ក្រុមអ្នកសារព័ត៌មានឯករាជ្យស្នើសុំឱ្យរដ្ឋាភិបាលពន្លឿនអនុម័តច្បាប់ស្ដីពីសិទ្ធិទទួលបានព័ត៌មានដើម្បីលើកកម្ពស់ការផ្សព្វផ្សាយព័ត៌មានពិតនិងបញ្ហានៅក្នុងសង្គម។ការលើកឡើងនេះធ្វើឡើងបន្ទាប់ពីលោក ហ៊ុន សែន ថ្លែងកាលពីពេលថ្មីៗនេះថាច្បាប់ស្ដីពីសិទ្ធិទទួលបានព័ត៌មាននឹងត្រូវអនុម័តនៅក្នុងអាណត្តិទី៧។
ការអនុម័តច្បាប់ស្ដីពីសិទ្ធិទទួលបានព័ត៌មានមិនត្រឹមតែលើកកម្ពស់សិទ្ធិអ្នកសារព័ត៌មានប៉ុណ្ណោះទេតែក៏នឹងលើកកម្ពស់ការផ្សព្វផ្សាយព័ត៌មានពិតដើម្បីដោះស្រាយបញ្ហានៅក្នុងសង្គមជាតិផងដែរ។
អ្នកសារព័ត៌មានវិទ្យុសំឡេងសហរដ្ឋអាមេរិក វីអូអេ (VOA) លោក ស៊ុន ណារិន ប្រាប់វិទ្យុអាស៊ីសេរីថារដ្ឋាភិបាលគួរពន្លឿនការអនុម័តច្បាប់ស្ដីពីសិទ្ធិទទួលបានព័ត៌មានឱ្យបានឆាប់ដើម្បីបង្កភាពងាយស្រួលដល់អ្នកសារព័ត៌មានវិជ្ជាជីវៈអាចបំពេញការងារឱ្យកាន់តែមានប្រសិទ្ធិភាព។លោកបន្ថែមថាការលើកឡើងរបស់លោកនាយករដ្ឋមន្ត្រី ហ៊ុន សែន ដែលជំរុញឱ្យអ្នកសារព័ត៌មានផ្សព្វផ្សាយព័ត៌មានអំពីបញ្ហាអំពើពុករលួយឬភាពអសកម្មរបស់មន្ត្រីរាជការក្នុងការបំពេញការងារនឹងមិនមានប្រសិទ្ធិភាពឡើយខណៈច្បាប់ស្ដីពីសិទ្ធិទទួលបានព័ត៌មាននៅតែមិនទាន់មាននៅឡើយ។ ទោះជាយ៉ាងណា លោក ស៊ុន ណារិន សំណូមពរដល់អាជ្ញាធរឱ្យបញ្ឈប់ការធ្វើទុក្ខបុកម្នេញលើអ្នកសារព័ត៌មានដែលនឹងចុះយកព័ត៌មាននៅពេលបោះឆ្នោតក្នុងខែកក្កដាឆ្នាំ២០២៣នេះ៖
«ខ្ញុំលើកទឹកចិត្តឱ្យអាជ្ញាធរមានការគោរពការងាររបស់សារព័ត៌មាន ប្រសិនបើគាត់ចុះទៅតាមបណ្ដាខេត្តកុំមានការគំរាមកំហែង នៅថ្ងៃបោះឆ្នោតអនុញ្ញាតឱ្យគាត់ចូលរាយការណ៍ការបោះឆ្នោតដោយសេរី នៅមុនការបោះឆ្នោត សុំកុំមានការធ្វើទុក្ខបុកម្នេញលើសារព័ត៌មាន ដូចថាមិនមានការឱ្យជួលម៉ោងផ្សាយ ឬក៏ពាក្យបណ្ដឹងអ្វីទៅកាន់សារព័ត៌មាន ដែលគាត់ហ៊ានធ្វើព័ត៌មានរសើប ព័ត៌មានដែលមានប្រយោជន៍សម្រាប់ប្រជាពលរដ្ឋដែលជាអ្នកបោះឆ្នោតនៅក្នុងការសម្រេចចិត្ត»។
ការស្នើសុំនេះធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានថ្លែងនៅក្នុងពិធីសំណេះសំណាលជាមួយអ្នកសារព័ត៌មានដោយផ្ទាល់លើកទី៥កាលពីថ្ងៃទី១៥ ខែមករា ថា រដ្ឋាភិបាលគ្រោងនឹងអនុម័តច្បាប់ស្ដីពីសិទ្ធិទទួលបានព័ត៌មានឱ្យបាននៅក្នុងអាណត្តិទី៧ ដោយលោកអះអាងថាសេចក្ដីព្រាងច្បាប់នេះ កំពុងស្ថិតនៅដំណាក់កាលត្រួតពិនិត្យនៅក្រសួងយុត្តិធម៌លើផ្នែកដាក់ទោសនិងពិន័យលើអ្នករំលោភបំពានច្បាប់នេះ៖
«យើងរំពឹងថា ច្បាប់សិទ្ធិទទួលបានព័ត៌មាន នឹងចេញនៅអាណត្តិទី៧ក្រោយការបោះឆ្នោត គឺអាចថាប្រាកដជាក្នុងចន្លោះឆ្នាំ២០២៤ ឬ២០២៥។ យើងចង់ប្រមូលផ្ដុំនូវមតិយោបល់ទាំងឡាយពីគ្រប់ទិសទី ដើម្បីឱ្យច្បាប់មួយនេះចេញទៅបានផលប្រយោជន៍ទាំងអស់គ្នា»។
ជាមួយគ្នានេះលោកនាយករដ្ឋមន្ត្រី ហ៊ុន សែន ក៏បានផ្ដល់អនុសាសន៍៨ចំណុចដល់ក្រសួងអាជ្ញាធររាជធានីខេត្តនិងអ្នកសារព័ត៌មានអនុវត្តដើម្បីលើកកម្ពស់វិស័យព័ត៌មាន។ អនុសាសន៍ទាំងនោះរួមមាន ជំរុញឱ្យអ្នកសារព័ត៌មានផ្សព្វផ្សាយព័ត៌មានពីអំពើពុករលួយនិងភាពអសកម្មរបស់មន្ត្រីរាជការលុបបំបាត់ព័ត៌មានមិនពិតនិងព័ត៌មានក្លែងក្លាយនិងរួមគ្នាផ្សព្វផ្សាយពីការចាក់វ៉ាក់សាំង កូវីដ ១៩ ជាដើម។ ទោះជាយ៉ាងណាការសំណេះសំណាលជាមួយអ្នកសារព័ត៌មាននេះលោកនាយករដ្ឋមន្ត្រីមិនបានផ្ដល់ឱកាសដល់អ្នកសារព័ត៌មានឯករាជ្យបង្ហាញពីក្ដីកង្វល់និងការលំបាករបស់ពួកគេក្នុងពេលបំពេញការងារយកព័ត៌មានឡើយជាពិសេសបញ្ហាអាជ្ញាធរដែលមិនសហការជាមួយអ្នកសារព័ត៌មាន។ អ្នកសារព័ត៌មានប្រមាណ៥.០០០នាក់ដែលបានចូលរួមក្នុងកម្មវិធីនេះភាគច្រើនគឺជាអ្នកសារព័ត៌មានដែលមាននិន្នាការគាំទ្ររដ្ឋាភិបាល។
ជុំវិញរឿងនេះអ្នកសារព័ត៌មានសំឡេងប្រជាធិបតេយ្យ លោក ហ៊ី ឆាយ យល់ឃើញថាការលើកឡើងរបស់លោកនាយករដ្ឋមន្ត្រី ហ៊ុន សែន ណែនាំឱ្យអាជ្ញាធរកុំចាត់ទុកអ្នកសារព័ត៌មានគឺជាសត្រូវនឹងមិនមានប្រសិទ្ធិភាពឡើយ។លោកអះអាងថាក្រុមអាជ្ញាធរនៅតែបន្តគំរាមកំហែងម្ដងម្កាលមកលើរូបលោកតាមរយៈការប្រើប្រាស់ពាក្យសំដីមិនសមរម្យនិងហាមឃាត់មិនឱ្យចូលយកព័ត៌មាននៅកន្លែងកើតមានបញ្ហារំលោភសិទ្ធិមនុស្ស។ក្នុងនាមជាអ្នកសារព័ត៌មានដែលធ្លាប់បានរងអំពើហិង្សាពីក្រុមកងអង្គរក្សលោក នាយករដ្ឋមន្ត្រី ហ៊ុន សែន នៅពេលចុះយកព័ត៌មាននៅតំបន់ភ្នំតាម៉ៅកាលពីឆ្នាំ២០២២កន្លងទៅ លោក ហ៊ី ឆាយ បន្ថែមថាដើម្បីបង្ហាញឆន្ទៈថារដ្ឋាភិបាលចង់លើកកម្ពស់សេរីភាពសារព័ត៌មាននិងការគោរពសិទ្ធិអ្នកសារព័ត៌មានពិតមែនថ្នាក់ដឹកនាំរដ្ឋាភិបាលត្រូវជំរុញឱ្យអនុម័តច្បាប់ស្ដីពីសិទ្ធិទទួលបានព័ត៌មានឱ្យបានឆាប់ៗប្រសើរជាងគ្រាន់តែនិយាយតែមាត់។
ចំណែក នាយកប្រតិបត្តិនៃសម្ព័ន្ធអ្នកសារព័ត៌មានកម្ពុជា ខេមបូចា (CamboJA) លោក ណុប វី គាំទ្រចំពោះការស្នើសុំឱ្យរដ្ឋាភិបាលពន្លឿនការអនុម័តច្បាប់ស្ដីពីសិទ្ធិទទួលបានសារព័ត៌មានព្រោះអ្នកសារព័ត៌មានវិជ្ជាជីវៈអាចប្រើច្បាប់នេះជាមូលដ្ឋានដើម្បីស្នើនិងទទួលបានស្របច្បាប់នូវព័ត៌មានចាំបាច់ពីស្ថាប័នសាធារណៈរបស់រដ្ឋ ដើម្បីសរសេរព័ត៌មានបែបស្រាវជ្រាវជាប្រយោជន៍ជាតិ។លោកបន្ថែមថាអ្នកសារព័ត៌មានមានតួនាទីសំខាន់ក្នុងការនាំយកបញ្ហានៅក្នុងសហគមន៍ផ្សព្វផ្សាយទៅដល់សាធារណជននិងភាគីពាក់ព័ន្ធឱ្យបានដឹងនិងរកដំណោះស្រាយទៅលើបញ្ហានោះ។ លោកថា អាជ្ញាធរ និងភាគីពាក់ព័ន្ធនានាមិនត្រូវរើសអើងឬប្រើអំពើហិង្សាទៅលើអ្នកសារព័ត៌មាននោះឡើយ៖
«ទាក់ទងជាមួយការប្រើប្រាស់អំពើហិង្សា ការប្រើប្រាស់ពាក្យសំដីប្រមាថ ឬមួយការប្រើប្រាស់ពាក្យអសុរោះអីហ្នឹង គឺយើងមិនគួរប្រើទេ ជាពិសេសទៅលើអ្នកសារព័ត៌មាន ដែលគាត់មានតួនាទីមួយ បម្រើសាធារណៈជនទូទៅ ហើយមានតួនាទីដូចអ្នកបញ្ជូនសារអញ្ចឹង គឺគាត់មិនគួរមានសត្រូវទេ»។
អង្គការអ្នករាយការណ៍គ្មានព្រំដែន (Reporters Without Borders) បានចេញផ្សាយរបាយការណ៍ស្ដីពីសន្ទស្សន៍សេរីភាពសារព័ត៌មានពិភពលោកសម្រាប់ឆ្នាំ២០២២បានរកឃើញថាសេរីភាពសារព័ត៌មាននៅកម្ពុជានៅតែមានការរឹតត្បិតដោយកម្ពុជាបានជាប់ចំណាត់ថ្នាក់លេខរៀងទី១៤២ក្នុងចំណោមប្រទេសចំនួន១៨០។
ក្រុមអ្នកសារព័ត៌មាន អង្គការសិទ្ធិមនុស្សជាតិ និងអន្តរជាតិនៅតែបន្តរិះគន់ រដ្ឋាភិបាលកម្ពុជាថា មានចេតនាពន្យារពេលម្ដងហើយម្ដងទៀត ក្នុងការអនុម័តច្បាប់ស្ដីពីសិទ្ធិទទួលបានព័ត៌មាន គោលដៅបន្តរឹតត្បិតសេរីភាពសារព័ត៌មាន។ លោកនាយករដ្ឋមន្ត្រី ហ៊ុន សែន ធ្លាប់បានសន្យានៅចំពោះមុខអ្នកសារព័ត៌មានប្រមាណ៦ពាន់នាក់កាលពីឆ្នាំ២០២០ថា លោកនឹងជំរុញឲ្យច្បាប់ស្ដីពីសិទ្ធទទួលបានព័ត៌មានចេញជារូបរាងនៅត្រឹមឆ្នាំ២០២០ ប៉ុន្តែក្នុងពេលជួបអ្នកសារព័ត៌មានថ្មីៗនេះ លោកបែរជាលើកឡើងថា ច្បាប់នេះនឹងត្រូវអនុម័តនៅអាណត្តិទី៧ ពោលគឺនៅក្នុងឆ្នាំ២០២៤ ឬ២០២៥ ទៅវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។