"រដ្ឋាភិបាល​បារម្ភ​ពី​ស្ថានភាព​ចង្អៀត​ណែន​ក្នុង​ពន្ធនាគារ ដូច​អ្នករាយការណ៍​ពិសេស​UN”

ដោយ ខែ សុណង
2021-10-07
Share
"រដ្ឋាភិបាល​បារម្ភ​ពី​ស្ថានភាព​ចង្អៀត​ណែន​ក្នុង​ពន្ធនាគារ ដូច​អ្នករាយការណ៍​ពិសេស​UN” ស្ថានភាព​អ្នក​ទោស​រស់នៅ​ក្នុង​ពន្ធនាគារ​បណ្ដោះអាសន្ន ដែល​ជា​អតីត​រោង​កុន​ខេត្ត​ប៉ៃលិន កាល​ពី​ថ្ងៃ​២៥ ខែ​សីហា ឆ្នាំ​២០១១។
RFA

តំណាង​ស្ថាប័ន​សិទ្ធិមនុស្ស​របស់​រដ្ឋាភិបាល លើកឡើង​ថា រដ្ឋាភិបាល ក៏​ព្រួយបារម្ភ​ពី​ស្ថានភាព​ចង្អៀត​ណែន​ក្នុង​ពន្ធនាគារ​ដែរ និង​កំពុង​ចាត់វិធានការ​ដោះស្រាយ​បញ្ហា​នេះ​ជា​បន្តបន្ទាប់​។ ការ​លើកឡើង​បែប​នេះ គឺ​បន្ទាប់​ពី​អ្នករាយការណ៍​ពិសេស​របស់​អង្គការសហប្រជាជាតិ ទទួលបន្ទុក​ផ្នែក​សិទ្ធិ​មនុស្ស​នៅ​កម្ពុជា លើកឡើង​ថា អ្នក​ជាប់ឃុំ​នៅក្នុង​ពន្ធនាគារ​បន្ត​កើនឡើង​ច្រើន​គួរ​ឲ្យ​ព្រួយ​បារម្ភ និង​ជំរុញ​ឲ្យ​រដ្ឋាភិបាល ចាត់វិធានការ​ចាំបាច់​ជាបន្ទាន់​ដើម្បី​កាត់បន្ថយ​ភាព​ចង្អៀត​ណែន​នោះ។

មន្ត្រី​សិទ្ធិមនុស្ស​របស់​រដ្ឋាភិបាល​លើកឡើង​ថា បញ្ហា​ពន្ធនាគារ​ចង្អៀត​ណែន​នេះ ក៏​ជា​កង្វល់​របស់​អាជ្ញាធរ​ពាក់ព័ន្ធ​ដែរ មិនមែន​តែ​ជា​កង្វល់​របស់​អ្នកជំនាញ​សិទ្ធិមនុស្ស​របស់​អង្គការ​សហប្រជាជាតិ​នោះ​ទេ។

សមាជិក និង​ជា​អ្នកនាំពាក្យ​គណៈកម្មាធិការ​សិទ្ធិមនុស្ស​របស់​រដ្ឋាភិបាល លោក កត្តា អ៊ន ថ្លែងប្រាប់​អាស៊ីសេរី នៅ​ថ្ងៃ​ទី៧ តុលា​ថា អាជ្ញាធរ​ពាក់ព័ន្ធ បាន​រួមគ្នា​ដោះស្រាយ​បញ្ហា​ចង្អៀត​ណែន​ក្នុង​ពន្ធនាគារ​នេះ​ជា​យូរ​មក​ហើយ ដូចជា​ការ​ពន្លឿន​ដោះស្រាយ​សំណុំរឿង​កកស្ទះ​និង​ការ​ដោះលែង​ជន​ជាប់ឃុំ​ដែល​ប្រព្រឹត្ត​បទល្មើស​ស្រាលៗ។ លោក​បញ្ជាក់​ថា មូលហេតុ​ដែល​ពន្ធនាគារ​បន្ត​ចង្អៀត​ណែន ដោយសារ​បទល្មើស​កើនឡើង​ជាពិសេស​បញ្ហា​គ្រឿងញៀន និង​រដ្ឋាភិបាល​ខ្វះ​លទ្ធភាព​ពង្រីក​អាគារ​ពន្ធនាគារ​បន្ថែម​ទៀត។ ទោះជា​យ៉ាងណា លោក​អះអាង​ថា ក្នុង ស្ថានភាព​នៃ​ការ​ឆ្លង​រាតត្បាត​ជំងឺ​កូវីដ​-១៩ នេះ អាជ្ញាធរ​ពាក់ព័ន្ធ ជាពិសេស​អាជ្ញាធរ​ពន្ធនាគារ បាន​យកចិត្តទុកដាក់​ទប់ស្កាត់​ជំងឺ​កូវីដ និង​ព្យាបាល​អ្នក​ឆ្លង​ជំងឺ​កូវីដ ដើម្បី​ធានា​សុវត្ថិភាព​និង​សុខភាព​ជូន​ជន​ជាប់ឃុំ​គ្រប់រូប​៖ «យើង​មិនមែន​ទុក​គាត់​នៅតែ​ឯង យើង​មិនមែន​មិន​គិតគូរ​គាត់​នោះ​ទេ​។ យើង​ប្រឹងប្រែង​គិតគូរ​គាត់​តាំងពី​ដើមទី​ម្ល៉េះ ប៉ុន្តែ​អ្វី​ដែល​ជា​បញ្ហា​ប្រឈម​នោះ យើង​ទទួល​ស្គាល់​ថា វា​មាន​ភាព​ចង្អៀត វា​មាន​អាគារ​ទ្រុឌទ្រោម​។ យើង​ត្រូវការ​ថវិកា​យើង​ត្រូវ​ការ​ធនធាន​ក្នុង​ការ​ពង្រីក​អាគារ​ទាំងអស់​នោះ ឲ្យ​ទូលំទូលាយ ទីតាំង​សុវត្ថិភាព។ កន្លង​មក យើង​ឃើញ​មាន​ប្រទេស​មួយចំនួន​ដែល​ជា​ប្រទេស​ផ្តល់​ជំនួយ ដូចជា​អូស្ត្រាលី​ជាដើម យើង​បាន​ប្រឹងប្រែង​សហការ​គ្នា​ដើម្បី​កសាង​អាគារ​ពន្ធនាគារ​ថ្មីៗ ធ្វើ​យ៉ាងណា​យើង​រក្សា​សុវត្ថិភាព​ជូន​គាត់ ធ្វើ​យ៉ាងណា​អនុវត្ត​វិធានការ​សុខាភិបាល ទៅលើ​អ្នក​ជាប់ឃុំ​ទាំងអស់​នោះ ដូចជា​ប្រជាជន​នៅ​ខាងក្រៅ​ដែរ ដើម្បី​ការពារ​កុំ​ឲ្យ​ជំងឺ​កូវីដ​រីក​រាលដាល​ក្នុង​ពន្ធនាគារ»

ទោះជា​យ៉ាងណា ស្រប​ពេល​ដែល​មន្ត្រី​រដ្ឋាភិបាល​រូប​នេះ​ទទួល​ស្គាល់​ពី​បញ្ហា​ចង្អៀត​ណែន​ក្នុង​ពន្ធនាគារ គណៈកម្មាធិការ​សិទ្ធិមនុស្ស​កម្ពុជា បាន​ចេញ​សេចក្តី​ជូន​ព័ត៌មាន​ដាច់ដោយឡែក​មួយទៀត ដើម្បី​ឆ្លើយតប​បន្ថែម នៅ​ថ្ងៃ​ដដែល​នេះ​។ ស្ថាប័ន​នេះ លើកឡើង​ថា ការ​អំពាវនាវ​ឲ្យ​ដោះលែង​អ្នកទោស​របស់ អង្គការ​សង្គម​ស៊ីវិល​មួយចំនួន ដើម្បី​ដោះស្រាយ​ភាព​ចង្អៀត​ណែន​នៅក្នុង​ពន្ធនាគារ មិនមែន​ជា​វិធានការ​សមស្រប​នោះ​ទេ ផ្ទុយទៅវិញ នឹង​នាំ​ឲ្យ​ប៉ះពាល់​ដល់​សន្តិសុខ និង​សណ្ដាប់ធ្នាប់​សង្គម។

ការ​បកស្រាយ និង​ប្រតិកម្ម​ទាំងនេះ ធ្វើឡើង​ក្រោយ​ពេល​អ្នករាយការណ៍​ពិសេស​របស់​អង្គការ​សហប្រជាជាតិ ទទួលបន្ទុក​ផ្នែក​សិទ្ធិ​មនុសុ្ស​នៅ​កម្ពុជា​លោក វិទិត មុនតាប៊ន ​(Vitit Muntarbhorn) បង្ហាញ​ក្តី​ព្រួយបារម្ភ​អំពី​ស្ថានភាព​ចង្អៀត​ណែន​នៅក្នុង​ពន្ធនាគារ​នៅ​កម្ពុជា។ លោក វិទិត មុនតាប៊ន បាន​លើកឡើង​ពី​កង្វល់​បែប​នេះ​នៅក្នុង​របាយការណ៍​លើកដំបូង​របស់​លោក​ដែល​ត្រូវ​បង្ហាញ​ក្នុង​សម័យ​ប្រជុំ​លើក​ទី៤៨ នៃ​ក្រុមប្រឹក្សា​សិទ្ធិមនុស្ស​អង្គការសហប្រជាជាតិ កាលពី​ថ្ងៃទី​៦ តុលា​។ លោក​ពិនិត្យ​ឃើញ​ថា ស្ថានភាព​ជន​ជាប់ឃុំ​ក្នុង​ពន្ធនាគារ កើនឡើង​ច្រើន​ជា​បន្តបន្ទាប់​គួរ​ឲ្យ​ព្រួយបារម្ភ ជាពិសេស​ក្នុង​ពេល​ឆ្លង​រាតត្បាត​ជំងឺ​កូវីដ-១៩​នេះ​។ លោក​បន្ត​ថា​ ពន្ធនាគារ​នៅ​កម្ពុជា​បច្ចុប្បន្ន​នេះ កំពុង​ផ្ទុក​អ្នក​ជាប់ឃុំ​លើស​រហូតដល់​ ៣០០ភាគ​រយ​ដែល​មិន​អាច​ឲ្យ​ពួកគេ​រក្សា​គម្លាត​សុវត្ថិភាព​បាន​ទេ។

អ្នករាយការណ៍​ពិសេស​រូប​នេះ រំលឹក​ថា ក្នុង​សារលិខិត​មួយ​ច្បាប់​កាល​ពី​ខែ​ធ្នូ ឆ្នាំ​២០២០ អ្នក​រាយការណ៍​ពិសេស​លើក​មុន និង​អ្នករាយការណ៍​ពិសេស​ម្នាក់​ទៀត ក៏បាន​បង្ហាញ​កង្វល់​ចំពោះ​កង្វះខាត​ការ​ធ្វើ​តេស្ដ​នានា​ពាក់ព័ន្ធ​នឹង​ជំងឺ​កូ​វីដ​-១៩ សម្រាប់​អ្នក​ជាប់ឃុំ ហើយ​និង​ហានិភ័យ​ផ្សេងៗ​នៃ​ការ​ប្រឈម​នឹង​ជំងឺ​នេះ​នៅក្នុង​ពន្ធនាគារ ព្រមទាំង​ភាព​ចង្អៀត​ណែន​ខ្លាំង​។​ ក្រៅ​ពី​នេះ ក៏មានដែរ​សេចក្តី​ថ្លែងការណ៍​ស្ដីពី​នីតិវិធី​ពិសេស​មួយចំនួន​ដែល​អំពាវនាវ​ឱ្យ​មាន​ការ​ធ្វើ​តេស្ដ​ជា​ចាំបាច់​លើ​អ្នក​ដែល​នៅក្នុង​ពន្ធនាគារ ដើម្បី​បង្ការ​ការ​រីក​រាលដាល​ជំងឺ​កូវីដ-១៩​។ ក្រោយ​មក​ទៀត នៅ​ថ្ងៃ​ទី​២៧ ខែ​ឧសភា អ្នករាយការណ៍​ពិសេស ក៏បាន​ដឹង​អំពី​ការ​ផ្ទុះ​ជំងឺ​កូវីដ​ក្នុង​ពន្ធនាគារ​ចំនួន​៣ ដែល​ធ្វើ​ឲ្យ​មាន​ការ​ព្រួយបារម្ភ​ជា​ខ្លាំង អំពី​ដំណើរការ​ទទួល​បាន​ការ​ព្យាបាល​ដ៏​សមរម្យ និង​សមធម៌​សម្រាប់​អ្នក​ជាប់ឃុំ ព្រមទាំង​លទ្ធភាព​នៃ​ការ​ឆ្លង​រាតត្បាត​វីរុស​កូវីដ​នៅ​តាម​ពន្ធនាគារ​និង​មន្ទីរឃុំឃាំង​ផ្សេងៗ​។​ ដោយសារតែ​ពន្ធនាគារ​ចង្អៀត​ណែន​បែបនេះ លោក វិទិត មុនតាប៊ន អំពាវនាវ​ឲ្យ​អាជ្ញាធរ​រដ្ឋាភិបាល ចាត់វិធានការ​ទៅតាម​ច្បាប់​និង​គោល​នយោបាយ ដើម្បី​កាត់​បន្ថយ​ចំនួន​អ្នក​ជាប់ឃុំ​នៅក្នុង​ពន្ធនាគារ​ឲ្យ​បាន​ឆាប់រហ័ស។

ជុំវិញ​រឿង​នេះ​នាយករង​ទទួលបន្ទុក​ផ្នែក​ឃ្លាំមើល និង​ការពារ​សិទ្ធិមនុស្ស​នៃ​អង្គការ​លីកាដូ (LICADHO) លោក អំ សំអាត មានប្រសាសន៍​ថា ការ​លើកឡើង​របស់​អ្នករាយការណ៍​ពិសេស​អង្គការ​សហប្រជាជាតិ គឺជា​រឿង​ត្រឹមត្រូវ និង​ឆ្លុះបញ្ចាំង​ពី​ការពិត​។ លោក​កត់សម្គាល់​ថា វិធានការ​របស់​រដ្ឋាភិបាល​កន្លងមក ដូចជា​យុទ្ធនាការ​ដោះស្រាយ​ការ​កកស្ទះ​សំណុំរឿង​របស់​ក្រសួងយុត្តិធម៌​ជាដើម នៅ​មិន​ទាន់​អាច​កាត់បន្ថយ​ភាព​ចង្អៀត​ណែន​ឲ្យ​មាន​ប្រសិទ្ធភាព​បានទេ។ លោក​យល់​ថា ដើម្បី​ដោះស្រាយ​បញ្ហា​នេះ​ឲ្យ​មាន​ប្រសិទ្ធភាព រដ្ឋាភិបាល គួរតែ​ចាត់វិធានការ​ជា​បន្ទាន់​មួយ​ចំនួន​ដូចជា កែទម្រង់​ប្រព័ន្ធ​យុត្តិធម៌ ពន្លឿន​ការ​ដោះលែង​អ្នក​ជាប់ឃុំ​ដែល​មាន​បទល្មើស​តូចតាច ព្រមទាំង​ដោះលែង​អ្នក​ជាប់ឃុំ​ដែល​ត្រូវ​បាន​ឃុំខ្លួន​ដោយ​គ្មាន​មូលដ្ឋាន​ច្បាប់​គ្រប់គ្រាន់​ដូចជា​សកម្មជន​សិទ្ធិមនុស្ស សង្គម និង​បរិស្ថាន ជាដើម​៖ «ការ​បកស្រាយ​របស់​មន្ត្រី​រដ្ឋាភិបាល វា​អត់​មាន​អី​ភ្ញាក់ផ្អើល​ទេ ព្រោះ​យើង​ឃើញ​ជា​បទពិសោធន៍​កន្លង​មក ប៉ុន្តែ​ទិដ្ឋភាព​ជាក់ស្តែង យើង​ទាំងអស់​គ្នា​ជា​សង្គម​ស៊ីវិល ជាពិសេស​ស្ថាប័ន​ដែល​ពាក់ព័ន្ធ​ក្នុង​រដ្ឋាភិបាល គួរតែ​រក​យន្តការ ដើម្បី​កាត់បន្ថយ​ភាព​ចង្អៀត​ណែន​នៅក្នុង​ពន្ធនាគារ​ឲ្យ​បាន​ឆាប់​កាន់តែ​ល្អ ពីព្រោះ​ទី​១ ជំងឺ​រាតត្បាត​នៃ​កូ​វីដ​-១៩ មួយ​ហើយ។ បញ្ហា​ទី​២​ ជំងឺឆ្លង​ផ្សេងៗ បញ្ហា​ទី​៣ វា​ធ្វើ​ឲ្យ​ប៉ះពាល់​ទៅលើ​សិទ្ធិ​ក្នុង​ការ​រស់នៅ​របស់​អ្នក​ជាប់ឃុំ ព្រោះ​ភាព​ចង្អៀត​ណែន វា​ប៉ះពាល់​ច្រើន​។ បើ​ស្ថានភាព​ចង្អៀត​ណែន​នៅតែ​កើត​បន្ត​ទៅ​ទៀត ដូច្នេះ​ផលវិបាក ក្រៅពី​ជន​ជាប់ឃុំ ក៏​ធ្លាក់​ទៅលើ​អនុរក្ស​ពន្ធនាគារ​ដែរ»

របាយការណ៍​របស់​អង្គការ​លីកាដូ និង​អង្គការ​លើកលែងទោស​អន្តរជាតិ បង្ហាញថា ចំនួន​អ្នក​ជាប់ឃុំ​ក្នុង​ពន្ធនាគារ​នៅ​កម្ពុជា មាន​ចំនួន​ជិត​ ៤​ម៉ឺន (៣៨.៩៩០) នាក់ គិត​ត្រឹម​ខែមីនា ឆ្នាំ​២០២០​។ នេះ​ជា​ចំនួន​ដ៏​ច្រើន​លើសលប់ ពីព្រោះ​ពន្ធនាគារ​នៅ​កម្ពុជា​ត្រូវ​បាន​ប៉ាន់ប្រមាណ​ថា អាច​ផ្ទុក​មនុស្ស​បាន​ត្រឹម​ចំនួន​ជាង​ ២​ម៉ឺន​ ៦​ពាន់ (២៦. ៥៩៣)​នាក់​ប៉ុណ្ណោះ​។ អង្គការ​ទាំងនេះ​បញ្ជាក់​ថា ការ​កើន​ឡើង​ចំនួន​ជន​ជាប់ឃុំ​នេះ គឺ​បន្ទាប់ពី​មាន​យុទ្ធនាការ​បង្ក្រាប​គ្រឿងញៀន និង​ដោយសារ​ការ​កើនឡើង​ច្រើន​ហួសហេតុ​នៃ​ការ​ឃុំ​ខ្លួន​បណ្ដោះអាសន្ន​រង់​ចាំ​សវនាការ​ជម្រះក្តី​។ បញ្ហា​នេះ​បង្កើត​ឱ្យ​មាន​ប្រព័ន្ធ​នៃ​ការ​ឃុំខ្លួន​យ៉ាង​ធំ​សម្បើម ដែល​ជិត ៧៥%​នៃ​អ្នក​ជាប់ឃុំ​ទាំងនេះ មិនទាន់​ទទួល​បាន​ការ​ជំនុំជម្រះ​នៅឡើយ​ទេ​។ ការ​ផ្ទុក​មនុស្ស​លើស​ចំណុះ​ក្នុង​ពន្ធនាគារ​នេះ បាន​ធ្វើឱ្យ​អ្នក​ជាប់ឃុំ​រស់នៅ​ទាំង​លំបាកលំបិន ខ្វះ​អនាម័យ ប៉ះពាល់​ដល់​សុខភាព​ផ្លូវកាយ និង​ផ្លូវចិត្ត និង​សេចក្ដីថ្លៃថ្នូរ​ក្នុងនាម​ជា​មនុស្ស៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល