គ្រួសារអះអាងថាលោក កង សារ៉ន ដែលកំពុងជាប់ពន្ធនាគាររឿងរិះគន់គណបក្សកាន់អំណាចអសមត្ថភាពទប់ស្កាត់លំហូរពលរដ្ឋវៀតណាមនៅកម្ពុជា នៅតែរក្សាជំហររឹងមាំក្នុងការស្វែងរកយុត្តិធម៌ ប៉ុន្តែលោកបដិសេធធ្វើសុំទោសជាថ្នូរដោះលែងបានសេរីភាពឡើងវិញ។ មន្ត្រីសិទ្ធិមនុស្សនៅតែចាត់ទុកសកម្មភាពរបស់លោក កង សារ៉ន ជាការអនុវត្តសិទ្ធិសេរីភាព ហើយស្នើឱ្យតុលាការពន្លឿននីតិវិធី និងផ្តល់យុត្តិធម៌ជូនគាត់។
ពលរដ្ឋដែលរិះគន់មេដឹកនាំគណបក្សប្រជាជនកម្ពុជាថា អសមត្ថភាពក្នុងការទប់ស្កាត់ជនជាតិវៀតណាមហូរចូលកម្ពុជា បន្តទាមទាររកយុត្តិធម៌។
ប្រពន្ធរបស់លោក កង សារ៉ន គឺលោកស្រី ហង្ស ត្រឹប ប្រាប់អាស៊ីសេរីនៅថ្ងៃទី៧ ខែមករា ថា លោកស្រីតែងចូលសួរសុខទុក្ខប្តីនៅក្នុងពន្ធនាគារខេត្តបន្ទាយមានជ័យ ពីរទៅបីសប្តាហ៍ម្តង គឺនៅពេលដែលលោកស្រីសន្សំប្រាក់បានបន្តិចបន្តួចពីការលក់នំ ខណៈប្តីលោកស្រីកំពុងកើតជំងឺលើសឈាមដោយត្រូវការលេបថ្នាំជាប្រចាំ។ លោកស្រីឱ្យដឹងថា បើទោះបីអាជ្ញាធរនៅបន្តអូសទាញឱ្យប្តីលោកស្រីឡាយវីដេអូសុំទោសជាសាធារណៈយ៉ាងណាក្តី ក៏មកដល់ពេលគាត់នៅតែមិនព្រមធ្វើតាម ដោយរក្សាឆន្ទៈ និងស្មារតីរឹងមាំជាធម្មតាដដែល ពីព្រោះគាត់យល់ថា គាត់គ្រាន់តែបញ្ចេញមតិរឿងពិតក្នុងសង្គម ដោយមិនបានប្រព្រឹត្តកំហុសដូចការចោទប្រកាន់របស់តុលាការខេត្តទេ។
លោកស្រី ហង្ស ត្រឹប៖ «ខ្ញុំនឹងទៅកំសត់ខ្លួន ខ្ញុំធ្លាប់ឃើញពេលប្តីគ្រាន់ និយាយកោកៗ គឺកំសត់ខ្លួនណាស់ពីរនាក់ម៉ែកូនយំរាល់ថ្ងៃ គ្មានយុត្តិធម៌ទេ គ្រាន់តែនិយាយរឿងយួនទៅចាប់ប្តីរបស់ខ្ញុំដាក់ពន្ធនាគារ ដោយមិនរកយុត្តិធម៌ទេ គេនិយាយរឿងហ្នឹងច្រើនមិនខុសអី គាត់មិនខុសអីទេ គេគាបសង្កត់ហ្នឹងឯង»។
លោក កង សារ៉ន ត្រូវបានអាជ្ញាធរចោមរោមចាប់ និងឃុំខ្លួនដាក់ក្នុងពន្ធនាគារ កាលពីថ្ងៃទី២៥ ខែវិច្ឆិកា ឆ្នាំ២០២៣ បន្ទាប់ពីតុលាការខេត្តបន្ទាយមានជ័យផ្ដន្ទាទោសដាក់ពន្ធនាគារចំនួន ៣ឆ្នាំ ពាក់ព័ន្ធនឹងទស្សនៈនយោបាយរបស់លោក ដែលលោកបានបង្ហោះក្នុងគណនីហ្វេសប៊ុករបស់លោកអំឡុងពេលយុទ្ធនាការបោះឆ្នោតខែកក្កដា ឆ្នាំ២០២៣។ នៅក្នុងវីដេអូផ្សាយផ្ទាល់នោះ លោកបានចោទជាសំណួរថា តើក្រោយពីបក្សប្រជាជនកម្ពុជាឈ្នះឆ្នោត នឹងមានវិធានការដេញពលរដ្ឋវៀតណាមចេញ ឬបន្តឱ្យហូរចូលដោយខុសច្បាប់បន្តទៀត?
ក្រោយការចាប់ឃុំខ្លួនលោក កង សារ៉ន បណ្តាលឲ្យមានការរិះគន់ព្រោងព្រាតពីអ្នកប្រើប្រាស់បណ្ដាញសង្គម និងមន្ត្រីសិទ្ធិមនុស្សថា ទង្វើរបស់អាជ្ញាធរគឺជាការរំលោភសិទ្ធិមនុស្ស និងអមនុស្សធម៌។ ពួកគេទទូចឱ្យរដ្ឋាភិបាលបញ្ឈប់ប្រើប្រាស់យន្តការតុលាការ ដើម្បីគំរាមកំហែងប្រជាពលរដ្ឋដែលហ៊ានបញ្ចេញមតិរិះគន់រឿងទាំងនេះ។
ជុំវិញរឿងនេះ អ្នកសម្របសម្រួលអង្គការលីកាដូ ខេត្តបន្ទាយមានជ័យ លោក ភុន ឈិន ថ្លែងថា ករណីរបស់លោក កង សារ៉ន ត្រូវបានមជ្ឈដ្ឋានសាធារណៈ ចាត់ទុកថា ជាសេរីភាពបញ្ចេញមតិនៅក្នុងសង្គមប្រជាធិបតេយ្យ។ លោកមើលឃើញថា ការបន្តឃុំខ្លួនលោក កង សារ៉ន មកដល់ពេលនេះបានធ្វើឱ្យជីវភាពគ្រួសារកាន់តែយ៉ាប់យ៉ឺន ហើយលោកយល់ថា សាលាឧទ្ធរណ៍បាត់ដំបងគួរពន្លឿនសំណុំរឿងនេះ ហើយផ្តល់យុត្តិធម៌ដល់ជនជាប់ចោទឱ្យបានឆាប់។
លោក ភុន ឈិន៖ «នៅពេលបាត់បង់កម្លាំងពលកម្មនោះ វានឹងប៉ះពាល់មួយផ្នែកដល់ជីវភាពប្រចាំថ្ងៃរបស់ពួកគាត់ ជាពិសេសគ្រួសារក៏មានជំពាក់បំណុលគេផងដែរ អ៊ីចឹងកាលណាគាត់មានបំណុល បាត់បង់កម្លាំងពលកម្មស្វែងរកប្រាក់ចំណូលអ៊ីចឹងវាធ្វើឱ្យប៉ះពាល់ខ្លាំងណាស់ដល់ជីវភាពគ្រួសារពួកគាត់»។
វិទ្យុអាស៊ីសេរីមិនអាចទាក់ទងអ្នកនាំពាក្យសាលាឧទ្ធរណ៍ប្រចាំតំបន់នៅបាត់ដំបងអ្នកស្រី ទៀង សំបូរ ដើម្បីសាកសួរជុំវិញបញ្ហានេះបានទេ នៅថ្ងៃ៧ ខែមករា។
លោក កង សារ៉ន រស់នៅភូមិបន្ទាយ១ ឃុំទទួលពង្រ ស្រុកម៉ាឡៃ ខេត្តបន្ទាយមានជ័យ។ ក្រុមគ្រួសាររបស់លោកមានម្តាយជរាអាយុ ១០២ឆ្នាំ និងកូនស្រីគថ្លង់ម្នាក់នៅក្នុងបន្ទុក ចំណែកជីវភាពគ្រួសាររបស់លោករស់នៅប្រកបរបរនេសាទ ត្រី ជីកទំពាំងតាមព្រៃ និងធ្វើនំលក់ប្តូរយកប្រាក់កម្រៃបន្តិចបន្តួចសម្រាប់ចិញ្ចឹមជីវិតប្រចាំថ្ងៃ។
ប្រពន្ធលោក កង សារ៉ន ឱ្យដឹងថា ចាប់តាំងពីអាជ្ញាធរដាក់កម្លាំងឃ្លាំមើលអ្នកខាងក្រៅចូលទៅទីនោះ រួមទាំងសកម្មភាពដាក់សម្ពាធផ្សេងទៀតមក បានកាត់ផ្តាច់ទំនាក់ទំនងរវាងគ្រួសារលោកស្រី និងប្រជាពលរដ្ឋខ្មែរទាំងក្នុងនិងក្រៅប្រទេស ដែលអាណិត និងជួយថវិកាកន្លងទៅ។ បញ្ហានេះធ្វើឱ្យលោកស្រីកាន់តែលំបាកទាំងសេដ្ឋកិច្ច និងផ្លូវចិត្តធ្ងន់ធ្ងរ ដូច្នេះលោកស្រីអំពាវនាវដល់ពលរដ្ឋខ្មែរដែលស្រឡាញ់យុត្តិធម៌ទាំងអស់បន្តជួយឧបត្ថម្ភដល់គ្រួសារលោកស្រីក្នុងគ្រាលំបាកនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។