ក្រុមកូដករណាហ្គាវើលដ៍ជិត១០០នាក់ជួបជុំគ្នានៅថ្ងៃទី១៨ ខែធ្នូ រំឭកខួប៣ឆ្នាំនៃ ការ ចេញធ្វើកូដកម្មតវ៉ានឹងការបញ្ឈប់បុគ្គលិកដោយការរើសអើងសហជីពពីសំណាក់ថៅកែបនល្បែងមួយនេះ។
ក្រុមកូដករអះអាងថា នឹងបន្តកូដកម្មតវ៉ាតទៅទៀតរហូតមានដំណោះស្រាយ ទៅតាម ការទាមទាររបស់ពួកគេ ដែលចង់ឱ្យក្រុមហ៊ុនកាស៊ីណូណាហ្គាវើលដ៍បញ្ឈប់ការរើសអើងសហជីព ទទួលយកក្រុមតំណាងសហជីព និងសមាជិកសហជីព ដែលក្រុមហ៊ុនបានបញ្ឈប់ពីការងារកាលពី៣ឆ្នាំឱ្យចូលធ្វើការវិញ ព្រមទាំងទម្លាក់ចោលរាល់បណ្ដឹង និងបទប្រកាន់លើតំណាងសហជីពទាំងអស់។
ចំនួនកូដករណាហ្គាវើលដ៍ដែលមកចូលរួមកូដកម្មរំឭកខួប៣ឆ្នាំនៅថ្ងៃទី១៨ ខែធ្នូនេះកើនឡើងច្រើនជាងចំនួនអ្នកចេញធ្វើកូដកម្មរៀងរាល់ថ្ងៃ។
ពួកគាត់ស្រែកតវ៉ាទាមទារដំណោះស្រាយផង នាំគ្នាឡើងថ្លែងរំឭកពីមូលហេតុដែលពួកគេចេញតវ៉ាផង និងស្រែកច្រៀងចម្រៀងពីសិទ្ធិសេរីភាពសហជីពផង។
«ទម្លាក់រាល់បទចោទ និងទទួលយកចូលធ្វើការវិញទាំងថ្នាក់ដឹកនាំ សកម្មជន ព្រមទាំងសមាជិកសហជីព និងទូទាត់ប្រាក់រំឭកចាប់ពីថ្ងៃបញ្ឈប់រហូតថ្ងៃចូលធ្វើការវិញ។ ទី២ ៖ ណាហ្គាវើលដ៍ត្រូវតែគោរពសិទ្ធិសហជីព និងចរចាជាមួយតំណាងសហជីពL.R.S.Uលើបញ្ហារបស់កម្មករ។ ទី៣៖ បញ្ឈប់ការលូកលាន់កិច្ចការផ្ទៃក្នុងរបស់សហជីព និងការគំរាមកំហែងគ្រប់ទម្រង់មកលើកម្មករនិយោជិត ដែលកំពុងបម្រើការងារនៅក្រុមហ៊ុនណាហ្គាវើលដ៍។ ទី៤៖ បញ្ឈប់ការលាបពណ៌គ្រប់បែបយ៉ាង មកលើកម្មករនិយោជិត ដែលគ្រាន់តែចង់បានការគោរពសិទ្ធិការងារនៅកន្លែងធ្វើការ»។
ពួកគាត់ថ្លែងប្រាប់សាធារណជនដែលនៅក្បែរៗអគារកាស៊ីណូណាហ្គាវើលដ៍ថាការតវ៉ារបស់ពួកគាត់ ដែលមិនទាន់បញ្ចប់នៅពេលនេះជាការតវ៉ា ដើម្បីឆ្នាំងបាយពួកគេ មិនមែនតវ៉ារឿងនយោបាយ ឬរឿងបដិវត្តពណ៌ណាមួយទេ។
ក្រុមកូដករបានឈរតម្រៀបគ្នាជាជួរដៃកាន់រូបថត និង បដាដែលសរសេរពីការ ទាមទាររបស់ពួកគេមានដូចជា៖ ខួប៣ឆ្នាំនៃការទាមទាររបស់កូដករណាហ្គាវើលដ៍ ណាហ្គាវើលដ៍ត្រូវបញ្ឈប់ការរើសអើងសហជីព ពួកយើងត្រូវការឱ្យមានសហជីពនៅណាហ្គាវើលដ៍ ពួកយើងត្រូវការយុត្តិធម៌ ជាដើម។
នៅខាងមុខជួរអ្នកតវ៉ា នេះពួកគេតាំងបង្ហាញនំខេក ឬនំខួបកំណើតធំមួយមាន៣ថ្នាក់ និងមានដាក់លេខ៣នៅពីលើ ដែលមានន័យថាជាការរំឭកខួប ៣ឆ្នាំនេះ។
តំណាងកូដករមួយរូបអ្នកនាង ម៉ម សុវឌ្ឍិន មានថ្លែងថា កូដកម្មនេះនឹងមិនបញ្ចប់ទេល្គឹកណាពុំមានដំណោះស្រាយ។
អ្នកនាង ម៉ម សុវឌ្ឍិន៖ «សូមបញ្ជាក់ជំហរថាពួកខ្ញុំនៅតែបន្តធ្វើកូដកម្មរហូតមានដំណោះស្រាយ។ ពួកខ្ញុំអត់ឈប់ទេ បើពួកខ្ញុំឈប់លុះត្រាតែមានដំណោះស្រាយ។ នេះជាវិវាទឆ្នាំងបាយមិនមែនជាវិវាទនយោបាយ ឬផ្ដួលរំលំអ្នកធំណាមួយឡើយ គឺតវ៉ាតែជាមួយថៅកែបរទេស ដែលជាម្ចាស់កាស៊ីណូណាហ្គាវើលដ៍នៅកណ្ដាលទីក្រុងភ្នំពេញនេះឯង»។
កូដករម្នាក់ទៀត ដែលឡើងថ្លែងនៅពេលតវ៉ាបានអំពាវនាវឱ្យអាជ្ញាធរពាក់ព័ន្ធងាកមកផ្ដល់ដំណោះស្រាយពិតប្រាកដ ការពារសិទ្ធិបុគ្គលិកកម្មករឈប់ការពារនិយោជក ឬថៅកែ ដែលរំលោភបំពានសិទ្ធិបុគ្គលិក និងសេរីភាពសហជីព។
«សុំឱ្យក្រសួងពាក់ព័ន្ធ ក្រសួងការងារ និងស្ថាប័នពាក់ព័ន្ធដែលនៅក្នុងស្រុកខ្មែរហ្នឹង សូមជួយដោះស្រាយវិវាទនៅកាស៊ីណូណាហ្គាឱ្យមានដំណោះស្រាយ ឱ្យបានចូលធ្វើការវិញផង។ ពួកខ្ញុំមិនចង់នៅខាងក្រៅ ហាលថ្ងៃ ហាលខ្យល់ទេ។ ពួកខ្ញុំចង់ចូលធ្វើការវិញ ហើយក៏ចង់ឱ្យមានវត្តមានប្រធានសហជីព កញ្ញា ឈឹម ស៊ីថរ បានចូលក្នុងក្រុមហ៊ុនណាហ្គាវើលដ៍ ដើម្បីបានធ្វើការតទៅទៀត»។
ក្រុមកូដករលើកឡើងដែរថា អាជ្ញាធររដ្ឋាភិបាលគួរពិចារណារឿងនេះឱ្យបានដិតដល់ ព្រោះករណីរំលោភបំពានសហជីពកម្មករនៅណាហ្គាវើលដ៍ហៅកាត់ថា អិល.អរ.អេស.យូ (LRSU)នេះមានលើកឡើងនៅក្នុងសេចក្ដីសម្រេចរបស់សភាអឺរ៉ុប កាលពីថ្ងៃទី២៨ ខែវិច្ឆិកា ដែលទាមទារឱ្យសហភាពអឺរ៉ុបពិចារណាការដាក់ទណ្ឌកម្មរដ្ឋាភិបាលកម្ពុជា ពាក់ព័ន្ធនឹងប្រព័ន្ធអនុគ្រោះពន្ធ EBA ដែលនៅសល់ចំនួន៨០%។
វិទ្យុអាស៊ីសេរីនៅមិនទាន់អាចសុំការឆ្លើយតបរឿងនេះពីរដ្ឋមន្ត្រីក្រសួងការងារ លោក ហេង សួរ និងមន្ត្រីពាក់ព័ន្ធជុំវិញការតវ៉ារបស់ក្រុមកូដករណាហ្គាវើលដ៍នៅថ្ងៃទី១៨ ខែធ្នូនេះបានទេ។
ក្រុមកូដករណាហ្គាវើលដ៍បានចេញធ្វើកូដកម្មតវ៉ាតាមផ្លូវជាលើកដំបូងកាលពីថ្ងៃទី១៨ ខែធ្នូឆ្នាំ២០២១ ជំទាស់នឹងការបញ្ឈប់បុគ្គលិករាប់រយនាក់ពីសំណាក់ថៅកែបនល្បែងនេះនៅពេលដែលជំងឺកូវីដរាតត្បាតខ្លាំង។
រយៈពេល៣ឆ្នាំកន្លងទៅនេះ ក្រុមកូដករដែលភាគច្រើនជាស្ត្រីតែងរងអំពើហិង្សាពីកងកម្លាំងអាជ្ញាធរ និងការលាបពណ៌ពីអាជ្ញាធររដ្ឋាភិបាលថា ជាក្រុមអ្នកស៊ីឈ្នួលតវ៉ា ឬក្រុមបដិវត្តពណ៌ថែមទៀត។ ជាមួយគ្នានេះក្រុមកូដករជិត ១០នាក់ ក៏កំពុងជាប់បណ្ដឹងនៅតុលាការ។ បន្ថែមពីនេះ ប្រធានសហជីពរបស់ពួកគាត់ គឺ កញ្ញា ឈឹម ស៊ីថរ ក៏ត្រូវបានតុលាការកាត់ក្ដីឱ្យជាប់ពន្ធនាគារ ២ឆ្នាំ ក្រោមបទចោទ«ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ដោយសារការការពារសិទ្ធិកម្មករ។ ពេលនេះកញ្ញាមានសេរីភាពក្រោយជាប់ពន្ធនាគារគ្រប់ចំនួន។
ក្រុមកូដករដែលតែងចេញតវ៉ាលើកឡើងថា ៣ឆ្នាំមកនេះ ពួកគេជួបការលំបាកខ្លាំងក្នុងជីវភាពដោយសារគ្មានការងារត្រឹមត្រូវ និងមានចំណូលជាប់លាប់ តាមរយៈការងារក្រៅម៉ោងនៅកន្លែងផ្សេងៗ ដើម្បីផ្គត់ផ្គង់ជីវភាព។ បើទោះជាបែបនេះក្ដីពួកគេអះអាងថា នឹងនៅតែបន្តធ្វើកូដកម្មរហូតទទួលបានដំណោះស្រាយពីថៅកែកាស៊ីណូណាហ្គាវើលដ៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។