សហជីព​ស្នើ​លោក ហ៊ុន សែន ជួប​សន្ទនា​ជាមួយ​កូដករ​ណាហ្គាវើលដ៍​ផ្ទាល់ ជា​ជាង​ការ​ចោទ​ពួក​គាត់​ថា ជា​ក្រុម​បដិវត្តន៍​ពណ៌

ដោយ ជាតិ ចំណាន
2023.03.10
សហជីព​ស្នើ​លោក ហ៊ុន សែន ជួប​សន្ទនា​ជាមួយ​កូដករ​ណាហ្គាវើលដ៍​ផ្ទាល់ ជា​ជាង​ការ​ចោទ​ពួក​គាត់​ថា ជា​ក្រុម​បដិវត្តន៍​ពណ៌ (រូបឯកសារ) ​ក្រុម​កូដករ​ណាហ្គាវើលដ៍ តវ៉ាទាមទារ​រកដំណោះ​ស្រាយ​បញ្ចប់​វិវាទ​ការងារ នៅ​ក្រុមហ៊ុន​កាស៊ីណូ​ណាហ្គាវើលដ៍ និង​ទាមទារ​ឱ្យ​ឈប់បង្កក​លុយ​វិភាគទាន​របស់​ពួ​គាត់ កាល​ពីថ្ងៃ​ទី៩ ខែកញ្ញា ឆ្នាំ២០២២។
រូបពីពលរដ្ឋ

ក្រុម​សហជីព​ចង់​ឃើញ​លោក​នាយក​រដ្ឋមន្រ្តី ហ៊ុន សែន បើក​វេទិកា​ជួប​សន្ទនា​ផ្ទាល់​ជាមួយ​ក្រុម​កូដករ​ណាហ្គាវើលដ៍ ដើម្បី​ដោះ​ស្រាយ​បញ្ចប់​វិវាទ​ការងារ ដែល​បាន​អូស​បន្លាយ​អស់​រយៈ​ពេល​ជាង ១ឆ្នាំ​មក​នេះ។ ការ​ស្នើ​នេះ ធ្វើ​ឡើង​ស្រប​ពេល ដែល​សហជីព​ចាត់​ទុក​ការ​ចោទ​ប្រកាន់​របស់​លោក ហ៊ុន សែន លើ​ក្រុម​កូដករ​ណាហ្គាវើលដ៍ ថា​ជា​ក្រុម​ស៊ី​ឈ្នួល​ធ្វើ​បាតុកម្ម គឺ​ជា​កំហុស​ដ៏​ធ្ងន់ធ្ងរ​មួយ។

ក្រុម​សហជីព​យល់​ឃើញ​ថា លោក ហ៊ុន សែន ឬ​កូន​ប្រុស​របស់​លោក គឺ​លោក ហ៊ុន ម៉ាណែត គួរតែ​ចុះ​មក​សួរ​សុខ​ទុក្ខ​ក្រុម​កូដករ​ណាហ្គាវើលដ៍​ដោយ​ផ្ទាល់ ហើយ​សួរ​នាំ​ជីក​ឫស​ជីក​គល់​ជុំវិញ​រឿងរ៉ាវ​វិវាទ​ការងារ​នៅ​ក្រុមហ៊ុន​មួយ​នេះ។ ពួក​គេ​សង្ឃឹម​ថា ប្រសិន​បើ​លោក ហ៊ុន សែន ចំណាយ​ពេល​តែ​បន្តិច​មក​ស្ដាប់​រឿងរ៉ាវ​ផ្ទាល់​ពី​កូដករ នោះ​នឹង​អាច​រក​ផ្លូវ​ដោះ​ស្រាយ​បញ្ចប់​បញ្ហា​ដោយ​សន្តិវិធី ចៀសវាង​លោក​ស្ដាប់​តាម​ការ​វិនិច្ឆ័យ​ខុស​របស់​មន្ត្រី​ថ្នាក់​ក្រោម មក​លើ​ក្រុម​កូដករ​ណាហ្គាវើលដ៍​ដូច​នៅ​ពេល​នេះ។

ប្រធាន​សហព័ន្ធ​សហជីពកម្មករ​ចំណី​អាហារ និង​សេវាកម្ម​កម្ពុជា អ្នកស្រី អ៊ូ ទេពផល្លីន ប្រាប់​វិទ្យុ​អាស៊ី​សេរី នៅ​ថ្ងៃ​ទី១០ មីនា​នេះ​ថា មាន​តែ​លោក ហ៊ុន សែន ទេ ដែល​អាច​បញ្ជា​ឱ្យ​ក្រុមហ៊ុន​ណាហ្គាវើលដ៍​ដោះ​ស្រាយ​បញ្ចប់​វិវាទ​ការងារ​នៅ​ពេល​នេះ​បាន តាមរយៈ​ការ​ទទួល​យក​ថ្នាក់​ដឹកនាំ​សហជីព និង​កូដករ​ចូល​ធ្វើ​ការ​វិញ ដោះលែង​ថ្នាក់​ដឹកនាំ​សហជីព​របស់​ក្រុម​កូដករ​កំពុង​ជាប់​ពន្ធនាគារ និង​ដោះស្រាយ​បញ្ហា​សេសសល់​មួយ​ចំនួន​ទៀត។ លោកស្រី​បន្ត​ថា វិវាទ​ការងារ​នេះ​កើត​ឡើង ដោយសារ​ការ​ប្រព្រឹត្ត​កំហុស​ដ៏​ធ្ងន់ធ្ងរ​របស់​ថៅកែ​ណាហ្គាវើលដ៍ ដែល​បាន​បំពាន​ច្បាប់​ស្ដីពី​ការងារ និង​មិន​គួរ​អត់ឱន​ឱ្យ​ឡើយ។

អ្នកស្រី អ៊ូ ទេពផល្លីន៖ «អ៊ីចឹង! យើង​ស្នើសុំ​ឱ្យ​សម្ដេច​នាយក ធ្វើការ​ដោះ​ស្រាយ​វិវាទ​ហ្នឹង ដោយ​លោក​បើក​វេទិកា​ស្ដាប់​ជាមួយ​អ្នក​កំពុង​ធ្វើ​កូដកម្ម​ហ្នឹង ហើយ​ខ្ញុំ​ជឿ​ថា បើសិនជា​សម្ដេច​នាយក​បើក​វេទិកា​ជា​សាធារណៈ ឬ​អនុញ្ញាត​ឱ្យ​មាន​ការ​ជួប​រវាង​កូដករ ដែល​កំពុង​មាន​កូដកម្ម គឺ​យើង​នឹង​ទៅ យើង​ទៅ​ស្ដាប់ ហើយ​យើង​នឹង​ថ្លែង​សារ​ប្រាប់​ទៅ​សម្ដេច រឿងរ៉ាវ​បែប​ណា នឹង​ទៅ​យ៉ាង​ណា»

លោកស្រីបន្ត​ថា អ្វី​ដែល​ក្រុម​សហជីព​ចង់​ឃើញ ក្រុម​កម្មករ​ទទួល​បាន​ការងារ​ធ្វើ ទទួល​បាន​ការ​គោរព​សិទ្ធិ និង​មាន​ជីវភាព​រស់នៅ​សមរម្យ​ដូច​គេ​ឯង ដែល​ជា​ភាព​សុខដុមរមនា និង​សន្តិភាព​សម្រាប់​កម្មករ ហើយ​ប្រសិន​បើ​កម្មករ​ត្រូវ​បាន​គេ​បំពាន អាច​ប្រើប្រាស់​សិទ្ធិ​របស់​ខ្លួន​តាម​រយៈ​ការ​ធ្វើ​កូដកម្ម​ទាមទារ​សិទ្ធិ​ទាំង​នោះ​មក​វិញ ដោយ​គ្មាន​ការ​ចោទ​ប្រកាន់ លាប​ពណ៌ និង​ការ​ចាប់​ដាក់​ពន្ធនាគារ​ជា​ដើម។

ការ​ថ្លែង​របស់​សហជីព​រូប​នេះ បាន​ធ្វើ​ឡើង​បន្ទាប់​ពី​លោក​នាយក​រដ្ឋមន្ត្រី ហ៊ុន សែន កាលពីថ្ងៃទី៦ មីនា បាន​ចោទ​ប្រកាន់​ក្រុម​កូដករ​ណាហ្គាវើលដ៍​ថា មាន​អ្នក​ចាំ​ផ្ដល់​ថវិកា​នៅ​ពី​ក្រោយ​សម្រាប់​ឧបត្ថម្ភ​ឱ្យ​ពួក​គេ​ចេញ​ធ្វើ​បាតុកម្ម​កន្លង​មក​នេះ ដើម្បី​បដិសេធ​មិន​ទទួល​យក​ការ​អន្តរាគមន៍​ពី​ក្រសួង​ការងារ និង​បណ្ដុះបណ្ដាល វិជ្ជាជីវៈ។

លោក​ ហ៊ុន សែន៖ «បើសិនជា​ខ្ញុំ​ទៅ​ចាប់​អា​កន្លែង​ទៅ​ផ្គត់ផ្គង់​លុយ​ឱ្យ​ធ្វើ​បាតុកម្ម ខ្ញុំ​ក៏​ចាប់​បាន​ដែរ អ្នក​ឯង​កុំ​គិត​ស្មាន​ថា ខ្ញុំ​មិន​ដឹង​នោះ។ ឥឡូវ​យើង​គិត​ខ្លួន​ឯង​គេ​ខ្លួន​យើង អត់​មាន​ការងារ​ធ្វើ​ជាង​មួយ​ឆ្នាំ នៅ​មាន​លទ្ធភាព​បាយ​ស៊ី​យ៉ាង​ស្រួល ហើយ​ទៅ​ធ្វើ​បាតុកម្ម»

ជុំវិញ​ការ​លើក​ឡើង​របស់​លោក ហ៊ុន សែន នេះ ប្រធាន​សហព័ន្ធ​សហជីព​កម្មករ​ចំណី​អាហារ និង​សេវាកម្ម​កម្ពុជា អ្នកស្រី អ៊ូ ទេពផល្លីន បន្ថែម​ថា ការ​ធ្វើ​កូដកម្ម​របស់​ក្រុម​កម្មករ​ណាហ្គាវើលដ៍ មិន​មែន​ជា​ចលនា​បង្ក​ភាព​វឹកវរ និង​អសន្តិសុខ​សង្គម​ឡើយ ព្រោះ​កម្ពុជា​មាន​ច្បាប់​បើក​ឱ្យ​ប្រើ​សិទ្ធិ​ធ្វើ​កូដកម្ម​ដោយ​សន្តិវិធី។ លោកស្រី​បន្ត​ថា ការ​ចោទ​ប្រកាន់​ពី​មន្ត្រី​របស់​លោក ហ៊ុន សែន មួយ​ចំនួន​នា​ពេល​កន្លង​មក ដើម្បី​ព្យាយាម​ផ្សា​ភ្ជាប់​ទៅ​នឹង​ការ​ធ្វើ​បដិវត្តន៍​ពណ៌ ឬ​ប្រឆាំង​រដ្ឋាភិបាល ជា​រឿង​មិន​សម​ហេតុផល​ទាល់​តែ​សោះ ខណៈ​ក្រុម​កូដករ​ណាហ្គាវើលដ៍ ចេញ​តវ៉ា​ទាមទារ​រក​ដំណោះស្រាយ​ពី​ក្រុមហ៊ុន​ឯកជន​សុទ្ធសាធ ដែល​មិនមែន​ជា​ស្ថាប័នរដ្ឋ។ លោកស្រីបន្ត​ថា ចំណែក​លុយ​កាក់ ម្ហូប​អាហារ និង​សម្ភារៈ​ប្រើប្រាស់​ផ្សេងៗ ដែល​ក្រុម​កូដករ​ទទួល​បាន​កន្លង​មក​នេះ គឺ​តាម​រយៈ​ការ​អំពាវនាវ​សុំ​ពី​សប្បុរសជន ខណៈ​កូដករ​ខ្លះ​ឆ្លៀត​ទៅ​ធ្វើ​ការងារ​ក្រៅ​ម៉ោង និង​ខ្លះ​ទទួល​បាន​ការ​ឧបត្ថម្ភ​ពី​សាច់​ញាតិ​បងប្អូន​ជា​ដើម។

កម្មករ​ណាហ្គាវើលដ៍​បាន​ផ្ទុះ​ការ​តវ៉ា​តាំង​ពី​ខែធ្នូ ឆ្នាំ២០២១ បន្ទាប់​ពី​កាស៊ីណូ​បាន​បញ្ឈប់​ការងារ​របស់​ពួក​គេ​រាប់​រយ​នាក់​ទាំង​ខុស​ច្បាប់ និង​គ្មាន​ការ​ផ្ដល់​ប្រាក់​សំណង​ឱ្យ​បាន​ត្រឹមត្រូវ។ នៅ​ក្នុង​ការ​តវ៉ា​អស់​រយៈ​ពេល​ប្រហែល ១៦ខែ​មក​នេះ កូដករ និង​សមាជិក​សហជីព​របស់​ក្រុម​កូដករ​ជា​ច្រើន​នាក់ ត្រូវ​បាន​អាជ្ញាធរ​ប្រើប្រាស់​អំពើ​ហិង្សា​បង្ក្រាប​យ៉ាង​សាហាវ​ឃោរឃៅ ដូច​ជា ការ​វាយ​ទាត់​ធាក់ ការ​រុញច្រាន ការ​ចាប់​ខ្លួន និង​ឃុំខ្លួន ការ​ពិន័យ​ជា​ប្រាក់ ការ​បៀតបៀន​ផ្លូវ​ភេទ និង​ការ​ប្រើប្រាស់​អំពើ​ហិង្សា​បណ្ដាល​ឱ្យ​ស្ត្រី​ជា​កូដករ​ម្នាក់​ត្រូវ​រលូត​កូន កាល​ពី​ខែឧសភា ឆ្នាំ២០២២។

តំណាង​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ នៃ​ក្រុមហ៊ុន​ណាហ្គាវើលដ៍ (Nagaworld) ហៅ​កាត់​ថា អិល.អារ៍.អេស.យូ (L.R.S.U) លោកស្រី រី សុវណ្ណឌី លើក​ឡើង​ថា ការ​ចោទ​ប្រកាន់​មក​លើ​ក្រុម​កូដករ​របស់​លោកស្រី​ថា ធ្វើ​កូដកម្ម​បាន​លុយ​ពី​អ្នក​នៅ​ពី​ក្រោយ ជា​ការ​ដាក់​បន្ទុក​ឱ្យ​ក្រុម​កម្មករ​កាន់​តែ​រង​ភាព​អយុត្តិធម៌​មួយ​ជាន់​ទៀត ស្រប​ពេល​ពួក​លោកស្រី​គ្រាន់​តែ​ចេញ​តវ៉ា​ដោយ​ប្រើប្រាស់​សិទ្ធិ​របស់​ខ្លួន។ លោកស្រី​បន្ត​ថា ស្រប​ពេល​អាជ្ញាធរ និង​ក្រសួង​ស្ថាប័ន​ពាក់ព័ន្ធ​មិន​បាន​ដោះ​ស្រាយ​វិវាទ​ការងារ​នេះ វា​ជា​ដំណើរ​ល្អ​មួយ ប្រសិនបើ​បាន​ជួប​សន្ទនា​ផ្ទាល់​ជាមួយ​លោក ហ៊ុន សែន។

លោកស្រី រី សុវណ្ណឌី៖ «និយាយ​ទៅ​បើ​និយាយ​ជីក​ឫស​ជីក​គល់ ហើយ​បាន​ជួប​ផ្ទាល់​និយាយ​ផ្ទាល់ អា​ហ្នឹង​រឹតតែ​ល្អ ព្រោះ​វា​ជាក់ស្ដែង ពួក​យើង​មាន​វិវាទ​ការងារ ហើយ​វិវាទ​ការងារ​ទៅ​ទៀត គឺ​អ្វី​ដែល​យើង​ធ្វើ គឺ​គ្រាន់តែ​ទាមទារ​សិទ្ធិ​ការងារ​ទេ។ យើង​ចង់​បាន​ឱ្យ​ថៅកែ​យក​យើង​ចូល​ធ្វើ​ការងារ​វិញ យើង​ចង់​ឱ្យ​មាន​សហជីព​នៅ​កន្លែង​ការងារ»

ជុំវិញ​បញ្ហា​នេះ វិទ្យុ​អាស៊ី​សេរី មិន​អាច​សុំ​ការ​ឆ្លើយ​តប​ពី​មន្ត្រី​នាំ​ពាក្យ​ក្រសួង​ការងារ និង​បណ្ដុះ​បណ្ដាល វិជ្ជាជីវៈ លោក ហេង សួរ និង​ប្រធាន​អង្គភាព​អ្នក​នាំ​ពាក្យ​រដ្ឋាភិបាល លោក ផៃ ស៊ីផាន បាន​ទេ ដោយសារ​ទូរស័ព្ទ​ហៅ​ចូល​គ្មាន​អ្នក​ទទួល។

ប្រធាន​សមាគម​ការពារ​សិទ្ធិមនុស្ស អាដហុក (Adhoc) លោក នី សុខា យល់​ឃើញ​ថា ដើម្បី​ដោះ​ស្រាយ​បញ្ហា​វិវាទ​ការងារ​នៅ​ក្រុមហ៊ុន​ណាហ្គាវើលដ៍​ឱ្យ​បាន​ចប់​ត្រឹមត្រូវ គឺ​ទាល់តែ​មាន​ការ​ប្រឹក្សា​ឱ្យ​បាន​ច្បាស់លាស់​អំពី​ដើម​ចម​នៃ​បញ្ហា និង​ត្រូវ​សិក្សា​ការ​តវ៉ា ដែល​ក្រុម​កូដករ​កំពុង​ទាមទារ​ចង់​បាន។ លោក​បន្ត​ថា លើស​ពី​នេះ រដ្ឋាភិបាល​ត្រូវ​ចៀសវាង​ការ​ចោទ​ប្រកាន់ និង​លាប​ពណ៌ ដែល​ខ្វះ​មូលដ្ឋាន និង​ហេតុផល ព្រោះ​វា​មិន​អាច​ឈាន​ទៅ​រក​ដំណោះស្រាយ​បាន​នោះ​ទេ។

លោក នី សុខា៖ «ការ​រក​ដំណោះស្រាយ​បាន​ល្អ គឺ​វា​ត្រូវ​ការ​ព័ត៌មាន​ឱ្យ​សព្វ​ជ្រុង​ជ្រោយ ឱ្យ​ច្បាស់លាស់ ឱ្យ​ពិតប្រាកដ ហើយ​យក​មក​ដោះស្រាយ​គ្នា​ដោយ​តម្លាភាព ដោយ​យក​ច្បាប់​ជា​គោល ដើម្បី​ធ្វើ​ការ​ដោះស្រាយ ហើយ​អ្នក​ដែល​ជា​អាជ្ញាកណ្ដាល ត្រូវ​ប្រកាន់​យក​គោល​ការណ៍​យុត្តិធម៌ ចៀសវាង​ការ​លម្អៀង​ទៅ​ភាគី​ណា​មួយ ដើម្បី​រក្សា​ឱ្យ​បាន​ប្រយោជន៍​ទៅ​ដល់​ភាគី​ទាំង​សង​ខាង»

ក្រុម​សហជីព និង​កូដករ​ណាហ្គាវើលដ៍ ហាក់​មាន​សង្ឃឹម​ថា មាន​តែ​លោក ហ៊ុន សែន ម្នាក់​ប៉ុណ្ណោះ​អាច​ជួយ​ដោះ​ស្រាយ​វិវាទ​ការងារ​នេះ​បាន ខណៈ​ម្ចាស់​ក្រុមហ៊ុន​ណាហ្គាវើលដ៍ ត្រូវ​បាន​គេ​ដឹង​ថា ជា​ទីប្រឹក្សា​ផ្ទាល់​របស់​លោក ហ៊ុន សែន។ កន្លង​មក អាជ្ញាធរ និង​ក្រសួង​ស្ថាប័ន​ពាក់ព័ន្ធ​ហាក់​មិន​ហ៊ាន​ស្វែង​រក​យុត្តិធម៌​ឱ្យ​ក្រុម​កូដករ ដោយសារ​ម្ចាស់​កាស៊ីណូ​ណាហ្គាវើលដ៍ ក៏​ត្រូវ​គេ​ដឹង​ថា មាន​ទំនាក់ទំនង​ជាមួយ​ភរិយា និង​កូន​លោក​នាយក​រដ្ឋមន្ត្រី ហ៊ុន សែន កូន​លោក សុខ អាន និង​មន្ត្រី​រដ្ឋាភិបាល​មួយ​ចំនួន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។