នាយកដ្ឋានព័ត៌មាននៃសហព័ន្ធខ្មែរកម្ពុជាក្រោម បានយកមកវិញនូវទំព័រ ( Facebook) របស់វិធីផ្សាយសំឡេងកម្ពុជាក្រោម ដែលមានឈ្មោះជាភាសាអង់គ្លេសថា (Voice of Kampuchea Krom) ក្រោយពេលក្រុមអនាមិក (Hacker) បានលួចចូលគ្រប់គ្រង និងលុបចោលទាំងស្រុងកាលពីចុងខែតុលាកន្លងទៅ។ ការវាយលុករបស់ក្រុមហេកឃ័រ (Hacker) នេះ ធ្វើឡើងបន្ទាប់ពីអាជ្ញាធរវៀតណមបានឃាត់ខ្លួនសកម្មជនសទ្ធិមនុស្សខ្មែរក្រោម ៤នាក់ដាក់ពន្ធនាគារ ដោយសារតែពួកគេប្រើប្រាស់ បណ្តាញសង្គមពិសេស( Facebook) ផ្សព្ធផ្សាយអំពីបញ្ហាសិទ្ធិមនុស្ស និងសិទ្ធិជនជាតិដើម។ សកម្មជនទាំងនោះ បានប្រើប្រាស់កម្មវិធីផ្សាយសំឡេងកម្ពុជាក្រោម ដើម្បីស្តាប់ព័ត៌មាន និងសិក្សាឯកសារសិទ្ធិមនុស្សផ្សេងៗ ដើម្បីផ្សព្វផ្សាយបន្ត។
លោកអ្នកនាងអាចចូលរកមើលព័ត៌មានរបស់កម្មវិធីសំឡេងកម្ពុជាក្រោម តាមរយៈអាសយដ្ឋាន៖ www.facebook.com/vokk.net
សហព័ន្ធខ្មែរកម្ពុជាក្រោម បានប្រើប្រាស់ទំព័រហ្វេសប៊ុក (Facebook Page) សំឡេងកម្ពុជាក្រោម ដើម្បីផ្សព្វផ្សាយព្រឹត្តិការណ៍ផ្សេងៗ ដែលកើតមានឡើងនៅលើដែនដីកម្ពុជាក្រោម និងអំពីសកម្មភាពតស៊ូមតិដោយសន្តិវិធីនិងអហិង្សានៅលើឆាកអន្តរជាតិរបស់សហព័ន្ធខ្មែរកម្ពុជាក្រោម។ សំឡេងកម្ពុជាក្រោម ជាកម្មវិធីផ្សាយវិទ្យុបង្កើតឡើង កាលពីឆ្នាំ២០០១ គឺមានអាយុកាល២២ឆ្នាំហើយ។ កម្មវិធីនេះ ឋិតនៅក្រោមការគ្រប់គ្រងរបស់នាយកដ្ឋានព័ត៌មាននៃសហព័ន្ធខ្មែរកម្ពុជាក្រោម ក្នុងចំណោមកម្មវិធីផ្សេងទៀត ដូចជាទូរទស្សន៍អនឡាញ បោះពុម្ពសៀវភៅ ព្រឹត្តិបត្រ និងកាសែតព្រៃនគរជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។