សហជីព​អន្តរជាតិ​ទាមទារឱ្យដោះលែង​ប្រធាន​សហជីព​ប្រចាំ​រោងចក្រ (Wing Stars) ជាបន្ទាន់

2024.02.23
សហជីព​អន្តរជាតិ​ទាមទារឱ្យដោះលែង​ប្រធាន​សហជីព​ប្រចាំ​រោងចក្រ (Wing Stars) ជាបន្ទាន់ ​កម្មការិនី​រោងចក្រ វីងស្តារស៊ូ (Wing Stars Shoes) ចេញពីរោងចក្រ នៅម៉ោងសម្រាក​ពីការងារ ថ្ងៃ​ទី២០ ខែសីហា ឆ្នាំ២០២៣។
រូប៖ ហ្វេសប៊ុកក្រុមហ៊ុន វីងស្តារស៊ូ (Wing Stars Shoes)

សហជីព​សកល​អ៊ិនដាសស្រ្ទីអល (IndustriALL Global Union) ថ្កោល​ទោស​ចំពោះ​ការ​ចាប់​ខ្លួន​លោក ជា ចាន់ និង​ទាមទារ​ឱ្យ​ដោះលែង​ប្រធាន​សហជីព​រោងចក្រ វីងស្ដារស៊ូ រូប​នេះ ជា​បន្ទាន់​ដោយ​ចាត់​ទុក​ការ​ចាប់ និង​ឃុំ​ខ្លួន​លោក ជា ចាន់ថា ជា​ការ​បង្ក្រាប និង​បញ្ឈប់​សកម្មភាព​របស់​សហជីព។ ការ​លើក​ឡើង​នេះ គឺ​បន្ទាប់​ពី ចៅក្រម​ស៊ើបសួរ​នៃ​សាលា​ដំបូង​ខេត្តកំពង់ស្ពឺ ឃុំ​ខ្លួន​ប្រធាន​សហជីព​កម្ពុជា​ប្រចាំ​រោងចក្រ វីងស្តារស៊ូ (Wing Stars Shoes) លោក ជា ចាន់ ក្នុង​ពន្ធនាគារ តាម​បណ្ដឹង​ថៅកែ​ក្រុមហ៊ុន​វីងស្តារស៊ូ។

ពី​ទីក្រុងហ្សឺណែវ (Geneva) ប្រទេសស្វីស (Switzerland) សហជីព​សកល​ឈ្មោះ អ៊ិនដាសស្រ្ទីអល (IndustriALL Global Union) បាន​សរសេរ​លិខិត​មួយ​ទៅ​កាន់ នាយក​ក្រុមហ៊ុន​ផលិត​ស្បែង​ជើង​កម្ពុជា វីងស្តាស៊ូ ខូអិលធិឌី (Wing Stars Shoes Cambodia Co., LTD.) ឈ្មោះ ជៀ ជីងទីង (Chiu Ching TING) ដោយ​បង្ហាញ​ថា សហជីព​សកល​បាន​ទទួល​ព័ត៌មាន​ពី​សហព័ន្ធ​សហជីព​កម្ពុជា (CATU) អំពី​ការ​ចាប់​ខ្លួន លោក ជា ចាន់ ប្រធាន​សហជីព​រោងចក្រ វីងស្ដារស៊ូ បន្ទាប់​ពី​ក្រុមហ៊ុន វីងស្ដារស៊ូ ដាក់​ពាក្យ​បណ្ដឹង ដើម្បី​ប្រឆាំង​នឹង​លោក ជា ចាន់ និង​សហការី​របស់​គាត់​ពី​បទ «លួច»

សហជីព​សកល​ថ្កោលទោស​ចំពោះ​ការ​ចោទ​ប្រកាន់​លើ​លោក ជា ចាន់  ដោយ​ចាត់​ទុក​ការ​ចោទ​ប្រកាន់​នេះ​ថា ជា​រឿង​មិន​ពិត និង​ជា​ឧបាយកល​បង្ក្រាប​សហជីព​ក្នុង​គោល​បំណង​បញ្ឈប់​សកម្មភាព​របស់​សហជីព​ក្នុង​ស្រុក។

ប្រភព​ដដែល​លើក​ឡើង​ថា ការ​ចាប់​ខ្លួន ធ្វើឡើង​ស្រប​ពេល ដែល​លោក ជា ចាន់ និង​សហការី​របស់​លោក ខិតខំ​ប្រឹងប្រែង​ក្នុង​ការ​បង្កើត​សហជីព​នៅ​ក្នុង​ក្រុមហ៊ុន។

សហជីព​អន្តរជាតិ ក៏​បាន​រំឭក​ថា កាលពី​ខែមករា ក្រុមហ៊ុន​វីងស្ដារស៊ូ បាន​ផ្ញើ​សារ​ទៅ​គំរាម​កំហែង​លោក ជា ចាន់ និង​ស្ថាបនិក​សហជីព​ផ្សេង​ទៀត ដោយ​ទាមទារ​ឱ្យ​សកម្មជន​សហជីព​ទម្លាក់​នូវ​ផែនការ​បង្កើត​សហជីព ហើយ​នៅ​ពេល​ដែល​សកម្មជន​សហជីព​មិន​ព្រម ចំពោះ​សម្ពាធ​គំរាមកំហែង​នោះ ហើយ​នៅ​តែ​បន្ត​ដំណើរការ​ចុះ​បញ្ជិកា​សហជីព លោក ជា ចាន់​ ក៏​ត្រូវ​ប៉ូលិស​ចាប់​ខ្លួន។

សហជីព​សកល បាន​អះអាង​ថា ជា​ការ​ចាំ​បាច់​ណាស់ ដែល​ក្រុមហ៊ុន​ស្បែង​ជើង​កម្ពុជា វីងស្ដារស៊ូ ត្រូវ​ដក​ចេញ​នូវ​របាយការណ៍​មិន​ពិត​របស់​ប៉ូលិស ហើយ​ដោះលែង​លោក ជា ចាន់ ជា​បន្ទាន់ និង​បញ្ចប់​រាល់​ការ​គំរាមកំហែង​លើ​សមាជិក​សម្ដ័ន្ធ​សហជីព។

វិទ្យុ​អាស៊ី​សេរី​មិន​អាច​ទាក់ទង​នាយក​ក្រុមហ៊ុន វីងស្ដារស៊ូ ដើម្បី​សុំ​ការ​បកស្រាយ ​បញ្ហា​នេះ បាន​ទេ នៅ​ថ្ងៃទី២៣ ខែកុម្ភៈ។ រីឯ​អ្នក​នាំ​ពាក្យ​ក្រសួង​ការងារ លោក កត្តា អ៊ន ប្រាប់​វិទ្យុ​អាស៊ី​សេរី នៅ​ថ្ងៃ​ទី ២៣ កុម្ភៈ ថា លោក​កំពុង​ជាប់​ប្រជុំ។

ប្រធាន​គ្រប់គ្រង​កម្មវិធី​ការងារ នៃ​អង្គការ​សង់ត្រាល់ លោក ឃុន ថារ៉ូ ប្រាប់​វិទ្យុ​អាស៊ី​សេរី​នៅ​ថ្ងៃ​ទី២៣ កុម្ភៈ ថា សហជីព​សកល​ផ្ញើ​លិខិត​ទៅ​កាន់​នាយក​ក្រុមហ៊ុន វីងស្ដារស៊ូ នេះ  គឺជា​សារមួយ​បញ្ជាក់​ថា ក្រុមហ៊ុន វីងស្ដារស៊ូ ត្រូវ​តែ​លើក​កម្ពស់ និង​ទទួល​ស្គាល់​សិទ្ធិ​សេរីភាព​ផ្នែក​សហជីព។ ប៉ុន្តែ​ក្នុង​ករណី​នេះ ក្រុមហ៊ុន វីង​ស្ដារស៊ូ មិន​អនុវត្ត​តាម​នោះ លោក​ជឿជាក់​ថា សហព័ន្ធ​សហជីព​អន្តរជាតិ នឹង​ជំរុញ​ទៅ​ក្រុមហ៊ុន​ធំ ដែល​ជា​ម្ចាស់​របស់​ក្រុមហ៊ុន វីងស្ដារស៊ូ ដែល​ទទួល​បាន​​ការ​បញ្ជា​ទិញ​របស់​ក្រុមហ៊ុន​ជប៉ុន។

លោក ឃុន ថារ៉ូ៖ «ចំណុចនេះ យើងគិត​ថា វា​ជា​ការ​ជំរុញ ហើយ​ក៏​ដូច​ជា​ការ​ដាក់​សម្ពាធ​ទៅ​ឱ្យ​ក្រុមហ៊ុនដែរ ពីព្រោះ​ថា ការ​ចាប់​ខ្លួន​ថ្នាក់​ដឹកនាំ​សហជីព​នេះ វា​កើត​ចេញ​ពី​បណ្ដឹង​របស់​ក្រុមហ៊ុន ហើយ​វា​កើតនៅ​ក្នុង​ទន្ទឹម​គ្នា នៅ​ក្នុង​ការ​សហជីព​របស់​សហព័ន្ធ​សហជីពកម្ពុជា (CATU) រៀបចំ​រចនាសម្ព័ន្ធ​នៅ​សហជីព​មូលដ្ឋាន​រៀបចំ​នៅ​ការ​បោះឆ្នោត​ រៀបចំ​ដំណើរ​ការ​ចុះ​បញ្ជី​ការ​នៅ​ក្នុង​ក្រុមហ៊ុុន​ហ្នឹង។ អ៊ីចឹង​វាហាក់​ដូច​ចៃដន្យ​នៅ​ក្នុង​អំឡុង​ពេល​ហ្នឹង គួរ​ផ្សំ​ទៅ​នឹង​ភាព​មិន​ប្រក្រតី​ទៅ​ដែល​យើង​ធ្វើ​ការ​ស៊ើបអង្កេត​នេះ យើង​អាច​និយាយ​បាន​ថា បញ្ហា​នេះ វា​អាច​កើត​ចេញ​ពី​ការ​រើស​អើង​សហជីព ហើយ​ហ្នឹង​ការ​គំរាមកំហែង​ទៅ​ដល់​សហជីព​ឯករាជ្យ​ដែល​រៀបចំ​បង្កើត​នៅ​ក្នុង​ក្រុមហ៊ុន​ហ្នឹង»

លោក ឃុន ថារ៉ូ លើក​ឡើង​ថា អង្គការ​សង់ត្រាល់ នឹង​សរសេរ​លិខិត​ជាផ្លូវ​ការ​មួយ  ប្ដឹង​ទៅ​ក្រុមហ៊ុន​របស់​ជប៉ុន ដែល​ជាម្ចាស់​បញ្ជា​ទិញ​ពី​ក្រុមហ៊ុន  វីងស្ដាស៊ូ ឱ្យ​ចាត់​វិធានការ​អនុលោម​តាម​ក្រម​សីលធម៌ ឬ​ផ្នែក​ច្បាប់ រួមទាំង​អំពាវនាវ​ឱ្យ​ដោះលែង​លោក ជា ចាន់ ជា​បន្ទាន់។

កាល​ពី​ថ្ងៃទី១៨ ខែកុម្ភៈចៅក្រម​ស៊ើបសួរ​នៃ​សាលា​ដំបូង​ខេត្ត​កំពង់ស្ពឺ បាន​ចេញ ​ដីកា​បង្គាប់​ឱ្យ​ឃុំ​ខ្លួន​ប្រធាន​សហជីព​កម្ពុជា​ប្រចាំ​រោងចក្រ វីងស្តារស៊ូ (Wing Stars Shoes) លោក ជា ចាន់ ក្នុង​ពន្ធនាគារ​បណ្តោះអាសន្ន   តាម​បណ្ដឹង​របស់​ថៅកែ​ក្រុមហ៊ុន វីងស្ដារស៊ូ ដែល​ចោទ​ប្រកាន់​លោក ជា ចាន់ «លួច​សម្ភារៈ​នៅ​ក្នុង​រោងចក្រ»

ការ​ចោទ​ប្រកាន់​លើ​លោក ជា ចាន់នេះ    ធ្វើ​ឡើងស្រប​ពេល​លោកបាន​ព្យាយាម​បង្កើត​សហជីព​ ដើម្បី​ការពារ​ផល​ប្រយោជន៍​កម្មករ​នៅ​កន្លែង​ការងារ។ 

លោក ជា ចាន់ រួមទាំង​ស្ថាបនិក​សហជីព៩នាក់​ទៀត ត្រូវ​បាន​ក្រុម​កម្មករ​

បោះឆ្នោត រើស​រើស​ឱ្យ​ជា​ក្លាយ​តំណាង​កាល​ពីថ្ងៃ​ទី១០ ខែមករា។ ប៉ុន្តែ​ក្រោយ​ពួកគេ​ជូន​ដំណឹង​ស្តីពី​ការ​បង្កើត​សហជីព ស្រាប់​តែ​ភាគី​ក្រុមហ៊ុន​បាន​ព្យាយាម​

បញ្ចុះបញ្ចូល​និង​ផ្ញើ​សារ​បំភិតបំភ័យ​ក្នុង​គោល​បំណង​ឱ្យ​លោក ជា ចាន់ និង​សមាជិក​ស្ថាបនិក​សហជីព​ផ្សេង​ទៀត​បោះបង់​ការ​បង្កើត​សហជីព ដើម្បី​ការពារ​សិទ្ធិ​នៅ​កន្លែង​ធ្វើ​ការ។

សហព័ន្ធ​សហជីព​កម្ពុជា  អំពាវនាវ​ឱ្យ​តុលាការ​ដោះលែង លោក ជា ចាន់ ដោយ​ចាត់​ទុក​សកម្មភាព​ចាប់​ខ្លួន និង​ចោទ​នេះ​ថា  ជា​ការ​រំលោភបំពាន​ និង​គំរាមកំហែង​ធ្ងន់ធ្ងរ​មក​លើ​សេរីភាព​ផ្នែក​សហជីព      ដែល​ធានា​ដោយ​ច្បាប់​ជាតិ​   និង​អនុសញ្ញា​របស់​អង្គការ​អន្តរជាតិ​ខាង​ការងារ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។