ក្រុម​គ្រួសារ​អ្នក​ជាប់​ឃុំ​រិះ​គន់លោក ហ៊ុន សែន ដោះ​លែង​សត្វតោ​តែ​មិន​ដោះ​លែង​សាច់​ញាតិ​របស់​ពួក​គាត់​ពី​ពន្ធនា​គារ

ដោយ ហេង រស្មី
2021-07-06
Share
ក្រុម​គ្រួសារ​អ្នក​ជាប់​ឃុំ​រិះ​គន់លោក ហ៊ុន សែន ដោះ​លែង​សត្វតោ​តែ​មិន​ដោះ​លែង​សាច់​ញាតិ​របស់​ពួក​គាត់​ពី​ពន្ធនា​គារ (ឆ្វេង) សត្វតោជាមួយនឹងម្ចាស់ជនជាតិ និងក្រុមយុវជនបរិស្ថានដែលត្រូវបានចាប់ឃុំខ្លួនដោយរបបក្រុងភ្នំពេញ។
រូប៖ RFA

ក្រុម​គ្រួសារ​របស់​អ្នក​ជាប់​ឃុំ ស្នើ​សុំ​ឲ្យ​លោក​នាយក​រដ្ឋ​មន្រ្តី ហ៊ុន សែន មាន​ក្តីមេត្តា​ប្រគល់​សេរី​ភាព​ជូន សកម្ម​ជន​នយោ​បាយ សកម្ម​ជន​​សង្គម និង​បរិស្ថាន ដើម្បី​ឲ្យ​ពួក​គាត់​បាន​រស់​នៅ​​ជួប​ជុំ​ក្រុម​គ្រួសារ​ឡើង​វិញ ដូច​ដែល​លោក ហ៊ុន សែន មាន​កី្ត​មេត្តា​​ដោះ​លែង​សត្វ​តោ​ឲ្យ​ទៅ​រស់​នៅ​ជួប​ជុំ​ជា​មួយ​ម្ចាស់របស់​វា​ដែរ។

ប្រពន្ធ​របស់​សកម្ម​ជន​គណ​បក្ស​ប្រឆាំង​កំពុង​ជាប់​ឃុំលោក កាក់ កុម្ភារ គឺលោក​ស្រី ព្រំ ចន្ថា លើក​ឡើង​ថា​ ការ​លែង​សត្វ​តោ​នេះ គ្រាន់​តែ​បំពេញបំណង​​ម្ចាស់​​ចិញ្ចឹម​​សត្វ​ដែល​​ជា​ជន​ជាតិ​ចិន​តែ​ប៉ុណ្ណោះ ព្រោះ​រដ្ឋា​ភិបាលកន្លង​មក​ពុំ​ដែល​មាន​ចិត្ត​មេត្តា ឬ​ការ​ពារ​ពល​រដ្ឋ​ខ្លួន ដែល​ហ៊ាន​ចេញ​មុខទាម​ទារ​សិទ្ធិ​សេរី​ភាព ប្រជា​ធិប​តេយ្យ និង​ការ​ពារ​ផល​ប្រយោជន៍​សង្គម​នោះទេ។ លោក​ស្រី​ចង់​ឃើញ​រដ្ឋា​ភិបាល​ប្រើ​មនោ​សញ្ចេត​នា​នេះ ដើម្បី​ដោះ​លែង​អ្នក​ទោស​នយោ​បាយ​សង្គម និង​​បរិស្ថាន​​ឱ្យ​មាន​សេរី​ភាព​ឡើង​វិញ ព្រោះ​ពួកគេ​ក៏​ចង់​ជួប​ជុំ​គ្រួសារ​ផង​ដែរ៖ «គាត់​​អត់​​គិត​​ថា​ ​គាត់​​ស្រឡាញ់​ពល​រដ្ឋ​​ខ្លួន​​ឯង​​នឹង​​គាំទ្រ​​គ្នាឯង​​ដែល​​ចេះ​​ដឹង​​រឿង​​សង្គម​​​ចេះ​ដឹង​រឿង​ប្រទេស​ជាតិ​ គាត់​អត់​គិត​ចឹង​ទេ បើគាត់​គិត​អ៊ី​ចឹង​មែន​ គាត់​ចាប់​ប្តី​ពួក​ខ្ញុំ​ដាក់​គុក​និង​កូន​ខ្ញុំ​​ដាក់​គុក​ចា៎ ចឹង​វា​ខុសច្បាប់​ទាំង​ស្រុងខុស​នី​តិ​វិធី​ទាំង​ស្រុក​ ចឹង​គាត់​អត់​បាន​គិត​ដល់​រឿង​ហ្នឹង​ទេ ចឹងបាន​ន័យ​ថា​ កិត្តិយស​និង​អាយុ​ជីវិត​ប្តី​របស់​ពួក​ខ្ញុំ​មិន​ស្មើ​សត្វ​តោ​មួយ​ផង​ចឹង»។

ស្រដៀង​គ្នា​នេះ​ដែរ ​កូន​ស្រី​សកម្ម​ជន​បក្ស​ប្រឆាំង​កំពុង​ជាប់​ពន្ធនា​គារ​លោកស្រី លឹម សាន គឺកញ្ញា ផាន សាត ថា​រដ្ឋា​ភិបាល​ខំ​ប្រឹង​បង្ហាញ​មហា​ជនចំពោះ​​ការ​យក​​​ចិត្ត​ទុក​ដាក់ អាណិត​សត្វ​តោ​របស់​ជន​ជាតិ​ចិន ប៉ុន្តែ​បែរ​ជា​ចាប់ពលរដ្ឋ​របស់​ខ្លួន ដាក់​ពន្ធនា​គារ​ដោយ​គ្រាន់​តែ​ឈឺ​ឆ្អាល​រឿង​សង្គម ការ​ពារយុត្តិ​ធម៌ និង​ប្រយោជន៍​សង្គម​ទៅ​វិញ។ លោក​ស្រី ស្តោក​ស្តាយ​ដែល​រដ្ឋា​ភិបាល​គិត​គូរ​សត្វ​តោ​របស់​ជន​ជាតិ​ចិន​ជាង​ពលរដ្ឋ​របស់​ខ្លួន​កំពុង​រង​គ្រោះដោយ​សារ​អំពើ​អយុត្តិ​ធម៌៖ «ចាប់​គ្នា​អត់​មាន​ថ្ងៃ​ចេញ​ និយាយ​ទៅ​អត់​មាន​ថ្ងៃ​ឡើងដោះស្រាយ ឡើង​សវនា​ការ​ឃើញ​ឡើង​រហូត​ ខ្ញុំ​តាម​ពេល​ចាប់​ម៉ែ​ខ្ញុំ​រយៈ​ពេល ​៨ ​ខែហ្នឹង​មក ​តែ​អត់​មាន​ថា​កាត់​ទោស​យ៉ាង​ណា ដោះ​លែង​​នៅ​ក្រៅ​ឃុំ ដែល​គាត់មិន​គួរ​ដាក់​គុក​យក​ទៅ​ដាក់​គុក​អត់​ឃើញ​ដំណោះ​ស្រាយ​ថា ​លែង​គាត់​ក្រៅ​ឃុំ ឬ​ព្យួរ​ទោស​គាត់​អ៊ី​ចឹង​អត់​មាន​ឃើញ តែ​បើ​សម្រាប់​ជន​ជាតិ​ចិន​ សម្រាប់​អ្នកមាន​អំណាច​មួយ​ចំនួន​ គាត់​ដោះ​លែង​នៅ​ក្រៅ​ឃុំ​ចឹង»។

រីឯ​ម្តាយ​របស់​យុវជន​​ខ្មែរ​ថា​វរៈ​កំពុង​ជាប់​ពន្ធនា​គារលោកស្រី ឈឿន ដារ៉ាវី គឺលោក​ស្រី ថាច់ ធីតា ប្រាប់​ថា​ កូន​លោក​ស្រី​ជាប់​ពន្ធនា​គារ​ទាំង​អយុត្តិ​ធម៌​ ១១ ខែ​មក​​​ហើយ ប៉ុន្តែ​រដ្ឋា​ភិបាល​ពុំ​បង្ហាញ​កាយ​វិការ ឬ​ទឹក​ចិត្ត​ណា​មួយ​ដើម្បីលើក​ទឹក​ចិត្ត​ដល់​យុវ​ជន​នោះ​ទេ។ លោក​ស្រី​​ស្នើ​ឱ្យ​រដ្ឋា​ភិបាល​ដោះ​លែង​កូន​លោក​ស្រី​និង​សកម្ម​ជន​ផ្សេង​ទៀត​ឱ្យ​មាន​សេរី​ភាព​ឡើង​វិញ ព្រោះ​លោក​ស្រីព្រួយ​បារម្ភ​សុខ​ទុក្ខ​កូន​នៅ​​ក្នុង​ពន្ធនា​គារ​​ពេល​រីក​រាល​​ដាល​នៃ​ជំងឺ​កូវីដ៖ «ដូច​ជា​កូន​ខ្ញុំ​ឬ​ក៏​ក្មេងៗ​ដែល​គ្នា​ធ្វើ​ការ​ងារ​ដើម្បី​ការ​ពារ​បរិស្ថាន​ចង់​ឱ្យ​នាយក​រដ្ឋ​មន្រ្តី​ពិចារ​ណា​ឡើង​វិញ ​អំពី​បញ្ហា​ក្មេងៗ​ដែល​គ្នា​ធ្វើសកម្ម​ភាព​គ្រាន់​តែ​ការ​ពារ​ទ្រព្យ​សម្បត្តិ​ជាតិ​ប្រជា​ពលរដ្ឋ»។

ប្រតិកម្ម​​នេះ គឺ​​​បន្ទាប់​​ពី​​លោក​នាយក​រដ្ឋ​មន្រ្តី ហ៊ុន សែន សរសេរ​នៅ​លើ​ហ្វេស​ប៊ុក​ផ្ទាល់​ខ្លួន​ថា ក្រោយ​ពលរដ្ឋ​ផ្តល់​មតិ​យោ​បល់​អាណិត​សត្វ​តោ លោកបាន​ពិភាក្សា​ជា​មួយ​​រដ្ឋ​មន្រ្តី​ក្រសួង​កសិ​កម្ម​​ដោយ​សម្រេច​អនុញ្ញាត​ឱ្យ​ម្ចាស់សត្វ​តោ​របស់​ជន​ជាតិ​ចិន​យក​ទៅ​ចិញ្ចឹម​នៅ​ក្នុង​ផ្ទះ​វិញ ​​ក្រោម​​លក្ខ​ខណ្ឌ​ធ្វើទ្រុង​ឱ្យ​ត្រឹម​ត្រូវ​​ដើម្បី​ធា​នា​​សុវត្ថិ​ភាព​​មនុស្ស​នៅ​ក្នុង​ផ្ទះ​ និង​អ្នក​ជិត​ខាង​ដែរ។ លោក ហ៊ុន សែន បញ្ជាក់​ថា​ មូល​ហេតុ​ដែល​លោកយោគ​យល់​និង​ដោះ​លែងសត្វ​តោ​នេះ​​ ព្រោះ​នេះ​គឺ​ជា​ករណី​ពិសេស ដោយ​សារ​សត្វ​តោ​មួយ​ក្បាល​នេះ ត្រូវ​បាន​បុរស​ជន​ជាតិ​ចិន ចិញ្ចឹម​តាំង​ពី​តូច​មក។

អាស៊ី​សេរី​មិន​អាច​ទាក់​ទង​អ្នក​​នាំ​​ពាក្យ​​ក្រសួង​កសិ​កម្ម​រុក្ខា​ប្រមាញ់ និងនេសាទលោក ស្រី វុឌ្ឍី និង​អ្នក​នាំ​ពាក្យ​ក្រសួង​យុត្តិ​ធម៌​លោក ជិន ម៉ាលីន ដើម្បី​បក​ស្រាយ​​មូល​ហេតុ​និង​ការ​អនុវត្ត​ផ្លូវ​ច្បាប់​ជុំវិញ​រឿង​នេះ​បាន​ទេ នៅ​ថ្ងៃទី៥ ខែកក្កដា។

អ្នក​ប្រើ​ប្រាស់​បណ្តាញ​សង្គម​មួយ​ចំនួន បាន​បញ្ចេញ​ប្រតិ​កម្ម​ព្រោង​ព្រាតចំពោះលោក ហ៊ុន សែន ថា​ការ​ចិញ្ចឹម​សត្វ​ព្រៃ​នៅ​តាម​ផ្ទះ ​គឺ​ផ្ទុយ​ពី​ច្បាប់​រដ្ឋ ដូច្នេះ​មនោ​សញ្ចេត​នា​លែង​​សត្វ​យក​ទៅ​ចិញ្ចឹម​នៅ​ផ្ទះ​វិញ​ វា​បង្ហាញ​ពី​ការ​អនុវត្ត​ផ្ទុយ​នឹង​ផ្លូវ​ច្បាប់។ ពួក​គេបន្ត​ថា បើ​លោក ហ៊ុន សែន ដោះ​លែងសត្វ​តោបាន ដូច្នេះ​លោក  គួរ​​តែ​​ដោះ​លែង​យុវជន​ដែល​ការ​ពារ​បរិស្ថាន ការ​ពារធន​ធាន​ធម្ម​ជាតិ អភិរក្ស​ព្រៃ​ឈើ​សត្វ​ព្រៃ​ឱ្យ​ជួប​ជុំ​គ្រួសារ​ឡើង​វិញ។

អនុ​ប្រធានគណបក្ស​សង្គ្រោះ​ជាតិលោក អេង ឆៃអ៊ាង បាន​បង្ហោះ​លើ​ហ្វេស​ប៊ុក​ផ្ទាល់ខ្លួន​ថា ថ្ងៃ​នេះលោក ហ៊ុន សែន បង្ហាញ​ទឹក​ចិត្ត​​មេត្តា​ធម៌ ចំពោះ​​សត្វ​តោ​មួយ ហើយ​បាន​បញ្ជា​ឱ្យ​ដោះ​លែង​ទៅ​ម្ចាស់​វិញ ក៏​ប៉ុន្តែ​អ្នក​ទោស​នយោ​បាយ និងមន​សិកា រួម​ទាំង​កុមារា កាក់ សុវណ្ណច័្ឆយ មិន​ដឹង​ពេល​ណា​​លោក ហ៊ុន សែន មាន​ចិត្ត​មេត្តា​ធម៌​ធ្វើ​អន្តរា​គមន៍​ឱ្យ​ដោះ​លែង​ពួក​គេ​នោះ​ទេ។

សមាជិក​បណ្តាញ​យុវ​ជន​កម្ពុជា (CYN) លោក សាន់ ម៉ាឡា យល់​ថា ​ការសម្រេច​ចិត្ត​របស់​រដ្ឋាភិបាល​ផ្អែក​លើ​មនោ​សញ្ចេតនា​នេះ អាច​ប៉ះ​ពាល់​ដល់សត្វ​ព្រៃ​ដោយ​ជំរុញ​​ឲ្យ​មាន​អ្នក​ដែល​មាន​បំណង​ចិញ្ចឹមសត្វ​ព្រៃ​កាន់​តែ​ច្រើន ដែល​ផ្ទុយ​គោល​ការណ៍​ច្បាប់។ លោក​ថា​ រដ្ឋាភិបាល​សម្រេច​ចិត្ត​លែង​សត្វ​តោនេះ រដ្ឋា​ភិបាល​គួរ​ប្រើ​មនោ​សញ្ចេតនា​នេះ ​ដោះ​លែង​យុវជន​ការ​ពារ​បរិស្ថានដែល​កំពុង​ជាប់​ពន្ធនា​គារ និង​ទំលាក់​ចោល​ការ​ចោទ​ប្រកាន់ ដើម្បី​ឱ្យ​ពួកគាត់​មាន​សេរី​ភាព​ជួប​ជុំ​គ្រួសារ​ឡើង​វិញ៖ «មហាជន​មួយចំនួន​គាត់​មាន​អារម្មណ៍​ថា​ អាណិត​តោឬ​ក៏​ស្នើ​ឱ្យ​រដ្ឋាភិបាល​ហ្នឹង​ប្រគល់​តោ​ឱ្យ​ទៅ​ម្ចាស់​វិញ​ រដ្ឋាភិបាល​ក៏បាន​សម្រេច​ចិត្ត​ដោយ​យោងទៅ​លើ​កត្តា​មនោសញ្ចេតនា ដូច្នេះ​ខ្ញុំក៏​គិតថា​ រដ្ឋាភិបាល​គួរមាន​មនោសញ្ចេតនា​ចំពោះ​យុវជន​ក្មេងៗ​ដែល​គាត់​គ្រាន់​តែ​ធ្វើការងារ​ដើម្បី​ផលប្រយោជន៍​រួម​របស់​ប្រទេស​ជាតិ​ ហើយ​ធ្វើការ​ដោះលែង​ទំលាក់​ចោល​ការចោទ​ប្រកាន់​ដើម្បី​ឱ្យ​ពួកគាត់​មាន​សេរីភាព​ជួបជុំគ្នា​និង​បំពេញ​ការងារ​ស្រប​ទៅ​តាម​ច្បាប់»។

មក​ទល់​ពេល​នេះ​ អាជ្ញាធរ​​របប​ក្រុង​ភ្នំពេញ​ បាន​​ចាប់​​ខ្លួន​​សកម្ម​ជន​​សកម្ម​ជន នយោ​បាយ ​សកម្ម​ជន​សង្គម​ និង​​សកម្ម​ជន​​បរិស្ថាន​​ប្រមាណ​​ ៨០​ នាក់​​ ហើយ​ដាក់​​​ក្នុង​​ពន្ធនា​គារ​ ដោយ​​ភាគ​ច្រើន​​ ចោទ​ប្រកាន់​​ពី​​បទ​​ញុះ​ញង់ ​និង​​រួម​គំនិតក្បត់ ដោយ​សារការ​អនុវត្ត​សិទ្ធិ​ជា​មូល​ដ្ឋាន​របស់​ពួក​គាត់។ ក្រុមគ្រួសារ​របស់អ្នក​ជាប់​ឃុំ រួម​ទាំង​​ក្រុម​​អង្គការ​​ជាតិ-អន្តរ​ជាតិ​ និង​​ក្រុម​​ប្រទេស​​ប្រជា​ធិបតេយ្យធំៗ ​តែង​តែ​​ថ្កោល​ទោស​​ជា​​បន្ត​បន្ទាប់​​ថា​ ការ​ចាប់​ឃុំ​​ខ្លួន​​ទាំង​នេះ ​ធ្វើ​ឡើងដោយ​​គ្មាន​​​មូល​ដ្ឋាន​​ច្បាប់ ​និង​​ទាម​ទារ​ឲ្យ​​ដោះ​លែង​ពួក​គេ​​​វិញ​​ជា​បន្ទាន់។

ទោះ​ជា​យ៉ាង​ណា អាជ្ញាធរ​របប​លោក ហ៊ុន សែន មិន​ដែល​យក​ចិត្ត​ទុក​ដាក់​ចំពោះសំឡេង​ទទូច​អង្វរ​ក​ទាំង​នេះ​ទេ ថែម​ទាំង​បំភិត បំភ័យ គំរាម​កំហែង និងធ្វើ​ទុក្ខ​បុក​ម្នេញ​គ្រប់​រូប​ភាព​ទៅ​លើ​សមា​ជិក​ក្រុម​គ្រួសារ​របស់​សកម្ម​ជន​សង្គ្រោះជាតិ​ដែល​តវ៉ា​ទាម​ទារ​ឲ្យ​ដោះ​លែង​អ្នក​កំពុង​ជាប់​ឃុំ​នោះ​​ទៀតផង។ លើស​ពីនេះ ថ្មីៗ​នេះ អាជ្ញាធរ​របប​លោក ហ៊ុន សែន បាន​ចាប់​ឃុំ​ខ្លួន​កូន​ប្រុស​របស់សកម្ម​ជន​បក្ស​ប្រឆាំង​ដែល​កំពុង​ជាប់​ឃុំ គឺ​ក្មេង​ប្រុស កាក់ សុវណ្ណ​ច្ឆ័យ ដែលមាន​វ័យ​១៦ និង​មាន​បញ្ហា​ផ្នែក​សតិ​បញ្ញា​​ថែម​ទៀត ដែល​គេ​មើល​ឃើញ​ថា ជា​ចេត​នា​បំបាក់​ស្មារតី​កុំ​ឲ្យ​ងើប​តវ៉ា​ទាម​ទារ​យុត្តិ​ធម៌៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល