អង្គការអន្តរជាតិបន្តថ្កោលទោសតុលាការវៀតណាមដែលបន្តដាក់ទោសខ្មែរក្រោម៩នាក់
2024.12.08
ព្រះសង្ឃ និងសកម្មជនខ្មែរក្រោម ដែលកំពុងជាប់ពន្ធនាគារ នៅកម្ពុជាក្រោម។
រូប៖ សហព័ន្ធខ្មែរក្រោម
អង្គការសិទ្ធមនុស្សអន្តរជាតិបានបន្តថ្កោលទោសតុលាការវៀតណាមដែលបន្តផ្ដន្ទាទោសព្រះសង្ឃ និងពលរដ្ឋខ្មែរក្រោមឲ្យជាប់ពន្ធនាគារដោយសារតែការទាមទារសិទ្ធិស្វ័យសម្រេច។ អង្គការទាំងនោះស្នើឲ្យវៀតណាមដោះលែងព្រះសង្ឃ និងពលរដ្ឋខ្មែរក្រោមដោយឥតលក្ខខ័ណ្ឌ។
មូលនិធិសិទ្ធិមនុស្ស (Human Rights Foundation) ថ្កោលទោសតុលាការវៀតណាមចំពោះការកាត់ទោសព្រះសង្ឃ ៥អង្គ និងសកម្មជន៤នាក់នៅវៀតណាម។
កាលពីថ្ងៃទី២៦ ខែវិច្ឆិកា តុលាការវៀតណាមបានកាត់ទោសព្រះសង្ឃ ៥អង្គ និងសកម្មជនខ្មែរ ក្រោម៤នាក់ ឱ្យជាប់ពន្ធនាគារចាប់ពី ២ឆ្នាំ ដល់ ៦ឆ្នាំ ដោយចោទ ប្រកាន់ពីបទ «កេងចំណេញលើសិទ្ធិសេរីភាព និងលទ្ធិប្រជាធិបតេយ្យ» និងបទ «ការចាប់ខ្លួនឃាត់ខ្លួនឬឃុំខ្លួនមនុស្សដោយខុសច្បាប់» តាមក្រមព្រហ្មទណ្ឌវៀតណាម។
ក្នុងចំណោមព្រះសង្ឃ ៥អង្គ រួមមានព្រះចៅអធិការវត្តទ្រនំសេក ព្រះតេជព្រះគុណ ថាច់ ចន្ទតារា ជាប់ទោស ៦ឆ្នាំ និងព្រះតេជព្រះគុណ យឿង ខាយ ៥ឆ្នាំ ៩ខែ។
កាលពីខែឧសភា កន្លងទៅ តុលាការវៀតណាមបានកាត់ទោសសកម្មជនសិទ្ធិមនុស្សខ្មែរកម្ពុជាក្រោមពីរនាក់ផ្សេងទៀត គឺលោក ថាច់ កឿង និងលោក តោ ហ្វាងចឿង ឱ្យជាប់ពន្ធនាគារ ពី ៣ ដល់ ៤ឆ្នាំដែរ។
មូលនិធិសិទ្ធិមនុស្ស (Human Rights Foundation) ក្នុងសេចក្ដីថ្លែងការណ៍ចេញកាលពីថ្ងៃទី៥ ធ្នូ ចាត់ទុកថា សាលក្រមតុលាការវៀតណាមជាការវាយប្រហារមួយទៀតមកលើប្រជាពលរដ្ឋខ្មែរក្រោម និងការរស់នៅរបស់ពួកគាត់។ មូលនិធិសិទ្ធិមនុស្សថ្កោលទោសចំពោះការប្រើប្រាស់ប្រព័ន្ធយុត្តិធម៌ដើម្បីកំណត់គោលដៅនិងឃុំខ្លួនជនជាតិដើមនិងសកម្មជនដោយគ្រាន់តែអនុវត្តសិទ្ធិជាមូលដ្ឋានរបស់ពួកគាត់ ចំពោះសេរីភាពខាងសាសនា ការបញ្ចេញមតិ ការប្រមូលផ្ដុំ និងសមាគម។
ស្រដៀងគ្នានេះដែរ នាយកអង្គការតស៊ូមតិសិទ្ធិមនុស្ស និងការងារប្រចាំតំបន់អាស៊ី (AHRLA) លោក ហ្វីល រ៉បឺតស៊ុន (Phil Robertson) បានចេញសេចក្ដីថ្លែងការណ៍ នៅថ្ងៃទី២៧ វិច្ឆិកា ថា ជារឿងហួសចិត្តនិងមិនអាចទទួលយកបាន ដែលតុលាការវៀតណាមបានកាត់ទោសព្រះសង្ឃ និងសកម្មជនការពារសិទ្ធិមនុស្សខ្មែរកម្ពុជាក្រោម កាលពីថ្ងៃទី២៦ វិច្ឆិកា។
លោកសង្កត់ធ្ងន់ថា សកម្មភាពធ្វើទុក្ខបុកម្នេញរបស់អាជ្ញាធរវៀតណាមលើខ្មែរកម្ពុជាក្រោមនេះ ជាការបង្ហាញឱ្យឃើញកាន់តែច្បាស់ថា រដ្ឋាភិបាលវៀតណាមមិនអត់ឱនឱ្យពលរដ្ឋខ្មែរកម្ពុជាក្រោម ចំពោះការអនុវត្តសិទ្ធិជំនឿសាសនា ភាសា វប្បធម៌ និង សិទ្ធិសេរីភាពបញ្ចេញមតិ ដែលអាជ្ញាធរវៀតណាមបានគ្រប់គ្រង និងបំបិទសិទ្ធិយ៉ាងតឹងរ៉ឹង។
ចំណែកសហព័ន្ធខ្មែរកម្ពុជាក្រោមដែលមូលដ្ឋាននៅសហរដ្ឋអាមេរិកវិញចាត់ទុក្ខទង្វើរបស់វៀតណាមដែលជាសមាជិកក្រុមប្រឹក្សាសិទ្ធិមនុស្សអង្គការសហប្រជាជាតិថា បានធ្វើផ្ទុយទៅនឹងកិច្ចសន្យាជាសមាជិកក្នុងការគោរពនិងលើកកម្ពស់សិទ្ធិមនុស្ស។
សហព័ន្ធខ្មែរកម្ពុជាក្រោមស្នើឲ្យសហរដ្ឋអាមេរិកដាក់វៀតណាមជាប្រទេសគួរឲ្យបារម្ភពីបញ្ហារំលោភសិទ្ធសាសនា។
របាយការណ៍ក្រសួងការបរទេសអាមេរិកសម្រាប់ឆ្នាំ២០២៣បង្ហាញថា ទោះបីរដ្ឋធម្មនុញ្ញវៀតណាមអនុញ្ញាតឲ្យមានសិទ្ធិសេរីភាពផ្នែកសាសនាក្តី ប៉ុន្តែច្បាប់ក៏អនុញ្ញាតឲ្យអាជ្ញាធររឹតត្បិតសាសនាដោយយកលេសដើម្បីការពារសន្តិសុខជាតិ និងឯកភាពសង្គម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ប៉ូលិសថៃស៊ើបអង្កេតឃើញថា ករណីធ្វើឃាតលើលោក លិម គិមយ៉ា មានការរៀបចំជាប្រព័ន្ធ ដោយមានមេខ្លោងនៅកម្ពុជា
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- ខ្មាន់កាំភ្លើងមិនទាន់ហ៊ានលាតត្រដាងមេខ្លោងនៅពីក្រោយ ព្រោះបារម្ភពីសុវត្ថិភាពគ្រួសារ
- ខ្មាន់កាំភ្លើងបង្ហាញអត្តសញ្ញាណអ្នកបញ្ជាឱ្យបាញ់សម្លាប់លោក លិម គិមយ៉ា ក្រោយពេលតុលាការចេញដីកាចាប់ខ្លួនលោក លី រតនរស្មី
- ភាពស្ងប់ស្ងាត់លើករណីឃាតកម្មលោក លិម គិមយ៉ា «បង្ហាញពីភាពគ្មានទំនួលខុសត្រូវរបស់រដ្ឋាភិបាល»