ខ្មែរក្រោម​សោកស្ដាយ​ដែល​អាជ្ញាធរ​មិន​អនុញ្ញាត​ឱ្យ​ដាក់​ញត្តិ​តាម​ទូត​ដើម្បី​ទាមទារ​ឱ្យ​វៀតណាម​ដោះលែង​សកម្មជន​ខ្មែរក្រោម

0:00 / 0:00

ខ្មែរ​ក្រោម​សោកស្ដាយ ដែល​អាជ្ញាធរ​ក្រុងភ្នំពេញ​មិន​អនុញ្ញាត​ឱ្យ​ពួកគេ​ហែ​ញត្តិ​ដាក់​តាម​ស្ថានទូត ដើម្បី​ទាមទារ​ឱ្យ​វៀតណាម​ដោះលែង​សកម្មជន​ខ្មែរក្រោម​ចំនួន ៤​នាក់ ដែល​រដ្ឋាភិបាល​វៀតណាម​ចាប់​ឃុំ​ខ្លួន ដោយសារតែ​ការ​ផ្សព្វផ្សាយ​សៀវភៅ​សិទ្ធិ​ជនជាតិ​ដើម។ មន្ត្រី​សង្គម​ស៊ីវិល យល់​ឃើញ​ថា ការ​មិន​អនុញ្ញាត​ឱ្យ​សមាគម​ខ្មែរក្រោម​ហែ​ញត្តិ​ដាក់​តាម ស្ថាប័ន​អន្តរជាតិ​នេះ បង្ហាញ​ពី​ភាព​មិន​អើពើ​ចំពោះ​សុខទុក្ខ​ខ្មែរក្រោម​របស់​រដ្ឋាភិបាល​កម្ពុជា។

ពលរដ្ឋ​ខ្មែរក្រោម​អះអាង​ថា ការ​ហែ​ញត្តិ​ទៅកាន់​បណ្ដា​ស្ថានទូត​នានា គឺជា​ការ​ទាមទារ​ឱ្យ​រដ្ឋាភិបាល​វៀតណាម​គោរព​សិទ្ធិ​ខ្មែរក្រោម ហើយ​មិនមែន​ជា​អំពើ​ខុស​ទៅ​នឹង​ធម្មនុញ្ញ​អាស៊ាន រដ្ឋធម្មនុញ្ញ​កម្ពុជា ដូច​ការ​លើកឡើង​របស់​រដ្ឋបាល​កម្ពុជា​នោះ​ទេ។

ប្រធាន​មិត្តសមាគម​ខ្មែរ​កម្ពុជា​ក្រោម លោក ថាច់ ឡែន ដែល​បាន​ចូលរួម​ប្រជុំ​ជាមួយ​មន្ត្រី​នៃ​សាលា​រាជធានី​ភ្នំពេញ សោកស្ដាយ​ដែល​រដ្ឋបាល​រាជធានី​ភ្នំពេញ មិន​អនុញ្ញាត​ឱ្យ​សមាគម​ខ្មែរក្រោម ហែ​ញត្តិ​ដាក់​ឱ្យ​អង្គការសហប្រជាជាតិ និង​បណ្ដា​ស្ថានទូត​របស់​ប្រទេស​នាំមុខ​លទ្ធិប្រជាធិបតេយ្យ ឱ្យ​រដ្ឋាភិបាល​វៀតណាម​ដោះលែង​សកម្មជន​ខ្មែរក្រោម​៤​នាក់ ដែល​រដ្ឋាភិបាល​វៀតណាម​បាន​ឃុំខ្លួន​ពួកគេ​កាលពីដើម​ខែសីហា​នេះ​។ លោក​បន្ថែម​ថា ការ​មិន​អនុញ្ញាត​ឱ្យ​សមាគម​ខ្មែរ​កម្ពុជា​ក្រោម​ហែ​ញត្តិ​នេះ ក៏​ឆ្លុះបញ្ចាំង​ពី​ភាព​ព្រងើយកន្តើយ​របស់​រដ្ឋាភិបាល​កម្ពុជា ចំពោះ​សកម្មជន​សិទ្ធិមនុស្ស​ខ្មែរក្រោម​ផ្សេងទៀត ដែល​រដ្ឋាភិបាល​វៀតណាម​កំពុង​គំរាមកំហែង​ផង​ដែរ។

លោក ថាច់ ឡែន៖ «សម្រាប់​រដ្ឋាភិបាល​វៀតណាម​គេ​ថា ធ្វើ​អ៊ីចឹង​ទៅ​ដើម្បី​ការពារ​សុវត្ថិភាព ប៉ុន្តែ​ខ្ញុំ​ឃើញ​ថា នេះ​មិនមែន​ជា​ការ​ការពារ​សុវត្ថិភាព​ទេ គឺជា​ការ​ធ្វើទុក្ខបុកម្នេញ​ដល់​ពលរដ្ឋ​ខ្មែរ​កម្ពុជា​ក្រោម ដែល​មាន​ភាព​ក្លាហាន​ក្នុង​ការ​ពាំនាំ​យក​នូវ​បញ្ហា​សិទ្ធិមនុស្ស និង​បញ្ហា​សិទ្ធិ​ជនជាតិ​ដើម​ដើម្បី​ចែករំលែក​ទៅដល់​បងប្អូន​យើង​ឱ្យ​បាន​យល់​ដឹង»។

ការ​លើកឡើង​បែបនេះ​ធ្វើឡើង​បន្ទាប់​ពី​រដ្ឋបាល​សាលា​រាជធានី​ភ្នំពេញ នៅ​ថ្ងៃទី​១០ ខែ​សីហា មិន​អនុញ្ញាត​ឱ្យ​សមាគម​ខ្មែរ​កម្ពុជា​ក្រោម ដើម្បី​សិទ្ធិមនុស្ស និង​អភិវឌ្ឍន៍ ធ្វើ​ពិធី​ហែ​ញត្តិ​នៅ​ថ្ងៃទី​១៦ ខែ​សីហា ដែល​មាន​អ្នកចូលរួម ១៥​អង្គ​/​នាក់ ទៅ​កាន់​ស្ថានទូត​ចំនួន​១០​កន្លែង​ក្នុង​រាជធានី​ភ្នំពេញ ក្នុង​គោលបំណង​ស្នើ​ឱ្យ​បណ្ដា​ស្ថានទូត​នាំមុខ​ខាង​លទ្ធិប្រជាធិបតេយ្យ​ទាំង​នោះ អន្តរាគមន៍​ឱ្យ​រដ្ឋាភិបាល​វៀតណាម​ដោះលែង​សកម្មជន​សិទ្ធិមនុស្ស​ខ្មែរក្រោម​។ រដ្ឋបាល​សាលា​រាជធានី​ភ្នំពេញ​លើកឡើង​ថា មូលហេតុ​ដែល​មិន​អនុញ្ញាត ព្រោះ​សកម្មភាព​ដង្ហែ​ញត្តិ​ដែល​សមាគម​ខ្មែរ​កម្ពុជា​ក្រោម​ដែល​បម្រុង​នឹង​​ធ្វើ​នេះ ផ្ទុយ​ទៅ​នឹង​ធម្មនុញ្ញ​អាស៊ាន និង​រដ្ឋធម្មនុញ្ញ​របស់​កម្ពុជា។

វិទ្យុ​អាស៊ីសេរី​មិន​អាច​ទាក់ទង​អ្នកនាំពាក្យ​សាលាក្រុង​ភ្នំពេញ លោក ម៉េត មាសភក្ដី ដើម្បី​សុំ​ការ​បកស្រាយ​ជុំវិញ​រឿង​នេះ​បាន​នៅឡើយ​ទេ នៅ​ថ្ងៃទី​១០ ខែ​សីហា។

អាជ្ញាធរ​វៀតណាម បាន​ចាប់​ឃុំ​ខ្លួន និង​គំរាមកំហែង​សកម្មជន​សិទ្ធិមនុស្ស​ខ្មែរ​ក្រោម​ចំនួន ៩​នាក់ កាលពី​ថ្ងៃទី​៣១ ខែ​កក្កដា ក្រោម​ការ​ចោទប្រកាន់​ពី​បទ «កេង​ចំណេញ​លើ​សិទ្ធិ​សេរីភាព និង​លទ្ធិប្រជាធិបតេយ្យ បំពាន​លើ​ផលប្រយោជន៍​របស់​រដ្ឋ និង​សិទ្ធិ​សេរីភាព​ស្របច្បាប់ នៃ​អង្គការ​ចាត់តាំង និង​បុគ្គល​» តាម​មាត្រា ៣៣១ នៃ​ក្រមព្រហ្មទណ្ឌ​របស់​ប្រទេស​វៀតណាម​។ ទោះ​យ៉ាងនេះ​ក៏ដោយ​ក្រោយ​ការ​ឃាត់ខ្លួន និង​សួរនាំ អាជ្ញាធរ​បាន​ដោះលែង​ពួកគេ​ឱ្យ​មាន​សេរីភាព​វិញ ប៉ុន្តែ​នៅ​បន្ត​ឃុំខ្លួន​សកម្មជន​សិទ្ធិមនុស្ស​ខ្មែរក្រោម​ចំនួន​៤​នាក់ រួមមាន​លោក យ័ញ ម៉ិញក្វាង រស់នៅ​ខេត្ត​ឃ្លាំង លោក ថាច់ កឿង និង​លោក តោ ហ្វាងចឿង រស់នៅ​ខេត្ត​ព្រះត្រពាំង។ ដោយឡែក អាជ្ញាធរ​វៀតណាម​បាន​ឃុំខ្លួន សកម្មជន​សិទ្ធិមនុស្ស​ខ្មែរក្រោម​ជា​ស្ត្រី​ម្នាក់​ទៀត គឺ​លោកស្រី ឌិន ធីហ្វិន រស់នៅ​ខេត្ត​ឃ្លាំង កាលពី​ថ្ងៃទី​៣ ខែ​សីហា ក្រោម​បទ​ចោទ «​មិន​អនុវត្ត​តាម​សាលក្រម​របស់​តុលាការ​» ដែល​ពាក់ព័ន្ធ​នឹង​បញ្ហា​ដីធ្លី។

មន្ត្រី​អង្គការ​សង្គម​ស៊ីវិល​លើកឡើង​ថា ការ​គំរាមកំហែង និង​ឃាត់ខ្លួន​សកម្មជន​សិទ្ធិមនុស្ស​ខ្មែរ​ក្រោម​ទ្រង់ទ្រាយ​ធំ​បែប​នេះ គឺជា​ការ​គំរាមកំហែង​ថ្មី​មួយទៀត ខណៈ​ខ្មែរក្រោម​បន្ត​ទាមទារ​សិទ្ធិ​ស្វ័យ​សម្រេច​វាសនា​ខ្លួនឯង ក្នុង​នាម​ជា​ជនជាតិ​ដើម​នៅ​លើ​ទឹកដី​កំណើត​ដូនតា​របស់​ខ្លួន។

ជុំវិញ​រឿង​នេះ​ដែរ អគ្គលេខាធិការ​សមាគម​ខ្មែរ​កម្ពុជា​ក្រោម​ដើម្បី​សិទ្ធិមនុស្ស និង​អភិវឌ្ឍន៍ បណ្ឌិត សឺន ជុំជួន សោកស្ដាយ​ដែល​រដ្ឋបាល​សាលា​រាជធានី​ភ្នំពេញ​មិន​អនុញ្ញាត​ឱ្យ​សមាគម​ខ្មែរ​កម្ពុជា​ក្រោម​ដង្ហែ​ញត្តិ​នេះ។ លោក​បន្ថែម​ថា ការ​ដង្ហែ​ញត្តិ​ទៅ​ដាក់​ឱ្យ​បណ្ដា​ស្ថានទូត​ប្រទេស​នាំមុខ​លទ្ធិប្រជាធិបតេយ្យ ទាមទារ​ឱ្យ រដ្ឋាភិបាល​វៀតណាម​គោរព​សិទ្ធិ​សកម្មជន​សិទ្ធិមនុស្ស​ខ្មែរក្រោម មិនមែន​ជា​អំពើ​ខុស​ទៅ​នឹង​ធម្មនុញ្ញ​អាស៊ាន ឬ​រដ្ឋធម្មនុញ្ញ​កម្ពុជា​នោះ​ឡើយ ប៉ុន្តែ​នេះ​គឺជា​សកម្មភាព​គិតគូរ​ពី​សុខទុក្ខ​សកម្មជន​សិទ្ធិមនុស្ស​ខ្មែរក្រោម​។ លោក សឺន ជុំជួន បន្ត​ថា ការ​ការពារ​សិទ្ធិ​សកម្មជន​សិទ្ធិមនុស្ស​ខ្មែរក្រោម គឺ​ប្រៀប​ដូចជា​ការ​ស្នើសុំ​របស់​ថ្នាក់ដឹកនាំ​រដ្ឋាភិបាល​វៀតណាម​ឱ្យ​អាជ្ញាធរ​កម្ពុជា​ការពារ​និគមជន​វៀតណាម​កំពុង​រស់នៅ​ក្នុង​ប្រទេស​កម្ពុជា​ដែរ មិនមែន​ជា​សកម្មភាព​រំលោភ​អធិបតេយ្យភាព​អ្វី​នោះ​ឡើយ។

លោក សឺន ជុំជួន៖ «ប្រជាជន​វៀតណាម​ដែល​គេ​មក​រស់នៅ​ក្នុង​ប្រទេស​កម្ពុជា​យើង ទោះបី​អន្តោប្រវេសន៍​ក៏ដោយ មិន​អន្តោប្រវេសន៍​ក៏ដោយ ឬក៏​បាន​រស់នៅ​ដោយ​ស្របច្បាប់​ក៏ដោយ នៅតែ​រដ្ឋាភិបាល​វៀតណាម​មានការ​ផ្ដាំផ្ញើ​ឱ្យ​មើល​សុខ​មើល​ទុក្ខ ឬក៏​ជួយ​ដោះស្រាយ​បញ្ហា​នៅ​ពេល​ដែល ប្រជាជន​វៀតណាម​ដែល​កំពុង​រស់នៅ​ក្នុង​ប្រទេស​កម្ពុជា​ហ្នឹង យ៉ាងណាមិញ បើ​យើង​ប្រៀបធៀប​ទៅ​កម្ពុជា​ក្រោម បងប្អូន​យើង​សុទ្ធតែ​ឈាមជ័រ​តែមួយ​ទេ ហេតុ​អី​ក៏​រដ្ឋាភិបាល​កម្ពុជា​យើង​មិន​អាច​បាន អ៊ីចឹង​គួរតែ​ធ្វើ​បាន​ដូច​វៀតណាម​ធ្វើ​មក​លើ​កម្ពុជា​អ៊ីចឹង»។

សង្គម​ស៊ីវិល​លើកឡើង​ថា ការ​មិន​អនុញ្ញាត​ឱ្យ​ដង្ហែ​ញត្តិ​នេះ​បង្ហាញ​ពី​ភាព​មិន​យកចិត្តទុកដាក់​អំពី​សុខទុក្ខ​ខ្មែរក្រោម ដែល​អាជ្ញាធរ​វៀតណាម​កំពុង​គំរាមកំហែង បំបិទ​សិទ្ធិ​សេរីភាព​ក្នុង​ការ​រក្សា​វប្បធម៌ និង​ប្រពៃណី​របស់​ខ្លួន​។ ទោះជា​យ៉ាងណា មន្ត្រី​សមាគម​ខ្មែរ​កម្ពុជា​ក្រោម​ដើម្បី​សិទ្ធិមនុស្ស និង​អភិវឌ្ឍន៍ អះអាង​ថា ពួកគេ​នឹង​យក​ញត្តិ​ទៅ​ដាក់​នៅ​តាម​បណ្ដា​ស្ថានទូត​ប្រទេស​នាំមុខ​ខាង​លទ្ធិប្រជាធិបតេយ្យ​តាម​ការ​គ្រោងទុក ប៉ុន្តែ​នឹង​មិន​ដង្ហែ​ញត្តិ​នោះ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។