អាជ្ញាធរក្រុងភ្នំពេញបង្ខំព្រះសង្ឃមួយអង្គឱ្យផ្ដិតមេដៃបញ្ឈប់ធ្វើសកម្មភាពសង្គម
2024.08.14
(រូបឯកសារ) ព្រះតេជព្រះគុណ ធូ វ៉ាឃីម ជាព្រះសង្ឃ ដែលអាជ្ញាធរភ្នំពេញបង្ខំឱ្យធ្វើកិច្ចសន្យាឈប់ឈឺឆ្អាលរឿងសង្គម នៅថ្ងៃទី១៣ ខែសីហា ឆ្នាំ២០២៤។
រូប៖ ព្រះសង្ឃផ្ដល់ឱ្យ
អាជ្ញាធរខណ្ឌចម្ការមនរាជធានីភ្នំពេញ បានបង្ខំឱ្យព្រះសង្ឃមួយអង្គដែលសកម្មនឹងកិច្ចការសង្គមត្រូវតែផ្ដិតមេដៃ ធ្វើកិច្ចសន្យា ឈប់ឈឺឆ្អាលសកម្មភាពសង្គម បើពុំដូច្នេះទេសមត្ថកិច្ចនឹងចាត់វិធានការច្បាប់។
ព្រះសង្ឃដែលអាជ្ញាធរបង្ខំឱ្យធ្វើកិច្ចសន្យាឈប់ឈឺឆ្អាលរឿងសង្គម គឺព្រះតេជគុណ ធូ វ៉ាឃីម គង់នៅវត្តនួនមណីរាម ហៅវត្តថាន់ ឋិតក្នុងខណ្ឌចំការមន រាជធានីភ្នំពេញ មិនខ្លាចរអា ចំពោះការគំរាមកំហែង និងការដាក់សម្ពាធ របស់អាជ្ញាធរក្រុងភ្នំពេញនោះទេ។ ព្រះសង្ឃអង្គនេះយល់ថា សកម្មភាពរបស់ព្រះអង្គ ជារឿងត្រឹមត្រូវស្របតាមរដ្ឋធម្មនុញ្ញ។
ព្រះតេជព្រះគុណ ធូ វ៉ាឃីម មានថេរដីកាប្រាប់វិទ្យុអាស៊ីសេរីថា នៅរយៈពេល ១សប្តាហ៍កន្លងទៅនេះ អាជ្ញាធររាជធានីភ្នំពេញប្រមាណ ១០នាក់ ខ្លះស្លៀកពាក់ស៊ីវិល និងខ្លះទៀត ពាក់ឯកសណ្ឋានជានគរបាល បានចុះឃ្លាំមើល និងមកសួរនាំព្រះអង្គដល់វត្តដែលព្រះអង្គគង់នៅ ដើម្បីដាក់សម្ពាធឱ្យព្រះអង្គ ផ្ដិតមេដៃធ្វើកិច្ចសន្យា ឈប់ឈឺឆ្អាលកិច្ចការសង្គមជាតិ។
ព្រះអង្គបន្ថែមថា អាជ្ញាធរបានរងសម្ពាធពីថ្នាក់លើតៗគ្នា ទើបបង្ខំឱ្យព្រះអង្គ ត្រូវតែផ្តិតមេដៃ តាមបញ្ជារបស់ថ្នាក់លើ ហើយម្យ៉ាងទៀត ព្រះចៅអធិការវត្តដែលព្រះអង្គកំពុងគង់នៅក៏រងសម្ពាធពីអាជ្ញាធរដែរ។
ព្រះតេជព្រះគុណ៖ ធូ វ៉ាឃីម៖ «តាមពិតទៅរឿងនេះ គឺលែងយកច្បាប់មកនិយាយហើយ គឺយកការគំរាមកំហែងមកនិយាយជាជាង ឱ្យយើងឈប់ធ្វើសកម្មភាពរឿងសង្គមជាតិ ហើយទង្វើសកម្មភាពការធ្វើរបស់អាត្មាគឺមិនអាចចោលបាននោះទេ គឺនៅតែធ្វើដដែល។ អាត្មាមិនអាចធ្វើតាមសន្យាបានទេ បើអាត្មាទៅធ្វើតាមកិច្ចសន្យានោះមានន័យថាបំបិទខ្លួនឯង ក៏ដូចជាបំបិទឧត្ដមគតិខ្លួនឯង»។
កាលពីថ្ងៃទី១៣ ខែសីហា អាជ្ញាធរខណ្ឌចម្ការមនរាជធានីភ្នំពេញ ប្រមាណ ១០នាក់ បានធ្វើដំណើរដល់វត្តនួនមណីរាម ហៅវត្តថាន់ ដោយបង្ខំឱ្យព្រះតេជព្រះគុណ ធូ វ៉ាឃីម ផ្ដិតមេដៃធ្វើកិច្ចសន្យាឈប់ឈឺឆ្អាលរឿងសង្គម។
ក្នុងកិច្ចសន្យា អាជ្ញាធរសរសេរថា ព្រះតេជព្រះគុណ ធូ វ៉ាឃីម ត្រូវឈប់ធ្វើធម្មយាត្រា និងធ្វើបាតុកម្មផ្សេងៗ ពាក់ព័ន្ធរឿងនយោបាយ ក៏ប៉ុន្តែប្រសិនបើព្រះសង្ឃអង្គនេះមិនអនុវត្តតាមទេ អាជ្ញាធរនឹងមានវិធានការច្បាប់។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះ ពីអ្នកនាំពាក្យសាលារាជធានីភ្នំពេញ លោក លោក ម៉េត មាសភក្តី បាននៅឡើយទេនៅថ្ងៃទី១៤ សីហា។
រីឯអ្នកនាំពាក្យក្រសួងធម្មការ និងសាសនា លោក សេង សុមុនី ក៏មិនទាន់អាចសុំការអធិប្បាយបានដែរ។
ព្រះតេព្រះគុណ ធូ វ៉ាឃីម ជានិស្សិតច្បាប់ឆ្នាំទី៣ នៃសកលវិទ្យាល័យមួយ នៅរាជធានីភ្នំពេញ។ កន្លងទៅព្រះសង្ឃអង្គនេះបានធ្វើសកម្មភាពសង្គមជាច្រើន រួមមាន ការការពារព្រៃឈើ ឃ្លាំមើលបញ្ហាដីធ្លី ទាមទារយុត្តិធម៌សង្គម និងជំទាស់ ចំពោះការអនុវត្តច្បាប់លើយុវជនចលនាមាតាធម្មជាតិទាំង ៥រូប ដាក់ពន្ធនាគារ ព្រមទាំងមិនពេញចិត្ត ចំពោះការចាប់ខ្លួនប្រធានសមាគមសម្ពន្ធនិស្សិតបញ្ញាវន្តខ្មែរ លោក កើត សារ៉ាយ ដាក់ពន្ធនាគារជាដើម។
ជាមួយគ្នានេះ ព្រះតេជព្រះគុណអង្គនេះ បានផលិតវីដេអូ បង្ហាញពីស្ថានភាពអភិវឌ្ឍន៍តាមតំបន់ព្រំដែនកម្ពុជា-វៀតណាម ក្នុងខេត្តមួយចំនួន ដែលអាជ្ញាធរខ្មែរទុកដីឱ្យនៅទំនេរចោល ផ្ទុយពីប្រទេសវៀតណាម ដែលក្នុងវីដេអូនោះមានចំនួនអ្នកចូលមើលជាច្រើនម៉ឺននាក់។
សំឡេងក្នុងវីដេអូ ព្រះតេជគុណ ធូ វ៉ាឃឹម៖ «អាត្មាបានមកដល់ព្រំដែនកម្ពុជា និងវៀតណាមអាត្មាមើលឃើញថា ប៉ែកខាងនេះបែកខាងវៀតណាម និយាយរួមទៅខាងវៀតណាមគេមិនចូលចិត្តទុក្ខដីឱ្យទំនេរទេ គេចូលចិត្តដាំអំពៅធ្វើស្រែធ្វើចម្ការផ្សេងៗ ជាដើម និយាយរួមទៅគឺខៀវស្រងាត់តែម្ដងដីខាងវៀតណាមឮ ឯខាងដីខ្មែរយើងវិញ គឺអត់មានអីទេ ស្រឡះល្វឹងតែម្ដង»។
ទាក់ទងរឿងនេះដែរ ព្រះសង្ឃគង់នៅប្រទេសកាណាដា ព្រះតេជព្រះគុណ ម៉ិញ សុខមីល ដែលតែងតែចេញវីដេអូឈឺឆ្អាលរឿងសង្គម និងនយោបាយ បានចាត់ទុកទង្វើរបស់អាជ្ញាធររាជធានីភ្នំពេញថា ជាការបំបិទសិទ្ធិសេរីភាពព្រះសង្ឃធ្ងន់ធ្ងរ ផ្ទុយពីច្បាប់។ ព្រះអង្គអំពាវនាវឱ្យព្រះសង្ឃគ្រប់ៗ ព្រះអង្គ ត្រូវសាមគ្គីគ្នា ក្រោកឈរតវ៉ាប្រឆាំងចំពោះទង្វើរឹតត្បិតទាំងនេះ។
ព្រះតេជព្រះគុណ ម៉ិញ សុខមីល៖ «សូមអំពាវនាវដល់គុណម្ចាស់គ្រប់ព្រះអង្គទាំងអស់ ប្រាំមួយម៉ឺន ប្រាំពីរម៉ឺនអង្គ បើយើងក្រោកតែម្នាក់ពីរនាក់មុខតែគណៈសង្ឃគាត់ជិះជាន់ហើយ តែបើលោកក្រោកច្រើនអង្គ គឺលោកមិនហ៊ានជាមួយកម្លាំងសាមគ្គីរបស់សាមណៈសង្ឃទេ។ អញ្ចឹងគ្រប់អង្គតស៊ូឡើងដើម្បីទឹកដីយើង ដើម្បីបង្ហាញព័ត៌មានពិតចែកជូនញាតិញោមឱ្យយល់ដឹងពីបញ្ហាសង្គម»។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត ពន្យល់ថា ព្រះសង្ឃមានសិទ្ធិចូលរួមសកម្មភាពសង្គម ដើម្បីផលប្រយោជន៍រួមរបស់ជាតិ ក៏ប៉ុន្តែប្រសិនបើមានការគំរាមកំហែងពីសំណាក់អាជ្ញាធរណាមួយ គឺជាការរំលោភសិទ្ធិសេរីភាពព្រះសង្ឃធ្ងន់ធ្ងរ។
លោក អំ សំអាត៖ «នៅពេលដែលព្រះសង្ឃលោកចូលរួមនៅក្នុងកិច្ចការងារសង្គម គឺអត់មានអីខុសទេតាមផ្លូវច្បាប់ ផ្ទុយទៅវិញ អ្នកដែលធ្វើការរារាំង គំរាមកំហែងបំបិទសិទ្ធិទៅវិញទេដែលអនុវត្តតួនាទីហើយរំលោភបំពានទៅលើសិទ្ធិសេរីភាពរបស់នោះ»។
ព្រះតេជព្រះគុណ ធូ វ៉ាឃីម បន្ថែមថា ការសម្រេចចិត្តផ្ដិតមេដៃធ្វើកិច្ចសន្យា តាមសំណើរបស់អាជ្ញាធរ គ្រាន់តែជាការរំដោះខ្លួន ដើម្បីបង្គ្រប់កិច្ចតែប៉ុណ្ណោះ ព្រោះបើផ្អែកតាមច្បាប់ ការផ្ដិតមេដៃដោយបង្ខំ ពុំមែនជាការស្ម័គ្រចិត្ត មិនអាចយកជាផ្លូវការបានឡើយ។ ព្រះអង្គប្ដេជ្ញាថា នឹងបន្តសកម្មភាពសង្គម ដែលច្បាប់អនុញ្ញាត បើទោះបីជារងការគំរាមកំហែង និងសម្ពាធក្ដី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កម្មករវៀតណាមកំពុងសម្ងំធ្វើការក្នុងក្រុមហ៊ុនចម្ការចេកខេត្តរតនគិរី
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
