អង្គការសិទ្ធិមនុស្ស​អន្តរជាតិ​អំពាវនាវ​ឲ្យ​អ.ស.ប​ដាក់​សម្ពាធ​លើ​រដ្ឋាភិបាល​កម្ពុជា​ដែល​រំលោភសិទ្ធិ​មនុស្ស

ដោយ ទីន ហ្សាការីយ៉ា
2024.05.07
អង្គការសិទ្ធិមនុស្ស​អន្តរជាតិ​អំពាវនាវ​ឲ្យ​អ.ស.ប​ដាក់​សម្ពាធ​លើ​រដ្ឋាភិបាល​កម្ពុជា​ដែល​រំលោភសិទ្ធិ​មនុស្ស លោកនាយករដ្ឋមន្ត្រី ហ៊ុន ម៉ាណែត។
រូប៖ ហ្វេសប៊ុកលោក ហ៊ុន ម៉ាណែត

អង្គការសិទ្ធិមនុស្ស​អន្តរជាតិ (Human Rights Watch) អំពាវនាវ​ឲ្យ​ប្រទេស​ជា​សមាជិក​អង្គការ​សហប្រជាជាតិ ដាក់​សម្ពាធ​លើ​រដ្ឋាភិបាល​កម្ពុជា ដែល​រំលោភ សិទ្ធិមនុស្ស និង​ធ្វើទុក្ខបុកម្នេញ​គណបក្ស​ប្រឆាំង​ឥត​ស្រាកស្រាន្ត។

ការ​អំពាវនាវ​របស់​អង្គការ​សិទ្ធិមនុស្ស​អន្តរជាតិ (Human Rights Watch) នៅ​ថ្ងៃទី​៦​ឧសភា​នេះ ធ្វើឡើង​នៅមុន​កិច្ចប្រជុំ​ដំណើរការ​ពិនិត្យ​ជា​សកល​តាម​កាលកំណត់ (UNPR) របស់​អង្គការ​សហប្រជាជាតិ នឹង​បើ​កិច្ចប្រជុំ​នៅ​ថ្ងៃទី​៨ ឧសភា ដែល​មាន​ភាគី​កម្ពុជា និង​រដ្ឋ​ជា​សមាជិក​ចូលរួម។

នាយករង​ប្រចាំ​តំបន់​អាស៊ី​នៃ​អង្គការ (Human Rights Watch) លោក ប្រៃយូនី លឺ (Bryony Lau) មាន​ប្រសាសន៍​ថា ចាប់​តាំង​ពី​កិច្ចប្រជុំ​ចុងក្រោយ នៃ​ការពិនិត្យ​ជា​សកល​តាម​កាលកំណត់ (UNPR) ឆ្នាំ​២០១៩ មក កម្ពុជា បាន​ក្លាយ​ទៅជា​រដ្ឋ ឯក​បក្ស​ដ៏​សំខាន់​មួយ ដែល​គ្មាន​ការបោះឆ្នោត​ដោយ​សេរី ប្រកបដោយ​អត្ថន័យ គ្មាន​សេរីភាព​សារព័ត៌មាន និង​ប្រព័ន្ធ​តុលាការ​គ្រប់គ្រង​ដោយ​គណបក្ស​កាន់អំណាច​ជាដើម។

លោក​បន្ត​ថា ប្រទេស​ដែល​ជា​សមាជិក​នៃ​ក្រុមប្រឹក្សា​សិទ្ធិមនុស្ស អង្គការ​សហប្រជាជាតិ គួរតែ​ថ្កោលទោស​រដ្ឋាភិបាល​កម្ពុជា ដែល​បាន​បដិសេធ ឬ រឹតត្បិត​សិទ្ធិ​សេរីភាព​ជា​មូលដ្ឋាន​របស់​ប្រជាពលរដ្ឋ​កម្ពុជា សិទ្ធិ​សារព័ត៌មាន និង​ជំរុញ​ឲ្យ​រដ្ឋាភិបាល​អនុម័ត​ជាបន្ទាន់​នូវ កំណែទម្រង់​ដ៏​ពិតប្រាកដ។

សេចក្ដី​ប្រកាស​ព័ត៌មាន​បន្ត​ថា រដ្ឋាភិបាល​កម្ពុជា បាន​ទទួលយក​អនុសាសន៍​ចំនួន​១៧៣​ក្នុង​ចំណោម​១៩៨​នៃ​កិច្ចប្រជុំ និង​កំណត់សម្គាល់​ចំនួន​២៥​ផ្សេងទៀត ក្នុង​កិច្ចប្រជុំ​នៃ​ដំណើរការ​ពិនិត្យ​ជា​សកល​តាម​កាលកំណត់​កាលពី​ឆ្នាំ​២០១៩​។ រដ្ឋាភិបាល​មិន​ត្រឹមតែ​បរាជ័យ​ក្នុង​ការ​អនុវត្ត​អនុសាសន៍​ដែល​ខ្លួន​បាន​ទទួលយក​ក្នុងអំឡុងពេល​កិច្ចប្រជុំ​ចុងក្រោយ​នេះ​ទេ ប៉ុន្តែ​បាន​បន្ត​រឹត​បន្តឹង​សេរីភាព​បញ្ចេញមតិ ប្រព័ន្ធ​ផ្សព្វផ្សាយ សហជីព សិទ្ធិ​ការងារ និង​អង្គការ​សង្គម​ស៊ីវិល​កាន់តែ​អាក្រក់​ទៅៗ​ថែម​ទៀត។

ដំណើរការ​ពិនិត្យ​ជា​សកល​តាម​កាល​កំណត់ (UPR) គឺជា​យន្តការ​ពិសេស​មួយ​នៃ​អង្គការ​សហប្រជាជាតិ ដែល​មាន​អាណត្តិ​ពិនិត្យ​មើល លើ​ការ​បំពេញ​កាតព្វកិច្ច​សិទ្ធិមនុស្ស​នៃ​រដ្ឋ​ជា​សមាជិក​របស់​អង្គការសហប្រជាជាតិ​តាម​កាលកំណត់​ជាក់លាក់។ ដំណើរការ​ពិនិត្យ​លើ​ប្រទេស​នីមួយៗ​នេះ ធ្វើ​ឡើងជា​រៀង​៤​ឆ្នាំ​កន្លះ​ម្ដង តាម​ជុំ​នីមួយៗ​។ សម្រាប់​កម្ពុជា ការ​ពិនិត្យ​របស់​យូភីអ សម្រាប់​ឆ្នាំ​២០២៤ ជា​ជុំ​ទី​៤​ហើយ ដែល​នឹង​ប្រព្រឹត្តិ​ទៅ​នៅ​ថ្ងៃទី​៨ ឧសភា នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។