តុលាការ​ឃុំខ្លួន​យុវជន​ខ្មែរ​ថាវរៈ ២រូប​ទៀត​ពី​បទ​ញុះញង់

ដោយ មាន ឫទ្ធិ
2020-09-08
អ៊ីម៉ែល
មតិ
Share
បោះពុម្ព
កញ្ញា សូ មេត្តា (ឆ្វេង)  និង​លោក ថា ឡាវី យុវជន​ខ្មែរ​ថាវរៈ ដែល​ត្រូវ​អាជ្ញាធរ​ចាប់​ខ្លួន ពេល​ព្យាយាម​ចូល​ធ្វើ​បាតុកម្ម​នៅ​ទីលាន​ប្រជា​ធិប​តេយ្យ កាល​ពី​ថ្ងៃ​ទី៧ ខែកញ្ញា ឆ្នាំ២០២០។
កញ្ញា សូ មេត្តា (ឆ្វេង) និង​លោក ថា ឡាវី យុវជន​ខ្មែរ​ថាវរៈ ដែល​ត្រូវ​អាជ្ញាធរ​ចាប់​ខ្លួន ពេល​ព្យាយាម​ចូល​ធ្វើ​បាតុកម្ម​នៅ​ទីលាន​ប្រជា​ធិប​តេយ្យ កាល​ពី​ថ្ងៃ​ទី៧ ខែកញ្ញា ឆ្នាំ២០២០។
រូប៖ ពលរដ្ឋ

តុលាការ​ក្រុង​ភ្នំពេញ សម្រេច​ឃុំខ្លួន​យុវជន​ខ្មែរ​ថាវរៈ ​២រូប​ទៀត​គឺ​លោក ថា ឡាវី និង​កញ្ញា សូ មេត្តា​ នៅ​ក្នុង​ពន្ធនាគារ​ព្រៃស នៅ​រសៀល​ថ្ងៃ​ទី៨ ខែកញ្ញា។​ យុវជន​ទាំងពីរ ត្រូវ​បាន​ចាប់​ខ្លួន​ជា​បន្ត​បន្ទាប់ កាល​ពី​ថ្ងៃ​ទី៧ ខែកញ្ញា បន្ទាប់​ពី​ពួកគេ​បាន​ព្យាយាម​ចូល​ធ្វើ​បាតុកម្ម​នៅ​ទីលាន​ប្រជា​ធិប​តេយ្យ។ មន្ត្រី​សិទ្ធិ​មនុស្ស​យល់ថា ទង្វើ​របស់​អាជ្ញាធរ​បែបនេះ គឺ​ជា​ការ​បំពាន​សេរីភាព​ជា​មូលដ្ឋាន​របស់​ប្រជា​ពលរដ្ឋ​នៅ​ក្នុង​ការ​ធ្វើ​ការ​តវ៉ា និង​ការ​ធ្វើ​បាតុកម្ម​ដោយ​សន្តិ​វិធី។

សាលា​ដំបូង​រាជធានី​ភ្នំពេញ ចោទ​ប្រកាន់​យុវជន​ ថា ឡាវី និង កញ្ញា សូ មេត្តា ពីបទ​ញុះញង់​បង្ក​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម និង​បាន​បញ្ជូន​ទៅ​ឃុំខ្លួន​ក្នុង​ពន្ធនាគារ​ព្រៃស ដូច​យុវជន​ផ្សេងៗ​ទៀត​ដែរ។

អ្នក​នាំ​ពាក្យ​នៃ​ស្នងការដ្ឋាន​នគរបាល​រាជធានី​ភ្នំពេញ លោក សាន សុខសីហា បញ្ជាក់​ថា អាជ្ញាធរ​បាន​អនុវត្ត​តាម​ដីកា​របស់​តុលាការ និង​ក្រសួង​មហាផ្ទៃ ក្នុង​ការ​ចាប់​ខ្លួន​យុវជន​ខ្មែរ​ថាវរៈ ក្រោម​បទ​ចោទ ញុះញង់​បង្ក​ឱ្យ​មាន​ភាព​វឹកវរ​ធ្ងន់​ធ្ងរ​ដល់​សន្តិសុខ​សង្គម៖ «ហ្នឹង​បង​អាច​ទាក់ទង​ទៅ​ខាង​តុលាការ​បាន ព្រោះ​ការ​អនុវត្ត​តាម​តុលាការ អញ្ចឹង​ពេល​យើង​ចាប់​ភ្លាម​សមត្ថកិច្ច​ គឺ​បាន​បញ្ជូន​ទៅ​តុលាការ​ហើយ អញ្ចឹង​អឺ​ការងារ​បន្ត​បង​អាច​ទាក់ទង​ទៅ​ខាង​តុលាការ​បាន​ ហើយ​ម្យ៉ាង​ទៀត ថ្មីៗនេះ​ក្រសួង​មហាផ្ទៃ​ ក៏​គាត់​បាន​ចេញ​សេចក្ដី​ប្រកាស​មួយ​ដែល​ទាក់​ទង​ទៅ​នឹង​ក្រុម​យុវជន​ថាវរៈ ហើយ​នឹង​មាតា​ធម្ម​ជាតិ​ហ្នឹង​ គឺ​អនុវត្ត​នូវ​ការងារ​ខុស​ច្បាប់​កាល​ដែល​គ្មាន​ប័ណ្ឌ​អនុញ្ញាត​ត្រឹម​ត្រូវពី​ក្រសួង​មហាផ្ទៃ»

យុវជន ថា ឡាវី ត្រូវ​បាន​អាជ្ញាធរ​ចាប់​ខ្លួន​កាល​ពី​ព្រឹក​ថ្ងៃ​ទី៧ ខែ​កញ្ញា ក្នុង​ពេល​លោក និង​យុវជន​ដទៃ​ទៀត ព្យាយាម​ទៅ​ប្រមូល​ផ្តុំ​គ្នា​សម្ដែង​មតិ​នៅ​ទី​លាន​ប្រជាធិបតេយ្យ ។ចំណែក កញ្ញា សូ មេត្តា ត្រូវ​បាន​ចាប់​ខ្លួន​នៅ​ព្រលប់​ថ្ងៃ​ទី៧ ខែកញ្ញា បន្ទាប់​ពី​ត្រឡប់​មក​ពី​កន្លែង​តវ៉ា​វិញ។ អ្នក​ទាំងពីរ ត្រូវ​បាន​អាជ្ញាធរ​ឃុំខ្លួន​មួយ​យប់​នៅ​ស្នងការ​នគរ​បាល​រាជធានី​ភ្នំពេញ។ ក្រៅ​ចាប់​ខ្លួន​នោះ យុវជន​ម្នាក់​ទៀត​ឈ្មោះ ឡុញ ស៊ុំសុមុន្នី ដែល​បាន​ទៅ​ចូលរួម​តវ៉ា​ដែរ​នោះ ត្រូវ​បាន​ជន​មិន​ស្គាល់​មុខ​ពីរ​នាក់ លួច​វាយ​តប​ពី​ក្រោយ​បណ្ដាល​ឲ្យ​របួស​ធ្ងន់ នៅ​ម្ដុំ​ផ្សារ​ធំ​ថ្មី។

លោក ឡុញ ស៊ុំសុមុន្នី គឺជា​យុវជន​គណបក្ស​សង្គ្រោះ​ជាតិ ខណ្ឌ​មានជ័យ ឲ្យ​ដឹង​ថា បន្ទាប់​ពី​បញ្ចប់​បាតុកម្ម​បំបែក​គ្នា​មក​ផ្ទះ​វិញ មាន​ក្រុម​សន្តិ​សុខ​ខណ្ឌ​ឫស្សីកែវ និង​ខណ្ឌ​ដូនពេញ បាន​ជិះ​តាម​លោក​មក​រហូត​ ហើយ​នៅ​ពេល​លោក​​មក​ដល់​កន្លែង​កើត​ហេតុ​ជិត​ផ្សារ​ធំ​ថ្មី ស្រាប់​តែ​ពួក​សន្តិសុខ​ស្លៀក​ពាក់​ស៊ីវិល​ទាំង​នោះ ​​ធាក់​ផ្ដួល​ម៉ូតូ និង​ព្រួត​គ្នា​វាយ​ដំ​រូប​លោក​បណ្ដាល​ឲ្យ​សន្លប់​ ហើយ​​​រង​របួស​ធ្ងន់ធ្ងរ កាល​ពី​ថ្ងៃ​ទី៧ ខែកញ្ញា។ លោ​កថា ការ​​ប្រើ​ហិង្សា​មក​លើ​លោក​នេះ គឺជា​រឿង​នយោបាយ​ដែល​​​​​អ្នក​មាន​អំណាច​មាន​បំណង​បំបាក់​ស្មារតី គំរាម​កំហែង​លោក មិន​ឲ្យ​ចូលរួម​ធ្វើ​បាតុកម្ម និង​បញ្ចេញ​​​មតិ​​តទៅ​ទៀត​។ ជន​រង​គ្រោះ​រូប​នេះ​ថា លោក ​គ្មាន​ជំនឿ​ចិត្ត​លើ​អាជ្ញា​ធរ​កម្ពុជា​ដែល​អាច​វែក​មុន​ជន​ដៃ​ដល់​យក​មក​ផ្ដន្ទាទោស​បាន​នោះ​ទេ៖ «សម្រាប់​ខ្ញុំ ខ្ញុំ​សំណូមពរ​ដល់​អង្គការ​អន្តរជាតិ​ទាំងអស់​ព្រម​ទាំង​អាជ្ញាធរ​នៅ​សង្កាត់​ផ្សារធំ​ថ្មី​ហ្នឹង​មេត្តា​ជួយ​រក​វីដេអូ​ណា​ដើម្បី​បង្ហាញ​មុខ​ឃាតក​ណា​ដែល​ប៉ុន​ប៉ង​អាយុ​ជីវិត​មក​លើក​ខ្ញុំ។ អង្គការ​ជាតិ និង​អន្តរជាតិ​ទាំងអស់​មេត្តា​ជួយ​រក​យុត្តិធម៌​សម្រាប់​ខ្ញុំ​បាទ​ផង កុំឲ្យ​ការ​ឈឺចាប់​របស់​ខ្ញុំ​ទាំង​ផ្លូវកាយ និង​ផ្លូវចិត្ត វា​បាត់​បង់​ដោយ​ទទេៗ។ ខ្ញុំ​មិន​មាន​ជំនឿ​ទុក​ចិត្ត​អ្វី​ទាំង​អស់ ព្រោះ​ហេតុ​ការណ៍​នេះ វា​កើត​ឡើង​ជា​រឿង​នយោបាយ​​សុទ្ធសាធ»

ក្រុម​យុវជន និង​ព្រះ​សង្ឃ គ្រោង​ជួបជុំ​គ្នា​សម្ដែង​មតិ​នៅ​ទី​លាន​ប្រជាធិបតេយ្យ​ថ្មី ខណ្ឌ​ឫស្សីកែវ ចាប់​ពី​ថ្ងៃ​ទី៧ ដល់​ថ្ងៃ​ទី១៥ ខែកញ្ញា ដើម្បី​ទាមទារ​យុត្តិ​ធម៌​សង្គម​រួមមាន៖​ការ​ទាមទារ​ឲ្យ​ដោះលែង​មេ​ដឹកនាំ​សហជីព លោក រ៉ុង ឈុន និង​អ្នកទោស​មនសិការ​ដទៃ​ទៀត។ ទោះ​ជា​យ៉ាង​ណា សាលា​រាជ​ធានី​ភ្នំពេញ ក្រោម​ការ​ដឹកនាំ​របស់ លោក ឃួង ស្រេង ប្រកាស​មិន​អនុញ្ញាត​ឡើយ ក្រោម​ហេតុ​ផល​ថា បាតុកម្ម​នោះ​អាច​ប៉ះពាល់​ធ្ងន់ធ្ងរ​ដល់​សន្តិសុខ​សង្គម និង​សណ្ដាប់ធ្នាប់​សាធារណៈ និង​ចោទ​ប្រកាន់​ថា ការ​តវ៉ា​របស់​ពួក​គេ មាន​ចរិត​ញុះញង់​ធ្វើ​ឲ្យ​ប៉ះ​ពាល់​ដល់​នីតិ​វិធី​របស់​តុលាការ។

យុវតី​ខ្មែរ​ថាវរៈ​មួយ​រូប​ទៀត កញ្ញា ផូ សារ៉េត អះអាង​ថា កញ្ញា​មាន​ការ​ឈឺចាប់​ដែល​អាជ្ញាធរ​ចាប់​ខ្លួន​យុវជន​ដែល​ធ្វើការ​តវ៉ា​ទាមទារ​សិទ្ធិ​សេរីភាព និង​លទ្ធិ​ប្រជាធិបតេយ្យ​នៅ​កម្ពុជា។ យុវតី​រូប​នេះ​បន្ត​ថា អាជ្ញាធរ​បាន​​តាម​ឃ្លាំមើល និង​ឡោម​ព័ទ្ធ​ផ្ទះ ចាប់​តាំង​ពី​ល្ងាច​ថ្ងៃ​ទី៧ រហូត​ដល់​ព្រឹក​ថ្ងៃ​ទី៨ ខែកញ្ញា បន្ទាប់​ពី​នាង​បាន​ចូលរួម​សកម្មភាព​តវ៉ា។ ទោះ​យ៉ាង​ណា កញ្ញា លើក​ឡើង​ថា មិន​ខ្លាច​ការ​គំរាម​កំហែង​របស់​អាជ្ញាធរ​មក​លើ​រូប​នាង​នោះ​ទេ ដោយ​សារ​កញ្ញា​មិន​បាន​ប្រព្រឹត្ត​អ្វី​ដែល​ខុស​ពី​ច្បាប់​អនុញ្ញាត​នោះ​ទេ តែ​អាជ្ញាធរ​ទៅ​វិញ​ទេ ដែល​ខ្លាច​ក្រុម​យុវជន​ដែល​ហ៊ាន​ចេញ​មុខ​ធ្វើ​បាតុកម្ម ទាមទារ​សិទ្ធិ​សេរីភាព​និង​យុត្តិធម៌​សង្គម។ កញ្ញា ប្តេជ្ញា​ថា នឹង​បន្ត​សកម្មភាព​តវ៉ា​ជាថ្មី​បន្ត​ទៀត​ក្នុង​ពេល​ឆាប់ៗ​ខាង​មុខ​នេះ៖ «ខ្ញុំ​សូម​បញ្ជាក់​ប្រាប់​ម្តង​ទៀត​ថា ពួកគាត់​ពិត​ជាខ្លាច​ពួក​ខ្ញុំ​មែន​ទែន មិន​មែន​ពួក​ខ្ញុំ​ខ្លាច​គាត់​ទេ​ គឺ​ពួក​គាត់​ខ្លាច​ខ្ញុំ​ដែល​ចេញ​ទៅ​ធ្វើ​សកម្មភាព​បាតុកម្ម​ត​ទៅ​ទៀត។ ហើយ​គាត់​ថា បើ​ពួក​ខ្ញុំ​ចេញ​ទៅ គាត់​នឹង​ចាប់​​ពួក​ខ្ញុំ។ ខ្ញុំ​ប្រគល់​ខ្លួន​ឲ្យ មិន​បាច់​ចាប់​របៀប​សាហាវ​ចឹងទេ។ ខ្ញុំ​ប្រគល់​ខ្លួន​ឲ្យ ២នាក់។ ខ្ញុំ​អត់​ខ្លាច​ទេ! ពេល​ណា​ដែល​ប្រជា​ពលរដ្ឋ​មាន​ការ​បញ្ចេញ​មតិ ពេល​ណា​ប្រជា​ពលរដ្ឋ​ពុះ​កញ្ច្រោល​ឡើង គាត់​នៅមិន​ស្ងៀម​ទេ គាត់​ចង់​ឲ្យ​ប្រជា​ពលរដ្ឋ​នេះ​ក្លាយ​ជា​មនុស្ស​ល្ងង់ ក្លាយ​ជា​មនុស្ស​ដែល​មិន​ដឹង​អ្វី​ទាំង​អស់​នៅក្នុង​សង្គម​នេះ។ ពួកខ្ញុំ​ប្តេជ្ញា​ចិត្ត​ហើយ​បង ប្តេជ្ញា​ថា យក​គុក​ជា​ផ្ទះ។ ខ្ញុំ​នឹង​ទាមទារ​អ្វី​ដែល​ជា​សិទ្ធិ​សេរីភាព​របស់​ខ្ញុំ​មកវិ​ញ»

នាយករង​ទទួល​បន្ទុក​ផ្នែក​ឃ្លាំមើល​សិទ្ធិ​មនុស្ស​នៃ​អង្គ​ការ​លីកាដូ (LICADHO) លោក អំ សំអាត មាន​ប្រសាសន៍​ថា ការ​ធ្វើ​ទុក្ខ​បុក​ម្នេញ​លើ​យុវជន​ដែល​ប្រើ​ប្រាស់​សិទ្ធិ​ក្នុង​ការ​តវ៉ា​ដោយ​សន្តិវិធី គឺជា​ការ​បំបិទ​សិទ្ធិ​សេរីភាព​របស់​ប្រជា​ពលរដ្ឋ​ដែល​ធានា​ដោយ​ច្បាប់​ជាតិ​និង​អន្តរជាតិ។ លោកបន្ត​ថា ទង្វើ​បែប​នេះ មិន​មាន​ផល​ចំណេញ​ដល់​កម្ពុជា​នោះ​ទេ៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល