អ្នកឃ្លាំមើល​ថា រដ្ឋាភិបាល​យឺតយ៉ាវ​​ស៊ើបអង្កេត​ការ​ស្លាប់​ទារិកា​រស់នៅ​ជាមួយ​ម្ដាយ​ក្នុង​ពន្ធនាគារ

ដោយ ហេង រស្មី
2020-02-20
អ៊ីម៉ែល
មតិ
Share
បោះពុម្ព
មណ្ឌល​អប់រំ​កែប្រែ​ព្រៃស "ម២"
មណ្ឌល​អប់រំ​កែប្រែ​ព្រៃស "ម២"
រូប៖ អង្គការ​សិទ្ធិមនុស្ស លីកាដូ (LICADHO)

អ្នកឃ្លាំមើល​សិទ្ធិ​ពលរដ្ឋ ថា រដ្ឋាភិបាល​យឺតយ៉ាវ ក្នុង​ការ​បញ្ជា​ឱ្យ​ស៊ើបអង្កេត ការ​ស្លាប់​របស់​ទារិកា​អាយុ​៥​ខែ ដែល​រស់នៅ​ជាមួយ​ម្ដាយ​កំពុង​ជាប់ឃុំ​ក្នុង​ពន្ធនាគារ​។ បើ​ទោះ យ៉ាងណា សង្គម​ស៊ីវិល​សង្ឃឹមថា ក្រោយ​ការ​ស៊ើបអង្កេត​ម្ដងនេះ រដ្ឋាភិបាល​អាច​មាន​ចំណាត់ការ ក្នុង​ការ​កែប្រែ​ស្ថានភាព​អាក្រក់ ការរំលោភ​សិទ្ធិមនុស្ស​ទាំង​ក្នុង និង​ក្រៅ​ពន្ធនាគារ។

ការ​លើកឡើង​របស់​ក្រុម​អ្នកឃ្លាំមើល​សិទ្ធិមនុស្ស ក្រោយ​ពេល រដ្ឋមន្ត្រី​ក្រសួង​មហាផ្ទៃ ប្រកាស​កាលពី​ថ្ងៃ​ទី​១៩ កុម្ភៈ ថា នឹង​បើក​ការស៊ើបអង្កេត ការ​ស្លាប់​របស់​ទារិកា​អាយុ ៥​ខែ បើ​ទោះ គ្មាន​សំណូមពរ​ពី​អង្គការ​សិទ្ធិមនុស្ស​ក៏ដោយ។

ប្រធាន​មជ្ឈមណ្ឌល​ប្រជាពលរដ្ឋ ដើម្បី​អភិវឌ្ឍន៍ និង​សន្តិភាព លោក យង់ គិមអេង ស្វាគមន៍​ចំណាត់​ការ របស់​រដ្ឋមន្ត្រី​ក្រសួង​មហាផ្ទៃ តែ​លោក ថា ចំណាត់​ការ​នេះ មាន​ភាព​យឺតយ៉ាវ ព្រោះ ការ​ស្លាប់​របស់​ទារិកា ជិត ១​ខែ​មក​ហើយ និង​ទាល់​តែ​មាន​របាយការណ៍​ពី​ខាង​អង្គការ​លីកាដូ ទើប​រដ្ឋាភិបាល​បង្ហាញ​ឆន្ទៈ ថា បើក​ការ​ស៊ើបអង្កេត។

ម្យ៉ាងទៀត លោក យង់ គិមអេង សង្កេតឃើញ​ថា ការស៊ើបអង្កេត​ករណី​មិន​ប្រក្រតី​កន្លងមក រដ្ឋាភិបាល មិន​បាន​ចាត់វិធានការ​ច្បាស់លាស់​ទេ ដែល​ធ្វើ​ឱ្យ​ករណី​រំលោភ​លើ​សិទ្ធិ​ជន​ជាប់​ឃុំ នៅតែ​កើតឡើង​ដដែលៗ​។ លោក ចង់​ឱ្យ​រដ្ឋាភិបាល​ចាត់វិធានការ​ឱ្យ​ច្បាស់លាស់ នឹង​តឹងរ៉ឹង ក្រោយ​ពេល ស៊ើបអង្កេត​រក​ឃើញ​ភាព​មិន​ប្រក្រតី​នេះ​រួច៖ «មន្ត្រី​នៅ​ក្នុង​ពន្ធនាគារ​នោះ អត់​បាន​រាយការណ៍​មកដល់​ក្រសួង ឬក៏​យ៉ាង​ម្ដេច​? នេះ​ជា​រឿង​មួយ​សំខាន់​ណាស់ណា​។ បើសិន​ណា ខ្វះ​ចំណាត់ការ​នៃ​ការ​រាយការណ៍ ឬក៏​មានការ​លាក់​ព័ត៌មាន ដែល​ក្រសួង​អត់​ដឹង​ហ្នឹង អាហ្នឹង​ត្រូវតែ​មាន​ទោស​ទណ្ឌ​ធ្ងន់ធ្ងរ​តទៅទៀត​ហើយ​។ ឬក៏​ថា ក្រសួង​មិនទាន់​រៀបចំ​ក្រុម​ស៊ើបអង្កេត​អ្វី ឱ្យ​បាន​លឿន​។ ប៉ុន្តែ​ពាក់ព័ន្ធ​នឹង​ការ​ស្លាប់​មនុស្ស គួរតែ​រៀបចំ​ក្រុម​ស៊ើបអង្កេត​ឱ្យ​បាន​លឿន ជាជាង​ទុក​ពេល​វេលា​យូរ​អ៊ីចឹង​ណា»

កាលពី​ថ្ងៃ​ទី​១៩ កុម្ភៈ រដ្ឋមន្ត្រី​ក្រសួងមហាផ្ទៃ លោក ស ខេង បាន​បញ្ជា​ឱ្យ​សមត្ថកិច្ច​ស៊ើបអង្កេត ការ​ស្លាប់​របស់​ទារិកា​អាយុ ៥ ខែ​ម្នាក់ នៅ​មន្ទីរពេទ្យ មិត្តភាព​ខ្មែរ​-​សូវៀត ក្នុង​រាជធានី​ភ្នំពេញ ដែល​ទារិកា​នោះ រស់នៅ​ជាមួយ​ម្ដាយ​កំពុង​ជាប់ឃុំ​ក្នុង​មណ្ឌល​អប់រំ​កែប្រែ​ម​២។ លោក ស ខេង ប្រាប់​ក្រុម​អ្នកសារព័ត៌មាន នៅ​ក្រសួងមហាផ្ទៃ ថា ករណី​នេះ បើ​ទោះ​គ្មាន​សំណូមពរ​ពី​ខាង​អង្គការ​លីកាដូ ក៏​សមត្ថកិច្ច ត្រូវតែ​ធ្វើការ​ស៊ើបអង្កេត​ដែរ៖ «អាហ្នឹង យើង​ត្រូវតែ​ស៊ើបអង្កេត​ហើយ មិនបាច់​គាត់​អំពាវនាវ ក៏​យើង​ត្រូវ​ស៊ើបអង្កេត»

ប៉ុន្តែ​ទារិកា​នេះ ស្លាប់​ជិត​មួយ​ខែ​មក​ហើយ គឺ​ស្លាប់​កាលពី​ថ្ងៃអាទិត្យ ទី​២៦ មករា និង​ទាល់តែ​អង្គការ​លីកាដូ បង្ហាញ​របាយការណ៍​ជា​សាធារណៈ នៅ​ថ្ងៃ​ទី​១៨ កុម្ភៈ ទើប​អាជ្ញាធរ បាន​បង្ហាញ​ឆន្ទៈ ស៊ើបអង្កេត ជា​បន្តបន្ទាប់។

គណៈកម្មការ​សិទ្ធិមនុស្ស​របស់​រដ្ឋាភិបាល បាន​ចេញ​មុខ ការពារ​ភាព​ត្រឹមត្រូវ របស់​អាជ្ញាធរ​ពាក់ព័ន្ធ ថា ការ​ស្លាប់​របស់​ទារិកា ដោយសារ អាការៈ​ជនរងគ្រោះ មាន​សភាព​ធ្ងន់ធ្ងរ​ពេក ដល់​ថ្នាក់​មិន​អាច​ជួយ​សង្គ្រោះ​បាន​។ គណៈកម្មការ​នេះ អះអាង​ថា ក្រុម​គ្រូពេទ្យ​ថត ឃើញ​ថា​ទារិកា​រងគ្រោះ សណ្ដក​ឆ្អឹង និង​បាន​យកចិត្តទុកដាក់​ព្យាបាល ដោយ​គ្មាន​ការ​ធ្វើ​ប្រហែល​ម្ដង​សោះ​។ ឯ​ខាង​ពន្ធនាគារ​ក៏​មាន​ការ​សោកស្ដាយ​ដែរ។

ប៉ុន្តែ​អង្គការ​លីកាដូ រក​ឃើញ​ថា មូលហេតុ​ដំបូង គឺ​ទារិកា បាក់ឆ្អឹង​ភ្លៅ មិនមែន​សណ្ដក​ឆ្អឹង​ទេ​។ លីកាដូ ថា ការ​ស្លាប់​នេះ មាន​ការ​ពាក់ព័ន្ធ នឹង​ភាព​មិន​ស៊ី​សង្វាក់​គ្នា រវាង​មន្ត្រី​ពន្ធនាគារ និង​គ្រូពេទ្យ នៅ​មន្ទីរ​ពេទ្យ​រុស្ស៊ី និង​ពេទ្យ​កុមារ​ជាតិ ដែល​បញ្ជូន​ទារិកា​រងគ្រោះ​ចុះឡើង មិន​ព្រម​អនុញ្ញាត​ឱ្យ​ក្មេង​រងគ្រោះ​បាន​សម្រាក​ព្យាបាល​ក្នុង​មន្ទីរពេទ្យ​។ អ្នក​ការពារ​សិទ្ធិមនុស្ស ហៅ​ការប្រកាស​ព័ត៌មាន​របស់​គណៈកម្មការ​សិទ្ធិមនុស្ស ថា មិន​ឆ្លុះបញ្ចាំង​ការ​ពិត។

នាយក​ប្រតិបត្តិ​អង្គការ​សម្ព័ន្ធ​គណនេយ្យ​សង្គម​កម្ពុជា លោក សន ជ័យ យល់​ថា ដើម្បី​កាត់បន្ថយ ឬ​លុបបំបាត់​ករណី​រំលោភ​សិទ្ធិ​មនុស្ស​បែបនេះ ចាំបាច់​ក្រសួងមហាផ្ទៃ ត្រូវ​បើកចំហ​ឱ្យ​បាន​ទូលាយ​ក្នុង​ការ​ចូលរួម តាមដាន​ការងារ​របស់​មន្ត្រី​ក្នុង​ពន្ធនាគារ ពី​ភាគី​ពាក់ព័ន្ធ ពិសេស​ការ​ចូលរួម​របស់​សង្គម​ស៊ីវិល​។ បើ​គ្មាន​ការ​បើកចំហ​ឱ្យ​ចូលរួម​ចំណែក​ទេ បញ្ហា​នេះ នឹង​នៅតែ​កើតឡើង​បន្ត៖ «បើ​គ្មាន​ដំណោះស្រាយ ឬក៏​គ្មាន​មធ្យោបាយ​ណាមួយ ដើម្បី​ជា​ការ​រួមចំណែក យើង​យល់ថា បញ្ហា​នេះ នឹង​នៅតែ​បន្ត​ដដែល​។ ការ​បើក​ទូលាយ​នៅ​ក្នុង​ការ​តាមដាន​ការងារ​របស់​ពន្ធនាគារ គួរតែ​កើតមាន ហើយ​ផ្ដល់​ឱកាស​ឱ្យ NGO ពិនិត្យមើល​បញ្ហា​នេះ»

ទារិកា អាយុ​៥​ខែ ដែល​រស់នៅ​ជាមួយ​ម្ដាយ​កំពុង​ជាប់ឃុំ ក្នុង​មណ្ឌល​អប់រំ​កែប្រែ​ម​២ ឬ​គុក​ព្រៃ​ស បាន​ស្លាប់ ដោយសារ​តែ រលាក​សួត និង​ខ្វះ​អាហារូបត្ថម្ភ។ ម្ដាយ​របស់​ទារិកា​រង​គ្រោះ ត្រូវ​បាន​បញ្ជូន​ទៅ​ឃុំខ្លួន ក្នុង​ពន្ធនាគារ នៅ​ពាក់កណ្ដាល​ឆ្នាំ​២០១៩ នៅ​ពេល​ស្ត្រី​នោះ មានគភ៌​៨​ខែ ជិត​ដល់​ថ្ងៃ​ឆ្លងទន្លេ​។ មន្ត្រី​តុលាការ បញ្ជា​ឱ្យ​ឃុំខ្លួន​ស្ត្រី​នោះ ដោយ​មូលហេតុ ថា បាន​កាន់កាប់​កញ្ចប់​គ្រឿង​ញៀន មានតម្លៃ​ប្រហែល​១​ម៉ឺន​រៀល ស្មើ​២,៥​ដុល្លារ​អាមេរិក​។ ការ​ឃុំខ្លួន​បណ្ដោះអាសន្ន ជាង​កន្លះ​ឆ្នាំ​មកនេះ ស្ត្រី​រូប​នោះ មិន​មាន​មេធាវី មិន​ទទួល​បាន​ការណែនាំ​ពី​សិទ្ធិ​របស់​ខ្លួន និង​មិនទាន់​ទទួល​បាន​ការ​ជម្រះ​ក្ដី​នៅឡើយ​ទេ។

អង្គការ​លីកាដូ​ថា ការ​ស្លាប់​ដ៏​ខ្លោច​ផ្សារ ក្នុង​ករណី​នេះ បង្ហាញ​ពី​តម្រូវការ​ចាំបាច់ សម្រាប់​អាជ្ញាធរ​មាន​សមត្ថកិច្ច ក្នុង​ការ​ផ្ដល់​អាទិភាព សិទ្ធិ​នៅ​ក្រៅ​ឃុំ​បណ្ដោះអាសន្ន​សម្រាប់​ស្ត្រី​ដទៃ​ទៀត ដែល​មាន​កូន​តូច នៅ​ជាមួយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល