កូដករណាហ្គាវើលដ៍បន្តទាមទារឱ្យថៅកែដោះស្រាយវិវាទការងារ និងដោះលែងកញ្ញា ឈឹម ស៊ីថរ
2022.12.06
ក្រុមកូដករណាហ្គាវើលដ៍ (Naga World) នៅថ្ងៃទី៦ ខែធ្នូ ឆ្នាំ២០២២ បន្តចេញធ្វើកូដកម្មទាមទារឱ្យថៅកែដោះស្រាយវិវាទការងារ និងដោះលែងប្រធានសហជីពកញ្ញា ឈឹម ស៊ីថរ ឱ្យមានសេរីភាពឡើងវិញដោយឥតលក្ខខណ្ឌ។
រូបពីពលរដ្ឋ
ក្រុមកូដករណាហ្គាវើលដ៍ (Naga World) នៅថ្ងៃទី៦ ធ្នូ បន្តចេញធ្វើកូដកម្មទាមទារឱ្យថៅកែដោះស្រាយវិវាទការងារ និងដោះលែងប្រធានសហជីពកញ្ញា ឈឹម ស៊ីថរ ឱ្យមានសេរីភាពឡើងវិញដោយឥតលក្ខខណ្ឌ។ មន្ត្រីសង្គមស៊ីវិលរិះគន់ថា ការណ៍ដែលរដ្ឋាភិបាលនៅតែមិនអើពើដោះស្រាយបញ្ចប់វិវាទការងារដ៏រ៉ាំរ៉ៃនេះ ហើយរដ្ឋាភិបាលនឹងរងភាពអាម៉ាស់ និងរងការរិះគន់ធ្ងន់ៗ បន្ថែមទៀតពីជាតិ និងអន្តរជាតិ។
តំណាងកូដករក្រុមហ៊ុនបនល្បែងកាស៊ីណូណាហ្គាវើលដ៍ (Naga World) លើកឡើងថា ពួកគាត់ គឺក្រុមកូដករទាំងអស់ចង់បង្ហាញទៅកាន់រដ្ឋាភិបាលថា ប្រធានសហជីពរបស់ពួកគេគឺកញ្ញា ឈឹម ស៊ីថរ ត្រូវគេតុលាការចាប់ដាក់គុកទាំងអស់យុត្តិធម៌។
កូដករម្នាក់កញ្ញា ផាត ចាន់ណា ប្រាប់វិទ្យុអាស៊ីសេរីនៅថ្ងៃទី៦ ធ្នូថា វាជារឿងគួរឱ្យអាម៉ាស់បំផុតសម្រាប់ក្រសួងពាក់ព័ន្ធ ព្រោះវិវាទការងារនេះ គឺជារឿងតូចតាចប៉ុណ្ណោះ ប្រសិនបើរដ្ឋាភិបាល និងក្រសួងការងារឈរលើភាពត្រឹមត្រូវដោះស្រាយវិវាទការងារ។ កញ្ញា លើកឡើងទៀតថា ការណ៍ដែលអាជ្ញាធររដ្ឋាភិបាលបន្តធ្វើទុក្ខបុកម្នេញសម្លុតគំរាមកំហែងកម្មករ ចាប់ចងសហជីពម្ដងហើយម្ដងទៀតនេះ ឆ្លុះជញ្ជាំងឱ្យឃើញថា រដ្ឋាភិបាលមិនបានអើពើ ចំពោះកម្មករខ្មែរ ដែលកំពុងរងភាពអយុត្តិធម៌ពីថៅកែបរទេសនោះទេ។
កញ្ញា ផាត ចាន់ណា៖ «ពួកខ្ញុំទាមទារជាមួយថៅកែណាហ្គាវើលដ៍តែគេព្យាយាមទាញពួកខ្ញុំឱ្យទៅកូដកម្មជាមួយរដ្ឋាភិបាលវិញ។ ជាក់ស្ដែង វិវាទការងារទេ តែទៅជាមានក្រសួងពាក់ព័ន្ធ ដូចជា អាជ្ញាធរស្លៀកពាក់ខោអាវការពារជាតិ តែគាត់មកវាយដំច្រំធាក់ពួកខ្ញុំកន្លងមក។ ខ្ញុំគិតថា វាពាក់ព័ន្ធមានអីនៅពីក្រោយខ្នងរឿងវិវាទហ្នឹងហើយ។ បើត្រឹមជាថៅកែណាហ្គាវើលដ៍ ដែលជាជនជាតិម៉ាឡេស៊ីនេះ ខ្ញុំគិតថា គិតមិនមានឥទ្ធិពលខ្លាំងដល់ថ្នាក់ហ្នឹងធ្វើបាបពួកខ្ញុំរហូតដល់មួយឆ្នាំនេះទេ។ គាត់ជនជាតិបរទេស គាត់អត់មានសិទ្ធិអីមករំលោភបំពានច្បាប់ស្រុកខ្មែរបានទេ វាមានអ្វី ស្រមោលខ្មៅអីពីក្រោយខ្នងហើយ ដែលធ្វើឱ្យរឿងនេះអាប់ឱនប្រទេសជាតិយើងខ្លាំងណាស់»។
ក្រុមកូដករបន្តស្នើដល់រដ្ឋាភិបាលឯកបក្សគិតគូរឡើងវិញក្នុងការពន្លឿននីតិវិធីដោះស្រាយបញ្ចប់វិវាទការងារនេះ ដោយលើភាពត្រឹមត្រូវ ដើម្បីកុំឱ្យកម្មករបន្តរងទុក្ខវេទនាទាំងផ្លូវកាយ និងចិត្ត។ ក្រុមកូដករបន្ថែមទៀតថា ទោះបីពួកគេត្រូវប្រឈមការរងគំរាមកំហែងគ្រប់រូបភាពពីសំណាក់អាជ្ញាធរជាបន្តបន្ទាប់មកហើយក្ដី ក៏ពួកគេនៅតែមានឆន្ទៈរួមគ្នាចេញតវ៉ាអហិង្សារហូតមានដំណោះស្រាយ និងដើម្បីឱ្យថៅកែណាហ្គាវើលដ៍គោរពសិទ្ធិសហជីព និងកម្មករខ្មែរ។
ក្រុមកូដករជាង ១រយនាក់នៅថ្ងៃទី៦ ធ្នូ នៅតែបន្តចេញធ្វើកូដកម្មដូចសព្វដង ដោយពួកគាត់បានវាយស្គរ ស្រែកទាមទារនៅខាងមុខអគារបនល្បែងណាហ្គាវើលដ៍។ ពួកគាត់មួយចំនួនទៀតបានស្លៀកសំលៀកបំពាក់ជាអ្នកទោស លើកបដាសរសេរថា «បញ្ឈប់ការចាប់អ្នកទាមទារសិទ្ធិការងារដាក់គុក» «គ្មានសិទ្ធិសេរីភាពមិនខុសពីជាប់គុកឥតជញ្ជាំង «គ្មានអ្នកណាចង់ជាប់គុកនោះទេ ប៉ុន្តែដើម្បីសេរីភាពពួកយើងហ៊ានប្តូរ»។ បន្ថែមពីនេះ កូដករបានអំពាវនាវដល់ភាគីពាក់ព័ន្ធដោះស្រាយបញ្ចប់វិវាទការងារឱ្យបានឆាប់ និងបញ្ឈប់ការដាក់សម្ពាធ ប្រើវិធីបង្អត់បាយកម្មករក្នុងសម័យដែលរដ្ឋាភិបាលតែងតែអះអាងថា ជាប្រទេសសុខសាន្តនោះ។
វិទ្យុអាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ដើម្បីសាកសួរអំពីបញ្ហានេះបានទេ នៅថ្ងៃទី៦ ធ្នូ។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា ការប្រើប្រាស់ប្រព័ន្ធតុលាការមកដាក់សម្ពាធគំរាមកំហែងក្រុមកូដករ និងសហជីព ពុំមែនជាដំណោះស្រាយបញ្ចប់វិវាទការងារនេះទេ។ លោកទទូចដល់អាជ្ញាធរ និងតុលាការដោះលែងកញ្ញា ឈឹម ស៊ីថរ ឱ្យមានសេរីភាពឡើងវិញហើយងាកដោះស្រាយវិវាទការងាររវាងថៅកែ ជាមួយក្រុមកូដករដោយផ្អែកតាមច្បាប់ស្ដីពីការងារ និងច្បាប់អន្តរជាតិដែលកម្ពុជាបានផ្ដល់សច្ចាប័ន។
លោក អំ សំអាត៖ «អាជ្ញាធរដែលពាក់ព័ន្ធគួរតែ ស្វះស្វែងរកដំណោះស្រាយ ដើម្បីបញ្ចប់វិវាទការងារ ជាជាងការចាប់ខ្លួនការប្ដឹងទៅតុលាការយកប្រព័ន្ធតុលាការ ធ្វើជាឧបករណ៍ក្នុងការគំរាមកំហែង បំភិតបំភ័យលើសហជីពណាហ្គាវើលដ៍ និងកូដករកំពុងធ្វើកូដកម្ម។ ក្នុងករណីនេះវានាំឱ្យមានការរិះគន់ចោទប្រកាន់ជាបន្តទៀតទាក់ទងនឹងការរឹតត្បិតនៃលំហសេរីភាពសហជីព លំហសេរីភាពជាមូលដ្ឋានរបស់ពលរដ្ឋ»។
ក្រុមកូដករក្រុមហ៊ុនណាហ្គាវើលដ៍ចេញតវ៉ាទាមទារសិទ្ធិសេរីភាពការងារជិត ១ឆ្នាំមកហើយ បន្ទាប់ពីថៅកែក្រុមហ៊ុនបនល្បែងនេះ បានមានចេតនាលុបបំបាត់សំឡេងសហជីពឯករាជ្យក្នុងកន្លែងការងារ និងបញ្ឈប់បុគ្គលិកជាង ៣រយនាក់ចេញពីការងារដោយខុសច្បាប់។ ជាងនេះទៀត ការចេញតវ៉ារបស់ក្រុមកូដករកន្លងមកនេះ តែងតែត្រូវកម្លាំងអាជ្ញាធរបង្ក្រាបជាបន្តបន្ទាប់ រហូតដល់មានការប្រើអំពើហិង្សាទៅលើកូដករម្នាក់បណ្ដាលឱ្យរលូតកូនក្នុងផ្ទៃទៀតផង។
មកទល់នឹងពេលនេះ ក្រៅពីគ្មានដំណោះស្រាយប្រធានសហជីព កញ្ញា ឈឹម ស៊ីថរ ត្រូវតុលាការចាប់គុកឡើងវិញ ហើយកូដករមួយចំនួនទៀតប្រឈមបញ្ហាផ្លូវច្បាប់ ក្រោយពីក្រុមហ៊ុនដាក់ពាក្យប្ដឹងដោយចោទពួកគាត់រំលោភលំនៅឋាន ធ្វើឱ្យខូចខាតដោយចេតនា ដែលមានស្ថានទម្ងន់ទោស និងចាប់ឃុំឃាំង និងបង្ខាំងដោយខុសច្បាប់។
សហរដ្ឋអាមេរិក និងស្ថានទូតអូស្ត្រាលី រួមទាំងសហព័ន្ធសហជីពអន្តរជាតិមានសមាជិកសហជីពប្រមាណ ៣០០ស្ថាប័នមកប្រទេសជាង ១រយ (១២០) ទូទាំងពិភពលោកទាមទារឱ្យរដ្ឋាភិបាលកម្ពុជា ដោះលែងកញ្ញា ឈឹម ស៊ីថរ និងទម្លាក់ការចោទប្រកាន់លើសហជីពកម្មករទាំងអស់ និងបើកឱ្យពួកគេប្រើសិទ្ធិសេរីភាពបង្កើតសមាគម និងការជួបប្រជុំដោយសន្តិវិធី។ ក្រុមអង្គការផ្នែកសិទ្ធិមនុស្សជាតិ អន្តរជាតិ សហជីព និងបណ្ដាប្រទេសប្រជាធិបតេយ្យធំៗ មួយចំនួន ក៏ឃើញថា ការបន្តធ្វើទុក្ខបុកម្នេញលើក្រុមកូដករណាហ្គាវើលដ៍ និងការចាប់ខ្លួនកញ្ញា ឈឹម ស៊ីថរ ឡើងវិញនេះ គឺរដ្ឋាភិបាលកម្ពុជាកំពុងអនុវត្តផ្ទុយពីច្បាប់រដ្ឋធម្មនុញ្ញ ដែលមានចែងធានាគាំពារដល់សិទ្ធិជាមូលដ្ឋានរបស់ពលរដ្ឋក្នុងការសម្ដែងមតិ បង្ហាញទុក្ខកង្វល់ទៅកាន់រដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន មិនគាំទ្រដីកាតុលាការ ICC ដើម្បីចាប់ខ្លួនមេដឹកនាំរុស្ស៊ី
- ពិធីមង្គលការរបស់ពលករខ្មែរនៅប្រទេសថៃ
