កូដករនៅ​ក្រុមហ៊ុន​ណាហ្គាវើលដ៍ ប្រតិកម្ម​ការ​បំភ្លឺ​របស់​ក្រសួង​ការងារ​ ថា​ជា​ការ​ដោះសារ និង​បំភ្លៃ​ការពិត

ដោយ ជី វិតា
2022.10.03
Share on WhatsApp
Share on WhatsApp
កូដករនៅ​ក្រុមហ៊ុន​ណាហ្គាវើលដ៍ ប្រតិកម្ម​ការ​បំភ្លឺ​របស់​ក្រសួង​ការងារ​ ថា​ជា​ការ​ដោះសារ និង​បំភ្លៃ​ការពិត ការប៉ះទង្គិចគ្នារវាងក្រុមកូដករណាហ្គាវើលដ៍ជាមួយអាជ្ញាធរក្រុងភ្នំពេញនៅក្បែស្ពានអាកាសតិចណូកាលពីថ្ងៃអាទិត្យ ទី១១ ខែកញ្ញា ឆ្នាំ២០២២។
រូប៖ ពលរដ្ឋ​ផ្ដល់​ឲ្យ

ក្រុម​កូដករ​ណាហ្គាវើលដ៍ ​រិះគន់​ចំពោះ​ការ​បំភ្លឺ​របស់​​​ក្រសួងការងារ​ ​ពាក់ព័ន្ធ​នឹង​វិវាទ​ការងារ​ ​ថា​គ្មាន​ទទួលខុសត្រូវ​ ​ដោះសា​រយ​ក​រួចខ្លួន​ ​និង​ជា​ការ​គាំទ្រ​ក្រុមហ៊ុន​ខុសច្បាប់​ដែល​រំលោភ​សិទ្ធិ​កម្មករ​ខ្មែរ។ ការ​ប្រតិកម្ម​នេះ​កើតមាន​បន្ទាប់ពី​ក្រសួងការងារ​បាន​ចេញ​លិខិត​ចំហ​មួយ​ដាក់​បន្ទុក​ទៅលើ​ក្រុម​កូដករ​ថា​ធ្វើការ​តវ៉ា​ខុសច្បាប់​ក្នុង​អំឡុង​ពេល​ក្រសួង​កំពុង​ធ្វើការ​ ​បណ្ដាល​ឱ្យ​ការ​ដោះស្រាយ​វិវាទ​គ្មាន​លទ្ធផល។ ​មន្ត្រី​សហ​ព័ន្ធ​សហជីព​ថា​ ​ការ​បំភ្លឺ​របស់​​​ក្រសួង​មាន​ភាព​លម្អៀង​ទៅ​ខាង​ក្រុមហ៊ុន​បរទេស​ ​និង​គ្មាន​ឆន្ទៈ​រក​ដំណោះស្រាយ​ពិតប្រាកដ​ឱ្យ​កម្មករ​​និយោជិក​នោះ​ឡើយ។

បើ​ទោះបី​ឆ្លងកាត់​ការ​ ​សម្របសម្រួល​វិវាទ​ការងារ​រវាង​ក្រុម​កូដករ​ ​និង​ភាគី​ក្រុមហ៊ុន​ណា​ហ្គាវើលដ៍​ជាច្រើន​ដង​ទៅ​ហើយ​ក្ដី​ ​ក៏​បញ្ហា​ដ៏​រ៉ាំ​រៃ​មួយ​នេះ​នៅ​មិនទាន់​ឃើញ​មាន​ដំណោះស្រាយ​សមស្រប​ណាមួយ​សម្រាប់​កូដករ​ ​ដែល​បន្ត​ការ​តវ៉ា​ ​ជាង​១រយនាក់​នេះ​នៅឡើយ។ ប៉ុន្តែ​ក្រសួងការងារ​បែរជា​ព្យាយាម​ចោទប្រកាន់​ ​និង​ដា​ក​បន្ទុក​ ​ទៅ​ឱ្យ​ក្រុម​កូដករ​តាមរយៈ​លិខិត​បំភ្លឺ​របស់​ខ្លួន​ជំនួស​ឱ្យ​ការ​ដោះស្រាយ​ទៅវិញ។

កូដករ​ណាហ្គាវើលដ៍​ម្នាក់​គឺ​កញ្ញា​ ​ម៉ៅ សុធានិន​ ​ប្រាប់​វិទ្យុ​អាស៊ី​សេរី​នៅ​ថ្ងៃទី៣​ ​តុលា​ ​ថា​ ​សេចក្ដី​បំភ្លឺ​របស់​​​ក្រសួងការងារ​នេះ​ ​មាន​ភាព​លម្អៀង​ ​និង​ដើម្បី​ការពារ​មុខមាត់​របស់​​​ក្រសួង​មួយ​នេះ​តែ​ប៉ុណ្ណោះ។កញ្ញា​ថា​ ​ក្រុមហ៊ុន​ធ្វើ​បែប​នេះ​ដោយសារ​គេ​មានបំណង​លុបបំបាត់​សហជីព​ ​ដោយ​ប្រើ​វិធី​បញ្ឈប់​បុគ្គលិក​ណា​ដែល​ជាប់​ពាក់ព័ន្ធ​ ​ឬ​មានការ​ការពារ​ពី​សហជីព។ ទោះ​ជា​បែប​នេះ​ក្ដី​ ​ក្រសួងការងារ​ហាក់​មិន​អើពើ​ ​ស៊ើប​អង្កេត​ ​និង​ដោះស្រាយបញ្ហា​ទៅតាម​ផ្លូវច្បាប់​នោះ​ឡើយ​ ​បែរជា​ម​កលាប​ពណ៌​ ​ដោយ​ចោទប្រកាន់​ថា​ ​ក្រុម​កូដករ​ថា​នាំគ្នា​ធ្វើ​កូដកម្ម​ដោយ​ខុសច្បាប់​ទៅវិញ។ កញ្ញា​លើកឡើង​ថា​ ​លិខិត​បំភ្លឺ​នេះ​កំពុង​បង្ហាញ​ថា​ក្រសួងការងារ​អសមត្ថភាព​ធ្វើការ​ ​និង​ព្យាយាម​ដោះសា​រយ​ក​រួចខ្លួន​ ​ថែមទាំង​បាន​បំភ្លៃ​ខុស​ការពិត​ទាំងស្រុង៖ «ស្នើសុំ​ឱ្យ​ក្រសួងការងារ​ប្រើ​ចំណេះ​ដឹងខ្លួន​ឯង​ដែល​បាន​រៀន​មក​ពីក្រៅ​ស្រុក​ឬ​ថ្នាក់បណ្ឌិត​អី​លើសលប់​ហ្នឹង​ ​មក​បញ្ចេញ​សមត្ថភាព​ដោះស្រាយ​រឿង​វិវាទ​ការងារ​តូច​មួយ​ហ្នឹង​ឱ្យ​ចេញទៅ​កុំ​ឱ្យ​អូស​បន្លាយ​អ៊ីចឹង។ បើសិនជា​មិន​អាច​​​រក​យុត្តិធម៌​ឱ្យ​កម្មករ​ខ្មែរ​បានទេ​សួរ​ថា​បង្កើត​ក្រសួង​មក​ធ្វើ​អី?បង្កើត​មក​នាំ​តែ​ខាត​ធនធាន​រដ្ឋ​ហ្នឹង»

ប្រតិកម្ម​នេះ​ធ្វើឡើង​ ​ក្រោយ​ពី​ក្រសួងការងារ​ចេញ​លិខិត​បំភ្លឺ​នៅ​ថ្ងៃទី១ តុលា​ ​ថា​ ​ការ​ជាប់​គាំង​កន្លងមក​រវាង​ភាគី​ក្រុម​កូដករ​និង​ភាគី​ក្រុមហ៊ុន​ ​មិនមែន​ជា​ការ​ព្រងើយកន្តើយ​របស់​​​ក្រសួងការងារ​នោះ​ឡើយ។ ក្រសួង​បន្ត​ថា​ ​ក្រុម​ការងារ​ដោះស្រាយ​វិវាទ​បាន​ព្យាយាម​រក​ដំណោះស្រាយ​ ​ទៅតាម​តួនាទី​ដែល​កំណត់ដោយច្បាប់​ ​និង​ការ​ទាមទារ​របស់​ភាគី​ទាំងពីរ​ ​ប៉ុន្តែ​មានការ​ជាប់​គាំង​ដោយសារ​តែ​គូភាគី​វិវាទ​មិន​មាន​ឆន្ទៈ​ក្នុង​ការ​ដោះស្រាយ​ទៅតាម​នីតិវិធី។ យ៉ាងណា​ក្រសួង​មួយ​នេះ​ ​ហាក់​ចង់​បង្ហាញ​ថា​បញ្ហា​ចម្បង​ដែល​បណ្ដាល​ឱ្យ​មានការ​ជាប់​គាំង​ ​គឺ​បណ្ដាលមកពី​ការ​ធ្វើ​កូដកម្ម​របស់​អតីត​បុគ្គលិក​ដែល​ត្រូវ​បាន​ក្រុមហ៊ុន​បញ្ឈប់។

ទាក់ទិន​បញ្ហា​នេះ​ ​វិទ្យុ​អាស៊ី​សេរី​នៅ​ពុំទាន់​អាច​ទាក់ទង​អ្នកនាំពាក្យ​ក្រសួងការងារ​លោក​ ​ហេង​ ​សួរ​ ​និង​ប្រធាន​អ្នកនាំពាក្យ​រដ្ឋាភិបាល​លោក​ ​ផៃ​ ​ស៊ី​ផា​ន​ ​ដើម្បី​សើ​ការ​បំភ្លឺ​បាន​ឡើយ​ ​នៅ​ថ្ងៃ​ទី​៣​ ​ខែតុលា​។​

វិវាទ​ការងារ​រវាង​អតីត​បុគ្គលិក​ណា​ហ្គាវើ​ល​ដ៍ ​ជាមួយ​ថៅកែ​បរទេស​មួយ​នេះ​ ​បាន​អូស​បន្លាយ​ជិត១ឆ្នាំ​មក​ហើយ​ ​ព្រោះ​ក្រុមហ៊ុន​បនល្បែង​មួយ​នេះ​ ​មិនព្រម​ទទួលយក​អតីត​បុគ្គលិក​ជាង​១រយនាក់​ (១២៩នាក់) ឱ្យ​ចូល​ធ្វើការ​វិញ​ឡើយ​ ​ដោយសារ​អតីត​បុគ្គលិក​ទាំងនោះ​ ​មាន​រចនា​សម្ព័ន្ធ ​ដែល​ទទួល​បានការ​ការពារ​សិទ្ធិ​ការងារ​ពី​សហជីព។ ក្រុមហ៊ុន​ធ្លាប់​បកស្រាយ​ថា​ ​ការបញ្ឈប់​បុគ្គលិក​នេះ​ ​ដោយសារ​វិបត្តិ​ជម្ងឺ​កូវីដ១៩ បណ្ដាល​ឱ្យ​ចំណូល​ក្រុមហ៊ុន​ធ្លាក់​ចុះ។ ទោះ​ជា​យ៉ាងនេះ​ក្ដី​ ​ការ​បកស្រាយ​នេះ​ត្រូវ​បាន​សង្គម​ស៊ីវិល​ ​មើល​ឃើញ​ថា​ ​ជា​ការ​គុ​ហក់​ទាំង​បំពាន​ ​ព្រោះ​ ​ក្រុមហ៊ុន​មួយ​នេះ​បាន​កាស​ជ្រើសរើស​បុគ្គលិក​ថ្មី​ចូល​ធ្វើការ​ន្ថែ​ម​ទៅវិញ​។​ ​ទន្ទឹមគ្នា​នេះ​ ​សង្គម​ស៊ីវិល​មើលឃើញ​ថា​ ​បុគ្គលិក​ដែល​ចូល​ធ្វើការ​ថ្មី​នេះ​ ​នឹង​ប្រឈម​ពី​ការរំលោភ​សិទ្ធិ​ការងារ​ ​ព្រោះ​បុគ្គលិក​ទាំងនោះ​ ​មានតែ​កិច្ចសន្យា​ការងារ​រយះ​ពេល​ខ្លី​ ​និង​មិន​មាន​សហជីព​នៅ​ការពារ​ដល់​ពួកគេ​ឡើយ។

ជុំវិញ​រឿង​នេះ​ ​ប្រធាន​សហព័ន្ធសហជីពកម្ពុជា​ ​អ្នកស្រី​ ​យ៉ាង សុភ័ណ្ឌ ​យល់ឃើញ​ថា​ ​ក្រុមហ៊ុន​មានបំណង​កម្ទេច​ក្រុម​សហជីព​ ​ដោយមាន​ការចូលរួម​ពី​ក្រសួងការងារ​ដោយប្រយោល។ អ្នកស្រី​បន្ត​ថា​ ​ក្នុងនាម​ជា​ស្ថាប័នរដ្ឋ​បម្រើ​ប្រជារាស្ត្រ​ ​ក្រសួងការងារ​មាន​តួនាទី​ដោះស្រាយបញ្ហា​ផ្សេងៗ​ដែល​កម្មករ​ខ្មែរ​ជួបប្រទះ​ ​ជាពិសេស​នៅ​ពេល​ពួកគេ​រង​ការរំលោភ​សិទ្ធិ​ពី​ថៅកែ​បរទេស។ ប៉ុន្តែ​អ្នកស្រី​សង្កេតឃើញ​ថា​ ​ក្រសួង​មួយ​នេះ​បែរជា​មិន​អើពើ​ ​និង​ព្យាយាម​គេច​វេ​ស​ ​មាន​ចេតនា​មិន​ដោះស្រាយបញ្ហា​នោះ​ឡើយ៖ «សួរ​ថា​ភាគី​ (ក្រុមហ៊ុន) ​មាន​ចេតនា​អី​ ​ឬក៏​ក្រសួងការងារ​អត់​បាន​ដឹងរឿង​ហ្នឹង​ទេ​ ​ឬក៏​ដឹង​ហើយ​ធ្វើ​ព្រងើយកន្តើយ​ ​ឬ​គេងលក់

កាលពី​ខែ​មេសា​ ​ឆ្នាំ២០២១​ក្រុមហ៊ុន​ណាហ្គាវើលដ៍ ​បាន​ប្រកាស​កាត់បន្ថយ​បុគ្គលិក​ក្នុង១២ផ្នែក​ដែល​មាន​ចំនួន១ពាន់៣រយ២៩នាក់​ ​ក្រោម​ហេតុផល​មាន​បញ្ហា​ហិរញ្ញវត្ថុ​បណ្ដាលមកពី​វិបត្តិ​ជំងឺកូវីដ-១៩។ ជាង១ពាន់នាក់​នៃ​បុគ្គលិក​ដែល​ក្រុមហ៊ុន​បញ្ឈប់​ ​សុទ្ធ​សឹង​ជា​សមាជិក​ ​សកម្មជន​ ​បេសកជន​ ​និង​ប្រធាន​សហជីព។ អស់​រយៈពេល​ជាង១ឆ្នាំមកនេះ​ ​អតីត​បុគ្គលិក​ក្រុមហ៊ុន​ណាហ្គាវើលដ៍​មិនទាន់​ទទួល​បាន​ដំណោះស្រាយ​ពិតប្រាកដ​ណាមួយ​នោះ​ឡើយ​ ​បើ​ទោះបី​មានការ​ធ្វើ​កូដកម្ម​ ​និង​ការ​ដាក់ពាក្យបណ្ដឹង​តាម​ផ្លូវច្បាប់។

លើស​ពី​នេះ​ក្រុម​កូដករ​បាន​រង​ការចោទប្រកាន់​ក្នុង​ក្រមព្រហ្មទណ្ឌ​ ​រង​ការប្រើប្រាស់​អំពើ​ហិង្សា​ពីសំណាក់​ក្រុម​សន្តិសុខ​ ​និង​អាជ្ញាធរ​របប​ក្រុងភ្នំពេញ​យ៉ាង​អាណោច​អា​ធ​ម​ ​រហូតដល់​ថ្នាក់​មាន​អ្នក​រង​របួស​ ​សន្លប់​ធ្ងន់ធ្ងរ​ ​និង​ស្ត្រី​ម្នាក់​បាន​រលូតកូន។​ ​អំពើ​បែប​នេះ​មិន​ត្រូវ​បាន​រដ្ឋាភិបាល​ចាត់ការ​ដោះស្រាយ​តាម​ផ្លូវច្បាប់​នោះ​ឡើយ​ ​ផ្ទុយទៅវិញ​អាជ្ញាធរ​តែង​គេ​ចាត់​ទុក​ការ​តវ៉ា​ដើម្បី​ទាមទារ​យុត្តិធម៌​ ​និង​ការ​គោរព​សិទ្ធិ​ការងារ​ជា​រឿង​ខុសច្បាប់៕​

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ប្ដី​ស្ត្រី​រងគ្រោះ​ដោយ​គ្រូ​ពេទ្យវះកាត់​ដាច់​ពោះវៀន​សម្រេច​ប្ដឹង​មន្ទីរ​សំរាក​ព្យាបាល​បង្ក​បញ្ហា​នោះ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។