សង្គមស៊ីវិល លើកឡើងថា ការសហការរវាងក្រសួងព័ត៌មានកម្ពុជា ជាមួយប្រទេសវៀតណាម ដើម្បីប្រឆាំងទៅនឹងព័ត៌មានក្លែងក្លាយ មិនអាចធ្វើឱ្យស្ថានភាពប្រព័ន្ធផ្សព្វផ្សាយ និងសារព័ត៌មាននៅកម្ពុជាមានភាពល្អប្រសើរនោះឡើយ។ ផ្ទុយទៅវិញ ពួកគាត់ស្នើឱ្យរដ្ឋាភិបាល និងក្រសួងពាក់ព័ន្ធ លើកកម្ពស់សេរីភាពសារព័ត៌មានឯករាជ្យ ដើម្បីបើកលំហឱ្យព័ត៌មានពិត និងមានវិជ្ជាជីវៈនៅកម្ពុជា ដើម្បីបានផ្សព្វផ្សាយទៅកាន់ប្រជាពលរដ្ឋកាន់តែទូលាយជាងមុន។
ផ្ទុយពីការអនុវត្តតាមការស្នើសុំរបស់ប្រទេសប្រជាធិបតេយ្យ ឱ្យបើកលំហសេរីភាពសារព័ត៌មាន រដ្ឋាភិបាលកម្ពុជាដែលមានក្រសួងព័ត៌មាន ជាសេនាធិការនោះ បែរជាងាកទៅធ្វើកិច្ចសហប្រតិបត្តិការផ្នែកព័ត៌មាន និងការផ្សព្វផ្សាយ ជាមួយរដ្ឋាភិបាលប្រទេសវៀតណាម ក្នុងគោលបំណងប្រឆាំងព័ត៌មានក្លែងក្លាយ ខណៈសង្គមស៊ីវិលថា ទង្វើនេះមិនបានបង្ហាញពីឆន្ទៈ ដែលចង់ឱ្យស្ថានភាពសារព័ត៌មាននៅកម្ពុជាមានភាពល្អប្រសើរនោះឡើយ។
នាយកផ្នែកប្រព័ន្ធផ្សព្វផ្សាយ នៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ លោក អ៊ិត សូធឿត ប្រាប់វិទ្យុអាស៊ីសេរីនៅថ្ងៃទី២២ ខែកញ្ញា ថា ការផ្សព្វផ្សាយព័ត៌មានពិតកាន់តែច្រើន និងឆាប់រហ័សទៅដល់ប្រជាពលរដ្ឋ និងមានការសហការពីភាគីរដ្ឋាភិបាល ដោយឆ្លើយតបជាមួយអ្នកសារព័ត៌មានមកពីគ្រប់ស្ថាប័ននោះ គឺជាយន្តការមួយ ជួយទប់ស្កាត់ព័ត៌មានក្លែងក្លាយ។ ជាមួយគ្នានេះ លោកសង្ឃឹមដែរថា រដ្ឋាភិបាលនឹងមិនយកហេតុផលនៃការប្រឆាំងព័ត៌មានក្លែងក្លាយមកគាបសង្កត់ ឬមកប្រឆាំងសារព័ត៌មានឯករាជ្យវិញនោះឡើយ។
លោក អ៊ិត សូធឿត៖ « ក៏ប៉ុន្តែ ប្រសិនបើព័ត៌មាននោះ មានលក្ខណៈរិះគន់ ប៉ះពាល់ដល់រដ្ឋាភិបាល អ៊ីចឹងរដ្ឋាភិបាលគួរតែទទួលយកស្ដាប់ហេតុផលទាំងអស់ហ្នឹង ហើយយកទៅពិនិត្យមើលថាតើបញ្ហាទាំងអស់ហ្នឹង ពិតជាកើតមានឬយ៉ាងណា ជៀសវាងការចោទប្រកាន់ព័ត៌មានទាំងអស់ហ្នឹងថាជាព័ត៌មានក្លែងក្លាយ ហើយបដិសេធភ្លាមៗ » ។
ការលើកឡើងនេះ បន្ទាប់ពីជំនួបទ្វេភាគីរវាង រដ្ឋមន្ត្រីក្រសួងព័ត៌មានកម្ពុជា លោក នេត្រ ភក្ត្រា និងរដ្ឋមន្ត្រីក្រសួងព័ត៌មាននិងគមនាគមន៍វៀតណាម លោក ង្វៀន ម៉ាញ់ហុង (Nguyen Manh Hung)នៅថ្ងៃទី២១ ខែកញ្ញា បានប្ដេជ្ញារួមគ្នាក្នុងការធ្វើកិច្ចសហប្រតិបត្តិការផ្នែកព័ត៌មាន និងការផ្សព្វផ្សាយ និងការប្រឆាំងព័ត៌មានក្លែងក្លាយ ដើម្បីរួមគ្នាពង្រឹងគុណភាពសារព័ត៌មាននៅក្នុងតំបន់អាស៊ាន និងផ្ដល់ព័ត៌មានពិត ប្រកបដោយគុណភាព ព្រមទាំងលុបបំបាត់នូវព័ត៌មានក្លែងក្លាយ។ ក្នុងឱកាសនោះ លោក នេត ភក្ត្រា បានលើកឡើងថាក្នុងបរិបទនៃសង្គមឌីជីថល និន្នាការនៃការទទួលព័ត៌មានរបស់ប្រជាពលរដ្ឋបច្ចុប្បន្ន តាមរយៈប្រព័ន្ធផ្សព្វផ្សាយទំនើប រួមមានហ្វេសប៊ុក (Facebook) តិកតុក(Tiktok) ព្រមទាំងខ្លឹមសារសម្បូណ៌បែប និងមានល្បឿនលឿន បានធ្វើឱ្យមានបញ្ហានៃការបំពុលព័ត៌មានតាមរយៈការបង្កើតព័ត៌មានក្លែងក្លាយដែលមានចេតនាទុច្ចរិត ដែលធ្វើឱ្យប៉ះពាល់ដល់សង្គម ហើយពេលខ្លះបង្កើតជាបញ្ហាចលាចល និងបំផ្លាញកិត្តិយសបុគ្គល ឬធ្វើឱ្យមានការយល់ច្រឡំ និងបាត់បង់ជំនឿទុកចិត្តជាដើម។
ទន្ទឹមគ្នានេះ រដ្ឋមន្ត្រីក្រសួងព័ត៌មានកម្ពុជា និងរដ្ឋមន្ត្រីក្រសួងព័ត៌មានវៀតណាម បានចុះហត្ថលេខាលើអនុសារណៈយោគយល់គ្នា (MoU) ស្ដីពីកិច្ចសហប្រតិបត្តិការលើវិស័យព័ត៌មាន ដោយពង្រឹងកិច្ចសហប្រតិបត្តិការលើវិស័យសារព័ត៌មាន និងការផ្សព្វផ្សាយ។
ទោះជាយ៉ាងណា សង្គមស៊ីវិលយល់ឃើញថា វៀតណាមគឺជាប្រទេសកុម្មុយនិស្ត ដែលរឹតត្បិតសេរីភាពសារព័ត៌មានឯករាជ្យ មិនចាញ់រដ្ឋាភិបាលកម្ពុជាប៉ុន្មានឡើយ។
ប្រធានអង្គការសម្ព័ន្ធភាពការពារសិទ្ធិមនុស្សកម្ពុជា (CHRAC) លោក រស់ សុដ្ឋា បារម្ភថា ក្រសួងព័ត៌មានកម្ពុជា និងក្រសួងព័ត៌មានវៀតណាមប្រើប្រាស់កិច្ចសហការ ដើម្បីរួមគ្នាទប់ស្កាត់សំឡេងឯករាជ្យ ដែលតែងតែផ្សាយរិះគន់ពីការរំលោភសិទ្ធិមនុស្ស និងបំផ្លាញលទ្ធិប្រជាធិបតេយ្យរបស់រដ្ឋាភិបាល ជាជាងការប្រឆាំងព័ត៌មានក្លែងក្លាយ ដែលក្រសួងប្រទេសទាំងពីបានអះអាង។
លោក រស់ សុដ្ឋា៖ « វៀតណាមខ្លាច ខ្លាចប្រជាពលរដ្ឋកម្ពុជាក្រោមហ្នឹង ទទួលព័ត៌មានពាក់ព័ន្ធទៅនឹងសិទ្ធិមនុស្ស ប្រជាធិបតេយ្យ ចលនាលើកកម្ពស់សិទ្ធិជនជាតិដើម។ អាចនឹងពាក់ព័ន្ធបញ្ហាទាំងអស់ហ្នឹង មិនមែនជារឿងបារម្ភពីផលប្រយោជន៍ រឿងព័ត៌មានមិនពិតអ្វីទេ។ អាចថារឿងហ្នឹងធ្វើឱ្យកម្លាំងចលនាទាមទារសិទ្ធិជនជាតិដើមកាន់តែរួមតូច ចុះខ្សោយ អាចថាបារម្ភនឹងករណីនេះទៅវិញទេ » ។
កាលពីខែសីហា ប្រទេសវៀតណាម បានប្រើបច្ចេកវិទ្យាទំនើបរាំងខ្ទប់ការផ្សាយរបស់វិទ្យុអាស៊ីសេរីជាភាសាខ្មែរ លើវិទ្យុរលកធាតុអាកាសខ្លី (Shortwave) ដែលមិនអាចឱ្យពលរដ្ឋកម្ពុជាស្ដាប់ការផ្សាយរបស់វិទ្យុអាស៊ីសេរីតាមវិទ្យុរលកធាតុអាកាសខ្លីបានឡើយ។
របាយការណ៍សន្ទស្សន៍ប្រចាំឆ្នាំដែលរៀបចំដោយអង្គការឃ្លាំមើលប្រព័ន្ធផ្សព្វផ្សាយអ្នកសារព័ត៌មានគ្មានព្រំដែន (RSF) បង្ហាញថា វៀតណាមធ្លាក់ចំណាត់ថ្នាក់សេរីភាពសារព័ត៌មានពី១៧៤ មក ១៧៨ ក្នុងចំណោម ១៨០ប្រទេស ខណៈកម្ពុជាធ្លាក់ពី ១៤២ មក ១៤៧ ដែលជាចំណាត់ថ្នាក់ទាបមួយ។
សង្គមស៊ីវិលថា រដ្ឋាភិបាលកម្ពុជាគួរងាកទៅធ្វើកិច្ចសហប្រតិបត្តិការសារព័ត៌មាន និងប្រព័ន្ធផ្សព្វផ្សាយជាមួយប្រទេសដែលមានចំណាត់ថ្នាក់ខ្ពស់ជាងនេះ មិនមែនសហការជាមួយប្រទេសដែលមានពិន្ទុស្ទើរនៅបាតតារាង បែបនេះឡើយ៕