សហព័ន្ធខ្មែរកម្ពុជាក្រោមថ្កោលទោសសមាគមព្រះសង្ឃវៀតណាម ដែលគ្រោងនឹងចាប់ផ្សឹកព្រះចៅអធិការវត្ត និងព្រះសង្ឃខ្មែរក្រោមផ្សេងទៀតដែលកំពុងគង់នៅវត្តមួយនៅខេត្តលង់ហោរ។ វិធានការរបស់សមាគមព្រះសង្ឃវៀតណាមនេះ ធ្វើឡើងក្រោយពេលដែលអាជ្ញាធរវៀតណាមបានប្រើហិង្សាទៅលើព្រះសង្ឃខ្មែរក្រោម រឿងព្រះសង្ឃដាក់ទង់ជាតិតំណាងឲ្យខ្មែរកម្ពុជាក្រោមនៅក្នុងវត្ត។
សមាគមពុទ្ធសាសនារបស់រដ្ឋាភិបាលវៀតណាមមានគំរោងនឹងដឹកនាំមន្ត្រីសង្ឃវៀតណាមនិងអាជ្ញាធរទៅដកហូតសិទ្ធិឬចាប់ផ្សឹក ព្រះចៅអធិការវត្តប្រជុំពលមង្គលបុរី ឬហៅថាវត្ត (ទ្រនំសេក) និងព្រះសង្ឃផ្សេងទៀតនៅក្នុងខេត្តលង់ហោរនៅថ្ងៃទី៣ធ្នូ។ នេះបើតាមការអះអាងរបស់មន្ត្រីសហព័ន្ធខ្មែរកម្ពុជាក្រោម។ ប្រធានអន្តរសាសនានៃសហព័ន្ធខ្មែរកម្ពុជាក្រោមព្រះអង្គ ធីធី ធម្មោ មានថេរដីកា ប្រាប់វិទ្យុអាស៊ីសេរីថា ព្រះអង្គព្រួយបារម្ភថា សមាគមពុទ្ធសាសនាវៀតណាមនឹងចាប់បង្ខំផ្សឹកអធិការវត្តប្រជុំពលមង្គលបុរី គឺព្រះអង្គ ថាច់ ច័ន្ទតារា និងព្រះសង្ឃផ្សេងទៀតដោយចោទប្រកាន់ថា បានបំពានវិន័យធម៌។ ព្រះអង្គ ធីធី ធម្មោ បដិសេធថា ព្រះចៅអធិការវត្តប្រជុំពលមង្គលបុរី ឬហៅថាវត្តទ្រនំសេក និងព្រះសង្ឃនៅទីនោះបានរំលោភវិន័យព្រះសង្ឃ។
ព្រះអង្គ ធីធី ធម្មោ៖ «ព្រះសង្ឃតារាមិនមែនជាសមាជិកសមាគមព្រះសង្ឃវៀតណាមទេ។ ព្រះអង្គបានលាលែងបានមួយឆ្នាំកន្លងទៅហើយកាលពីឆ្នាំ២០២២។ អាត្មាជឿថា រដ្ឋាភិបាលបានបំពាន សិទ្ធិមនុស្សនិងសិទ្ធិអ្នកបួសក្នុងព្រះពុទ្ធសាសនាហើយទៅលើជនជាតិដើម»។
សមាគមពុទ្ធសាសនារបស់រដ្ឋាភិបាលវៀតណាមកាលពីថ្ងៃទី១ ធ្នូ បានចេញលិខិតចោទប្រកាន់ ព្រះអង្គ ថាច់ច័ន្ទតារា ថា បានរំលោភធម៌វិន័យហើយគ្រោងនឹងដកតួនាទី ព្រះសង្ឃនៅថ្ងៃទី៣ ធ្នូ។ ទោះបីយ៉ាងណា ព្រះអង្គ យឿង ខាយ ដែលកំពុងគង់នៅវត្តប្រជុំពលមង្គលបុរី មានថេរដីកាថា សមាគមព្រះសង្ឃវៀតណាម បានយកលេសធ្វើបាបព្រះសង្ឃខ្មែរក្រោម ដោយសារតែ កាលពីថ្ងៃទី ២៨ វិច្ឆិកា ព្រះសង្ឃខ្មែរក្រោមបានយកទង់កម្ពុជាក្រោមមកដោតក្នុងវត្ត ហើយអាជ្ញាធរវៀតណាមបានព្យាយាមមករឹបអូស ហើយបានប្រើប្រាស់អំពើហិង្សាទៅលើព្រះសង្ឃខ្មែរក្រោមថែមទៀតផង។ ព្រះអង្គ យឿង ខាយ បន្តថា អាជ្ញាធរវៀតណាម បានព្យាយាមចូលវត្តដោយគ្មានការអនុញ្ញាតទើបព្រះសង្ឃខ្មែរក្រោមហាមឃាត់ ប៉ុន្តែត្រូវអាជ្ញាធរប្រើប្រាស់ហិង្សាវាយទៅលើព្រះចៅអធិការវត្តប្រជុំពលមង្គលបុរី ព្រះអង្គ ថាច់ ច័ន្ទតារា។ ព្រះអង្គ យឿង ខាយ ធ្លាប់ជាសកម្មជនសិទ្ធិមនុស្សមុនបួសជាព្រះសង្ឃហើយត្រូវបានអាជ្ញាធរវៀតណាម ព្យាយាមធ្វើទុក្ខបុកម្នេញជាច្រើនលើកច្រើនសាមកហើយទើបភៀសខ្លួនមកបួសក្នុងវត្តប្រជុំពលមង្គលបុរី។
វិទ្យុអាស៊ីសេរីមិនទាន់អាចទាក់ទងមន្ត្រីសមាគមព្រះសង្ឃវៀតណាមដើម្បីបកស្រាយជុំវិញរឿងនេះបានទេ កាលពីថ្ងៃទី ២ ធ្នូ។ ប្រធានអន្តរសាសនានៃសហព័ន្ធខ្មែរកម្ពុជាក្រោមព្រះអង្គ ធីធី ធម្មោ ព្រមានថា ប្រសិនបើសមាគមវៀតណាមចាប់ព្រះសង្ឃខ្មែរក្រោមផ្សឹកមែននោះ សហព័ន្ធនឹងធ្វើការតស៊ូមតិនៅលើឆាកអន្តរជាតិជុំវិញការរំលោភសិទ្ធិសាសនានេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។