លោក Phil Robertson ថា ការ​ប្រើ​ហិង្សា​លើ​ក្រុម​ស្ត្រី​ថ្ងៃ​សុក្រ​ពី​ក្រុម​សន្តិ​សុខ ផ្ទុយ​ពី​បញ្ញត្តិ​សិទ្ធិ​មនុស្ស​នៃ​កិច្ច​ព្រមព្រៀង​សន្តិភាព​ទី​ក្រុង​ប៉ារីស

ដោយ ម៉ៅ សុធានី
2021-10-24
Share
លោក Phil Robertson ថា ការ​ប្រើ​ហិង្សា​លើ​ក្រុម​ស្ត្រី​ថ្ងៃ​សុក្រ​ពី​ក្រុម​សន្តិ​សុខ ផ្ទុយ​ពី​បញ្ញត្តិ​សិទ្ធិ​មនុស្ស​នៃ​កិច្ច​ព្រមព្រៀង​សន្តិភាព​ទី​ក្រុង​ប៉ារីស លោក ហ្វីល រ៉ូបឺតសុន (Phil Robertson) នាយក​រង​អង្គការ​ឃ្លាំ​មើល​សិទ្ធិ​មនុស្ស​អន្តរ​ជាតិ យូមែន រ៉ៃត៍ រ៉ច្ឆ (Human Right Watch) ប្រចាំ​តំបន់​អាស៊ី​។
រូប៖ AFP

អង្គការ​ឃ្លាំ​មើល​សិទ្ធិ​មនុស្ស​អន្តរ​ជាតិ យូមែន រ៉ៃត៍ រ៉ច្ឆ (Human Right Watch) ថា ការ​ប្រើ​ហិង្សា​លើ​ក្រុម​ស្ត្រី​ថ្ងៃ​សុក្រ​ពី​ដំណាក់​ក្រុម​សន្តិ​សុខ​នៅ​មុខ​ស្ថាន​ទូត​បារាំង​ប្រចាំ​កម្ពុជា កាល​ពី​ថ្ងៃ​ទី២២ តុលា គឺ​ផ្ទុយ​ពី​បញ្ញត្តិ​សិទ្ធិ​មនុស្ស​នៃ​កិច្ច​ព្រមព្រៀង​សន្តិភាព​ទី​ក្រុង​ប៉ារីស។ ទោះ​បី​យ៉ាង​ណា​ក្ដី មន្ត្រី​រដ្ឋាភិបាល​ថា ការ​រិះគន់​រដ្ឋាភិបាល​អំពី​ស្ថាន​ភាព​ប្រជាធិបតេយ្យ និង​សិទ្ធិ​មនុស្ស គឺ​ជា​ការរំលោភ​បំពាន​អធិបតេយ្យភាព ដែល​មិន​យល់​ពី​ស្ថាន​ភាព​ជាក់​ស្ដែង​នៅ​កម្ពុជា។

នាយក​រង​អង្គការ​ឃ្លាំ​មើល​សិទ្ធិ​មនុស្ស​អន្តរ​ជាតិ យូមែន រ៉ៃត៍ រ៉ច្ឆ (Human Right Watch) ប្រចាំ​តំបន់​អាស៊ី​លោក ហ្វីល រ៉ូបឺតសុន (Phil Robertson) បាន​បង្ហោះ​សារ​លើ​ហ្វេសប៊ុក នៅ​ថ្ងៃ​ទី២៣ តុលា​ថា ការ​តវ៉ា​ដោយ​សន្តិវិធី​របស់​សមាជិក​គ្រួសារ​អ្នក​ជាប់​ឃុំ​គណបក្ស​ប្រឆាំង គឺ​ជា​សកម្មភាព​ជាក់​លាក់​មួយ ដែល​ត្រូវ​បាន​ការ​ពារ​ដោយ​បញ្ញត្តិ​សិទ្ធិ​មនុស្ស​នៃ​កិច្ច​ព្រមព្រៀង​សន្តិភាព​ទី​ក្រុង​ប៉ារីស ប៉ុន្តែ​បច្ចុប្បន្ន​រដ្ឋាភិបាល​របស់​លោក​នាយក​រដ្ឋមន្ត្រី ហ៊ុន សែន មិន​បាន​ធានា​អ្វី​នោះ​ទេ។ លោក​សួរ​ថា​តើ​រដ្ឋាភិបាល​កម្ពុជា​ខ្លាច​អ្វី​ដែល​ពួក​គេ​មិន​អនុញ្ញាត​ឱ្យ​ក្រុម​អ្នក​តវ៉ា​ដោយ​អហិង្សា​ចំនួន​២០នាក់​កាន់​បដា​នៅ​តាម​ចិញ្ចើម​ផ្លូវ។ លោក​មើល​ឃើញ​ថា​សេរី​ភាព​ស៊ីវិល និង​នយោបាយ​ជា​មូលដ្ឋាន​កំពុង​រង​គ្រោះ​នៅ​ទូទាំង​ប្រទេស ហើយ​លោក​នាយក​រដ្ឋមន្ត្រី ហ៊ុន សែន បាន​កាត់​បន្ថយ​ស្មារតី​កិច្ច​ព្រមព្រៀង​សន្តិភាព​ទី​ក្រុង​ប៉ារីស ដោយ​យល់​ថា​បង្កើត​កម្ពុជា​ឡើង ដែល​មិន​ប្រកាន់​លទ្ធិ​ប្រជាធិបតេយ្យ ឬ​ការ​គោរព​សិទ្ធិ។

ការ​លើក​ឡើង​នេះ​ធ្វើ​ឡើង​បន្ទាប់​ពី​ក្រុម "ស្រ្តីថ្ងៃសុក្រ" ជាង ២០នាក់ លើក​បដា និង​ដាក់​ញត្តិ​ទៅ​ស្ថានទូត​បារាំង​ប្រចាំ​កម្ពុជា​កាល​ពី​ថ្ងៃ​ទី២២ តុលា​ ដើម្បី​សុំ​ឱ្យ​រដ្ឋាភិបាល​បារាំង​ជំរុញ​ទៅ​របប​លោក ហ៊ុន សែន អនុ​វត្ត​ឱ្យ​បាន​ពេញលេញ​នូវ​ស្មារតី​កិច្ច​ព្រមព្រៀង​សន្តិភាព​ទីក្រុង​ប៉ារីស និង​ដោះ​លែង​អ្នក​ទោស​នយោបាយ និង​សង្គម ដែល​កំពុង​ជាប់​ពន្ធនាគារ។ ប៉ុន្តែ​ពួក​គេ​ត្រូវ​បាន​ក្រុម​សន្តិសុខ​ខណ្ឌ​ដូន​ពេញ ដែល​មាន​ចំនួន​លើស​លុប​ប្រើ​អំពើ​ហិង្សា​បណ្ដាល​ឱ្យ​ស្ត្រី​បី​នាក់​រង​របួស​ធ្ងន់ និង​មួយ​ចំនួន​ទៀត​រង​របួស​ស្រាល។

ឆ្លើយ​តប​ជុំវិញ​រឿង​នេះ អ្នក​នាំ​ពាក្យ​គណៈកម្មាធិការ​សិទ្ធិ​មនុស្ស​របស់​រដ្ឋាភិបាល លោក កត្តា អ៊ន ថ្លែង​ថា​ប្រាប់​វិទ្យុ​អាស៊ី​សេរី​ថា​ការ​ដែល​អង្គការ​អន្តរ​ជាតិ និង​ប្រទេស​មួយ​ចំនួន​រិះគន់​រដ្ឋាភិបាល​អំពី​ស្ថាន​ភាព​លទ្ធិ​ប្រជាធិបតេយ្យ និង​សិទ្ធិ​មនុស្ស គឺ​ជា​ការ​រំលោភ​បំពាន​អធិបតេយ្យ ដោយ​មិន​យល់​ពី​ស្ថានភាព​ជាក់​ស្ដែង​នៅ​កម្ពុជា។ លោក​អះអាង​ថា ខ្លឹម​សារ​នៃ​កិច្ច​ព្រមព្រៀង​សន្តិភាព​ទីក្រុង​ប៉ារីស​បាន​បញ្ចូល​ទៅ​ក្នុង​រដ្ឋ​ធម្មនុញ្ញ​រួច​ហើយ។ លោក​បញ្ជាក់​ថា កន្លង​មក​ក្រុម​ស្ត្រី​ថ្ងៃ​សុក្រ ដែល​ចេញ​ដាក់​ញត្តិ និង​តវ៉ា​ទាំង​នោះ មិន​យល់​ពី​កាតព្វកិច្ច​នៃ​ការ​ប្រើ​ប្រាស់​សិទ្ធិ​សេរីភាព ដែល​ធ្វើ​ឱ្យ​រំលោភ​បំពាន​ច្បាប់។ ចំណែក​ហិង្សា​ដែល​បង្ក​ដោយ​ក្រុម​សន្តិសុខ​វិញ លោក​លើក​ទឹក​ចិត្ត​ឱ្យ​ស្ត្រី​ថ្ងៃសុក្រ​ដាក់​ពាក្យ​ប្ដឹង​អ្នក​ដែល​ប្រើ​ហិង្សា​ទៅ​ស្ថាប័ន​មាន​សមត្ថ​កិច្ច ដើម្បី​ស្វែងរក​យុត្តិធម៌៖ «ការ​ដែល​យើង​សម្លឹង​មើល​ពី​ខាង​ក្រៅ​ដោយ​យើង​មិន​បាន​ពិនិត្យ​មើល​ទិដ្ឋភាព​ជាក់​ស្ដែង​នូវ​អង្គ​ហេតុ​សកម្ម​ភាព យើង​គិត​តែ​ពី​ទ្រឹស្ដី​ពី​សិទ្ធិ​មនុស្ស យើង​មិន​គិត​ពី​សកម្មភាព​ពាក់​ព័ន្ធ​បទ​ល្មើស​នោះ យើង​យល់​ខុស​ទាំង​ស្រុង អ៊ីចឹង​ហើយ​នៅ​កម្ពុជា​យើង​ត្រូវ​ញែក​ឱ្យ​ច្បាស់​ទ្រឹស្ដី​សិទ្ធិ​មនុស្ស​នឹង​សកម្ម​ភាព​ទង្វើ​របស់​មនុស្ស​ក្នុ​ង​ការ​ប្រើ​ប្រាស់​សិទ្ធិ​ចំពោះ​មុខ​ច្បាប់»

ទោះ​ជា​យ៉ាង​ណា​ក្រុម​ស្ត្រី​ថ្ងៃ​សុក្រ​ច្រាន​ចោល​ចំពោះ​ការ​លើក​ឡើង​របស់​មន្ត្រី​រដ្ឋាភិបាល​កម្ពុជា ពួក​គាត់​អះអាង​សកម្ម​ភាព​កន្លង​មក​ធ្វើ​ឡើង​ដោយ​សន្តិវិធី និង​ស្រប​តាម​ច្បាប់ ដែល​ធានា​ដោយ​រដ្ឋ​ធម្មនុញ្ញ​និង​ស្មារតី​នៃ​កិច្ច​ព្រមព្រៀង​សន្តិភាព​ទីក្រុង​ប៉ារីស។ ស្ត្រី​រង​គ្រោះ​ទាំង​នោះ​មិន​ដាក់​ពាក្យ​បណ្ដឹង​ករណី​ហិង្សា​នេះ​នោះ​ទេ ពី​ព្រោះ​ពួក​គាត់​មិន​មាន​ជឿ​លើ​ការ​អនុវត្ត​ច្បាប់​របស់​អាជ្ញាធរ។

កូន​ស្រី​​​សកម្មជន​បក្ស​ប្រឆាំង​នៅ​ខេត្ត​កណ្ដាល​អ្នកស្រី យ៉យ ស្រីមុំ គឺ​អ្នក​ស្រី ខុំ ស្រីល័ក្ខ បាន​ឱ្យ​ដឹង​ថា​លោក​ស្រី​ដេក​ឈឺ​ចាប់​មុខ​របួស​ដោយ​សារ​ក្រុម​​​​សន្តិ​​​សុខ​​​ខណ្ឌ​​ដូន​ពេញ​ជា​ច្រើន​នាក់ បាន​ប្រើ​អំពើ​ហិង្សា​ដោយ​រុញ​ច្រាន ទាត់​ចំ​កណ្ដាល​មុខ និង​ដាល់​មុខ​បណ្ដាល​​​ឱ្យ​លោកស្រី​បែក​មាត់​និង​ហើម​មុខ​ធ្ងន់។ លោក​ស្រី​​ឱ្យ​ដឹង​ទៀត​ថា ក្រុម​សន្តិសុខ​ដែល​ជា​បុរស​បាន​បន្លំ​បៀតបៀន​រាង​កាយ​ស្ត្រី​ភេទ រួម​ទាំង​ប្រើ​ពាក្យ​សម្ដី​គំរាម​កំហែង និង​មាក់ងាយ​ទៀត​ផង។ លោក​​ស្រី​សោក​ស្ដាយ​ការ​ដែល​អាជ្ញាធរ​តាម​រារាំង និង​ប្រើ​អំពើ​ហិង្សា​លើ​ស្ត្រី​ទន់​ខ្សោយ ហើយ​លោក​ស្រី​ចាត់​ទុក​អំពើ​ហិង្សា​ពី​សំណាក់​​​សន្តិ​​សុខ​នេះ គឺ​ជា​អំពើ​រំលោភ​បំពាន​លើ​សិទ្ធិ​ស្ត្រី​ធ្ងន់ធ្ងរ​ដែល​មិន​អាច​ទទួល​យក​បាន​ទេ។ ទោះ​ជា​​យ៉ាង​ណា​លោក​ស្រី​ប្ដេជ្ញា​ចិត្ត​បន្ត​ចេញ​តវ៉ា​ដោយ​សន្តិវិធី បើ​ទោះ​បី​រង​ការ​បង្ក្រាប​ពី​អាជ្ញាធរ ក៏​ដោយ៖ «ខ្ញុំ​មាន​តែ​ដៃ​ពីរ​ក្រដាស​រូប​ថត​ម្ដាយ​របស់​ខ្ញុំ​ទេ តែ​គាត់​មក​ប្រើ​កម្លាំង​បាយ​រុញ​ច្រាន មួល និយាយ​ចំ​ឱ្យ​តែ​បន្លំ​កន្លែង​ណា​គាត់​បន្លំ​កន្លែង​ហ្នឹង ហើយ​គាត់​បោះ​បោក វាយ​ធ្វើ​បាប​គ្រប់​បែប​យ៉ាង ចា៎​នៅ​តែ​មិន​ទាន់​មាន​ពន្លឺ​យុត្តិ​ធម៌​ទេ រហូត​មក​ដល់​សព្វ​ថ្ងៃ​នេះ សម្រាប់​ខ្ញុំ​អស់​ជំនឿ​ទាំង​ស្រុង ពី​ព្រោះ​ប្រព័ន្ធ​យុត្តិធម៌​នៅ​ប្រទេស​កម្ពុជា​មិន​មាន»

ករណី​តាម​យា​យី និង​អំពើ​ហិង្សា​ពី​សំណាក់​អាជ្ញាធរ និង​ក្រុម​សន្តិសុខ​លើ​ក្រុម​ស្ត្រី​ថ្ងៃ​សុក្រ​នេះ មិន​មែន​កើត​ឡើង​តែ​ម្ដង​នោះ​ទេ។ សង្គម​ស៊ីវិល​ចាត់​ទុក​ការ​បង្ក្រាប និង​គំរាម​កំហែង​លើ​ស្ត្រី​ថ្ងៃ​សុក្រ​ដែល​ដាក់​ញត្តិ​​ដោយ​សន្តិវិធី​នេះ​ថា ជា​ការ​រំលោភ​បំពាន​ច្បាប់ និង​សិទ្ធិ​មនុស្ស​ធ្ងន់ធ្ងរ ដែល​ផ្ទុយ​ពី​ស្មារតី​កិច្ច​ព្រមព្រៀង​សន្តិភាព​ទី​ក្រុង​ប៉ារីស។ ពួក​គេ​ជំរុញ​ឱ្យ​រដ្ឋាភិបាល​អប់រំ​អាជ្ញាធរ​ទាំង​នោះ​អំពី​ការ​អនុវត្ត​តួនាទី​របស់​ខ្លួន​ដោយ​ផ្អែក​លើ​ក្រម​សីលធម៌ និង​ច្បាប់ ដើម្បី​ជៀសវាង​ការ​ប្រើប្រាស់​អំពើ​ហិង្សា​លើ​ស្ត្រី។ លើស​ពី​នេះ​អង្គការ​សិទ្ធិមនុស្ស​ជាតិ និង​អន្តរ​ជាតិ​អំពាវនាវ​ឱ្យ​របប​លោក ហ៊ុន សែន ត្រូវ​តែ​បញ្ចប់​អំពើ​ហិង្សា​លើ​គ្រួសារ​អ្នក​ជាប់​ឃុំ​ដែល​តវ៉ា​ដោយ​សន្តិវិធី និង​គោរព​សិទ្ធិ​សេរី​ភាព​បញ្ចេញ​មតិ និង​ការ​ជួប​ជុំ៕



កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល