មន្រ្តី​សិទ្ធិមនុស្ស​អន្តរជាតិ​ ​រម្លឹក​មន្រ្តី​ថៃ​ឲ្យការ​ពារ​ជនភៀសខ្លួន​ខ្មែរ​ ​ជាជាង​ធ្វើតាម​ល្បិច​នយោបាយ​របស់​ ​របប​លោក​ ​ហ៊ុន​ ​សែន

ដោយ មួង ណារ៉េត
2021-09-14
Share
មន្រ្តី​សិទ្ធិមនុស្ស​អន្តរជាតិ​ ​រម្លឹក​មន្រ្តី​ថៃ​ឲ្យការ​ពារ​ជនភៀសខ្លួន​ខ្មែរ​ ​ជាជាង​ធ្វើតាម​ល្បិច​នយោបាយ​របស់​ ​របប​លោក​ ​ហ៊ុន​ ​សែន លោក​ ហ្វ៊ីល​ រ៉ូប៊ើតសុន​ (​Phil Robertson​) ​នាយក​រង​ប្រចាំ​តំបន់​អាស៊ី​នៃ​អង្គការ​ឃ្លាំមើល​សិទ្ធិមនុស្ស​អន្តរជាតិ​ ​យូមែន​ ​រ៉ៃត៍ ​វ៉​ច្ឆ (​Human Rights ​Watch​)។
រូប៖ RFA

​មន្រ្តី​ឃ្លាំមើល​សិទ្ធិមនុស្ស​អន្តរជាតិ​ ​រម្លឹក​មន្រ្តី​នៃ​រដ្ឋាភិបាល​ថៃ​ ​ឲ្យ​ប្រកាន់ភ្ជាប់​នូវ​កាតព្វកិច្ច​ការពារ​ជនភៀសខ្លួន​ខ្មែរ​ ​ដោយ​មិន​ត្រូវ​ចូល​ស៊ង​ក្នុង​ល្បិច​កល​នយោបាយ​បែប​ជើង​កាង​របស់​របប​លោក​ ​ហ៊ុន​ ​សែន​ ​នោះ​ឡើយ​។​

ម​ន្រ្តី​ឃ្លាំមើល​សិទ្ធិមនុស្ស​អន្តរជាតិ​ ​ចាត់​ទុក​យុទ្ធនាការ​របស់​រដ្ឋាភិបាល​លោក​ ​ហ៊ុន​ ​សែន​ ​ក្នុង​ការ​តាម​ធ្វើទុក្ខបុកម្នេញ​សកម្មជន​នយោបាយ​នៅ​ក្រៅ​ប្រទេស​ ​ថា​ជា​​អំពើអាក្រក់​ហួស​ ​ដែល​មិន​អាច​ទទួលយក​បាន​ ​និង​ត្រូវតែ​បញ្ឈប់​ជាបន្ទាន់​។​

នាយក​រង​ប្រចាំ​តំបន់​អាស៊ី​នៃ​អង្គការ​ឃ្លាំមើល​សិទ្ធិមនុស្ស​អន្តរជាតិ​ ​យូមែន​ ​រ៉ៃត៍ ​វ៉​ច្ឆ (​Human Rights ​Watch​) ​លោក​ ហ្វ៊ីល​ រ៉ូប៊ើតសុន​ (​Phil Robertson​) ​ប្រាប់​វិទ្យុ​អាស៊ី​សេរី​កាលពី​ថ្ងៃ​ទី​​១៤​ ​ខែ​​កញ្ញា​ ​ថា​សកម្មជន​នយោបាយ​ ​ដែល​ជា​ជនភៀសខ្លួន​នៅ​ប្រទេស​ថៃ​ ​គឺ​គ្រាន់តែ​អនុវត្ត​សិទ្ធិ​សេរីភាព​របស់​ខ្លួន​ ​ក្នុង​ការ​បញ្ចេញមតិ​ ​និង​​ទាមទារ​ឲ្យ​មាន​ការគោរព​សិទ្ធិមនុស្ស​ ​និង​ប្រជាធិបតេយ្យ​ ​នៅ​មាតុ​ភូមិកំណើត​របស់​ខ្លួន​តែប៉ុណ្ណោះ​។​ ​លោក​ថា​ ​ប្រទេស​ថៃ​មិន​ត្រូវ​លុះ​ក្នុង​ឧប្បាយក​ល​នយោបាយ​​ ​ដែល​រៀបចំ​ឡើង​ដោយ​របប​ក្រុងភ្នំពេញ​ ​ក្នុង​ការ​ធ្វើទុក្ខបុកម្នេញ​ពួកគេ​នោះ​ទេ​។​

ប្រទេស​ថៃ​ជា​ប្រទេស​ក្នុង​តំបន់​អា​ស៊ាន​ ​ដែល​ឈាន​មុខ​គេ​ក្នុង​ការ​ផ្តល់​ទី​ជម្រក​ ​និង​សិទ្ធិជ្រកកោន​ដល់​ជនភៀសខ្លួន​ ​និង​អ្នកសុំ​សិទ្ធិជ្រកកោន​ផ្នែក​នយោបាយ​។​​ឧត្តមស្នងការ​អង្គការសហប្រជាជាតិ​ទទួលបន្ទុក​ជនភៀសខ្លួន​ (UNHCR) ​ឲ្យដឹង​ថា​ ​បច្ចុប្បន្ននេះ​ ​ប្រទេស​ថៃ​ ​កំពុង​ផ្តល់​ទី​ជម្រក​ ​និង​កិច្ច​គាំពារ​ដល់​ជនភៀសខ្លួន​​ ​និង​អ្នកសុំ​សិទ្ធិជ្រកកោន​ផ្នែក​នយោបាយ​ជាង​កន្លះ​លាន​នាក់​ (​៥៧៦​,​៦៣៥​) ​មកពី​ជាង​ ​៤០​ ​ប្រទេស​។​

លោក​ ហ្វ៊ីល​ រ៉ូប៊ើតសុ​ន​ ​ស្នើ​ឲ្យ​រដ្ឋ​មន្រ្តី​ក្រសួងយុត្តិធម៌​ថៃ​លោក​ សុមស័ក្តិ ទេពសុធិន ​(​Somsak ​Tepsuthin​) ​និង​មេ​ដឹកនាំនយោបាយ​ថៃ​ឯទៀត​បន្ត​រក្សា​គោលជំហរ​​ ​និង​កាតព្វកិច្ច​របស់​ប្រទេស​ថៃ​ ​អំពី​ការគោរព​សិទ្ធិ​ជនភៀសខ្លួន​ ​និង​អ្នកសុំ​សិទ្ធិជ្រកកោន​ផ្នែក​នយោបាយ​។​

ប្រតិកម្ម​របស់​មន្រ្តី​ជាន់ខ្ពស់​ផ្នែក​សិទ្ធិមនុស្ស​នេះ​ ​ធ្វើឡើង​ក្រោយ​ប្រព័ន្ធឃោសនា​របស់​លោក​ ​ហ៊ុន​ ​សែន​ ​បាន​ចុះផ្សាយ​កាលពី​ថ្ងៃ​ទី​​១៤​ ​ខែ​​កញ្ញា​ ​ថា​រដ្ឋមន្រ្តី​ក្រសួងយុត្តិធម៌​ថៃ​លោក​ សុមស័ក្តិ ទេពសុធិន​ (​Somsak ​Tepsuthin​) ​បាន​សន្យា​ថា​ «រដ្ឋាភិបាលថៃនឹងពិនិត្យលទ្ធភាព​ ​និងចាត់វិធានការផ្លូវច្បាប់ឲ្យបានតឹងរឹងបំផុតលើក្រុមប្រឆាំងណាមួយ​ ​ដែលយកទឹកដីថៃ​ ​ដើម្បីធ្វើសកម្មភាពប្រឆាំង​ ​ជេរប្រមាថថ្នាក់ដឹកនាំខ្មែរ»។

បើ​តាម​ប្រភព​ដដែល​នេះ​ ​អ្នក​ដែល​ទៅ​ពឹង​ថៃ​ឲ្យ​ជួយ​ធ្វើទុក្ខបុកម្នេញ​សកម្មជន​បក្ស​ប្រឆាំង​នៅ​ក្រៅ​ប្រទេស​នោះ​ ​គឺ​ទីប្រឹក្សា​របស់​លោកនាយក​រដ្ឋ​មន្រ្តី ​ហ៊ុន​ ​សែន​​និង​ជា​រដ្ឋលេខាធិការ​ក្រសួង​ទេសចរណ៍​លោក​ ​សុខ​ សុក្រឹត្យា ​ដែល​ត្រូវជា​កូនប្រុស​បង្កើត​របស់​លោក​ ​សុខ​ ​ឥ​សាន ​អ្នក​នាំពាក្យ​គណបក្ស​កាន់អំណាច​ ​ហើយដែល​បាន​​ជួប​មន្រ្តី​ថៃ​​នៅ​ទីក្រុង​បាងកក​ ​កាលពី​ថ្ងៃ​ទី​១៣​ ​ខែ​​កញ្ញា​។​

អ្នកឃ្លាំមើល​សង្គម​ ​ថា​ភាគី​ថៃ​នឹង​មិន​ចាត់ការ​ ​ឬ​ធ្វើទុក្ខបុកម្នេញ​លើ​សកម្មជន​នយោបាយ​នៅ​លើទឹក​ដី​ថៃ​ ​តាម​សំណើ​របស់​កម្ពុជា​នោះ​ទេ​។​ ​ផ្ទុយទៅវិញ​ ​ការណ៍​ដែល​​មន្រ្តី​ថៃ​សន្យា​ជាមួយ​ភាគី​កម្ពុជា​នេះ​ ​គឺ​ធ្វើ​គ្រាន់តែ​ដើម្បី​ស្អំ​ចិត្ត​កម្ពុជា​ ​ដែល​ម្តង​ហើយ​ម្តងទៀត​ ​រត់ទៅ​ពឹង​ថៃ​ឲ្យ​ចាត់ការ​ពលរដ្ឋ​ខ្មែរ​។​ ​អ្នកឃ្លាំមើល​ការ​អភិវឌ្ឍ​​សង្គម​​លោក​​បណ្ឌិត​ ​សេង​ ​សារី​ ​មិន​ភ្ញាក់ផ្អើល​នឹង​មន្រ្តី​រដ្ឋាភិបាល​លោក​ ​ហ៊ុន​ ​សែន​ ​ដែល​នៅ​ចិញ្ចឹម​ចិត្ត​ ​តាម​ធ្វើទុក្ខបុកម្នេញ​សកម្មជន​បក្ស​ប្រឆាំង​ ​រហូតដល់​ទឹកដី​ថៃ​នោះ​ទេ​ ​ព្រោះ​នេះ​ជា​អាច​ជា​យុទ្ធ​សាស្រ្ត ​បន្លាច​ ​និង​បង្អើល​ ​បែប​វាយ​បណ្តើរ​ចរចា​បណ្តើរ​។​

លោក​​បណ្ឌិត​ ​សេង​ ​សារី​ ​ថា​សកម្មជន​នយោបាយ​ខ្មែរ​ ​ដែល​រត់​ភៀសខ្លួន​ទៅ​ប្រទេស​ថៃ​ ​តាមធម្មតា​ទទួល​បាន​កិច្ច​គាំពារ​ពី​ស្ថាប័ន​សិទ្ធិមនុស្ស​ ​និង​អង្គការសហប្រជាជាតិ​ ​ក្នុងឋានៈជា​ជនភៀសខ្លួន​ ​ដោយសារ​ការ​ធ្វើទុក្ខបុកម្នេញ​ផ្នែក​នយោបាយ​នោះ​។​ ​លោក​បន្ត​ថា​ ​បើ​ភាគី​ថៃ​ចង់​ចាត់ការ​សកម្មជន​នយោបាយ​ទាំងនេះ​ ​ក៏​មិន​ងាយស្រួល​នោះ​ដែរ​ ​ព្រោះ​នីតិវិធី​ស្មុគ​ស្មាញ​ ​ហើយ​ភាគី​ថៃ​ក៏​មិន​ចង់​រង​សម្ពាធ​ ​ឬ​ការរិះគន់​ពី​សហគមន៍​អន្តរជាតិ​ ​រឿង​សិទ្ធិ​ជនភៀសខ្លួន​ផ្នែក​នយោបាយ​នេះ​ដែរ៖ «ពួកយុវជនដែលសកម្ម​​នៅក្នុងការរិះគន់រដ្ឋាភិបាលបច្ចុប្បន្ន​ ​ដែលជាយុវជនគណបក្សសង្គ្រោះជាតិហ្នឹង​ ​គឺគាត់ជាពលរដ្ឋរបស់យូអិន (UN)ទៅហើយ​ ​គាត់ជាជនភៀសខ្លួននយោបាយ​ ​ដូច្នេះរដ្ឋាភិបាលថៃ​ ​មុននឹងចាត់ការទៅលើពួកគាត់ហ្នឹង​ ​ក៏ត្រូវតែពិភាក្សាជាមួយយូអិដែរ​ ​ពួកគាត់មានឋានៈជាពលរដ្ឋរបស់អង្គការសហប្រជាជាតិ​ ​មិនមែនតែជាពលរដ្ឋកម្ពុជាតែមួយមុខទេ​ ​ខ្ញុំមើលទៅ​ ​របៀបក្នុងការឆ្លើយរបស់រដ្ឋាភិបាលថៃ​ ​ទៅរដ្ឋាភិបាលកម្ពុជានេះ​ ​គ្រាន់តែជាតិចនិកការទូតមួយ​ ​ដើម្បីធ្វើម៉េចឲ្យភាគីខាងកម្ពុជាហ្នឹងសប្បាយចិត្ត​ ​ស្អំចិត្តភាគីកម្ពុជាតែប៉ុណ្ណោះ​ ​ប៉ុន្តែជានីតិវិធីពិតប្រាកដ​ ​ខ្ញុំមើលទៅរដ្ឋាភិបាលថៃ​ ​នឹងមិនចាត់ការរឿងហ្នឹងទេ»។

ដូចគ្នា​នេះ​ដែរ​ ​យុវជន​ដែល​ជាសកម្ម​ជន​គណបក្សប្រឆាំង​ ​និង​កំពុង​ភៀសខ្លួន​នៅ​ប្រទេស​ថៃ​ ​និង​សកម្ម​ក្នុង​ការ​ធ្វើការ​តស៊ូ​មតិ​នយោបាយ​ ​តាម​បណ្តាញ​សង្គម​ ​ថា​សារ​របស់​ប្រព័ន្ធឃោសនា​លោក​ ​ហ៊ុន​ ​សែន​ ​ដែល​អះអាង​អំពី​ការ​សន្យា​ការ​របស់​អាជ្ញាធរ​ថៃ​លើ​សកម្មជន​ខ្មែរ​នេះ​ ​មិន​មាន​ឥទ្ធិពល​អ្វី​​ឲ្យ​ថៃ​ចាត់ការ​នោះ​ឡើយ​ ​ព្រោះ​​ពួក​លោក​គ្មាន​ធ្វើអ្វី​ខុសច្បាប់​ ​ដូច​ការចោទប្រកាន់​របស់​មន្រ្តី​របប​លោក​ ​ហ៊ុន​ ​សែន​ ​នោះ​ដែរ​។​

យុវជន​គណបក្ស​សង្គ្រោះ​ជាតិ​ ​ដែល​កំពុង​រស់នៅ​និរទ្ទេ​ស​ខ្លួន​នៅ​ប្រទេស​ថៃ​​លោក​ ​សេង​ ​ម៉េង​ប៊ុន​រ៉ុ​ង​ ​ថា​សកម្មជន​នយោបាយ​បក្ស​ប្រឆាំង​ ​អនុវត្ត​សិទ្ធិ​ស្រប​ច្បាប់​របស់​ខ្លួន​ ​ក្នុង​សកម្មភាព​នយោបាយ​ ​ដែល​ការពារ​ដោយ​រដ្ឋធម្មនុញ្ញ​កម្ពុជា​ ​និង​ច្បាប់អន្តរជាតិ​។​ ​លោក​ថា​ ​ការ​និយាយ​ការពិត​អំពី​បញ្ហា​អសកម្ម​នៃ​របប​លោក​ ​ហ៊ុន​ ​សែន​ ​គឺជា​ការរិះគន់​ក្នុង​ន័យ​ឲ្យ​របប​នេះ​កែ​លម្អ​ ​ដើម្បី​បានជា​ប្រយោជន៍​ដល់​សង្គមជាតិ​ខ្មែរ​ទាំងមូល​ ​គ្មានអ្វី​ដែល​ខុសច្បាប់​ ​ឬ​ត្រូវ​ព្រួយបារម្ភ​នោះ​ទេ​។​ លោក​បន្ថែម​ថា​ ​ខាង​ភាគី​ថៃ​ ​ក៏​គ្មាន​មូលដ្ឋាន​ច្បាប់​ណា​ ​មក​ធ្វើទុក្ខបុកម្នេញ​ពលរដ្ឋ​ ​ដែល​សម្តែង​មតិ​ ​និង​និយាយ​ការពិត​ ​អំពី​បញ្ហា​សង្គម​ខ្មែរ​នោះ​ដែរ​៖ «ថៃកំពុងតែមានរឿងពាក់ព័ន្ធនឹងសិទ្ធិមនុស្សច្រើនណាស់​ ​បើគេយកពេលវេលាមកចង់ចាត់ការយើងទៀត​ ​ដែលយើងជាជនភៀសខ្លួននយោបាយនៅក្នុងប្រទេសថៃ​ ​ច្បាស់ណាស់គេនឹងធ្វើការស៊ើបអង្កេតសិន​ ​គេមិនមែនចេះតែធ្វើដោយចិត្តឯង​ ​គេជឿរបបលោក​ ​ហ៊ុន​ ​សែន​ ​នោះទេ​ ​ដូច្នេះ​ ​គេមិនអាចធ្វើអ្វីភ្លាមនោះទេ​ ​យ៉ាងណាក៏គេត្រូវតែធ្វើការស៊ើបអង្កេតជាមុនដែរ​ ​គេនឹងដឹងថា​ ពួកយើងធ្វើអ្វី​ ​ពួកយើងធ្វើការតស៊ូមតិ​ ​ពួកយើងធ្វើការដើម្បីលទ្ធិប្រជាធិបតេយ្យ»

វិទ្យុ​អាស៊ី​សេរី​ ​មិនទាន់​អាច​សុំ​ការ​បញ្ជាក់​ពី​ស្ថានទូត​ថៃ​ ​និង​ក្រសួងយុត្តិធម៌​ថៃ​ ​ជុំវិញ​ខ្លឹមសារ​​​ដែល​សារ​ព័ត៌មាន​ ហ្វ្រេ​ស​ញូ (​Fresh​ ​News​) ​អះអាង​ថា​ ​ជា​សម្តី​របស់​រដ្ឋ​មន្រ្តី​ក្រសួងយុត្តិធម៌​ថៃ​នេះ​ ​បាន​នៅឡើយ​ទេ​។​

ទោះ​ជា​យ៉ាងនេះ​ក្ដី​ ​ទាំង​រដ្ឋធម្មនុញ្ញ​កម្ពុជា​ ​និង​ច្បាប់អន្តរជាតិ​ ​ដែល​កម្ពុជា​បាន​ចុះហត្ថលេខា​ ​សុទ្ធតែ​មាន​ចែង​អំពី​សិទ្ធិ​សេរីភាព​របស់​ប្រជាពលរដ្ឋ​ ​ក្នុង​ការ​បញ្ចេញ​មតិ​ ​និង​សេរីភាព​ក្នុង​ការ​ធ្វើនយោបាយ​ ​ដោយ​គ្មាន​ការរើសអើង​ ​និង​ធ្វើទុក្ខបុកម្នេញ​។​ ​រដ្ឋ​បរទេស​ ​មាន​កាតព្វកិច្ច​ ​ផ្តល់​កិច្ចការពារ​ ​និង​សិទ្ធិជ្រកកោន​ផ្នែក​នយោបាយ​ ​ដល់​ជនភៀសខ្លួន​នយោបាយ​ ​ដែលគេ​ច​ចេញពី​ការ​ធ្វើទុក្ខបុកម្នេញ​របស់​រដ្ឋាភិបាល​នៃ​ប្រទេស​សា​ម៉ី​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល