អតីតបុគ្គលិកវិទ្យុ វីអូឌី ជិត ៣០នាក់ បានដាក់ពាក្យសុំធ្វើការងាររដ្ឋនៅក្រសួងមុខងារសាធារណៈ តបតាមការអំពាវនាវរបស់លោក ហ៊ុន សែន បន្ទាប់វិទ្យុសំឡេងប្រជាធិបតេយ្យ វីអូឌី ដែលជាស្ថាប័នសារព័ត៌មានឯករាជ្យចុងក្រោយនៅកម្ពុជា ត្រូវបានរដ្ឋាភិបាលរម្លាយចោលទាំងតក់ក្រហល់។ មន្ត្រីអង្គការសង្គមស៊ីវិលចាត់ទុកការសម្រេចចិត្តនោះថា ជាសិទ្ធិសេរីភាពរបស់បុគ្គល ប៉ុន្តែ ពួកគេស្នើដល់រដ្ឋាភិបាលអនុញ្ញាតឱ្យវិទ្យុ វីអូឌីបើកដំណើរការឡើងវិញ ព្រោះវត្តមានសារព័ត៌មានឯករាជ្យជួយជំរុញរដ្ឋាភិបាលឱ្យអនុវត្តចំណុចខ្វះខាត និងគោលនយោបាយកាន់តែមានប្រសិទ្ធភាពថែមទៀត។
ថ្ងៃទី២៨ ខែកុម្ភៈនេះ គឺជាថ្ងៃចុងក្រោយ ដែលលោកនាយករដ្ឋមន្ត្រី ហ៊ុន សែន តាំងខ្លួនធ្វើជាបុរសចិត្តធម៌ ដោយទុកពេលឱ្យបុគ្គលិក វីអូឌី ដាក់ពាក្យចូលធ្វើការងាររដ្ឋ ឬចូលក្របខ័ណ្ឌមន្ត្រីរាជការសាធារណៈដោយមិនឆ្លងកាត់ការប្រឡងប្រជែងឡើយ។
អ្នកនាំពាក្យគណបក្សប្រជាជនកម្ពុជាលោក សុខ ឥសាន ប្រាប់វិទ្យុអាស៊ីសេរីថា គិតត្រឹមម៉ោង ១០ព្រឹក ថ្ងៃទី២៨ ខែកុម្ភៈ មានអតីតបុគ្គលិក វីអូឌី ចំនូន ២៥នាក់ ក្នុងនោះមានស្ត្រី ៦នាក់ បានដាក់ពាក្យស្នើសុំក្របខ័ណ្ឌរដ្ឋនៅក្រសួងមុខងារសាធារណៈ។ លោកបន្តថា ចំនួនអ្នកដាក់ពាក្យនឹងកើនឡើងជាងនេះ ព្រោះមុនឱសានវាទនៅម៉ោង ៥ល្ងាចមានអតីតបុគ្គល វីអូឌី មួយចំនួនទៀត កំពុងបំពេញឯកសារតាមលក្ខខ័ណ្ឌតម្រូវរបស់ក្រសួងនៅឡើយ។ លោក សុខ ឥសាន អះអាងថា ករណីផ្ដល់ក្របខ័ណ្ឌដោយមិនឆ្លងការប្រឡងនេះ គឺជាករណីពិសេស ហើយជាសិទ្ធិសម្រេចរបស់រដ្ឋាភិបាល។
លោក សុខ ឥសាន៖«ជាឆន្ទានុសិទ្ធិរបស់រដ្ឋាភិបាល ដើម្បីសម្រេចថា តើបងប្អូនអតីតបុគ្គលិក វីអូឌី ហ្នឹង ត្រូវចូលរបៀបម៉េច បើឱ្យបងប្អូនឆ្លងកាត់ការប្រឡងចូលវាមានជាប់វាមានធ្លាក់។ បងប្អូន ដែលមានចំនួនមានចំនួនច្រើនគួរសម គឺថា បងប្អូនមានការជឿទុកចិត្តលើប្រមុខរដ្ឋាភិបាលដែលទទួលខុសត្រូវក្នុងការរកការងារជូនបងប្អូន ដើម្បីដោះស្រាយការលំបាក»។
ក្រុមបុគ្គលិកសារព័ត៌មាន វីអូឌី ដែលមិនដាក់ពាក្យចូលធ្វើការងារក្របខ័ណ្ឌរដ្ឋតាមការប្រកាសរបស់លោកនាយករដ្ឋមន្ត្រី ហ៊ុន សែន ធ្លាប់លើកឡើងថា បើសិនរដ្ឋាភិបាលអនុញ្ញាតឱ្យសារព័ត៌មាន វីអូឌី បើកដំណើរការឡើងវិញ នឹងផ្ដល់ផលចំណេញច្រើនជាងការផ្ដល់ការងាររដ្ឋ ដែលស្ថិតនៅក្រោមគំនាបពីស្ថាប័ននោះ។ ចំណែកគណបក្សប្រឆាំង និងសង្គមស៊ីវិលចាត់ទុកការផ្ដល់បុណ្យស័ក្ដិ លាភសក្ការៈនៅតាមក្រសួងស្ថាប័នរដ្ឋ គឺជាអំពើពុករលួយផ្នែកនយោបាយ។
សារព័ត៌មាន វីអូឌី (VOD) ដែលជាផ្នែកមួយនៃមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យហៅកាត់ថា (CCIM) បានដំណើរការផ្សព្វផ្សាយព័ត៌មាននៅកម្ពុជាអស់រយៈពេល ២០ឆ្នាំមកហើយ ដោយប្រកាន់ជំហរឯករាជ្យ និងប្រកបដោយវិជ្ជាជីវៈ។ បើគិតត្រឹមរដ្ឋាភិបាលលុបចោលអាជ្ញាប័ណ្ណកាលថ្មីៗ នេះ ស្ថាប័នព័ត៌មាននេះមានបុគ្គលិកបម្រើការងារផ្នែកសារព័ត៌មាន និងបច្ចេកទេសផ្សេងទៀត ប្រមាណ ៤០នាក់ សម្រាប់ផលិតព័ត៌មានចម្រុះ ដូចជា នយោបាយ សិទ្ធិមនុស្ស អភិបាលកិច្ច រួមទាំងបញ្ហាសង្គម វិវាទដីធ្លី និងបរិស្ថានជាដើម។
ក្រសួងព័ត៌មានបានប្រកាសលុបចោលអាជ្ញាប័ណ្ណរបស់សារព័ត៌មាន វីអូឌី កាលនៅថ្ងៃទី១៣ ខែកុម្ភៈ តាមបញ្ជាដ៏តក់ក្រហល់របស់លោក ហ៊ុន សែន ដោយប្រើពេលមិនដល់ ២៤ម៉ោងផង។ លោក ហ៊ុន សែន ចោទប្រកាន់ថា វីអូឌី បានរំលោភលើវិជ្ជាជីវៈសារព័ត៌មាន និងធ្វើឱ្យប៉ះពាល់ដល់កិត្តិយសរដ្ឋាភិបាល និងកូនប្រុសរបស់លោកបន្ទាប់ពីចុះផ្សាយព័ត៌មានទាក់ទងនឹង លោក ហ៊ុន ម៉ាណែត ផ្ដល់ជំនួយឱ្យតួគី ជំនួសលោក ហ៊ុន សែន ដែលជាឪពុក។ បន្ទាប់មកលោក ហ៊ុន សែន បានប្រកាសថា រដ្ឋាភិបាលរបស់លោក នឹងមិនអនុញ្ញាតឱ្យសារព័ត៌មាន វីអូឌី មានជីវិតវិញឡើយ ទោះក្នុងតម្លៃណាក៏ដោយ។
ទោះជាយ៉ាងណាក្ដី អ្នកឃ្លាំមើលស្ថានការណ៍សង្គមយល់ឃើញថា ការសម្រេចចិត្តរបស់លោក ហ៊ុន សែន ខុសពីបុព្វហេតុខាងដើម ដែលដំបូងឡើយលោកចង់បានត្រឹមតែឱ្យសារព័ត៌មាន វីអូឌី សុំទោសតែប៉ុណ្ណោះ ហើយករណីនេះបញ្ជាក់ថា វិទ្យុ វីអូឌី មិនបានប្រព្រឹត្តកំហុសធ្ងន់ធ្ងរអ្វីឡើយ។ ពួកគេយល់ថា ការលុបអាជ្ញាប័ណ្ណវិទ្យុ វីអូឌី មិនមានហេតុផលសមរម្យ ដែលធ្វើឱ្យលោក ហ៊ុន សែន ទទួលរងការរិះគន់ធ្ងន់ធ្ងរពីប្រជាពលរដ្ឋ សហគមន៍អន្តរជាតិ និងអង្គការសង្គមស៊ីវិល ទើបបានជាលោកចោទប្រកាន់លើស្ថាប័នមួយនេះ។
មាត្រា១០ នៃច្បាប់ស្ដីពីរបបសារព័ត៌មាន មិនបានចែងឱ្យដកអាជ្ញាប័ណ្ណសារព័ត៌មាននោះទេ ដោយមាត្រានេះ គ្រាន់តែបង្គាប់ឱ្យសារព័ត៌មានកែតម្រូវអត្ថបទ ដែលនាំឱ្យប៉ះពាល់ដល់បុគ្គលសាធារណៈ ឬសងជាជំងឺចិត្តដល់ដើមបណ្ដឹងរដ្ឋប្បវេណីតែប៉ុណ្ណោះ។
ជុំវិញរឿងនេះ ប្រធានស្ដីទីសារព័ត៌មាន វីអូឌី (VOD) លោក អ៊ិត សុធឿត ប្រាប់វិទ្យុអាស៊ីសេរីថា ការដែលបុគ្គល វីអូឌី ដាក់ពាក្យសុំក្របខ័ណ្ឌរដ្ឋ ឬអត់នោះ គឺជាសិទ្ធិសេរីភាពរបស់ពួកគេ។ ទោះយ៉ាងណាក្ដី លោកនៅតែសោកស្ដាយ ចំពោះរដ្ឋាភិបាលដកហូតអាជ្ញាធរប័ណ្ណ វីអូឌី ដែលជាសារព័ត៌មានដើរតួនាទីសំខាន់ក្នុងការនាំសំឡេងពិតរបស់ពលរដ្ឋផ្ញើជូនរដ្ឋាភិបាលជាដើម។ លោកសង្ឃឹមថា វីអូឌី នឹងអាចបន្តបេសកកម្មបន្តទៀត ដើម្បីផ្សព្វផ្សាយព័ត៌មាន លើកកម្ពស់ប្រព័ន្ធផ្សព្វផ្សាយឯករាជ្យ និងលើកកម្ពស់សេរីភាពបញ្ចេញមតិនៅកម្ពុជា។
លោក អ៊ិត សុធឿត៖«កម្ពុជាយើងមានរដ្ឋធម្មនុញ្ញ ដែលធានាដល់សេរីភាពសារព័ត៌មាន ក៏សិទ្ធិទទួលបានព័ត៌មានរបស់ប្រជាពលរដ្ឋគ្រប់រូប ហើយក្នុងនោះយើងមានច្បាប់ស្តីពីរបបសារព័ត៌មាន ដែលបង្ហាញពីការលើកទឹកចិត្ត ឬលើកកម្ពស់ដល់សេរីភាពសារព័ត៌មាន អ៊ីចឹង វីអូឌី យើងសង្ឃឹមថាសេរីភាពទាំងអស់នោះនឹងត្រូវបានបន្តលើកកម្ពស់ ដូចជា ការផ្ដល់ឱកាសឱ្យមានសារព័ត៌មានឯករាជ្យ ដូចជា វីអូឌី ជាដើមនេះ»។
ស្រដៀងគ្នានេះដែរ អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា កត់ស្គាល់ថា ការបិទវិទ្យុសំឡេងប្រជាធិបតេយ្យ វិអូឌី ធ្វើឡើងមិនប្រក្រតី និងអនុវត្តមិនបានត្រឹមត្រូវ តាមច្បាប់ស្ដីពីរបបសារព័ត៌មាននោះទេ។ លោករំឭកថា សិទ្ធិសេរីភាពសារព័ត៌មាន ដែលនិយាយការពិត និងរក្សាជំហរឯករាជ្យ គឺមានសារៈសំខាន់នៅក្នុងសង្គមប្រជាធិបតេយ្យ។ លោកអំពាវនាវដល់រដ្ឋាភិបាលគួរបើកលំហសេរីភាពសារព័ត៌មាន ហើយអនុញ្ញាតឱ្យវិទ្យុ វីអូឌី ដំណើរការឡើងវិញ។
លោក ស៊ឹង សែនករុណា៖«ចំណុចដែលយើងចង់បានមិនខុសពីការស្នើឡើងពីអង្គការដៃគូដែលយើងបានចេញសេចក្ដីថ្លែងការណ៍ រួមទាំង សហគមន៍អន្តរជាតិនោះទេ យើងចង់ឃើញយ៉ាងណា បើកនូវលំហឱ្យសេរីភាពសារព័ត៌មាននេះ បានល្អប្រសើរឡើងវិញ ហើយបើសិនអាចធ្វើបាន ឱ្យបើកវិទ្យុសំឡេងប្រជាធិបតេយ្យឡើងវិញ»។
ការលុបអាជ្ញាប័ណ្ណវិទ្យុ វីអូឌី ក្រោមហេតុផលមិនសមរម្យរបស់លោកនាយករដ្ឋមន្ត្រី ហ៊ុន សែន បានធ្វើឱ្យកក្រើកពិភពលោក ដោយរងការរិះគន់ និងថ្កោលទោសពីសំណាក់ប្រជាពលរដ្ឋ ក្រុមប្រទេសប្រកាន់ប្រជាធិបតេយ្យ អង្គការសង្គមស៊ីវិល សហគមន៍ជាតិ និងអន្តរជាតិថាប្រើអំណាចរឹតត្បិតសេរីភាពសារព័ត៌មាន ប្រាសចាកពីគោលការណ៍ច្បាប់។ អ្នកតាមដានសង្គម មើលឃើញថា រដ្ឋាភិបាលលោក ហ៊ុន សែន កំពុងព្យាយាមលាងជម្រះខ្លួនឱ្យស្អាតតាមរយៈហេតុផលផ្សេងៗ ក្រោយដិតដាមស្នាមប្រឡាក់នឹងអំពើពុករលួយ ការបំផ្លាញប្រជាធិបតេយ្យ និងនីតិរដ្ឋ ការរំលោភសិទ្ធិមនុស្ស និងរំលាយប្រព័ន្ធផ្សព្វផ្សាយឯករាជ្យដែលផ្សាយធ្វើឱ្យប៉ះពាល់ប្រយោជន៍របស់បក្សកាន់អំណាច៕