អតីតគរុសិស្ស នៃវិទ្យាស្ថានជាតិអប់រំកាយ និងកីឡា លោក កែវ សុវណ្ណឫទ្ធិ នឹងដាក់ពាក្យបណ្ដឹងទៅកាន់អាជ្ញាធរខណ្ឌដូនពេញដែលប្រើអំពើហិង្សាលើលោក និងអ្នកថតរូបលោក។ មន្ត្រីសង្គមស៊ីវិលចាត់ទុកថាការប្រើអំពើហិង្សាពីសំណាក់អាជ្ញាធរមកលើពលរដ្ឋដោយគ្រាន់តែទាមទារតវ៉ាដោយសន្តិវិធីនេះគឺជាការរំលោភសិទ្ធិមនុស្សធ្ងន់ធ្ងរ។
ការលើកឡើងរបស់អតីតគរុសិស្ស នៃវិទ្យាស្ថានជាតិអប់រំកាយ និងកីឡា រូបនេះ ក្រោយអាជ្ញាធរខណ្ឌដូនពេញក្នុងឯកសណ្ឋានស៊ីវិលនៅរសៀល នៅថ្ងៃទី៩ ខែតុលា បានចាប់ទាញ រុញច្រាន លោក កែវ សុវណ្ណឫទ្ធិ បញ្ចូលទៅក្នុងរថយន្ត ក្នុងពេលលោកកំពុងឈរស្រែកតវ៉ានៅពីមុខក្រសួងអប់រំ យុវជន និងកីឡា លើមហាវិថីព្រះ នរោត្តម ដើម្បីឱ្យរដ្ឋមន្ត្រីក្រសួងអប់រំ លោក ហង់ ជួនណារ៉ុន ទទួលយករូបលោក និងគរុសិស្ស ១១នាក់ទៀត ដែលត្រូវបានវិទ្យាស្ថានជាតិអប់រំកាយ និងកីឡា លុបឈ្មោះចេញពីក្របខ័ណ្ឌដោយអយុត្តិធម៌។
ក្រោយរងអំពើហិង្សា លោក កែវ សុវណ្ណឫទ្ធិ បានប្រាប់វិទ្យុអាស៊ីសេរីថា អាជ្ញាធរខណ្ឌដូនពេញបានវាយដំ លោក និងអ្នកថតរូបលោក រហូតធ្វើឱ្យលោករងរបួស និងរហែកអាវ។ លោក កែវ សុវណ្ណឫទ្ធិ ខកចិត្តលើការប្រើអំពើហិង្សាពីសំណាក់អាជ្ញាធរមកលើពលរដ្ឋខ្លួនឯងទាំងគ្មានកំហុសបែបនេះ។
ក្រោយរងអំពើហិង្សា លោក កែវ សុវណ្ណឫទ្ធិ បានប្រាប់វិទ្យុអាស៊ីសេរីថាអាជ្ញាធរខណ្ឌដូនពេញបានវាយដំលោក និងអ្នកថតរូបលោក រហូតធ្វើឱ្យលោករងរបួស និងរហែកអាវ។ លោក កែវ សុវណ្ណឫទ្ធិ ខកចិត្តលើការប្រើអំពើហិង្សាពីសំណាក់អាជ្ញាធរមកលើពលរដ្ឋខ្លួនឯងទាំងគ្មានកំហុសបែបនេះ។
លោក កែវ សុវណ្ណឫទ្ធិ៖«ខ្ញុំឈរស្ងៀមសោះក៏គាត់ប្រើអំពើហិង្សាមកលើខ្ញុំដែរ ខ្ញុំអន់ចិត្តខ្លាំងមែនសម្រាប់សង្គមជាតិដែលមានសមត្ថកិច្ចបែបនេះ។ ខ្ញុំត្រូវគាត់ទះមួយកំផ្លៀងចំសៀតផ្កា ហឹងត្រចៀក ហើយខ្ញុំវិលមុខ ខ្ញុំក្រោកអត់រួចទេ ខ្ញុំយល់ថាអំពើហិង្សានេះធ្វើខុសនីតិវិធីផ្លូវច្បាប់ហើយ គាត់ធ្វើទាំងកម្រោល ហើយខ្ញុំនឹងប្ដឹងគាត់»។
លោក កែវ សុវណ្ណឫទ្ធិ ថា លោកនឹងដាក់ពាក្យបណ្ដឹងប្រឆាំងអាជ្ញាធរខណ្ឌដូនពេញ ដែលប្រើអំពើហិង្សាលើរូបលោកនៅពេលនេះទៅកាន់តុលាការនាពេលឆាប់ៗ។ លោក កែវ សុវណ្ណឫទ្ធិ ថា ការគំរាមកំហែង វាយដំនេះ មិនអាចបញ្ឈប់រូបលោកទាមទាររកយុត្តិធម៌បាននោះទេ។
វិទ្យុអាស៊ីសេរីមិនទាន់អាចសុំការឆ្លើយតបរឿងនេះ ពីអធិការខណ្ឌដូនពេញ លោក ទៀង ច័ន្ទសារ និងអ្នកនាំពាក្យក្រសួងអប់រំ លោក កាន់ ពុទ្ធី បានទេ នៅថ្ងៃទី៩ ខែតុលា។ ចំណែកអភិបាលខណ្ឌដូនពេញ លោក ជា ខេមា ថា លោកកំពុងជាប់រវល់។
នាយកទទួលបន្ទុកកិច្ចការទូទៅនៃអង្គការឃ្លាំមើលសិទ្ធិមនុស្សលីកាដូ (LICADHO) លោក អំ សំអាត ចាត់ទុកការប្រើអំពើហិង្សារបស់អាជ្ញាធរមកលើពលរដ្ឋ ដែលតវ៉ាដោយអហិង្សានេះថា ជាការរំលោភសិទ្ធិមនុស្សធ្ងន់ធ្ងរ និងមិនគួរកើតមានដដែលៗ មកលើពលរដ្ឋនោះទេ។ លោក អំ សំអាត ស្នើដល់គ្រប់ភាគីបញ្ឈប់ការប្រើអំពើហិង្សា និងងាកមកដោះស្រាយបញ្ហាដោយសន្តិវិធី។
លោក អំ សំអាត៖«អ៊ីចឹងទោះក្នុងកាលៈទេសៈណាក៏ដោយ យើងជាអង្គការសង្គមស៊ីវិលមិនគាំទ្រនូវទង្វើហិង្សាណាមួយទេ ទោះបីជាកើតឡើងពីភាគីណាមួយក៏ដោយ ជាពិសេស អាជ្ញាធរគួរតែមានភាពអត់ធ្មត់ខ្ពស់ នៅក្នុងបញ្ហាទាំងអស់នេះ។ អ៊ីចឹងបញ្ហានេះ គឺជារឿងមួយ ដែលកើតឡើងម្ដងហើយម្ដងទៀតនូវអំពើហិង្សាហ្នឹង។ អ៊ីចឹង គួរតែមានវិធានការផ្សេងក្នុងការដោះស្រាយ»។
មុនរងអំពើហិង្សា លោក កែវ សុវណ្ណឫទ្ធិ នៅព្រឹកថ្ងៃទី៩ ខែតុលា បានធ្វើដំណើរទៅកាន់ក្រសួងមុខងារសាធារណៈដើម្បីទៅសុំអន្តរាគមន៍លើការលុបឈ្មោះលោក និងអតីតគរុសិស្សផ្សេងទៀតចេញពីក្របខណ្ឌ។ ប៉ុន្តែ លោក កែវ សុវណ្ណឫទ្ធិ ខកចិត្តក្រោយក្រសួងមុខងារសាធារណៈ មិនផ្ដល់ដំណោះស្រាយជាក់លាក់ណាមួយ ចំពោះសំណើសុំកិច្ចអន្តរាគមន៍របស់លោកទៅកាន់ លោក ហ៊ុន ម៉ានី ដែលជារដ្ឋមន្ត្រីក្រសួងមួយនេះកាលពី២សប្ដាហ៍មុន។
លោក កែវ សុវណ្ណឫទ្ធិ បន្ថែមថាមូលហេតុដែលមានតែរូបលោកបន្តចេញមុខទាមទារតវ៉ាលើការលុបក្របខណ្ឌនេះ ដោយអតីតគរុសិស្ស១១នាក់ទៀតបារម្ភពីសុវត្ថិភាព និងមិនមានថវិកាគ្រប់គ្រាន់ដើម្បីធ្វើដំណើរពីខេត្តមកភ្នំពេញ។ ទោះជាយ៉ាងណា លោក កែវ សុវណ្ណឫទ្ធិ ថារូបលោកប្ដេជ្ញាបន្តទាមទាររកយុត្តិធម៌ដល់រូបលោក និងអតីតគរុសិស្សផ្សេងទៀតឱ្យខានតែបាន។
លោក កែវ សុវណ្ណឫទ្ធិ៖«សម្រាប់ខ្ញុំផ្ទាល់ យើងដឹងស្រាប់ហើយភាពយុត្តិធម៌ ប្រសិនបើកាលណាខ្ញុំទទួលភាពយុត្តិធម៌តែឯង ខ្ញុំជាមនុស្សម្នាក់អាត្មានិយម ខ្ញុំអាចចូលរួមសង្គមអំពើខ្មៅងងឹតរបស់ក្រសួងអប់រំ ប្រសិនបើការតវ៉ាម្នាក់ឯង ហើយយើងចូលរៀនតែម្នាក់ឯង»។
ចំណែកអតីតគរុសិស្សម្នាក់ទៀត លោក ផន សំបូ ដែលក្រសួងអប់រំលុបឈ្មោះចេញក្របខ័ណ្ឌថាលោកគាំទ្រចំពោះការទាមទារតវ៉ាកន្លងមករបស់ លោក កែវ សុវណ្ណឫទ្ធិ។ លោក ផន សំបូ ថារូបលោកក៏ចង់ចូលរួមទាមទារតវ៉ាដែរ ប៉ុន្តែដោយសារលោករស់នៅខេត្តពោធិ៍សាត់ និងជាប់រវល់ធ្វើការ ទើបធ្វើឱ្យលោកមិនអាចចូលរួមតវ៉ាបាន។
លោក ផន សំបូ៖«ទីមួយការស្នើសុំគឺចង់ដឹងថា ហេតុអីបានជាពួកគេដែលខុសលក្ខខណ្ឌនោះ គេអាចរៀនដល់ចប់ហើយ ឥឡូវចេញបម្រើការងារទៀត ហើយខ្ញុំខុសលក្ខខណ្ឌដែរ តែខុសតិចតួចដូចគ្នា ប៉ុន្តែហេតុអីគាត់លុបតែពួកខ្ញុំចេញ ហើយពួកគេបានរៀន ហើយចេញបម្រើការងារដល់ឥឡូវ»។
លោក កែវ សុវណ្ណឫទ្ធិ អាយុ ២០ឆ្នាំ គឺជាអតីតគរុសិស្សម្នាក់ នៃវិទ្យាស្ថានជាតិអប់រំកាយ និងកីឡា ដែលបានប្រលងជាប់ស្ថាពរនៅថ្ងៃទី១៣ ខែវិច្ឆិកា ឆ្នាំ២០២១។ លោក កែវ សុវណ្ណឫទ្ធិ និងអតីតគរុសិស្ស១១នាក់ផ្សេងទៀត ត្រូវបានលុបឈ្មោះចេញកាលពីថ្ងៃទី២៨ ខែធ្នូ ឆ្នាំ ២០២១។ លោក កែវ សុវណ្ណឫទ្ធិ ធ្លាប់ត្រូវបានកម្លាំងសន្តិសុខខណ្ឌដូនពេញ ប្រើអំពើហិង្សា និងចាប់អូសទាញចូលក្នុងរថយន្ត ម្ដងរួចទៅហើយ កាលពីព្រឹកថ្ងៃទី២១ ខែសីហា កន្លងទៅ៕
អត្ថបទរឿងនេះ ត្រូវបានធ្វើបច្ចុប្បន្នភាពដោយបញ្ចូលព័ត៌មានពិស្ដារ លើព័ត៌មានបឋមកាលពីពេលព្រឹក។
កំ ណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។