មន្ត្រី​ជាន់​ខ្ពស់​​ប៉ូលិស​​ថា​ សំណុំ​រឿង​​ជនសង្ស័យ​​ម្នាក់​​ស្លាប់​​នៅ​​ពេល​​ប៉ូលិស​សួរ​ចម្លើយ​​នៅ​ក្នុង​​ខេត្ត​បាត់ដំបង​ មិន​​ទាន់​​បិទ​​បញ្ចប់​​នៅ​​ឡើយ​​

ដោយ ហេង រស្មី
2021-07-07
Share
មន្ត្រី​ជាន់​ខ្ពស់​​ប៉ូលិស​​ថា​ សំណុំ​រឿង​​ជនសង្ស័យ​​ម្នាក់​​ស្លាប់​​នៅ​​ពេល​​ប៉ូលិស​សួរ​ចម្លើយ​​នៅ​ក្នុង​​ខេត្ត​បាត់ដំបង​ មិន​​ទាន់​​បិទ​​បញ្ចប់​​នៅ​​ឡើយ​​ ជន​រងគ្រោះ​​ឈ្មោះ ពេជ្រ ធារ៉េត អាយុ​ ៣១ ឆ្នាំ និង​ប្រពន្ធ ឈ្មោះ ជា ច័ន្ទ​រចនា អាយុ ៣០​ ឆ្នាំ បាន​ស្លាប់​ក្នុង​ថ្ងៃ​ជាមួយ​គ្នា កាល​ពី​ថ្ងៃទី​៣ ខែ​មេសា ហើយ​បាន​បន្សល់​​ទុក​​កូន​ស្រី​តូចៗ​ចំនួន​ ២ ​នាក់​។
រូប៖ គេ​ផ្ដល់​ឱ្យ

អ្នក​នាំ​ពាក្យ​អគ្គ​ស្នង​ការ​នគរ​បាល​ជាតិ​លោក​ ឆាយ គឹមឃឿន ​ថា​សមត្ថកិច្ចកំពុង​បន្ត​ស្រាវជ្រាវ​​រក​មូល​ហេតុ​នៃ​ការ​ស្លាប់​ជនរងគ្រោះ​ម្នាក់​នៅ​អធិការដ្ឋាន​ប៉ូលិស​ស្រុក​សង្កែ​ ខេត្ត​បាត់ដំបង​ នៅ​ឡើយ​ ខណៈ​ក្រុម​គ្រួសារ​ជនរងគ្រោះ​ និង​មន្ត្រី​សង្គម​ស៊ីវិល​ទទូច​ឱ្យ​សមត្ថកិច្ច​​វែក​មុខ​ជន​ដៃ​ដល់​ទៅ​ផ្ដន្ទាទោស​តាម​ច្បាប់ឱ្យបានឆាប់​​៖ ​«ករណី​នេះ​ក្រុម​ការងារ​កំពុង​ស៊ើប​អង្កេត​យ៉ាង​លម្អិត​លទ្ធផល​អត់​ទាន់​មាន​»

ការ​លើក​ឡើង​របស់​មន្ត្រី​ប៉ូលិស​ជាន់​ខ្ពស់​​រូបនេះ​ បាន​កើត​​ឡើង​ក្រោយ​ពេល​គណៈកម្មាធិការ​ជាតិ​ប្រឆាំង​ទារុណកម្ម​​​ ចេញ​របាយការណ៍​ស្រាវជ្រាវ​​​នៅ​ថ្ងៃ​ទី​១៦​ ខែ​មិថុនា ​ដោយ​​​សន្និដ្ឋាន​ថា ជនរងគ្រោះ​​​ស្លាប់​បណ្ដាល​មក​ពី​ការ​វាយ​ធ្វើ​ទារុកម្ម​ស្រាល​ ឬ​ធ្ងន់​ ក្នុង​ពេល​ប៉ូលិស​ឃុំ​ខ្លួន​នៅ​អធិការ​នគរបាល​ស្រុក​សង្កែ។ ​​បន្ថែម​ពី​នេះ ​គណៈកម្មាធិការ​ជាតិ​ប្រឆាំង​ទារុណកម្មរបស់រដ្ឋាភិបាលនេះ បែរ​ជា​​រុញ​សំណុំ​រឿង​នេះ​ទៅ​អាជ្ញាធរ​ពាក់ព័ន្ធ​ ជា​ពិសេស​អគ្គស្នងការ​នគរបាល​ជាតិ​ ដើម្បី​​ស៊ើបអង្កេត​បន្ថែម​​ទៅ​វិញ។

វិទ្យុ​អាស៊ី​សេរី​មិន​អាច​ទាក់​ទង​ប្រធាន​គណៈកម្មាធិការ​ជាតិ​ប្រឆាំង​ទារុណកម្ម​លោក នុត សា​អាន ដើម្បី​សុំ​អត្ថាធិប្បាយ​​ជុំវិញ​បញ្ហា​នេះ​បាន​ទេ​ កាល​ពី​យប់​ថ្ងៃ​ទី​៦​ ខែកក្កដា​ ដោយ​ទូរស័ព្ទ​ចូល​ពុំ​មាន​អ្នក​ទទួល។

បង​ស្រី​បង្កើត​​លោក​ ពេជ្រ ធារ៉េត​ គឺ​លោក​ស្រី​ ពេជ្រ លីណា​​ បញ្ជាក់​ថា​ ក្រុម​គ្រួសារ​បាន​រង់​ចាំ​យុត្តិធម៌​អស់​រយៈ​ពេល​ជិត​ ៥​ ខែ​មក​ហើយ​ តែ​នៅ​មិន​ទាន់​ទទួល​បាន​​លទ្ធផល។​ លោក​ស្រី​ នៅ​តែ​មាន​ជំនឿ​ថា​ ជនរងគ្រោះ​ស្លាប់​ដោយ​សារ​ការ​ធ្វើ​ទារុណ​កម្ម​ធ្ងន់ធ្ងរ​ ពេល​ដែល​ប៉ូលិស​ កំពុង​សួរ​ចម្លើយ​ ពី​ព្រោះ​នៅ​លើ​ដង​ខ្លួន​ជន​រង​គ្រោះ​មាន​ស្នាម​វាយ​ដំ​ជា​ច្រើន​កន្លែង​ តាំង​ពី​ចុង​ជើង​រហូត​ដល់​ក្បាល៖ «ស្នើ​សុំ​ទៅ​សម្ដេច​អគ្គសេនាបតី​តេ​ជោ​ សូម​ឱ្យ​លោក​ជួយ​រក​យុត្តិធម៌​ដល់​គ្រួសារ​នាង​ខ្ញុំ​ផង​ ពី​ព្រោះ​អី​គ្រួសារ​នាង​ខ្ញុំ​ទទួល​នូវ​ភាព​អយុត្តិធម៌​ គឺ​ខ្លាំង។​ ដោយសារ​ប្អូន​ខ្ញុំ​មិន​មែន​អ្នក​ទោស​ទេ​ នៅ​ពេល​ដែល​លោក​អធិការ​ គាត់​យក​ប្អូន​ខ្ញុំ​ទៅ​សួរ​ចម្លើយ​រហូត​ដល់​ស្លាប់​ចឹង​ ហើយ​ឥឡូវ​ វា​អយុត្តិធម៌​ខ្លាំង​បំផុត​។ ខ្ញុំ​សូម​ឱ្យ​ជួយ​រក​យុត្តិធម៌​ដល់​គ្រួសារ​នាង​ខ្ញុំ​»។​​​

ជន​រងគ្រោះ​​ឈ្មោះ ពេជ្រ ធារ៉េត អាយុ​ ៣១ ឆ្នាំ និង​ប្រពន្ធ ឈ្មោះ ជា ច័ន្ទ​រចនា អាយុ ៣០​ ឆ្នាំ បាន​ស្លាប់​ក្នុង​ថ្ងៃ​ជាមួយ​គ្នា កាល​ពី​ថ្ងៃទី​៣ ខែ​មេសា ហើយ​បាន​បន្សល់​​ទុក​​កូន​ស្រី​តូចៗ​ចំនួន​ ២ ​នាក់​។ ជនរងគ្រោះ រស់​​នៅ​ក្នុង​ភូមិ​បោះ​ពោធិ៍ ឃុំ​អូរ​ដំបង​១ ស្រុក​សង្កែ ខេត្ត​បាត់ដំបង​។

លោក ពេជ្រ ធារ៉េត បាន​ស្លាប់​ក្នុង​ពេល​ប៉ូលិស​ចាប់​ឃុំ​ខ្លួន​សួរចម្លើយ​នៅ​ក្នុង​អធិការដ្ឋាន​នគរបាល​ស្រុក​សង្កែ អស់​រយៈពេល​ជាង​ ៣ ​ម៉ោង ពាក់ព័ន្ធ​នឹង​ការ​ចោទប្រកាន់​ថា លោក​រាយ​ខ្សែភ្លើង​អ​​​​​​​​​​​​​​​គ្គិសនី ដើម្បី​ឆក់​សម្លាប់​​ប្រពន្ធ​នៅ​ក្នុង​ផ្ទះ​ដោយសារ​ភ្លើង​ប្រច័ណ្ឌ។ ប៉ុន្តែ​សាក្សី​អះអាង​ថា ក្នុង​ពេល​កើតហេតុ ​លោក​ ពេជ្រ ធារ៉េត​ មិន​បាន​នៅ​ផ្ទះ​ឡើយ​។ ប៉ូលិស​ខេត្ត​បាត់ដំបងបក​ស្រាយ​ថា លោក ពេជ្រ ធារ៉េត ស្លាប់​ដោយសារ​គាំងបេះដូង ព្រោះ​ប្រើ​ថ្នាំញៀន​ហួស​កម្រិត។

​​ជុំ​វិញ​រឿង​នេះ ​មន្ត្រី​សម្របសម្រួល​សមាគម​ការពារ​សិទ្ធិមនុស្ស​អាដហុក​ (Adhoc) ខេត្ត​បាត់ដំបង លោក យិន ម៉េងលី មាន​ប្រសាសន៍​ថា​ គណៈកម្មាធិការ​ជាតិ​ប្រឆាំង​ទារុណកម្ម​ត្រូវ​ធ្វើ​ការ​ដោយ​ឯករាជ្យ​ ដើម្បី​ឱ្យ​ប្រជាពលរដ្ឋ​ និង​​មហាជនមាន​ជំនឿ​ទុកចិត្ត​៖ «​អ្វី​ដែល​យើង​ចង់​បាន​ គឺ​ពន្លឿន​នៃ​ការ​អង្កេត​ហ្នឹង​ទោះ​បី​លទ្ធផល​ហ្នឹង​វិជ្ជមាន​ក្តី​ អវិជ្ជមាន​ក្តី​ យើង​ចង់​បាន​ឱ្យ​វា​លឿន​ មិន​ចង់​ឱ្យ​អូស​បន្លាយ​រាប់​ខែ។​ គ្រាន់​តែ​ថា​ ធ្វើ​ទារុណ​កម្ម​ ឬ​មិន​ធ្វើ​ទារុណ​កម្ម​ វា​រាប់​ខែ​។​​យើង​ចង់​បាន​ឱ្យ​លឿន​ចេញ​លទ្ធផល​មក​ ទោះ​បី​វិជ្ជមាន​ក្តី​ អវិជ្ជមាន​ក្តី​ ទៅ​តាម​សមត្ថកិច្ច​ដែល​គាត់​អាច​ធ្វើ​បាន»

​ក្នុង​រយៈ​ពេល​ជាង​ ១ ឆ្នាំ​កន្លង​មក​នេះ​ នៅ​ខេត្ត​បាត់ដំបង​​មាន​ជន​ជាប់​ឃុំ​ចំនួន ​៣ នាក់​ហើយ​ ដែល​បាន​ស្លាប់​ក្នុង​​ពេល​សមត្ថកិច្ច​ឃុំ​ខ្លួន។ ការ​ស្លាប់​ទាំង​៣ ករណី​នេះ​​​​ សាកសព​សុទ្ធតែ​មាន​ស្នាម​ជាំ​នៅ​ដង​ខ្លួន​ ដៃ និង​ជើង​ ហើយ​​ក​របស់​ជនរងគ្រោះ​ភាគ​ច្រើន​ទន់​​ខុស​ប្រក្រតី​ ​។ ក្រសួង​ការបរទេស​អាមេរិក រក​ឃើញ​ថា ក្នុង​ឆ្នាំ២០២០ កន្លងទៅ មាន​ករណី​រំលោភបំពាន​សិទ្ធិ​មនុស្ស​គួរឲ្យ​កត់សម្គាល់​ ដែល​ប្រព្រឹត្ត​ដោយ​អាជ្ញាធររដ្ឋាភិបាល​កម្ពុជា ពាក់ព័ន្ធ​ទៅនឹង​ករណី​ធ្វើ​ទារុណកម្មក្នុងពេលឃុំខ្លួន ការ​ដាក់​ទោស​ទណ្ឌ​ ការ​ឃុំឃាំង​មនុស្ស​តាម​ទំនើងចិត្ត និង​ការប្រព្រឹត្ត​ប្រឆាំង​នឹង​អ្នកទោស​នយោបាយ ជាដើម ស្រប​ពេល​ដែល​កម្ពុជា​នៅតែ​គ្មាន​ប្រព័ន្ធ​តុលាការ​​ឯករាជ្យ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល