ក្រុមយុវជនដែលធ្លាប់ជួបបទពិសោធបង្អត់អាហារខ្លួនឯងក្នុងពន្ធនាគារបារម្ភពីសុខភាពកញ្ញា សេង ធារី ដែលកំពុងធ្វើកូដកម្មបង្អត់អាហារក្នុងពន្ធនាគារនៅពេលនេះ។ ពួកគេទទូចដល់អាជ្ញាធរពាក់ព័ន្ធទាំងអស់ពិចារណាការតវ៉ារបស់កញ្ញា សេង ធារី និងត្រូវដោះលែងកញ្ញាឱ្យមានសេរីភាពវិញព្រោះការបង្អត់អាហាររបស់កញ្ញានេះជាសញ្ញាដែលកញ្ញាចង់ប្រាប់ពិភពលោកថា កញ្ញាត្រូវជាប់ពន្ធនាគារទាំងគ្មានកំហុស។ ពួកគេរម្លឹកថា អ្នកជាប់ពន្ធនាគារទាំងអយុត្តិធម៌ពុំមានជម្រើសអ្វីក្រៅតែពីការតវ៉ាអហិង្សាជាពិសេសគឺការបង្អត់អាហារខ្លួនឯងដើម្បីបញ្ជាក់ប្រាប់ថា ពួកគេមិនអាចទទួលយកបាននូវភាពអយុត្តិធម៌ចំពោះពួកគេបើទោះបីការបង្អត់អាហារជាការពិបាកនិងប៉ះពាល់សុខភាពពួកគេក៏ដោយ។
យុវជនដែលឆ្លងកាត់កូដកម្មបង្អត់អាហារខ្លួនឯងក្នុងពន្ធនាគារបារម្ភថា កញ្ញា សេង ធារី នឹងជួបការលំបាកជាច្រើនក្នុងពន្ធនាគារក្នុងពេលបង្អត់អាហារនេះដែលរួមមានផលប៉ះពាល់ចំពោះសុខភាពដោយសាររាង្គកាយចុះទន់ខ្សោយខ្លាំងការធ្វើទុក្ខបុកម្នេញការរារាំងនិងការកៀបសង្កត់ពីឆ្មាំពន្ធនាគារ។
យុវជនចលនាមាតាធម្មជាតិលោក ថុន រដ្ឋា ឱ្យដឹងថាប្រសិនបើកញ្ញា សេង ធារី ជ្រើសរើសយកការបង្អត់អាហារខ្លួនឯងពេញមួយថ្ងៃគឺមិនទទួលអាហារទាំងស្រុងនិងធ្វើរយៈពេលវែងពេញមួយសបា្ដហ៍នោះនោះរាងកាយកញ្ញានឹងចុះទន់ខ្សោយខ្លាំងអាចឱ្យមានជំងឺភ្លាមៗមួយចំនួនពាក់ព័ន្ធនឹងប្រព័ន្ធរម្លាយអាហារមានដូចជា ឈឺបំពង់ក ធ្វើទុក្ខក្រពះ ពោះវៀន វិលមុខ ឬអាចដួលសន្លប់៖
«អាចពិបាកទ្រាំមែនទែនហើយអ្នកមីងសេង ធារីដែលកម្លាំងរបស់គាត់ជាមនុស្សស្រីខ្ញុំគិតថា យ៉ាងយូរត្រឹម២ទៅ៣ថ្ងៃអាចនឹងមានការដួលសន្លប់ឬមានបញ្ហាដល់សុខភាពធ្ងន់ធ្ងរ។នេះគឺជាការទទួលខុសត្រូវរបស់អាជ្ញាធរព្រោះអ្វីដែលជាការឃាត់ខ្លួនគាត់ជាការឃាត់ខ្លួនដោយអយុត្តិធម៌ការបំបិទសិទ្ធិសេរីភាព។នេះមិនមែនជារឿងលេងសើចទេហើយអាជ្ញាធរគួរតែចាប់ផ្ដើមមានវិធានការក្នុងការដោះលែងគាត់»។
កាលពីឆ្នាំ២០២០តុលាការក្រុងភ្នំពេញបានកាត់ទោសលោក ថុន រដ្ឋា ដាក់ពន្ធនាគាររយៈពេល២០ខែដោយចោទប្រកាន់ថា បានលួចបើកស្ទូឌីយោផ្សាយព័ត៌មានដោយពុំមានច្បាប់អនុញ្ញាតនៅពេលលោកកំពុងផលិតវីដេអូមួយដើម្បីទាមទារឲ្យរដ្ឋាភិបាលបញ្ឈប់លុបបឹងតាមោក។ ថុន រដ្ឋា រួចខ្លួនពីពន្ធនាគារក្រោយជាប់ពន្ធនាគារបាន១៤ខែប៉ុន្តែត្រូវស្ថិតក្នុងការត្រួតពិនិត្យរបស់តុលាការរយៈពេលប្រមាណ៣ឆ្នាំ។នៅពន្ធនាគារព្រៃសររដ្ឋា ធ្លាប់តវ៉ាមិនហូបអាហារចំនួនមួយថ្ងៃក្នុងមួយសប្តាហ៍ជាមួយសកម្មជនសង្គមមួយចំនួនទៀតដើម្បីបង្ហាញថា ពួកគេជាប់ពន្ធនាគារដោយអយុត្តិធម៌និងទាមទារឱ្យអាជ្ញាធរពន្ធនាគារយល់ព្រមឱ្យសកម្មជនសង្គមអាចទូរស័ព្ទជួបសាច់ញាតិនៅក្រៅពន្ធនាគារនៅពេលមានវិបត្តិជំងឺកូវីដ-១៩។
ស្រដៀងគ្នានេះដែរយុវតីក្រុមយុវជនខ្មែរថាវរៈកញ្ញា អេង ម៉ាឡៃ ហៅសូរ មេត្តា រៀបរាប់ថា កូដកម្មបង្អត់អាហារជាជម្រើសមួយដែលអ្នកជាប់ឃុំដោយភាពអយុត្តិធម៌ឬដោយពុំបានប្រព្រឹត្តទោសកំហុសសោះប្រើប្រាស់នៅពេលដែលពួកគាត់មានជម្រើសរើសតិចតួចប៉ុណ្ណោះក្នុងការសម្ដែងមតិប្រឆាំងនឹងភាពអយុត្តិធម៌ឬការរំលោភបំពានសិទ្ធិក្នុងពន្ធនាគារ។ កញ្ញាបន្តថាក្នុងពេលកញ្ញាជាប់ពន្ធនាគារដំបូងឆ្មាំពន្ធនាគារបានបញ្ជូនកញ្ញាឱ្យទៅនៅក្នុងបន្ទប់ពិន័យដែលកខ្វក់ដេកមិនបានប្រៀបបាននឹងទារុណកម្មលើរូបកញ្ញានោះ មេត្តា ចាប់ផ្តើមបង្អត់អាហារខ្លួនឯងឆ្លើយតបនឹងទង្វើរបស់ឆ្នាំគុក។មេត្តាបន្តថា ករណីកញ្ញា សេង ធារី ក៏មិនខុសគ្នានេះដែរគឺកញ្ញាធ្វើកូដកម្មមិនទទួលទានអាហារនេះគឺដើម្បីប្រាប់អ្នកនៅជុំវិញខ្លួន សាធារណជន និងពិភពលោកថានៅទីដែលកញ្ញាកំពុងនៅមានភាពអយុត្តិធម៌ដែលមិនអាចទទួលយកបាន៖
«យើងបង្អត់អាហារគឺយើងចង់បញ្ជាក់ថា យើងស្រេកឃ្លាននូវយុត្តិធម៌ហើយយើងចង់បង្ហាញទៅមន្រ្តីអាជ្ញាធរទាំងអស់ដែលខ្ញុំជឿថា ពួកគាត់ក៏មានមនសិការភាគរយតិចតួចនៅក្នុងបេះដូងគាត់។គាត់ជាខ្មែរគាត់ក៏គួរឈឺចាប់ដែ។អីចឹងខ្ញុំជឿថា មនសិការដែលស្ពឹកស្អុយរលួយរបស់គាត់នៅក្នុងខ្លួនក៏អាចនៅក្រោកឡើងវិញហើយថាគាត់ចាប់ជនដែលមិនមានកំហុសមកឃុំគាត់ជាអ្នកដែលទទួលខុសត្រូវហើយត្រូវដោះលែងមកវិញ»។
អាជ្ញាធររាជធានីភ្នំពេញបានចាប់ខ្លួនកញ្ញា សូ មេត្តា កាលពីខែកញ្ញា ឆ្នាំ២០២០ នៅខណ្ឌច្បារអំពៅហើយតុលាការបានសម្រេចឃុំកញ្ញាក្នុងពន្ធនាគារជាងមួយឆ្នាំក្នុងបទញុះញង់បង្កឲ្យមានភាពវឹកវរធ្ងន់ធ្ងរដល់សង្គមពាក់ព័ន្ធនឹងគម្រោងស្នើសុំធ្វើបាតុកម្មនៅទីលានប្រជាធិបតេយ្យដើម្បីទាមទារឲ្យតុលាការដោះលែងមេសហជីពលោក រ៉ុង ឈុន។ កញ្ញា សូ មេត្តា មានជំងឺច្រើនមុខជាប់ខ្លួនពេលចេញពីពន្ធនាគារ ដូចជា ជំងឺក្រពះ ជំងឺស្ត្រេស (Stress) ស្លេកស្លាំង ជំងឺរវើរវាយ ឬការភ័យខ្លាចដល់សន្លប់ជាដើម។
យូរៗម្ដងមានព័ត៌មានលេចចេញពន្ធនាគារថា ក្រុមអ្នកជាប់ឃុំដោយអយុត្តិធម៌ ឬ អ្នកទោសមនសិកានាំគ្នាធ្វើកូដកម្ម។ ពួកគេតវ៉ារួមគ្នាជាក្រុមឬតវ៉ាតែម្នាក់ឯងដើម្បីឱ្យមន្រ្តីពន្ធនាគារយកចិត្តទុកដាក់ដោះស្រាយបញ្ហារបស់ពួកគេក្នុងនោះមានទាំងបញ្ហាបន្ទប់ចង្អៀតណែន អនាម័យ ការជក់បារីក្នុងបន្ទប់ការរំលោភបំពានសិទ្ធិការរើសអើងនិងការរារាំងមិនឱ្យក្រុមគ្រួសារចូលសួរសុខទុក្ខជាដើម។ក្រៅពីការតវ៉ាដោយបង្អត់អាហារខ្លួនឯងអ្នកជាប់ឃុំក៏អាចនាំគ្នាតវ៉ាដោយមិនត្រឡប់ចូលបន្ទប់ឃុំឃាំងឬមិនព្រមចេញពីបន្ទប់ឃុំឃាំងសរសេរលិខិតរ៉ាយរ៉ាប់ពីការលំបាកផ្ញើទៅអ្នកគ្រប់គ្រងពន្ធនាគារឬទៅសារព័ត៌មាននៅខាងក្រៅពន្ធនាគារនិងការលើកបដារួមគ្នានៅក្រៅឬក្នុងបន្ទប់ឃុំឃាំងជាដើម។
តាមរយៈសកម្មភាពតវ៉ាទាំងនេះទំនងណាស់ដែលគេអាចបង្ហាញថា អ្នកជាប់ឃុំអាចប្រើប្រាស់សិទ្ធិតវ៉ាបានងាយស្រួលក្នុងពន្ធនាគារតែតាមជាក់ស្ដែងការតវ៉ានោះមិនងាយស្រួលឡើយ។
កញ្ញា សូរ មេត្តា បញ្ជាក់ថា ជាធម្មតាឆ្មាំពន្ធនាគារនឹងមិនបណ្ដោយឱ្យរឿងនេះកើតឡើងដោយងាយស្រួលឡើយនៅពេលគេដឹងថា មានការតវ៉ាម្ដងៗអ្នកតវ៉ាត្រូវគេប្រមាថ ជេរប្រទិច ត្រូវដាក់ឱ្យនៅឯកោពេលខ្លះក៏ត្រូវដៃជើងរបស់ឆ្មាំពន្ធនាគារដែលភាគច្រើនជាអ្នកជាប់ទោសដោយទោសឧក្រិដ្ឋវាយធ្វើបាបជាការព្រមាន៖
«ខ្ញុំនៅព្រៃសរមន្រ្តីគេតែងតែលើកឡើងបែបហ្នឹងតែការយាយីគំរាមកំហែងរបស់គេការអុកឡុករបស់គេនៅតែមានអីញ្ចឹង។ គេអុកឡុកគេគំរាមកំហែងដោយប្រយោល។នេះគឺគេលើកឡើងធ្វើម៉េចដើម្បីតែឱ្យល្អមើល»។
លើសពីនេះ កញ្ញា សូរ មេត្តា គិតថា មន្រ្តីពន្ធនាគារអាចនឹងមានផែនការរាំងខ្ទប់បិទរាល់ព័ត៌មានទាំងអស់ពីកញ្ញា សេង ធារី ធ្វើយ៉ាងណា មិនឱ្យព័ត៌មានពីការបង្អត់អាហារនេះបានធ្លាយចេញមកខាងក្រៅពន្ធនាគារឡើយ។
ទំនងមិនខុសពីការគិតទុករបស់កញ្ញា សូរ មេត្តា ទេមកដល់ពេលនេះ ស្ទើតែគ្មានព័ត៌មានទាល់តែសោះពីការធ្វើកូដកម្មបង្អត់អាហាររបស់កញ្ញា សេង ធារី នៅពន្ធនាគារក្នុងខេត្តព្រះវិហារ។
ទាក់ទងនឹងរឿងនេះ កញ្ញា សេង ធារី បានផ្ញើលិខិតចេញពីពន្ធនាគារកាលពីចុងខែតុលាថា កញ្ញានឹងធ្វើកូដកម្មបង្អត់អាហារនេះរយៈពេល១សប្ដាហ៍ចាប់ពីថ្ងៃ៧ ខែវិច្ឆិកា ដើម្បីទាមទារឱ្យតុលាការដោះលែងកញ្ញាឱ្យមានសេរីភាពមកវិញដោយគ្មានលក្ខខ័ណ្ឌ។
ចំណែកមេធាវីសិទ្ធិមនុស្សអន្តរជាតិរបស់កញ្ញា សេង ធារី បានបញ្ជាក់បន្ថែមថា កូដកម្មអត់អាហាររយៈពេល១សប្តាហ៍នេះដើម្បីទាមទារឱ្យអាជ្ញាធរពន្ធនាគារផ្លាស់ប្ដូរកញ្ញាពីការឃុំខ្លួននៅពន្ធនាគារខេត្តព្រះវិហារមកពន្ធនាគារនៅភ្នំពេញវិញនិងស្នើឱ្យអាជ្ញាធរបើកឱ្យកញ្ញាមានសិទ្ធិទទួលបានសេវាផ្សេងៗក្នុងពន្ធនាគារឱ្យបានដូចគ្នានឹងអ្នកជាប់ឃុំផ្សេងទៀតដែរក្នុងនោះរួមទាំងសិទ្ធិទៅបួងសួងតាមគ្រិស្ដសាសនានិងប្រើទូរស័ព្ទជាដើម។
វិទ្យុអាស៊ីសេរីនៅមិនទាន់អាចសុំការឆ្លើយតបរឿងនេះពីអ្នកនាំពាក្យនាយកដ្ឋានពន្ធនាគារ លោក នុត សាវនារ បានទេប៉ុន្តែលោកធ្លាប់អះអាងថា ការតវ៉ាបង្អត់អាហារជាសេរីភាពរបស់អ្នកជាប់ឃុំ។
ការតវ៉ាក្នុងពន្ធនាគាររបស់កញ្ញ សេង ធារី នេះស្របពេលដែលកម្ពុជាក្នុងនាមជាប្រធានប្តូរវេនអាស៊ានរៀបចំខ្លួនទទួលស្វាគមន៍មេដឹកនាំនៃបណ្ដាប្រទេសជាសមាជិកអាស៊ាននិងប្រទេសជាដៃគូអាស៊ានរួមទាំងប្រធានាធិបតីអាមេរិក លោក ចូ បៃឌិន (Joe Biden) ផង ដែលនឹងមកចូលរួមកិច្ចប្រជុំកំពូលអាស៊ាននិងកិច្ចប្រជុំពាក់ព័ន្ធដទៃទៀតនៅក្នុងសប្ដាហ៍នេះ។
អ្នកជំនាញវិទ្យាសាស្រ្តនយោបាយនិងកិច្ចការអន្តរជាតិលោក ឯម សុវណ្ណារ៉ា មានប្រសាសន៍ថា ការតវ៉ារបស់កញ្ញា សេង ធារី នៅពេលនេះនឹងមិនបានការឆ្លើយតបពីអាជ្ញាធរកម្ពុជាឡើយប៉ុន្តែអាចទាក់ទាញការចាប់អារម្មណ៍របស់សហគមន៍អន្តរជាតិ។ លោកថា ល្គិកណារឿងនេះមានការលើកឡើងពីអន្តរជាតិកាន់តែច្រើនក៏អាចជាផ្នែកជំរុញឱ្យអាជ្ញាធរកម្ពុជាពិចារណាដែរ៖
«ថ្វីត្បិតតែវាមិនបានផលពីអាជ្ញាធរកម្ពុជាក៏ដោយក៏ប៉ុន្តែវាអាចបានផលពីសហគមន៍អន្តរជាតិហើយយន្តការដែលគាត់ជ្រើសរើសកូដកម្មអត់អាហារជាជម្រើសតែមួយគត់ដែលគាត់អាចធ្វើបាននៅក្នុងពន្ធនាគារ»។
ទាក់ទងនឹងរឿងនេះដែរមេធាវីសិទ្ធិមនុស្សអន្តរជាតិរបស់កញ្ញា សេង ធារី បានអំពាវនាវដល់ប្រធានាធិបតីសហរដ្ឋអាមេរិកលោក ចូ បៃឌិន (Joe Biden) ដាក់សម្ពាធទៅលោកនាយករដ្ឋមន្ត្រី ហ៊ុន សែន ឱ្យដោះលែងកញ្ញា សេង ធារី និងអ្នកជាប់ឃុំដោយសាររឿងនយោបាយទាំងអស់។
មេធាវីសិទ្ធិមនុស្សអន្តរជាតិក៏បានរម្លឹកពីសំណើរបស់ក្រុមអ្នកសិទ្ធិមនុស្សអន្តរជាតិអង្គការផ្នែកពង្រឹងប្រជាធិបតេយ្យនិងមន្រ្តីការទូតអាមេរិកដែលជម្រុញឱ្យរដ្ឋាភិបាលលោក ហ៊ុន សែន គោរពសិទ្ធិមនុស្សជាពិសេសសិទ្ធិនយោបាយសេរីភាពបញ្ចេញមតិនិងការធានាផ្ដល់លទ្ធភាពគ្រប់បែបយ៉ាងដល់ពលរដ្ឋក្នុងនាមជាប្រទេសប្រជាធិបតេយ្យ។
សមត្ថកិច្ចចាប់ខ្លួនខ្មែរសញ្ជាតិអាមរិកកាំងកញ្ញា សេង ធារី អ្នកជំនាញច្បាប់និងកិច្ចការអន្តរជាតិកាលពីថ្ងៃទី១៤ ខែមិថុនា ក្រោយតុលាការប្រកាសសាលក្រមកាត់ឲ្យកញ្ញាជាប់ពន្ធនាគារ៦ឆ្នាំពីបទចោទរួមគំនិតក្បត់ក្នុងសំណុំរឿងវិលចូលស្រុករបស់លោក សម រង្ស៊ី កាលពីឆ្នាំ២០១៩និងបានបញ្ជូនយ៉ាងតក់ក្រហល់ទៅឃុំបន្តនៅពន្ធនាគារក្នុងខេត្តព្រះវិហារ។
ស្របគ្នានឹងយុវជនធ្លាប់បង្អត់អាហារក្នុងពន្ធនាគារបារម្ភពីសុខទុក្ខកញ្ញា សេង ធារី នៅខាងក្នុងពន្ធនាគារនេះនៅខាងក្រៅពន្ធនាគារមានក្រុមយុវជនខ្មែរថាវរៈមានគ្នា៦នាក់បាននាំគ្នាជួបជុំធ្វើកូដកម្មបង្អត់អាហារខ្លួនឯងតាមកញ្ញ សេង ធារី ដែរ ដោយពួកគេរំពឹងថា អាជ្ញាធរពាក់ព័ន្ធនឹងពិចារណាឡើងវិញដោះលែងកញ្ញាឱ្យមានសេរីភាពវិញនៅក្នុងពេលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។