ក្រុមសកម្មជនព្រៃឈើ និងដីធ្លីលើកឡើងថា ការបិទសារព័ត៌មានវីអូឌី (VOD) គឺប្រៀបដូចជាការបិទសំឡេងរបស់ពួកគាត់ ទៅកាន់សាធារណៈ។ មន្ត្រីអង្គការសង្គមស៊ីវិលយល់ថា រដ្ឋាភិបាលគួរផ្ដល់តម្លៃដល់សារព័ត៌មានឯករាជ្យ ជាងសារព័ត៌មានដែលតែងតែគាំទ្រខ្លួន ដើម្បីធានាឱ្យការអភិវឌ្ឍមិនរំលោភសិទ្ធិមនុស្ស និងបរិស្ថាន។
ប្រជាសហគមន៍ព្រៃឈើ និងសកម្មជនដីធ្លី លើកឡើងដូចៗគ្នាថា ការបិទសារព័ត៌មាន វីអូឌី គឺប្រៀបដូចជាការកាត់ផ្ដាច់សំឡេងរបស់ពួកគេ ដែលតែងតែអំពាវនាវឱ្យអាជ្ញាធរពាក់ព័ន្ធ និងថ្នាក់ដឹកនាំរដ្ឋាភិបាលបានដឹងពីទុក្ខលំបាក និងស្វែងរកដំណោះស្រាយទៅដល់ពួកគេដូច្នេះដែរ។
ប្រជាសហគមន៍ព្រៃឡង់ ខេត្តកំពង់ធំ លោក ហឿន សុភាព ប្រាប់វិទ្យុអាស៊ីសេរីថា ក្រោយពីការបិទសារព័ត៌មានឯករាជ្យ វីអូឌី លោកមិនអាចផ្ដល់ព័ត៌មានលម្អិតពីការកាប់ព្រៃឈើ ឱ្យបានញឹកញាប់ដូចកាលពីមុននោះឡើយ។ លោកបន្តទៀតថា ការផ្សព្វផ្សាយសារព័ត៌មាន វីអូឌី កន្លងមក មិនបានបំភ្លៃការពិត ឬបំផ្លាញកេរ្តិ៍ឈ្មោះរដ្ឋាភិបាលនោះឡើយ ព្រោះការចុះផ្សាយពីវិនាសកម្មព្រៃឈើនៅព្រៃឡង់ គឺគ្រាន់តែមានគោលបំណងឱ្យរដ្ឋាភិបាល ចាត់វិធានការការពារព្រៃឈើឱ្យនៅគង់វង្សតែប៉ុណ្ណោះ។
លោក ហឿន សុភាព៖«នៅពេលនេះកម្ពុជាយើង គឺបានន័យថាបាត់បង់វិទ្យុធំៗ វិទ្យុឯករាជ្យមួយចំនួនហ្នឹង មិនដឹងថាមានអីពឹងបន្តទៀតទេ ឥឡូវវាទៅជាអាចធ្វើឱ្យប៉ះពាល់ក្រុមសហគមន៍មួយចំនួនដែរ ដែលចង់ផ្សព្វផ្សាយបន្ត»។
ស្រដៀងគ្នានេះដែរ សកម្មជនដីធ្លី លោកស្រី ប្រាក់ សុភា ដែលជាពលរដ្ឋកំពុងរងគ្រោះពីការលុបបឹងតាមោក ក្នុងរាជធានីភ្នំពេញ ប្រាប់វិទ្យុអាស៊ីសេរីថា ការបិទវិទ្យុ វីអូឌី ប្រៀបដូចជាការបិទសំឡេងតវ៉ារបស់ប្រជាសហគមន៍ដីធ្លីបឹងតាមោក មួយផ្នែកផងដែរ។ លោកស្រីបន្ថែមថា សារព័ត៌មានដែលមាននិន្នាការគាំទ្ររដ្ឋាភិបាល មិនដែលចុះផ្សាយបញ្ហាដែលកំពុងកើតមានរបស់សហគមន៍លោកស្រីនោះឡើយ ក៏ប៉ុន្តែបែរជាចុះព័ត៌មានបំភ្លៃ ចោទក្រុមតវ៉ាដែលរងគ្រោះគឺជាអ្នកបង្កអសន្តិសុខទៅវិញ។ លោកស្រីបន្ថែមថា សារព័ត៌មានឯករាជ្យ វីអូឌី បានដើរតួនាទីយ៉ាងសំខាន់ដើម្បីឱ្យសាធារណៈជនបានដឹងពី ការពិតអំពីបញ្ហានៅក្នុងសហគមន៍លោកស្រី ដូច្នេះរដ្ឋាភិបាលមិនគួរបិទសារព័ត៌មាននេះឡើយ។
លោកស្រី ប្រាក់ សុភា៖«យើងជឿជាក់លើ វីអូឌី ព្រោះ វីអូឌី បានឡាយផ្ទាល់ពីទុក្ខសោករបស់ពួកយើង ព្រោះអីនៅពេលដែលពួកយើងមានទុក្ខសោក យើងបានទម្លាយព័ត៌មានតាមសារព័ត៌មាន វីអូឌី គឺ វីអូឌី បានផ្សាយផ្ទាល់អ៊ីចឹង យើងសោកស្ដាយបំផុតដែលបិទ វីអូឌី ហើយយើងសង្ឃឹមថា សារព័ត៌មាន វីអូឌី នឹងត្រឡប់មកវិញ»។
លោកនាយករដ្ឋមន្ត្រី ហ៊ុន សែន បានបញ្ជាឱ្យក្រសួងសារព័ត៌មាន ដកហូតអាជ្ញាប័ណ្ណសារព័ត៌មាន វីអូឌី យ៉ាងតក់ក្រហល់កាលពីយប់ថ្ងៃទី១៣ ខែកុម្ភៈ កន្លងទៅ។ លោក ហ៊ុន សែន ចោទសារព័ត៌មាននេះថា បានប្រព្រឹត្តិកំហុសវិជ្ជាជីវៈ និងប៉ះពាល់ដល់កិត្តិយសរដ្ឋាភិបាលធ្ងន់ធ្ងរ ទាក់ទងនឹងការចុះផ្សាយប្រធានបទដែលមានចំណងជើងថា "មន្ត្រីរដ្ឋាភិបាលថា ការដែលលោក ហ៊ុន ម៉ាណែត ដើរតួនាទីជំនួសឪពុកក្នុងការផ្ដល់ជំនួយឱ្យតួគី (Turkey) មិនមែនជារឿងខុសឆ្គង"។
ការបិទសារព័ត៌មាននេះ ត្រូវបានគេមើលឃើញថាធ្វើឡើងតាមទំនើងចិត្ត របស់លោក ហ៊ុន សែន និងផ្ទុយពីច្បាប់ស្ដីពីរបបសារព័ត៌មាន ដែលមិនបានចែងឱ្យដកអាជ្ញាប័ណ្ណ សារព័ត៌មាននោះឡើយ បើទោះបីជាការចុះផ្សាយមានព័ត៌មាននោះមានកំហុសក្ដី។
វិទ្យុអាស៊ីសេរីមិនអាចទាក់ទង ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ដើម្បីសុំការបកស្រាយជុំវិញរឿងនេះបាននៅឡើយនោះទេ នៅថ្ងៃទី៦ ខែមីនានេះ។
ជុំវិញរឿងនេះ អ្នកនាំពាក្យសមាគមការពារសិទ្ធិមនុស្ស អាដហុក លោក ស៊ឹង សែនករុណា យល់ស្របចំពោះការលើកឡើងរបស់ប្រជាសហគមន៍។ លោកបន្ថែមថា សារព័ត៌មានឯករាជ្យ មានសារៈសំខាន់ដើម្បីធានាឱ្យបាននូវស្ថិរភាពសង្គម ដូច្នេះការបិទសារព័ត៌មាន វីអូឌី គឺជាកំហុសឆ្គងមួយរបស់រដ្ឋាភិបាល។ លោក ស៊ឹង សែនករុណា បន្ថែមថា សារព័ត៌មាន វីអូឌី មិនបានវាយប្រហាររដ្ឋាភិបាល ដូចការចោទប្រកាន់នានាកន្លងមកនោះទេ ក៏ប៉ុន្តែសារព័ត៌មាននេះ បានជួយរដ្ឋាភិបាលជាច្រើន ក្នុងការលើកកម្ពស់ការគោរពសិទ្ធិមនុស្ស និងការការពារធនធានធម្មជាតិជាដើម។
លោក ស៊ឹង សែនករុណា៖«បើសិនជាបាត់សំឡេងទាំងអស់ហ្នឹង ថាតើបញ្ហានៅក្នុងសង្គមប្រជាធិបតេយ្យ វាមានការចូលរួមដូចម្ដេចបាន ព្រោះលទ្ធិប្រជាធិបតេយ្យគឺជាការចូលរួមរបស់ពលរដ្ឋ ហើយពលរដ្ឋជាម្ចាស់អំណាច អ៊ីចឹងបើសិនជាគាត់មានការខ្វះការចូលរួមហើយ ធាតុផ្សំ ឬក៏សសរស្ដម្ភសង្គមប្រជាធិបតេយ្យហ្នឹង អាចហ្នឹងមានការរង្គោះរង្គើ អាចមានការចាត់ទុកថា សង្គមមួយមិនទាន់មានលទ្ធិប្រជាធិបតេយ្យ ត្រឹមត្រូវ ពិតប្រាកដនោះទេ»។
អង្គការជាតិ និងអន្តរជាតិ លើកឡើងថា ការបិទសារព័ត៌មានឯករាជ្យ វីអូឌី គឺជាការរឹតត្បិតសេរីភាពសារព័ត៌មាន បន្ថែមមួយកម្រិតទៀត ខណៈសារព័ត៌មានជាច្រើន រួមមានដូចជា វិទ្យុ ទូរទស្សន៍ និងបណ្ដាញសង្គមជាច្រើន មិនដែលចុះផ្សាយព័ត៌មានទាក់ទងនឹងការរំលោភសិទ្ធិមនុស្ស និងការបំផ្លាញធនធានធម្មជាតិនោះឡើយ។ ព័ត៌មានទាំងនោះចុះផ្សាយតែព័ត៌មានគាំទ្ររដ្ឋាភិបាលតែប៉ុណ្ណោះ។ ក្រោយពីបិទសារព័ត៌មាន វីអូឌី ដែលមានបុគ្គលិក ៥៦នាក់ កំពុងធ្វើការនៅទូទាំងប្រទេស និងអ្នកតាមដានតាមផេកហ្វេសប៊ុក ១,៨លាននាក់ បញ្ហាតាមសហគមន៍ជាច្រើន មិនត្រូវបានផ្សព្វផ្សាយឱ្យបានទូលំទូលាយដូចមុននោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។