ក្រុមមន្ត្រីសិទ្ធិមនុស្សអំពាវនាវឲ្យរដ្ឋាភិបាលលោក ហ៊ុន សែន ពិចារណាទម្លាក់ចោលការចោទប្រកាន់និងដោះលែងសកម្មជនសិទ្ធិមនុស្ស និងបរិស្ថាន ដូចដែលតុលាការលើកលែងការចោទប្រាកាន់អ្នកវិភាគនយោបាយបណ្ឌិត សេង សារី។ ពួកគេយល់ថា ការចាប់និងការចោទលើសកម្មជនទាំងនោះ ក៏អាចជាការភ័ន្តច្រឡំពីគោលបំណងនៃការបញ្ចេញមតិរបស់ពួកគេទាំងនោះដែរ។
ក្រោយពីលោកនាយករដ្ឋមន្ត្រី ហ៊ុន សែន ដកដីកាចាប់ខ្លួនអ្នកវិភាគនយោបាយបណ្ឌិត សេង សារី មក មន្ត្រីសិទ្ធិមនុស្ស ក៏ចង់ឃើញលោក ហ៊ុន សែន ផ្តល់យុត្តិធម៌ដល់សកម្មជនសិទ្ធិមនុស្ស និងសកម្មជនបរិស្ថានដែលកំពុងជាប់ឃុំដែរ។
នាយកប្រតិបត្តិអង្គការតម្លាភាពកម្ពុជាលោក ប៉ិច ពិសី ថ្លែងថា សកម្មភាពរបស់លោក រ៉ុង ឈុន និងសកម្មភាពយុវជនការពារបរិស្ថាន គឺគ្មានចំណុចណាដែលបញ្ជាក់ពីបទល្មើសនោះទេ ពោលគឺពួកគាត់គ្រាន់តែបញ្ចេញមតិខ្វាយខ្វល់ពីបញ្ហាសង្គម និងបរិស្ថានដែលស្របតាមច្បាប់ប៉ុណ្ណោះ។ លោកស្នើសុំឲ្យរដ្ឋាភិបាល និងតុលាការលើកលែងការចោទប្រកាន់ប្រឆាំងពួកគាត់ដូចករណីបណ្ឌិត សេង សារីដែរ និងដោះលែងពួកគាត់ឲ្យមានសេរីភាពឡើងវិញ ដើម្បីបន្តចូលរួមការងារសង្គមតទៅទៀត៖ «ការបង្កលក្ខណៈឲ្យមានមតិត្រឡប់ ឬមានការរិះគន់ពីគ្រប់និន្នាការទាំងអស់ និន្នាការណាក៏ដោយ នយោបាយក្តី សាសនាក្តី វប្បធម៌ក្តី សិទ្ធិសេដ្ឋកិច្ចផ្សេងៗទៀតយើងគួរតែបើកចំហរ ព្រោះមានតែការជជែក ការរិះគន់នេះទេ ដែលនាំឲ្យមានការរីកចម្រើនដល់ប្រទេសជាតិទាំងមូល។ខ្ញុំគិតថា មកដល់ពេលនេះ កម្ពុជា មានធនធានមនុស្សគ្រប់គ្រាន់នៅក្នុងការធ្វើកិច្ចការដោយខ្លួនឯង ដូច្នេះយើង គួរតែបង្កលទ្ធភាពឲ្យបញ្ញវន្តដែលចេះដឹងចូលរួមកិច្ចការសង្គម»។
លោក ប៉ិច ពិសី បន្តថា ប្រសិនបើរដ្ឋាភិបាលធ្វើទុក្ខបុកម្នេញ ឬមិនបើកឱកាសឲ្យបញ្ញវន្តបញ្ចេញសមត្ថភាពចូលរួមកសាងសង្គមជាតិទេ នឹងធ្វើឲ្យពួកគេអស់សង្ឃឹមហើយរត់ភៀសខ្លួនទៅរស់នៅប្រទេសជឿនលឿន ដែលនាំឲ្យខាត់បង់សម្រាប់ជាតិកម្ពុជាធ្ងន់ធ្ងរ៖ «កាលណាគាត់ចេះដឹងហើយគាត់អត់មានឱកាសបញ្ចេញសមត្ថភាពឲ្យអស់សក្តានុពលក្នុងការកសាងសង្គមជាតិ កសាងគ្រួសារខ្លួនឯង គឺគាត់ សម្រេចចិត្តជ្រើសរើសទៅរស់នៅប្រទេសក្រៅ ដែលធ្វើឲ្យបាត់បង់ខួក្បាលអ្នកចេះដឹងនៅក្នុងសង្គមយើង។គាត់ទៅរស់នៅអូស្ត្រាលី ទៅនៅបារាំង អង់គ្លេស អាមេរិក ដែលជាប្រទេសមានអ្នកចេះដឹងច្រើនទៅហើយ ហើយយើងដែល ជាប្រទេសត្រូវការអ្នកចេះដឹង តែដោយសារយើងអត់ផ្តល់ឱកាសជូនគាត់ ហើយជារឿងធម្មតាទេ យើងក៏មិនបន្ទោសគាត់ទេ គឺគាត់ ត្រូវតែជ្រើសរើសផ្លូវមួយដែលចំណេញខ្លួនឯង ព្រោះគាត់មានឱកាសធំធេងនៅប្រទេសផ្សេងទទួលបានសិទ្ធិសេរីភាព ក៏ដូចប្រយោជន៍សេដ្ឋកិច្ចផ្សេងៗ»។
ជាមួយគ្នានេះ ប្រធានផ្នែកកម្មវិធីស្រាវជ្រាវនិងតស៊ូមតិនៃសមាគមបណ្តាញយុវជនកម្ពុជា(CYN)លោក ហេង គឹមហុង លើកឡើងថា រដ្ឋាភិបាលគួរតែពិចារណាដោះលែងលោក រ៉ុង ឈុន និងយុវជនសង្គម យុវជនបរិស្ថានឲ្យមានសេរីភាពឡើងវិញ ព្រោះសកម្មភាពរបស់ពួកគាត់ ក៏ជាការអនុវត្តសិទ្ធិស្របច្បាប់ដូចបណ្ឌិត សេង សារី ដែរ៖ «យើងគ្រប់គ្នា សុទ្ធតែបានដឹងបានលឺហើយមិនខុសពីសំណុំរឿងទាក់ទិនជាមួយបណ្ឌិត សេង សារី ទេ គឺសកម្មជនទាំងអស់នោះទោះបីជាពេលខ្លះ គាត់និយាយគំរោះគំរើយ ព្រោះធម្មតាពាក្យពិត រ៉ែងស្លែង ប៉ុន្តែអត្ថន័យខ្លឹមសារឬក៏អ្វីដែលពួកគាត់ចូលរួមនេះ គឺគ្រាន់តែចង់ការពារប្រយោជន៍រួមនៃសង្គមទេ មិនមែនជាអ្នកប្រព្រឹត្តបទឧក្រិដ្ឋឯណា»។
ការលើកឡើងបែបនេះ បន្ទាប់ពីលោកនាយករដ្ឋមន្ត្រី ហ៊ុន សែន កាលពីថ្ងៃទី២០ ខែកញ្ញា បានផ្លាស់ប្តូរចិត្តរបស់លោក ដោយស្នើដល់ស្ថាប័នតុលាការឲ្យដកហូតដីកាចាប់ខ្លួនបណ្ឌិត សេង សារី មកវិញ ក្រោយពីលោកអះអាងថា លោកបានស្តាប់ការបកស្រាយរបស់អ្នកវិភាគរូបនេះ។ការលើកលែងការចោទប្រកាន់នេ ធ្វើឡើង៤ថ្ងៃក្រោយពីលោក ហ៊ុន សែន បានប្រកាសតាមចាប់ខ្លួនបណ្ឌិតសេង សារី ពាក់ព័ន្ធនឹងការបង្ហោះទស្សនៈវិភាគនៅលើបណ្ដាញសង្គមហ្វេសប៊ុក(Facebook) អំពីលក្ខខណ្ឌ៦ចំណុចដែលអាចបង្កើតរដ្ឋាភិបាលបង្រួបបង្រួមជាតិតាមការអំពាវនាវរបស់លោកសម រង្ស៊ី។
ទាក់ទងនឹងករណីនេះ ប្រធានសមាគមគ្រូបង្រៀនកម្ពុជាឯករាជ្យ និងជាសហការីជិតស្និទ្ធរបស់លោក រ៉ុង ឈុន គឺអ្នកស្រី អ៊ុក ឆាយ៉ាវី និយាយថា ការលើកលែងទោសដល់បណ្ឌិត សេង សារី ដោយសារលោក ហ៊ុន សែន បានស្តាប់ការបកស្រាយហើយឈប់ភ័ន្តច្រឡំលើការបញ្ចេញមតិរបស់គាត់។អ្នកស្រី បន្តថាលោក ហ៊ុន សែន គួរដោះលែងលោក រ៉ុង ឈុន និងអ្នកកំពុងជាប់ឃុំដោយអយុត្តិធម៌ផ្សេងៗទៀត៖ «លោកនាយកមន្ត្រី លើកលែងការចោទប្រកាន់លើ លោក សេង សារី អ៊ីចឹង ខ្ញុំគិតថា លោកនាយករដ្ឋមន្ត្រី គួរពិចារណាលើកលែងទោស លោក រ៉ុង ឈុន និងអ្នកដែលជាប់ពន្ធនាគារទាំងអយុត្តិធម៌ទាំងអស់នោះផងដែរ។ ពួកគាត់ គ្មានចេតនាទៅបំផ្លាញប្រទេសជាតិ ទៅនាំឲ្យវឹកវរដល់សន្តិសុខសង្គមទេ គឺពួកគាត់ធ្វើនេះគ្រាន់តែសម្តែងមតិ ហើយការដែលចាប់នេះគឺចាប់ទាំងអត់មានកំហុស ដូច្នេះគួរតែលើកលែងទោសឲ្យពួកគាត់ទាំងអស់គ្នា ជួបជុំក្រុមគ្រួសារគាត់វិញ ហើយឲ្យគេមើលឃើញថា ខ្មែរយើង ចេះអធ្យាស្រ័យឲ្យគ្នា»។
ជុំវិញរឿងនេះ វិទ្យុអាស៊ីសេរី មិនអាចសុំការឆ្លើយតបពីប្រធានអង្គភាពអ្នកនាំពាក្យរដ្ឋាភិបាលលោក ផៃ ស៊ីផាន និងអ្នកនាំពាក្យគណបក្សកាន់អំណាចលោក សុខ ឥសាន បានទេ ដោយទូរស័ព្ទចូលពុំមានអ្នកទទួល។
អាជ្ញាធរបានចាប់ខ្លួនលោក រ៉ុង ឈុន កាលពីយប់ថ្ងៃទី៣១ ខែកក្កដា ឆ្នាំ២០២០ ក្រោយពីលោកចេញសេចក្តីថ្លែងការណ៍ និងផ្តល់បទសម្ភាសដល់អ្នកសារព័ត៌មានទាក់ទងនឹងការលើកឡើងរបស់ប្រជាកសិករខ្មែរអំពីបញ្ហាបាត់ដីធ្លីនៅក្បែរតំបន់ព្រំដែនក្នុងខេត្តត្បូងឃ្មុំ ទៅប្រទេសវៀតណាម។ក្រោយមក អាជ្ញាធរ ក៏បានចាប់ខ្លួនអ្នកនយោបាយព្រះសង្ឃ រួមទាំងយុវជនជាច្រើននាក់ដាក់ពន្ធនាគារជាបន្តបន្ទាប់ ដោយសារការតវ៉ាដោយសន្តិវិធីទាមទារឲ្យដោះលែងលោក រ៉ុង ឈុន។ បន្ទាប់មកអាជ្ញាធរ ក៏បានចាប់ខ្លួនយុវជនការពារបរិស្ថានបីនាក់ គឺលោក ថុន រដ្ឋា កញ្ញា ភួន កែវរស្មី និងកញ្ញា ឡុង គន្ធា ដោយសារទាមទារឲ្យបញ្ឈប់លុបបឹងតាមោក។ តុលាការក្រុងភ្នំពេញបានកាត់ទោសលោក រ៉ុង ឈុន និងសកម្មជនចំនួនទៀតឲ្យជាប់ពន្ធនាគារចន្លោះពី១ឆ្នាំកន្លះទៅ២ឆ្នាំ និងមួយចំនួនទៀតកំពុងរង់ចាំការជំនុះជម្រះ និងកាត់ទោស ក្នុងបទប្រកាន់ដូចៗគ្នា គឺបទ «ញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម»។កាលពីមិថុនា ឆ្នាំ២០២១ អាជ្ញាធរក្រុងភ្នំពេញ ក៏បានចាប់ឃុំខ្លួនយុវជនការពារបរិស្ថាន៣នាក់បន្ថែមទៀត ដោយចោទពីបទរួមគំនិតក្បត់ និងប្រមាថព្រះមហាក្សត្រ ពាក់ព័ន្ធការងារបរិស្ថាន។ តុលាការ ក៏បានបន្ថែមបទចោទថ្មីនេះទៅលើយុវជនបរិស្ថាន៣នាក់ដែលបានកាត់ទោសរួចនោះផងដែរ។
ទោះជាយ៉ាងណា ក្រុមអង្គការជាតិនិងអន្តរជាតិ ព្រមទាំងក្រុមប្រទេសប្រជាធិបតេយ្យបានថ្កោលទោសចំពោះការចាប់ខ្លួនសកម្មជនទាំងនេះថាធ្វើឡើងដោយគ្មានមូលដ្ឋានច្បាប់ និងទាមទារឲ្យរដ្ឋាភិបាល ប្រគល់សេរីភាពជូនពួកគេឡើងវិញដោយឥតលក្ខខណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។