យុវជនខ្មែរក្រោមដែលត្រូវអាជ្ញាធរវៀតណាមគំរាមកំហែង និងផាកពិន័យប្ដេជ្ញាបន្តយុទ្ធនាការតស៊ូមតិដើម្បីឲ្យវៀតណាមទទួលស្គាល់ខ្មែរក្រោមជាជនជាតិដើម។ ការប្ដេជ្ញាចិត្តរបស់យុវជនខ្មែរក្រោមនេះ ដោយសារតែវៀតណាមបន្តធ្វើទុក្ខបុកម្នេញយុវជនណាដែលសំដែងមតិតាមបណ្ដាញសង្គមដើម្បីទាមទារសិទ្ធិជនជាតិដើម។
យុវជនខ្មែរក្រោមដែលត្រូវអាជ្ញាធរវៀតណាមធ្វើបាបអះអាងថា ពួកគេមិនបាក់ស្បាតដោយសារតែទង្វើរបស់អាជ្ញាធរវៀតណាមនោះទេ។ កាលពីពេលថ្មីៗអាជ្ញាធរវៀតណាមនៅខេត្តឃ្លាំង និងព្រះត្រពាំង បានកោះហៅយុវជនខ្មែរក្រោមជាច្រើននាក់ទៅសំឡុតបំភ័យនិងប្រើប្រាស់ហិង្សាលើពួកគេ កុំឲ្យហ៊ាននិយាយទាមទារសិទ្ធិជាជនជាតិដើម និងផ្សព្វផ្សាយពីប្រវត្តិសាស្រ្តខ្មែរកម្ពុជាក្រោម។
យ៉ាងហោចណាស់ក៏មានយុវជនខ្មែរក្រោមពីរនាក់ត្រូវបានអាជ្ញាធរវៀតណាមផាកពិន័យជាច្រើនរយដុល្លារ ដោយសារតែពួកគេពាក់អាវមានសញ្ញាទង់ជាតិនិងផែនដីកម្ពុជាក្រោម។ វៀតណាមចោទប្រកាន់ពួកគេថា កេងចំណេញលើសិទ្ធិសេរីភាព និងបំពានលើផលប្រយោជន៍របស់រដ្ឋកុម្មុយនីស្តវៀតណាម។ យុវជន ត្រេវ ស៊ីវ ដែលត្រូវវៀតណាមផាកពិន័យ ជាង ៣០០ ដុល្លារថា លោកមិនខ្លាចការគាបសង្កត់របស់វៀណាមនោះទេ។ យុវជន ត្រេវ ស៊ីវ ក៏នឹងមិនសងប្រាក់ផាកពិន័យវៀតណាមឡើយ ដោយសារតែលោកអះអាងថា លោកគ្មានកំហុស ហើយលោកនឹងបន្តធ្វើការងារលើកស្ទួយសិទ្ធិមនុស្សខ្មែរក្រោមទៅមុខទៀត។
យុវជន ត្រេវ ស៊ីវ៖«ទីមួយប្អូនចង់បានសេចក្ដីខុសនិងសេរីភាពដូចប្រជាពលរដ្ឋគេដែរ ធ្វើឲ្យប្អូនមានចិត្តអីចឹងបង។ នៅចែករំលែកព័ត៌មានដែលបងប្អូនយើងអត់បានដឹងយើងនឹងចែករំលែកបន្តទៅទៀត ហើយសៀវភៅជនជាតិដើម បងប្អូនណាចង់បានយើងនឹងចែកឲ្យគាត់បង»។
អាជ្ញាធរវៀតណាម បានចោទប្រកាន់យុវជន ត្រេវ ស៊ីវ ពីបទកេងចំណេញលើសិទ្ធិសេរីភាព និងបំពានលើផលប្រយោជន៍របស់រដ្ឋ។ អាជ្ញាធរវៀតណាមហៅយុវជន ត្រេវ ស៊ីវ ទៅគំរាមកំហែងចំនួន ៣លើករួចមកហើយ ដោយហាមមិនឲ្យបង្ហោះព័ត៌មានទាក់ទងនឹងប្រវត្តិសាស្ត្រទឹកដីកម្ពុជាក្រោម និងសៀវភៅឯកសារ ស្តីពីសិទ្ធិជនជាតិដើមរបស់អង្គការសហប្រជាជាតិ នៅលើបណ្ដាញសង្គមហ្វេសប៊ុក។ កាលពីថ្ងៃទី១០ មករា អាជ្ញាធរវៀតណាមបានប្រើប្រាស់អំពើហិង្សាវាយដុំយុវជន ត្រេវ ស៊ីវ ឲ្យរងរបួសធ្ងន់មុននឹងដោះលែង។
បច្ចុប្បន្នយុវជន ត្រេវ ស៊ីវ ត្រូវរោងចក្រវៀតណាមបណ្តាញចេញពីការងារ ដោយសារតែអាជ្ញាធរវៀតណាម ហោះកៅលោកទៅសាកសួរបណ្តាលឲ្យលោកមិនអាចទៅធ្វើការងារបាន។ យុវជន ត្រេវ ស៊ីវ អំពាវឲ្យពលរដ្ឋខ្មែរក្រោម ងើបឡើងទាមទារសិទិ្ធជនជាតិដើមដោយអហិង្សា។
យុវជន ត្រេវ ស៊ីវ៖«បាទប្អូនសំណូមពរពេលបងប្អូនយើងឃើញខ្ញុំ អាជ្ញាធរកោះហៅ សូមកុំភ័យខ្លាចទាំងអស់ហើយកុំបាក់ទឹកចិត្តយើងធ្វើនេះស្របច្បាប់។យើងមានអង្គការសហប្រជាជាតិគេឃ្លាំមើលយើងដែរ»។
ស្រដៀងគ្នានេះដែរ យុវជន ថាច់បុត្រតៀង ដែលពាក់អាវមានទង់ជាតិនិងផែនទីខ្មែរកម្ពុជាក្រោមបង្ហោះតាមបណ្តាញសង្គម (Facebook)ក៏ត្រូវអាជ្ញាធរវៀតណាម កាលពីថ្ងៃទី ២២កុម្ភៈហៅ ទៅសំឡុតកុំឲ្យពាក់អាវដែលមានលក្ខណៈស្នេហាជាតិបន្តទៀត ហើយអាជ្ញាធរវៀតណាមប្រាប់លោកថា ខ្មែរក្រោមជាជាតិភាគតិច មិនមែនជាជាតិដើម។ ទោះបីជាយ៉ាង លោកបដិសេធមិនធ្វើតាមហើយប្តេជ្ញានឹងបន្តពាក់អាវយឺតដែលបង្ហាញពីអត្តសញ្ញាណខ្មែរក្រោមដដែល។
យុវជន ថាច់ បុត្រតៀង៖«គោលដៅរបស់ប្អូន ប្អូនចង់ផ្សព្វផ្សាយឲ្យខ្មែរកម្ពុជាក្រោមយើងដឹងពីកំណើតរបស់ខ្លួនដឹងពីប្រវត្តិសាស្ត្រដូនតាយើង។ ប្អូនចង់បង្ហាញពីអត្តសញ្ញាណជាតិសាសន៍របស់យើង»។
យុវជន ថាច់ បុត្រតៀង បន្តថា ទង្វើរបស់អាជ្ញាធរវៀតណាមដោយតែពួកគេមានចេតនាចង់បំបាក់ស្មារតីយុវជនខ្មែរ ក្រោមដទៃទៀត កុំឲ្យហ៊ានងើបឡើងតវ៉ាទាមទារសិទ្ធិជនជាតិដើម។ អាណានិគមបារាំង បានកាត់ទឹកដីខ្មែរកម្ពុជាក្រោម ទៅឲ្យវៀតណាមទាំងខុសច្បាប់ កាលពីថ្ងៃទី៤ ខែមិថុនា ឆ្នាំ១៩៤៩។ រយៈពេលជាង ៧០ឆ្នាំដែលបានវៀតណាម បានគ្រប់គ្រងទឹកដីកម្ពុជាក្រោមមកនេះ វៀតណាមបានប្រើប្រាស់គ្រប់មធ្យោបាយដើម្បីបំបាត់អត្តសញ្ញាណ និងសាសនាខ្មែរកម្ពុជាក្រោម។
ពាក់ព័ន្ធនឹងអាជ្ញាធរបន្តធ្វើទុក្ខបុកម្នេញខ្មែរក្រោមនេះ ប្រធាននាយកដ្ឋានព័ត៌មានសហព័ន្ធខ្មែរកម្ពុជាក្រោម ព្រះភិក្ខុ សឺង យ៉ឹងរតនា មានថេរដីកាថា វៀតណាមបានចិញ្ចឹមចិត្តសងសឹកនឹងការតស៊ូទាមទារសិទ្ធិជនជាតិដើមរបស់ខ្មែរក្រោម។ ព្រះអង្គ សំណូមពរឲ្យវៀតណាម គោរពសិទ្ធិជនជាតិដើម ដែលប្រទេសនេះ បានទទួលស្គាល់ សេចក្តីប្រកាសជាសលកស្តីពីជនជាតិដើមរបស់អង្គការសហប្រជាជាតិ។
ព្រះភិក្ខុ សឺង យ៉ឹងរតនា៖«អាជ្ញាធរវៀតណាមបានកោះហៅពលរដ្ឋខ្មែរ កម្ពុជាក្រោមទៅសួរចម្លើយនិងបំភិតបំភ័យ បំបាក់ស្មារតីចំពោះពលរដ្ឋខ្មែរក្រោមណាដែលហ៊ានក្រោកតស៊ូទាមទារសិទ្ធិសេរីភាពនិងការផ្សព្វផ្សាយប្រវត្តិសាស្ត្រ និងភូមិសាស្ត្រនៃទឹកដីកម្ពុជាក្រោម»។
រដ្ឋាភិបាលវៀតណាមបានលេបសំដីនិងការសន្យានៅចំពោះមុខសមាជិកអង្គការសហប្រជាជាតិថា ប្រទេសនេះ នឹងគោរពសិទ្ធិមនុស្សប្រសិនបើជាប់ជាសមាជិកក្រុមប្រឹក្សាសិទ្ធិមនុស្ស។ វៀតណាមបានក្លាយជាសមាជិកក្រុមប្រឹក្សាសិទ្ធិមនុស្សអង្គការសហប្រជាជាតិ សម្រាប់អាណត្តិ៣ឆ្នាំ ចាប់ពីខែមករាឆ្នាំ២០២៣ទៅ។
កាលពីពេលថ្មីៗនេះ អ្នករាយការណ៍ពិសេសអង្គការសហប្រជាជាតិ ស្តីពីសិទ្ធិជនជាតិដើមបានសរសេរលិខិតសំដែងក្តីបារម្ភពីការបន្តរំលោភសិទ្ធិមនុស្ស និងសាសនារបស់រដ្ឋាភិបាលវៀតណាម។ ពួកគេ បានដាក់សំណួរទៅរដ្ឋាភិបាលវៀតណាមរឿង ការធ្វើទុក្ខបុកម្នេញលើយុវជនខ្មែរក្រោម ការសំដែងមតិអំពីសិទ្ធិជនជាតិដើម ការចែកចាយឯកសារសិទ្ធិជនជាតិដើមរបស់អង្គការសហប្រជាជាតិ និងសេរីភាពប្រតិបត្តិសាសនាជាដើម។ មកទល់ពេលនេះ វៀតណាមមិនទាន់ឆ្លើយតបនឹងសំណួររបស់អ្នករាយការណ៍ពិសេសអង្គការសហប្រជាជាតិនៅឡើយទេ។ កន្លងទៅរដ្ឋាភិបាលវៀតណាម តែងតែទាត់ចោលរបាយការណ៍សិទ្ធិមនុស្សរបស់សហរដ្ឋអាមេរិកនិងអង្គការសិទ្ធិមនុស្សអន្តរជាតិ ដែលរកឃើញពីការរំលោភសិទ្ធិមនុស្សរបស់វៀតណាម។ ទោះបីយ៉ាងណាកាលពីឆ្នាំ ២០២២ កន្លងទៅ អាជ្ញាធរវៀតណាម រងការចោទប្រកាន់ពីការចាប់ចងមនុស្សដោយខុសច្បាប់ និងសម្លាប់មនុស្សយ៉ាងអនាធិបតេយ្យ ការធ្វើទារុណកម្ម បង្កអំពើឃោរឃៅ និងអមនុស្សធម៌៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។