អាជ្ញាធរកំពង់ឆ្នាំង អះអាងថា គម្រោងការផ្ដល់ដី ៤០ហិកតារដល់ជនជាតិវៀតណាម នៅខេត្តកំពង់ឆ្នាំង គឺឈរលើគោលការណ៍សិទ្ធិមនុស្ស។ ចំណែកមន្ត្រីសង្គមស៊ីវិលនិយាយថា គេក៏ចង់ឃើញរដ្ឋាភិបាលផ្ដល់ដំណោះស្រាយដីធ្លីដល់ពលរដ្ឋរបស់ខ្លួន ដោយឈរគោលការណ៍សិទ្ធិមនុស្ស ដូចដែលរដ្ឋាភិបាលដោះស្រាយឱ្យជនជាតិវៀតណាមដែរ។
មន្ត្រីរដ្ឋាភិបាលថ្លែងក្នុងសន្និសីទសារព័ត៌មាននៅថ្ងៃទី១២ ខែធ្នូ ស្ដីពី “ផែនការបន្លាស់ទីប្រជាពលរដ្ឋរស់នៅលើផ្ទះបណ្ដែតទឹកឱ្យឡើងរស់នៅលើគោកវិញ នៅលើផ្ទៃដី ៤០ហិកតារក្នុងខេត្តកំពង់ឆ្នាំង” មន្ត្រីរដ្ឋាភិបាលអះអាងថា គម្រោងនេះមិនមែនជាការផ្តល់ដី ឬកាត់ដីទៅឱ្យជនជាតិវៀតណាមទេ គឺគ្រាន់តែរៀបចំឱ្យមានការបន្លាស់ទីអ្នកទាំងនោះពីទឹកមកគោកវិញប៉ុណ្ណោះ។
អភិបាលរងខេត្តកំពង់ឆ្នាំង លោក ស៊ុន សុវណ្ណារិទ្ធ លើកឡើងថា ជនជាតិ ដែលគ្រោងបន្លាស់ទីជាជនអន្តោប្រវេសន៍ស្របច្បាប់។ លោកថា ដូច្នេះអាជ្ញាធរត្រូវអនុវត្តដោយឈរលើគោលការណ៍គោរពសិទ្ធិមនុស្ស និងច្បាប់អន្តោប្រវេសន៍៖ «រដ្ឋាភិបាលយើងឬអាជ្ញាធរខេត្តមិនធ្វើអំពើឃោរឃៅដូចសម័យ ប៉ុល ពត ឬលន់ នល់ ដែលបាញ់សម្លាប់មនុស្សទេ ឃោរឃៅណាស់ ហើយរំលោភសិទ្ធិមនុស្សធ្ងន់ធ្ងរអ៊ីចឹងសុំកុំយករឿងនេះធ្វើជាខែលដើម្បីបង្កើតជាការញុះញង់ដែលធ្វើឱ្យខ្មែរមានការច្របូកច្របល់»។
អ្នកសម្របសម្រួលគម្រោងធុរកិច្ច និងសិទិ្ធមនុស្សរបស់មជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត ស្វាគមន៍ចំពោះការគោរពសិទ្ធិមនុស្សលើជនជាតិភាគតិចបែបនេះ។ មន្ត្រីសង្គមស៊ីវិលរូបនេះបន្តថា លោកក៏ចង់ឃើញអាជ្ញាធរ ឬរដ្ឋាភិបាល អនុវត្តគោលការណ៍សិទ្ធិមនុស្សបែបនេះឱ្យទូទៅដោយមិនរើសអើង៖ «គោលការណ៍សិទ្ធិ យើងត្រូវតែធ្វើយ៉ាងម៉េចឱ្យមានតុល្យភាពដើម្បីលើកស្ទួយសិទ្ធិមនុស្សគ្រប់រូបដោយមិនប្រកាន់ពូជសាសន៍ ពណ៌សម្បុរ ភេទ សាសនាអីទេ»។
រីឯអ្នកនាំពាក្យសមាគមអាដហុក (Adhoc) លោក ស៊ឹង សែនករុណា សង្កេតឃើញថា អាជ្ញាធរ ឬរដ្ឋាភិបាលបានខកខានគោរពសិទ្ធិមនុស្សលើពលរដ្ឋរបស់ខ្លួន ដែលមានបញ្ហាដីធ្លី ដោយពលរដ្ឋមួយចំនួនរងការបណ្ដេញចេញដោយមិនបានទទួលដីធ្លី ដែលមានការរៀបចំហេដ្ឋារចនាសម្ព័ន្ធត្រឹមត្រូវទេ។ លោកបន្តថា មូលហេតុដែលធ្វើឱ្យរដ្ឋាភិបាលរងការរិះគន់ពីគម្រោងបន្លាស់ទីជនជាតិវៀតណាមពីសំណាក់មហាជននានា ក៏ព្រោះតែរដ្ឋាភិបាលហាក់ដូចជាគិតគូរជាតិសាសន៍ដទៃ ជាងជាតិសាសន៍ឯង៖ «ជាចម្បងបំផុត គឺសិទ្ធិដែលចាំបាច់បំផុត គឺកាតព្វកិច្ចត្រូវតែបំពេញលើពលរដ្ឋរបស់ខ្លួនឱ្យល្អប្រសើរចាំយើងបន្តគិតគូទៅ ជាតិសាសន៍ផ្សេងណា ក្នុងពេលនេះយើងមិនដឹងថា អ្នកទាំងអស់ហ្នឹង ដែលមកកម្ពុជា គឺគាត់គោរពតាមច្បាប់របស់កម្ពុជា ឬអត់»។
អភិបាលរងខេត្តកំពង់ឆ្នាំង លោក ស៊ុន សុវណ្ណារិទ្ធ ឱ្យដឹងថា ពេលនេះអាជ្ញាធរកំពុងពន្លឿនការចាក់ដី និងរៀបចំហេដ្ឋារចនាសម្ព័ន្ធនានា ដើម្បីអនុញ្ញាតឱ្យអ្នកបន្លាស់ទីចូលទៅសង់ទីលំនៅរស់នៅ។ លោកថាបច្ចុប្បន្ននេះ ទើបតែមានប្រជាពលរដ្ឋប្រមាណ ១០០ផ្ទះប៉ុណ្ណោះ ទៅរស់នៅលើដីនោះ។ លោកអះអាងថា អ្នកដែលត្រូវបានរៀបចំឱ្យបន្លាស់ទីមានចំនួនប្រមាណ ៤.៥៦៣គ្រួសារ ក្នុងនោះជនអន្តោប្រវេសន៍វៀតណាមមាន ២.៣៧៩គ្រួសារ ស្មើនឹង ១០.០៨៧នាក់។ ក្រៅពីនោះ គឺជាប្រជាពលរដ្ឋខ្មែរ និងខ្មែរ-ឥស្លាម។
ចំណែកក្រុមពលករធ្វើការនៅប្រទេសកូរ៉េខាងត្បូង និងប្រទេសថៃវិញ ស្នើទៅរបបក្រុងភ្នំពេញឱ្យបញ្ឈប់គម្រោងការផ្តល់ដី ៤០ហិកតារដល់ជនជាតិវៀតណាមនៅខេត្តកំពង់ឆ្នាំនេះ។ ពេលនេះពលករខ្មែរនៅប្រទេសកូរ៉េខាងត្បូង កំពុងដើរប្រមូលស្នាមដៃរបស់ពលករ ដើម្បីធ្វើញត្តិប្រឆាំងគម្រោងនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។