​នេះ អាជ្ញាធរ​ខ្មែរ​ទាំងអស់ គួរតែ​ដឹកនាំ​ប្រទេស​ដោយ​ដើរ​តាម​គន្លង​ព្រះពុទ្ធ​នាសនា​ឱ្យ​បាន​ខ្ជាប់ខ្ជួន និង​ត្រូវ​បណ្ដុះ​កូន​របស់​ពួកគេ​ឱ្យ​យល់​ដឹង​ពី​ពុទ្ធសាសនា តាំងពី​តូច​មុន​ពេល​ដែល​ពួកគេ​ចូលកាន់​តំណែង​ការងារ​រដ្ឋ។ ជាពិសេស​លោក​ជំរុញ​ឱ្យ​អាជ្ញាធរ​គ្រប់​លំដាប់​ថ្នាក់ គួរតែ​ប្រកាន់ខ្ជាប់​នូវ​ព្រហ្ម​វិហារធម៌​៤​យ៉ាង​របស់​ព្រះពុទ្ធ គឺ មេត្តា ករុណា មុទិតា និង​ឧបេក្ខា ដែល​មានន័យថា សេចក្ដីស្រឡាញ់ សេចក្ដី​អាណិត មានការ​ត្រេកអរ​នៅ​ពេល​ដែល​អ្នកដទៃ​បាន​សេចក្ដីសុខ និង​ការ​តម្កល់ចិត្ត​ឱ្យ​នៅ​កណ្ដាល​ដោយ​មិន​លំអៀង​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល