ក្រុមយុវជនសង្គមជាង១០០នាក់ធ្វើយុទ្ធនាការ រត់ដើម្បីលើកកម្ពស់សិទ្ធិស្ត្រី នៅតំបន់អង្គរ ដោយសារតែពួកគាត់មើលឃើញថា សិទ្ធិស្ត្រីនៅកម្ពុជាមិនទាន់ល្អនូវឡើយ ខណៈដែលសកម្មជនសង្គម អ្នកនយោបាយ និងអ្នកសារព័ត៌មានជាដើម តែងតែទទួលរងនូវការរំលោភបំពាន ដោយអំពើហិង្សា ពីសំណាក់អាជ្ញាធររដ្ឋ និងអ្នកមានលុយមានអំណាច។
ក្រុមយុវជនជាង ១រយនាក់(១២០នាក់) ដែលមកចូលរួមក្នុង«យុទ្ធនាការពណ៌ស្វាយ រត់ដើម្បីសិទ្ធិស្ត្រី» ក្នុងតំបន់អង្គរខេត្តសៀមរាបនេះ រំពឹងថា ស្ថាប័នរដ្ឋ និងរដ្ឋាភិបាលនឹងយកចិត្តទុកដាក់ខ្ពស់លើការគោរពស្ត្រី ហើយចូលរួមដោះស្រាយបញ្ហាការរំលោភបំពាន ដូចជាការកេងប្រវ័ញ្ចផ្លូវភេទ និងការធ្វើទុក្ខបុកម្នេញតាមរយៈរូបភាពផ្សេងៗមកលើស្ត្រី ដែលធ្វើឱ្យប៉ះពាល់កិត្តិយសស្ត្រី និងសិទ្ធិមនុស្សនៅកម្ពុជា។
អ្នករៀបចំកម្មវិធីយុទ្ធនាការពណ៌ស្វាយរត់ដើម្បីស្ត្រី និងជាប្រធានសកម្មវិធីនៃសមាគមបណ្ដាញយុវជនកម្ពុជា ហៅកាត់ថា CYN លោក ម៉ើ ចាន់ដារ៉ា ប្រាប់វិទ្យុអាស៊ីសេរី នៅថ្ងៃទី២៥ ខែមីនា ថា យុទ្ធនាការរត់ដើម្បីសិទ្ធិស្ត្រីនេះ គឺមានគោលបំណងដើម្បីពង្រឹងសមត្ថភាពយុវជន និងជំរុញឱ្យស្ត្រីមានភាពក្លាហានក្នុងការតស៊ូមតិ តាមរយៈការផ្សព្វផ្សាយពីសិទ្ធិស្ត្រី និងការចែករំលែកពីបញ្ហាប្រឈមនានា ដែលសកម្មជនសង្គមជាស្ត្រី ធ្លាប់បានជួបប្រទះកន្លងទៅ ហើយពុំមានការអើពើពីសំណាក់អាជ្ញាធរពាក់ព័ន្ធ។
លោកបន្តថា បច្ចុប្បន្ន ដ្បិតថារដ្ឋាភិបាលប្រកាសក្ដែងៗថា កម្ពុជាមានការគោរពសិទ្ធិស្ត្រី ដូចគ្នានឹងបុរសក៏ដោយ ក៏ប៉ុន្តែលោកថា ស្ត្រីនៅតែបន្តរងគ្រោះពីសំណាកអ្នកមានលុយមានអំណាច។ លោកបន្តថា ជាពិសេស ស្ត្រីដែលចូលរួមការងារសង្គមផ្សេងៗ ដូចជា នយោបាយ សកម្មជនបរិស្ថាន សកម្មជនដីធ្លី ក្រុមសហជីព និងអ្នកសារព័ត៌មានជាដើម។ លោកបញ្ជាក់ថា បញ្ហាទាំងនេះហើយ ដែលយុវជនទទូចឱ្យអាជ្ញាធរពាក់ព័ន្ធ គួរតែគិតពិចារណាឡើងវិញក្នុងការគោរពសិទ្ធិមនុស្ស ក៏ដូចជាសិទ្ធិស្ត្រី ឱ្យមានប្រសិទ្ធភាពខ្ពស់។
លោក ម៉ើ ចាន់ដារ៉ា៖ «ខ្ញុំមើលឃើញថា បញ្ហាស្ត្រីនៅតែជាបញ្ហាប្រឈមសម្រាប់ប្រទេសកម្ពុជារបស់យើង ដោយសារតែស្ត្រីភាគច្រើនគឺជាជនរង់គ្រោះ ហើយមិនសូវទទួលបានការពារដោយសិទ្ធិរបស់គាត់ទេ។ អ៊ីចឹងយុទ្ធនាការនេះនឹងចូលរួមផ្សព្វផ្សាយរបស់គាត់ចំនួន ១រយផ្សេងៗគ្នា និងដើម្បីឱ្យមានការចូលរួមគោរពសិទ្ធិស្ត្រីបន្ថែម ជាពិសេសចូលរួមផ្ដល់ឱកាសកិច្ចសហការ និងការលើកទឹកចិត្តឱ្យអនុវត្តសិទ្ធិស្ត្រីឱ្យបានពេញលេញ»។
យុទ្ធនាការពណ៌ស្វាយរត់ដើម្បីស្ត្រីនេះ បានធ្វើឡើងរយៈពេលជាង ៣ម៉ោងនៅព្រឹកថ្ងៃទី២៥ មីនា ដែលចាប់ផ្ដើមរត់ពីចំណុច សួនច្បារព្រះអង្គចេកព្រះអង្គចម ក្រុងសៀមរាប ឆ្ពោះទៅខ្លោងទ្វារ ទន្លេអុំ ជាប់នឹងប្រាសាទបាយ័ន។ អ្នកចូលរួមជាង ១រយនាក់ (១២០នាក់) ហើយស្ត្រី៩០ភាគរយ។ ពួកគាត់ពាក់អាវពណ៌សលាយស្វាយ ភ្ជាប់ដោយពាក្យស្លាក«យុទ្ធនាការពណ៌ស្វាយរត់ដើម្បីសិទ្ធិស្ត្រី»។ យុវជនដែលចូលរួមទាំងនោះមកពីតំបន់ផ្សេងៗគ្នា ដូចជាខេត្តសៀមរាប បន្ទាយមានជ័យ កំពង់ចាម និងរាជធានីភ្នំពេញ។
ស្រដៀងគ្នានេះ យុវតីម្នាក់ទៀតកញ្ញា ឌី រុចារ្យសុជិនី ដែលបានចូលរួមយុទ្ធនាការរត់ដើម្បីសិទ្ធិស្ត្រីដែរនោះ លើកឡើងថា យុទ្ធនាការនេះមានការចាប់អារម្មណ៍ចូលរួមច្រើនពីសំណាក់យុវជនដោយស្ម័គ្រចិត្ត។ កញ្ញាទទូចឱ្យរដ្ឋាភិបាល និងក្រសួងពាក់ព័ន្ធ ជាពិសេសក្រសួងកិច្ចការនារីគួរតែពង្រឹងវិធានការនានាក្នុងការលើកកម្ពស់ស្ត្រីឱ្យទទួលបានយុត្តិធម៌គ្រប់វិស័យ។ កញ្ញាមិនចង់ឃើញទង្វើរំលោភបំពាន់មកលើស្ត្រីពីសំណាកអ្នកមានលុយមានអំណាចតាមតែអំពើចិត្តបែបនេះទៀតនោះទេ ដែលធ្វើឱ្យស្ត្រីភាគច្រើនរងគ្រោះដោយអយុត្តិធម៌។
កញ្ញា ឌី រុចារ្យសុជិនី៖ «ជាពិសេសនៅក្នុងជួររដ្ឋាភិបាល ឬមុខតំណែងផ្សេងៗ ភាពជាស្ត្រីដែលគាត់ជាអ្នកដឹកនាំហ្នឹងគឺអត់ទាន់មានច្រើនទេ នៅមានតិចជាងបុរស នេះគឺជាអ្វីដែលយើងគួរតែជំរុញបន្ថែម»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង លើកឡើងថា ការធ្វើយុទ្ធនាការរត់ដើម្បីសិទ្ធិស្ត្រី របស់យុវជននេះគឺជាគំរូល្អមួយនៅសង្គម ខណៈដែលស្ថានការណ៍គោរពសិទ្ធិមនុស្ស ឬសិទ្ធិស្ត្រីនៅមិនទាន់ល្អនៅឡើយទេ។ លោកបន្តថា ជាពិសេសស្ត្រីដែលហ៊ានរិះគន់ភាពអសកម្មរបស់រដ្ឋាភិបាល ឬអ្នកមានលុយមានអំណាច គឺតែងតែទទួលរងការធ្វើទុក្ខបុកម្នេញជាបន្តបន្ទាប់។ លោកថា អាជ្ញាធរពាក់ព័ន្ធគួរតែពិចារណាឡើងវិញចំពោះការទាមទាររបស់យុវជនទាំងនោះ ដើម្បីធ្វើយ៉ាងណាឱ្យការគោរពសិទ្ធិស្ត្រីនៅកម្ពុជា បានល្អប្រសើរ។
លោក យង់ គិមអេង៖ «យើងនៅមានបញ្ហាដែលត្រូវកែលម្អឡើងវិញ ហើយនៅមានបញ្ហាដែលត្រូវធ្វើឱ្យឃើញអំពីយុត្តិធម៌ជាក់លាក់បន្ថែមទៀត ដល់សកម្មជនជាស្ត្រី ដែលទទួលរងនូវអំពើហិង្សា ក៏ដូចជាមានរូបភាពធ្វើទុក្ខបុកម្នេញមួយចំនួនទៅលើគាត់កន្លងមក»។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងកិច្ចការនារី អ្នកស្រី ស ស៊ីណែត និងអ្នកនាំពាក្យរដ្ឋាភិបាល លោក ផៃ ស៊ីផាន ដើម្បីអធិប្បាយជុំវិញរឿងនេះបានទេ នៅថ្ងៃទី២៥ ខែមីនា ដោយហៅទូរស័ព្ទចូលតែពុំមានអ្នកទទួល។
អ្នកវិភាគ និងប្រជាពលរដ្ឋមើលឃើញថា រដ្ឋាភិបាលលោក ហ៊ុន សែន តែងតែថ្លែងថា កម្ពុជាបច្ចុប្បន្ន ក្រោមការដឹកនាំរបស់លោក ជិត៤០ឆ្នាំ ថា មានការគោរពសិទ្ធិស្ត្រីបានល្អប្រសើរ ដូចគ្នានឹងបុរសក៏ដោយ តែជាក់ស្ដែងក្រុមកម្មករសហជីព ពលរដ្ឋមានជម្លោះដីធ្លី សកម្មជនបរិស្ថាន និងសកម្មជនបក្សប្រឆាំងជាដើម នៅតែបន្តរងការធ្វើទុក្ខបុកម្នេញពីអាជ្ញាធររបបក្រុងភ្នំពេញ តាមរយៈការប្រមាថ ប្រើអំពើហិង្សា និងចាប់ពួកគាត់ដាក់ពន្ធនាគារ។ ដូចជាក្រុមកម្មករសហជីពណាហ្គាវើល៍ ដែលតែងតែសកម្មទាមទារដោះស្រាយវិវាទការងារ ក្រុមស្ត្រីថ្ងៃសុក្រទាមទារឱ្យដោះលែងអ្នកទោសនយោបាយ និងសកម្មជនបរិស្ថានចលនាមាតាធម្មជាតិ សុទ្ធសឹងតែធ្លាប់ត្រូវបានអាជ្ញាធរឯកបក្សគំរាម ប្រើអំពើហិង្សា និងចាប់ដាក់ពន្ធនាការ។ កាលពីថ្មីៗ អ្នកសារព័ត៌មានជាស្ត្រីម្នាក់នៅវិទ្យុវីអូឌី (VOD) ក៏ទទួលរងការប្រមាថមើលងើយ ប៉ុន្តែ ពុំមានក្រសួងណាមួយចេញមុខមកជួយអន្តរាគមន៍រកយុត្តិធម៌ជូននោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។