សហជីព​ណាហ្គាវើលដ៍​ជួបជុំ​ដាក់​ញត្តិ​ស្នើ​ក្រសួង​ការងារ​​ឱ្យ​ប្រជុំ​រក​ដំណោះស្រាយ

ដោយ ជី វិតា
2024.03.06
សហជីព​ណាហ្គាវើលដ៍​ជួបជុំ​ដាក់​ញត្តិ​ស្នើ​ក្រសួង​ការងារ​​ឱ្យ​ប្រជុំ​រក​ដំណោះស្រាយ លោកស្រី ឃ្លាំង សុបិន្ត អគ្គលេខាធិការ នៃ​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ (LRSU) នៃ​ក្រុមហ៊ុន​ណាហ្គា វើលដ៍ (Naga World) ថ្លែងនៅមុខក្រសួងការងារ​ នៅថ្ងៃទី៦ មីនា ឆ្នាំ​២០២៤។
រូប​៖ ពលរដ្ឋ​ផ្តល់ឱ្យ

ក្រុម​កូដករ​ណាហ្គាវើលដ៍ នៅ​ព្រឹក​ថ្ងៃ​ទី៦ មីនា បាន​ប្រមូលផ្ដុំ​គ្នា​ដាក់​លិខិត​ទៅ​ក្រសួង​ការងារ និង​បណ្ដុះបណ្ដាល​វិជ្ជាជីវៈ ដើម្បី​ទាមទារ​ឲ្យ​ស្ថាប័ន​នេះ​ដោះស្រាយ​វិវាទ​ការងារ ប្រកប​ដោយ​យុត្តិធម៌ និង​តម្លាភាព។ មន្ត្រី​សហជីព​លើក​ឡើង​ថា ដើម្បី​ដោះស្រាយ​បញ្ហា​វិវាទ​ការងារ​រ៉ាំរ៉ៃ​នេះ ក្រសួង​ការងារ គួរតែ​ដោះស្រាយ​តាម​សំណើ​របស់​កម្មករ និង​ជំរុញ​ដល់​ថៅកែ​ណាហ្គាវើលដ៍ (Nagaworld) ឲ្យ​គោរព​សិទ្ធិ​កម្មករ ព្រមទាំង​ដោះ​លែង​ប្រធាន​សហជីព​ណាហ្គាវើលដ៍ កញ្ញា ឈឹម ស៊ីថរ ឲ្យ​មាន​សេរីភាព​ឡើង​វិញ។

កូដករ​ណាហ្គាវើលដ៍​ប្រមាណ ៦០នាក់ បាន​ជួបជុំ​គ្នា​ដាក់​លិខិត​ទៅ​ក្រសួង​ការងារ ដើម្បី​ស្នើ​ដល់​រដ្ឋមន្ត្រី​ក្រសួង​ការងារ លោក ហេង សួរ ឲ្យ​ចេញ​មុខ​ដោះស្រាយ​វិវាទ​ការងារ​រ៉ាំរ៉ៃ​មួយ​នេះ។

អនុប្រធាន​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ នៃ​ក្រុមហ៊ុន​បនល្បែង​កាស៊ីណូ​ណាហ្គាវើលដ៍ (Nagaworld) អ្នកស្រី ឈឹម សុខន ប្រាប់​វិទ្យុ​អាស៊ី​សេរី នៅ​ថ្ងៃ​ទី៦ មីនា​ថា ការ​ដាក់​លិខិត​នេះ មាន​តំណាង​ក្រសួង​ការងារ​ចេញ​មក​ទទួល ហើយ​បាន​សន្យា​ថា នឹង​បញ្ជូន​លិខិត​ស្នើសុំ​កិច្ច​អន្តរាគមន៍​នេះ ជូន​ទៅ​លោក ហេង សួរ។ អ្នកស្រី បញ្ជាក់​ថា គោល​បំណង​របស់​តំណាង​សហជីព បុគ្គលិក និង​កូដករ ដែល​បន្ត​ធ្វើ​កូដកម្ម និង​ដើរ​ដាក់​លិខិត​តាម​ស្ថាប័ន​រដ្ឋ​នេះ គឺ​ចង់​ឲ្យ​រដ្ឋាភិបាល ជាពិសេស ក្រសួង​ការងារ បញ្ចប់​វិវាទ​នេះ​ទៅ​តាម​ច្បាប់​ស្ដីពី​ការងារ និង​ជំរុញ​ឲ្យ​ថៅកែ​គោរព​សិទ្ធិ​បុគ្គលិក​ប៉ុណ្ណោះ។

អ្នកស្រី ឈឹម សុខន៖ «សំណូមពរ​របស់​យើង​គឺ អត់​មាន​លើស​ព្រំដែន ដែល​ក្រសួង​គាត់​ដោះ​ស្រាយ​ទេ ឲ្យ​តែ​គាត់​ឈរ​ចំ​កណ្ដាល ហើយ​យក​ច្បាប់​មក​វែកញែក​ថា ថៅកែ​មាន​សិទ្ធិ​បញ្ឈប់ ប៉ុន្តែ បើ​សិក្សា​ទៅ​លើ​ចំណុច​មាត្រា ដែល​គេ​ចែង​ថា បើ​រក​ឃើញ​ថា ការ​បញ្ឈប់​នោះ ទាក់ទង​នឹង​ការ​រើសអើង​នោះ ក្រសួង​ត្រូវ​មាន​តួនាទី និង​ដែន​សមត្ថកិច្ច​ត្រូវ​ទៅ​ប្រាប់​ដល់​និយោជក​ឲ្យ​បញ្ឈប់​នូវ​ការ​បញ្ឈប់​ដោយ​មាន​ការ​រើសអើង​ហ្នឹង​ទៅ អា​ហ្នឹង បើ​ផ្អែក​លើ​គោលការណ៍​ច្បាប់។ អីចឹង​ពី​បង​ទៅ​ក៏​ដូចជា តំណាង​ឲ្យ​កូដករ​ទាំង​អស់​ទទូច​ហើយ ទទូច​ទៀត ឲ្យ​ឯកឧត្ដម​មេត្តា​ពិនិត្យ​មើល​ច្បាប់​ហ្នឹង ថៅកែ​មាន​សិទ្ធិ​បញ្ឈប់ ប៉ុន្តែ​កុំ​យក​មូលហេតុ នៃ​ការ​បញ្ឈប់​ដោយ​ការ​រើសអើង គឺ​មិន​បាន​ទេ»

វិទ្យុ​អាស៊ី​សេរី​នៅ​ពុំ​ទាន់​អាច​ទាក់ទង​អ្នក​នាំ​ពាក្យ​ក្រសួង​ការងារ លោក កត្តា អ៊ន ដើម្បី​សុំ​ការ​ឆ្លើយតប​ចំពោះ​សំណើ​នេះ បាន​នៅ​ឡើយ​ទេ នៅ​ថ្ងៃ​ទី៦ មីនា។

ក្នុង​ដំណើរ​តវ៉ា និង​ដាក់​លិខិត​របស់​ក្រុម​កូដករ​ណាហ្គាវើលដ៍​នេះ មាន​ក្រុម​អង្គការ​សង្គម​ស៊ីវិល អាជ្ញាធរ និង​សន្តិសុខ ប្រមាណ ១០នាក់ តាម​ឃ្លាំមើល និង​ថតរូប​ក្រុម​កូដករ​ផង​ដែរ។

ប្រធាន​សហព័ន្ធ​សហជីព​កម្មករ​ចំណី​អាហារ និង​សេវាកម្ម​កម្ពុជា អ្នកស្រី អ៊ូ ទេពផល្លីន មាន​ប្រសាសន៍​ថា រដ្ឋាភិបាល និង​ក្រសួង​ការងារ គួរតែ​ដោះស្រាយ​បញ្ចប់​វិវាទ​ការងារ​រ៉ាំរ៉ៃ​នៅ​ក្រុមហ៊ុន​ណាហ្គាវើលដ៍​នេះ តាម​សំណើ​របស់​ក្រុម​កម្មករ និង​បញ្ឈប់​ការ​លាប​ពណ៌​កម្មករ​ទៅ​ជា​រឿង​អ្វី​ផ្សេង។

អ្នកស្រី អ៊ូ ទេពផល្លីន៖ «ទី១ គឺ​ត្រូវ​ដោះ​លែង​ពួក​គាត់ ទី២ ត្រូវ​ដោះ​ស្រាយ​បញ្ហា​ការ​រើសអើង​សហជីព អ៊ីចឹង​ដាក់​សម្ពាធ​ឲ្យ​និយោជក ឲ្យ​យក​កម្មករ​ចូល​ធ្វើការ​វិញ ហើយ​និង​ដោះ​ស្រាយ​វិវាទ ដែល​នៅ​សេសសល់​ទាំង​ប៉ុន្មាន។ គោលដៅ​មាន​តែ​ប៉ុណ្ណឹង​ទេ បើសិនជា​ដោះ​ស្រាយ​ប៉ុណ្ណឹង​បាន ចូល​ធ្វើការ​វិញ​បាន បើសិនជា​ការ​ជំរុញ​ឲ្យ​ចូល​ធ្វើការ​ហើយ ស្រាប់តែ​ពួក​គាត់​អត់​ចូល អា​ហ្នឹង​បាន​ហៅ​ថា ជា​ចេតនា​ក្នុង​ការ គេ​ហៅ​ថា ងឿក​ជា​ចេតនា​របស់​កម្មករ​និយោជិក​ងឿក​បង្កើត​សាច់រឿង​ផ្សេងៗ»

គិត​មក​ទល់​នឹង​ថ្ងៃ​ទី៦ មីនា ការ​តវ៉ា​ដោយ​សន្តិវិធី ដោយ​ដាក់​ញត្តិ​តាម​ស្ថាប័ន​រដ្ឋ​នានា និង​ការ​ធ្វើ​កូដកម្ម​របស់​ក្រុម​កូដករ​ណាហ្គាវើលដ៍ (Naga World) បានអូសបន្លាយពេលចំនួន៨០៩ថ្ងៃមកហើយ ប៉ុន្តែ ពួក​គេ​នៅ​មិន​ទាន់​ទទួល​បាន​ដំណោះស្រាយ​ណា​មួយ ដែល​អាច​ទទួល​យក​បាន​នៅ​ឡើយ​ទេ។ ផ្ទុយ​ទៅ​វិញ ពួក​គេ​បាន​ទទួល​រង​ការ​បង្ក្រាប​ដោយ​អំពើ​ហិង្សា ពី​អាជ្ញាធរ និង​សន្តិសុខ​របស់​ក្រុមហ៊ុន និងចោទ​ប្រកាន់​តាម​ផ្លូវ​តុលាការ​ទៀត​ផង ក្នុង​នោះ ប្រធាន​សហជីព​របស់​ពួក​គេ គឺ​កញ្ញា ឈឹម ស៊ីថរ ត្រូវ​បាន​តុលាការ​កាត់ក្ដី​ឲ្យ​ជាប់​ពន្ធនាគារ ២ឆ្នាំ ក្រោម​បទ​ចោទ «ញុះញង់​បង្ក​ឲ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម» ដោយសារ​បាន​ចេញ​មុខ​ការពារ​សិទ្ធិ​កម្មករ ហើយ​ការ​ផ្ដន្ទាទោស​លើ​កញ្ញា ឈឹម ស៊ីថរ នេះ ក៏​ត្រូវ​បាន​សហគមន៍​ជាតិ និង​អន្តរជាតិ​ផ្នែក​សិទ្ធិមនុស្ស​ថ្កោលទោស​ជុំ​ទិស ហើយ​ពួក​គេ​ទាមទារ​ឱ្យ​មាន​ការ​ដោះលែង​មេ​សហជីព​ដ៏​ក្លាហាន​រូប​នេះ​ជា​បន្ទាន់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។