កូដករ​ណាហ្គាវើលដ៍​មិន​សុខចិត្ត​លើ​ទង្វើ​មន្ត្រី​ប៉ូលិស​ទះកំផ្លៀង និង​រុញ​ស្ត្រី​មាន​ផ្ទៃពោះ​ឲ្យ​មាន​របួស

ដោយ ជាតិ ចំណាន
2022.05.21
Share on WhatsApp
Share on WhatsApp
កូដករ​ណាហ្គាវើលដ៍​មិន​សុខចិត្ត​លើ​ទង្វើ​មន្ត្រី​ប៉ូលិស​ទះកំផ្លៀង និង​រុញ​ស្ត្រី​មាន​ផ្ទៃពោះ​ឲ្យ​មាន​របួស អាជ្ញាធរ​ទាត់​ធាក់​កូដករ​នៅ​មុខ​ក្រុមហ៊ុន​កាស៊ីណូ​ណាហ្គាវើលដ៍ (Naga World) កាល​ពី​ថ្ងៃ​ទី២០ ខែ​ឧសភា ឆ្នាំ​២០២២។
រូប៖​ ពលរដ្ឋផ្ដល់​ឱ្យ

កូដករ​ណាហ្គាវើលដ៍ (Naga World) កើតទុក្ខ​មិន​សុខចិត្ត​ចំពោះ​ទង្វើ​របស់​មន្ត្រី​ប៉ូលិស ដែល​បាន​ទះកំផ្លៀង និង​រុញ​ស្ត្រី​មាន​ផ្ទៃពោះ​ឲ្យ​មាន​របួស ខណៈ​ពួកគាត់​តវ៉ា​ទាមទារ​ឲ្យ​ក្រុមហ៊ុន​បន​ល្បែង​ណាហ្គាវើលដ៍ ឲ្យ​ទទួល​ពួកគាត់​ចូល​ធ្វើ​ការ​វិញ​។​ក្រុម​កូដ​ករ និង​អង្គការក្រៅរដ្ឋាភិបាល ថ្កោលទោស​ចំពោះ​ទង្វើ​របស់​មន្ត្រី​ប៉ូលិស ដែល​បាន​ទះកំផ្លៀង និង​រុញច្រាន​ស្ត្រី​មាន​ផ្ទៃពោះ​រហូតដល់​មាន​របួស​ស្នាម ហើយ​រត់គេច​ខ្លួន ថា ជា​ទង្វើ​អមនុស្សធម៌ និង​ស្នើសុំ​ឲ្យ​មាន​វិធានការ​ផ្លូវច្បាប់​ចំពោះ​មន្ត្រី​ទាំងនោះ។

មន្ត្រី​សង្គម​ស៊ីវិល និង​ក្រុម​ស្ត្រី​កូដ​ករ មិន​ពេញចិត្ត ចំពោះ​អាជ្ញាធរ​ប្រើ​ហិង្សា​ទៅលើ​ក្រុម​ស្ត្រី​ទន់ខ្សោយ​ដែល​ចេញ​មក​ធ្វើ​កូដកម្ម និង​ស្នើ​ដល់​បុរសៗ​ជា​មន្ត្រី​នគរបាល​កង​ប្រដាប់​អាវុធ​គ្រប់​ប្រភេទ កុំ​ប្រើ​កំហឹង​ដោយ​កម្រោល​មក​លើ​មនុស្ស​ស្រី។ សង្គម​ស៊ីវិល​ស្នើ​ដល់​រាជរដ្ឋាភិបាល គួរតែ​អប់រំ​សីលធម៌​វិជ្ជាជីវៈ​ដល់​មន្ត្រី​ប៉ូលិស​ថ្នាក់ក្រោម​បន្ថែម​ទៀត ដើម្បី​ឲ្យ​មានការ​យល់ដឹង​ខ្ពស់​ទាក់ទង​នឹង​តួនាទី​របស់​ខ្លួន​ដែល​ជា​អ្នកមើល​សុខទុក្ខ​ប្រជាពលរដ្ឋ មិនមែន​មក​ធ្វើបាប​ពលរដ្ឋ​ដូច្នេះ​ទេ។

កូដករ​ណាហ្គាវើលដ៍ កញ្ញា រឿន មុំម៉ារីណែត ដែល​ត្រូវ​អាជ្ញាធរ​បាន​ទះកំផ្លៀង​ទាំង​កម្រោល​កាលពី​រសៀល​ថ្ងៃទី​១៩ ឧសភា ប្រាប់​វិទ្យុ​អាស៊ីសេរី​នៅ​ថ្ងៃទី​២០ ខែ​ឧសភា ថា កញ្ញា​ពិតជា​មិន​សុខចិត្ត​ជាដាច់ខាត ចំពោះ​មន្ត្រី​ប៉ូលិស​ដែល​បាន​ជះ​កំហឹង​ទៅលើ​កញ្ញា ទាំង​ខ្វះ​ក្រមសីលធម៌​ជា​មន្ត្រីរាជការ​។ កញ្ញា​បន្ត​ថា ក្រុម​បុគ្គលិក​ណាហ្គាវើលដ៍ មក​ធ្វើ​កូដកម្ម ស្រប​តាម​ច្បាប់​របស់​ប្រទេស ដូច្នេះ គួរតែ​អាជ្ញាធរ​មក​ការពារ​ទើប​ត្រឹមត្រូវ មិនមែន​មក​ប្រើ​ហិង្សា​រុញច្រាន​ប្រមូល​កូដ​ករ​ដាក់​រថយន្តក្រុង​ដូច្នេះ​ទេ​៖ «វា(ដៃ) អត់​ហើម​ទេ ប៉ុន្តែ​វា​ដូច​នៅ​ជាប់​សរសៃ​ម៉េច​មិនដឹង​ទេ។ (​ដៃ​ខ្ញុំ​) អាម៉ាចំហៀង​ខាងឆ្វេង​សរសៃ​ឆ្នូត​ដូច​យើង​កោស​តាក​អ៊ីចឹង​ម៉ា​ឆ្នូត​ហ្នឹង​មក​អ៊ីចឹង​ណា។ ចាស​!​ខ្ញុំ​ត្រូវតែ​ដាក់​ពាក្យ​បណ្ដឹង​ទៅលើ​រឿង​ទាំងអស់​ហ្នឹងហើយ ព្រោះថា ការប្រើ​អំពើ​ហិង្សា​ដែល​សមត្ថកិច្ច​ប្រើ​មក​លើ​រូប​ខ្ញុំ​ហ្នឹង​មិនមែន​ជា​លើកទីមួយ​ទេ គឺ​ច្រើនដង​ហើយ ហើយ​ចំណែកឯ​អធិការរង​លោក ជន់ ប៊ុណ្ណា ក៏​គាត់​ជា​អ្នក​ប្រើ​អំពើ​ហិង្សា​មក​លើ​ខ្ញុំ​ដែរ ។ ហើយ​ថ្ងៃ​ដែល​កើតហេតុ​កាលពី​ម្សិលមិញ​ហ្នឹង គឺ​សុខៗ​ស្រាប់តែ​ដើរមក​វៃ​ខ្ញុំ​មិនដឹង​ពី​មូលហេតុ​។ អ៊ីចឹង​ខ្ញុំ​អត់​អាច​នៅ​ស្ងៀម​បាន​ទេ ចំពោះ​រឿង​ហ្នឹង»

កញ្ញា រឿន មុំម៉ារីណែត ត្រូវ​សមត្ថកិច្ច​ជា​បុរស​ម្នាក់​ទះកំផ្លៀង​មួយ​ដៃ​ក្នុង​ពេល​រុញច្រាន​កញ្ញា​ឡើងលើ​ឡានក្រុង។ ពេល​បង្ក​ហិង្សា​រួច​សមត្ថកិច្ច​រូប​នោះ បាន​រត់​ចេញពី​កន្លែង​កើត​ហេតុ ហើយ​សមត្ថកិច្ច​ផ្សេងទៀត បាន​ព្យាយាម​រារាំង​មិន​ឲ្យ​ក្រុម​កូដករ​ដេញ​តាម​ជន​ដៃដល់​ឡើយ។

កូដករ​ណាហ្គាវើលដ៍​ម្នាក់ទៀត ដែល​ត្រូវ​បាន​អាជ្ញាធរ​រុញច្រាន​ធ្វើ​ឲ្យ​ប៉ះពាល់​ដល់​ផ្ទៃពោះ​ធ្លាក់​ឈាម លោកស្រី សុខ រតនា លើកឡើង​ថា ក្រោយ​កើតហេតុ លោកស្រី​បាន​ទៅ​ពេទ្យ​ពិនិត្យ​ម្ដង​ហើយ​ពេទ្យ​ថា ទារក​មាន​សុខភាព​ខ្សោយ។ លោកស្រី​បញ្ជាក់​ថា លោកស្រី​ដាច់ខាត​មិន​សុខចិត្ត​ចំពោះ​ទង្វើ​របស់​អាជ្ញាធរ​នោះ​ទេ ហើយ​គាត់​នឹង​ដាក់​ពាក្យ​ប្ដឹង​នៅពេល​ឆាប់ៗ​នេះ ព្រោះ​ពេល​នេះ​លោកស្រី​ពុំ​ទាន់​មាន​កម្លាំងកំហែង​នៅឡើយ​ទេ។ លោកស្រី​ទទូច​ដល់​មន្ត្រី​នគរបាល​មេត្តា​កុំ​រារាំង​ក្រុម​កូដករ​ទៀត ទុក​ឲ្យ​ក្រុមហ៊ុន​ដោះស្រាយ​ជាមួយ​បុគ្គលិក​ទៅ អាជ្ញាធរ​គួរតែ​អាណិត​រាស្ត្រ​ទន់ខ្សោយ​ផង​៖ «ស្ត្រី​ទាមទារ​ដើម្បី​ឲ្យ​ក្រុមហ៊ុន​មួយ​គោរព​សិទ្ធិ​ការងារ ហើយ​ទាមទារ​ដើម្បី​សិទ្ធិ​ការងារ​ខ្លួនឯង​ផ្ទាល់​នេះ ក៏​ត្រូវ​អាជ្ញាធរ​មក​ធ្វើអំពើ​ហិង្សា​វៃ​ដំ​ច្រំ​ធាក់​បោច​សក់​អី​គ្រប់សព្វ​បែបយ៉ាង​។ បើ​ជើង​វិញ​បង​អើយ​! ស្នាម​ជាំ​ពេញ​ជើង​អស់ហើយ​មួយៗ ហ្នឹងហើយ​ការ​តស៊ូ​មតិ​ដែល​ឲ្យ​ក្រុមហ៊ុន​មួយ​ហ្នឹង​ចេះ​គោរព​ច្បាប់​ស្រុក​ខ្មែរ ព្រោះ​គាត់​មក​គាត់​អត់​បាន​ស្ពាយ​ច្បាប់​ពី​ស្រុក​គាត់​អាច​មក​អនុវត្ត​ទេ គាត់​ត្រូវ​អនុវត្ត​តាមច្បាប់​ស្រុក​ខ្មែរ​យើង ព្រោះ​គាត់​មក​បោះ​សសរ​រកស៊ី​នៅ​ស្រុក​យើង​។ អ៊ីចឹង​គាត់​ត្រូវ​គោរព​ច្បាប់​ស្រុក​យើង»

វិទ្យុ​អាស៊ីសេរី មិនអាច​ទាក់ទង​អ្នកនាំពាក្យ​មន្ត្រី​អគ្គស្នងការដ្ឋាន​នគរបាល​ក្រុង​ភ្នំពេញ លោក សាន សុខសីហា ដើម្បី​អត្ថាធិប្បាយ​ជុំវិញ​បញ្ហា​នេះ បាន​ទេ​នៅ​រសៀល​ថ្ងៃទី​២០ ឧសភា ដោយ ទូរស័ព្ទ​ហៅ​ចូល​ពុំ​មាន​អ្នក​ទទួល។

ការប្រើ​អំពើ​ហិង្សា​ទាំង​ឥត​អៀនខ្មាស​របស់​អាជ្ញាធរ​ក្រុងភ្នំពេញ ទៅលើ​ស្ត្រី​កូដករ​ណាហ្គាវើលដ៍​នេះ មន្ត្រី​ជាន់ខ្ពស់​គណបក្ស​ប្រជាធិបតេយ្យ​មូលដ្ឋាន និង​ជា​អតីត​សមាជិក​ក្រុមប្រឹក្សាភិបាល​នៃ​មជ្ឈមណ្ឌល​សិទ្ធិមនុស្ស​កម្ពុជា (CCHR) អ្នកស្រី ប្រុក វ៉ាន្នី យល់ឃើញ​ថា ទង្វើ​របស់​មន្ត្រី​ប៉ូលិស​រូប​នោះ អាច​ធ្វើ​ឲ្យ​ខូច​កិត្យានុភាព​មន្ត្រី​ល្អៗ​នៅក្នុង​ជួរ​រាជរដ្ឋាភិបាល ដូច​ពាក្យស្លោក​ថា​ត្រី​មួយ​ស្អុយ ត្រី​មួយ​កន្ត្រក​ស្អុយ​ដែរ។ អ្នកស្រី​បញ្ជាក់​បន្ថែម​ថា សង្គម​ខ្មែរ ជា​សង្គម​មួយ​ដែល​មាន​សីលធម៌ សុជីវធម៌​ខ្ពង់ខ្ពស់ ពុំគួរ​ណា​មាន​មនុស្ស​មួយ​ក្រុម មក​ធ្វើ​ឲ្យ​កករ​ល្អក់​សង្គម​ខ្មែរ​ទាំងមូល​នោះ​ទេ ដូច្នេះ​រាជរដ្ឋាភិបាល​ត្រូវតែ​ចាត់វិធានការ​យ៉ាងណា​ឲ្យ​បាន​តឹងរ៉ឹង និង​ផ្ដន្ទាទោស​ដល់​មន្ត្រី​ណា​ដែល​ប្រើ​ហិង្សា​មក​លើ​ពលរដ្ឋ​ស្លូតត្រង់ ដើម្បី​ឲ្យ​ប្រទេសជាតិ​មាន​ភាព​ថ្លៃថ្នូរ សក្ដិ​សមជា​ប្រទេស​ដែល​ធ្លាប់​មាន​អារ្យធម៌​រុងរឿង​៖ «កើត​មក​ជា​ខ្មែរ​ពិតជា​មាន​សំណាង​ហើយ ប៉ុន្តែ​កុំ​នាំគ្នា​ធ្វើខ្លួន​ជា​ខ្មែរ ដែល​ទៅជា​ខ្មែរ​អសីលធម៌ កុំ​ធ្វើខ្លួន​ជា​ខ្មែរ​ដែល​មាន​ហិង្សា​។ គួរតែ​រៀនសូត្រ​អំពី​វប្បធម៌ អារ្យធម៌​ខ្មែរ ដែល​ល្អ។ ហើយ​ខ្ញុំ​ជឿជាក់​ទៀត​ថា ស្ថាប័ន​របស់​រាជរដ្ឋាភិបាល​ហ្នឹង​ក៏​មិនមែន​អប់រំ​មនុស្ស​ឲ្យ​ទៅជា​អាក្រក់​ដែរ​។ ប៉ុន្តែ​វា​ដោយសារ​មនុស្ស​មួយចំនួន​ហ្នឹង គាត់​មាន​សន្តាន​អ៊ីចឹង អាច​ជួនកាល​ថា សន្តាន​មកពី​កំណើត ឬក៏​អាច​ថា​សន្តាន​ដោយ​ក្រុម​ក៏​អាច​ដែរ​ណា​លោក​ណា៎»

នៅ​រសៀល​ថ្ងៃទី​២០ ខែ​ឧសភា​ដដែល ក្រុម​កូដករ​ជា​បុគ្គលិក​ក្រុមហ៊ុន​បន​ល្បែង​ណា​ហ្កាវើលដ៍​ជាង​១​រយ (១១៨)​នាក់​នៅតែ​ចេញ​តវ៉ា​ទាមទារ​ឲ្យ​ក្រុមហ៊ុន​ផ្តល់​ដំណោះស្រាយ​សមរម្យ​ដល់​ពួកគាត់ ប៉ុន្តែ​ត្រូវ​បាន​អាជ្ញាធរ​រាប់​សិប​នាក់ បន្ត​រារាំង និង​រុញច្រាន​ទាត់​ធាក់​ដោយ​ហិង្សា​លើ​ពួកគាត់​ដូច​សព្វមួយ​ដង​។ មក​ទល់​ពេល​នេះ អាជ្ញាធរ​មិន​ត្រឹមតែ​មិន​ជួយ​ដោះស្រាយ​វិវាទ​ការងារ​នោះ​ទេ ប៉ុន្តែ​ថែមទាំង​ឈរ​ការពារ​ក្រុមហ៊ុន ហើយ​បង្កើន​ការ​លាប​ពណ៌ គំរាមកំហែង និង​ប្រើ​ហិង្សា​លើ​ស្ត្រី​កូដករ​ទាំងនោះ​កាន់តែ​ខ្លាំង​ឡើង។ អាជ្ញាធរ​តែង​យក​រថយន្តក្រុង​មក​ដឹក​ពួកគាត់​ទៅ​ទម្លាក់​ចោល​នៅ​ជាយក្រុង ដល់​រសៀល​ទើប​ដឹក​ក្រុម​កូដករ​មក​ទម្លាក់​ចោល​នៅ​ចំណត​ឡាន​ម្ដុំ​វិមាន​សន្តិភាព​វិញ ហើយ​ឲ្យ​ពួកគាត់​រក​មធ្យោបាយ​ទៅផ្ទះ​ដោយ​ខ្លួនឯង។ ថ្ងៃ​ខ្លះ​ក្រុម​កូដ​ករ​ដើររក​បេះ​បន្លែ​តាម​ចិញ្ចើមថ្នល់ តាម​មាត់​ទន្លេ​យក​មក​បរិភោគ ដោយសារ​គ្មាន​ថវិកា​ទិញ​ម្ហូបអាហារ។ ក្រុម​កូដករ ត្អូញត្អែរ​ថា ជីវភាព​ពួកគាត់​កាន់តែ​ដុនដាប​ទៅ ព្រោះ​ពុំ​មាន​ការងារ​ធ្វើ​អស់​រយៈពេល​ជាង​ប្រាំ​ខែ​មក​ហើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល