អាជ្ញាធរ​​បញ្ជូន​កូន​ប្រុស​របស់​​សកម្មជន​បក្ស​ប្រឆាំង​ជាប់​ឃុំ​​​ម្នាក់​​​​​ទៅ​សាកសួរ​​នៅ​ស្នងការ​នគរបាល​រាជធានី​ភ្នំពេញ

ដោយ ទីន ហ្សាការីយ៉ា
2020-10-05
អ៊ីម៉ែល
មតិ
Share
បោះពុម្ព

អាជ្ញាធរ​របប​ក្រុង​ភ្នំពេញ មិន​ទាន់​ដោះ​លែង​កុមារា កាក់ សុវណ្ណឆៃ ដែល​ជា​កូន​ប្រុស​សមាជិក​គណបក្ស​ប្រឆាំង​កំពុង​ជាប់ឃុំ លោក កាក់ កុម្ភារ នៅ​ឡើយ​ទេ រហូត​មក​ដល់​ល្ងាច​ថ្ងៃ​ទី៥ ខែតុលា បន្ទាប់​ពី​ប៉ូលិស​ចាក់​អង្រែ​លើ បាន​ចាប់​ខ្លួន កាល​ពី​រសៀល​ថ្ងៃ​ទី៤ ខែតុលា ពាក់ព័ន្ធ​នឹង​ករណី​ចូល​ទីស្នាក់ការ​គណបក្ស​សង្គ្រោះ​ជាតិ ដើម្បី​ប្រមូល​ទង​គណបក្ស​ដែល​នៅ​រប៉ាត់រប៉ាយ ក្រោយ​ពេល​អាជ្ញាធរ​បិទ​ទីស្នាក់ការ​នោះ​ទុក​ចោល​ជា​ច្រើន​ឆ្នាំ​មក។

ម្ដាយ និង​ស្ត្រី​សកម្មជន​គណបក្ស​សង្គ្រោះ​ជាតិ​ប្រមាណ ១០នាក់ នៅ​រសៀល​ថ្ងៃ​ទី៥ តុលា បាន​លើក​គ្នា​ទៅ​ស្នងការដ្ឋាន​នគរបាល​រាជធានី​ភ្នំពេញ ដើម្បី​តាម​ដាន ប៉ូលិស​ចាប់​ឃុំ​ខ្លួន​កុមារា​អាយុ ១៥ឆ្នាំ​ម្នាក់ ដែល​ជា​កូន​ប្រុស​របស់​លោក កាក់ សមាជិក​បក្ស​ប្រឆាំង​កំពុង​ជាប់​ឃុំ​ម្នាក់។ មន្ត្រី​សង្គម​ស៊ីវិល​ ចាត់​ទុក​រឿង​នេះ​ថា ជា​ការ​ធ្វើ​ទុក​ទុក្ខបុកម្នេញ​ផ្នែក​នយោបាយ ព្រោះ​ចាប់​ឃុំ​ខ្លួន​ទាំង​ឪពុក​ហើយ​អាជ្ញាធរ បន្ត​ចាប់​ខ្លួន​ទាំង​កូន​ប្រុស​ជា​អនីតិជន​ទាំង​បំពានច្បាប់​ថែមទៀត។

ប្រពន្ធ​របស់​សមាជិក​ក្រុម​ប្រឹក្សា​រាជធានី​ភ្នំពេញ​ជាប់​ឆ្នោត​គណបក្ស​សង្គ្រោះ​ជាតិ​ លោក កាក់ កុម្ភារ គឺ​លោក ព្រំ ចន្ថា ប្រាប់​អាស៊ី​សេរី​ថា ប៉ូលិស​បាន​បញ្ជូន​កូន​របស់​លោក​ស្រី គឺ​កុមារា កាក់ សុវណ្ណឆៃ ​ទៅ​សាកសួរ​នៅ​ស្នងការដ្ឋាន​នគរបាល​រាជធានី​ភ្នំពេញ បន្ទាប់​ពី​ឃុំ​ខ្លួន​រូប​គេ​អស់​មួយ​យប់​នៅ​ប៉ុស្តិ៍​ប៉ូលិស​ចាក់​អង្រែ​លើ។ លោក​ស្រី​ ចាត់​ទុក​ការ​ចាប់​ខ្លួន​កូន​របស់​លោក​ស្រី​នេះ​ថា ជា​ទង្វើ​អមនុស្សធម៌​ ដែល​ជា​ការ​​​​​ធ្វើ​បាប​​ក្រុម​គ្រួសារ​របស់​លោក​ស្រី​ឱ្យ​មាន​ការ​​ឈឺ​ចាប់​កាន់​តែ​ខ្លាំង៖ «ក្មេង​បើ​សិន​ជា​គាត់​ធ្វើ​ខុស​គ្រាន់​តែ​យក​គាត់​​ទៅ​កែប្រែ​ឬ​អប់រំ​គាត់​ទៅ ហេតុ​អី​ចាំ​ប៉ូលិស​ដាក់​ខ្នៅ​ឃុំ​គាត់​មួយ​យប់​មិន​ដឹង​ជា​កូន​មូស​ខាំ​ កេង​យ៉ាង​ម៉េច​ទេ។ ខ្ញុំ​ខំ​ចិញ្ចឹម​ឱ្យ​បាន​ល្អ​សូម្បី​តែ​ខោអាវ​មិន​ដែល​បាន​បោក ខ្ញុំ​ឱ្យ​តែ​គាត់​ទៅ​តែ​រៀន។ ដោយ​សារ​គាត់​ស្រលាញ់​ពេក​​ដែល​ធ្លាប់​មាន​អនុស្សាវរីយ៍​ដល់​ពេល​គាត់​ជិះ​ម៉ូតូ​កាត់​ហ្នឹង​គាត់​ឃើញ​​គាត់​ទៅ​រើស​ទង់ជ័យ​បក្ស​មក​ ខ្ញុំ​សួរ​ថា គាត់​មាន​ទោសកំហុស​អី​ដែរ

លោក​ស្រី ព្រំ ចន្ថា ឱ្យ​ដឹង​ថា កូន​របស់​លោក​ស្រី​ឈ្មោះ កាក់ សុវណ្ណឆៃ មាន​ជំងឺ​អូទីហ្សឹម (Autism) តាំងពី​កំណើត និង​​មាន​ខួរក្បាល​ខុស​ប្រក្រតី​​ជា​ញឹកញាប់ ដែល​ធ្វើ​ឲ្យ​កូន​លោកស្រី ស្រលាញ់​អ្វី មួយ​គឺ​ដក់ជាប់​ក្នុង​អារម្មណ៍​រហូត។

កុមារា​ កាក់ សុវណ្ណឆៃ អាយុ ១៥ឆ្នាំ រៀន​ថ្នាក់​ទី៩ ជា​កូន​ប្រុស​​សកម្មជន​គណបក្ស​ប្រឆាំង​លោក​កាក់ កុម្ភារ ដែល​តុលាការ​ចាប់ខ្លួន​កាល​ថ្ងៃ​ទី៣១ ខែឧសភា ហើយ​បច្ចុប្បន្ន​កំពុង​ជាប់​ឃុំ​នៅ​ពន្ធនាគារ​ព្រៃ​ស។ កុមារ​រូប​នេះ​ត្រូវ​បាន​ប៉ូលិស​មូលដ្ឋាន​ចាប់​យក​ទៅ​ឃុំខ្លួន​នៅ​ប៉ុស្តិ៍​នគរបាល​ចាក់​អង្រែ​លើ ខណ្ឌ​មានជ័យ កាល​ពី​រសៀល​ថ្ងៃ​ទី​៤​តុលា។ កុមារ​រូប​នេះ​ត្រូវ​បាន​ប៉ូលិស​ចាប់​ខ្លួន​ក្នុង​ពេល​ប្រមូល​ទង់​គណបក្ស​សង្គ្រោះ​ជាតិ​នៅ​ស្នាក់​ការ​កណ្ដាល​គណបក្ស​នេះ កាល​ពី​រសៀល​ថ្ងៃ​ទី៤ តុលា។ រហូត​មក​ទល់​ម៉ោង ៥រសៀល​ថ្ងៃ​ទី៥ តុលា ប៉ូលិស​មិន​ទាន់​ដោះលែង​​កុមារ​ កាក់ សុវណ្ណឆៃ នៅ​ឡើយ​ទេ។

អាស៊ី​សេរី​មិន​អាច​ទាក់​ទង​អ្នក​នាំ​ពាក្យ​ស្នងការដ្ឋាន​នគរបាល​រាជធានី​ភ្នំពេញ​ លោក សាន សុខ​សីហា​ និង​អ្នក​នាំ​ពាក្យ​អគ្គស្នងការ​នគរបាល​ជាតិ​ លោក ឆាយ គឹម ខឿន​ ដើម្បី​សុំ​អត្ថាធិប្បាយ​ជុំ​វិញ​បញ្ហា​នេះ​បាន​ទេ​នៅ​ថ្ងៃ​ទី៥ តុលា។

ចំណែក​អធិការ​នគរបាល​ខណ្ឌ​មាន​ជ័យ​លោក ម៉េង វិមាន​តារា មិន​ធ្វើ​អធិប្បាយ​ជុំ​វិញ​រឿង​នេះ​ទេ ដោយ​លោក​ទទួល​ទូរស័ព្ទ​ហើយ​​ចុច​ផ្ដាច់​ទៅ​វិញ៖ «បាទ! ខ្ញុំ​ឮ​តើ​អ្នក​ណា​គេ​ មាន​អី​បង​មាន​អី

ប្រធាន​ផ្នែក​សិទ្ធិមនុស្ស​នៃ​សមាគម​ការពារ​សិទ្ធិមនុស្ស​អាដហុក (Adhoc) លោក នី សុខា ចាត់​ទុក​ការ​ចាប់​ខ្លួន​កូន​របស់​សកម្មជន​គណបក្ស​ប្រឆាំង​នេះ​ថា ​ជា​ការ​ធ្វើ​ទុក្ខបុកម្នេញ​ផ្នែក​នយោបាយ​ច្រើន​ជាង​ការ​អនុវត្ត​ច្បាប់។ លោក​បញ្ជាក់​ថា រឿង​នេះ​ប៉ូលិស​គួរតែ​ដោះលែង​កុមារ​រូប​នោះ​ តាំង​ពី​ដំបូង ​ ដោយ​មិន​ត្រូវ​ចាប់​ឃុំ​ខ្លួន​រូប​គេ​​​បែប​នេះ​ឡើយ ពីព្រោះ​លោក​យល់​ថា កុមារ​ចូល​ទៅ​ប្រមូល​ទង់​ទីស្នាក់ការ​គណបក្ស​ប្រឆាំង ពុំ​មែន​ជា​ទង្វើ​សុខ​ច្បាប់​ឡើយ៖ «យើង​គិត​ថា​នេះ​ជា​ការ​ព្រួយបារម្ភ​ហួស​ហេតុ​របស់​អាជ្ញាធរ​ទេ​បាទ។ ដូច​យើង​ដឹង​ហើយ​ថា រឿង​នេះ​វា​ទាក់​ទង​ទៅ​ហ្នឹង​រឿង​​ពាក់ព័ន្ធ​ទៅ​ហ្នឹង​កត្តា​នយោបាយ​ យើង​ដឹង​ហើយ​ថា ជា​ទូទៅ​គឺ​គាត់​មិន​មាន​​​បក្ស​ ហើយ​ជំនួស​មក​វិញ​យើង​ឃើញ​ថា​អាជ្ញាធរ​​មិន​សូវ​ជា​មាន​ភាព​ឯករាជ្យ​ពី​គណបក្ស​នយោបាយ​បាយ​ហ្នឹង​ប៉ុន្មាន​ទេ​។ដូច្នេះ​ហើយ​យើង​គាត់​សំគាល់​ឃើញ​ថា​ ឱ្យ​តែ​ក្រុម​អ្នក​ដែល​មាន​និន្នាការ​ប្រឆាំង​ហ្នឹង​​ជា​ទូទៅ​សមត្ថកិច្ច​មិន​សូវ​មាន​​ការ​សប្បាយ​ចិត្ត​ចំពោះ​អ្នក​ដែល​មាន​និន្នាការ​ប្រឆាំង​ហ្នឹង​ទេ»

ក្រោយ​ពេល​ចាប់ខ្លួន​នោះ ប៉ូលិស ខណ្ឌ​មានជ័យ បាន​ថតរូប កុមារា កាក់ សុវណ្ណឆៃ មាន​ទឹកមុខ​ស្លូតបូត ដោយ​ដៃ​ទាំង​ពី​ជាប់​ខ្នោះ និង​កាន់​ទង​គណបក្ស​សង្គ្រោះ​ជាតិ​មាន​រូប​ព្រះអាទិត្យ ហើយ​ត្រូវ​បាន​ចែក​ចាយ​ពេញ​បណ្ដាញ​សង្គម​ហ្វេសប៊ុក។

អនុប្រធាន​បក្ស​សង្រ្គោះ​ជាតិ លោក អេង ឆៃអ៊ាង លោក អេង ឆៃអ៊ាង អះអាង​ថា  ទីស្នាក់ការ​គណបក្ស​សង្គ្រោះ​ជាតិ ដែល​ជួល​អគារ​គណបក្ស​ភ្លើង​ទៀន ហើយ​របប​លោក ហ៊ុន សែន បិទ​ទ្វារ​នេះ មាន​ចោរ​ចូល​គាស់​យក​សំភារៈ​ជា​ច្រើន​បែរ​ជា​សមត្ថកិច្ច​មិន​ចាប់​ទៅ​វិញ។លោក អេង ឆៃអ៊ាង ថ្កោល​ទោស​ការ​ចាប់​ខ្លួន​នេះ​ថា ជា​ទង្វើ​រំលោភ​សិទ្ធិ​អនីតិជន និង​រំលោភ​ច្បាប់៖ «គាត់​យក​ក្មេង​មក​ដាក់​ខ្នោះ​ថត​បង្ហាញ​វា​មិន​ត្រឹមត្រូវ​ទេ ហើយ​ក្មេង​នេះ​មិន​បាន​សម្លាប់​មនុស្ស​បទ​ឧក្រិដ្ឋ​អ្វី​ដែរ ហើយ​បើ​ថា​តំបន់​នោះ (ទីស្នាក់ការ​បក្ស) ជា​តំបន់​ហាម​ឃាត់​គ្រាន់​តែ​ណែនាំ​ទៅ​បាន​ហើយ»

មាត្រា១៥ នៃ​ច្បាប់​ស្ដីពី​យុត្តិធម៌​អនីតិជន​ចែង​ថា នគរបាល​យុត្តិធម៌​អាច​ចាប់​ខ្លួន​អនីតិជន ដែល​មាន​អាយុ​ចាប់​ពី ១៤​ឆ្នាំ​ដល់​ក្រោម​ ១៨ឆ្នាំ តែ​ក្នុង​ករណី​ដែល​អនីតិជន​ប្រព្រឹត្តិ​បទ​ល្មើស​មជ្ឈិម ឬ​បទ​ឧក្រិដ្ឋ​ជាក់​ស្ដែង​តែ​ប៉ុណ្ណោះ។ ប៉ុន្តែ​អនីតិជន​ដែល​មាន​អាយុ​ចាប់​ពី ១៤ឆ្នាំ​ដល់​ក្រោម​អាយុ ១៦ឆ្នាំ ការ​ចាប់​ខ្លួន​អាច​ធ្វើ​ទៅ​បានតែ​ក្នុង​ករណី​ដែល​អនីតិជន​នោះ​ប្រព្រឹត្តិ​បទមជ្ឈិម​ដោយ​ចេតនា។ រាល់​ការ​ចាប់ខ្លួន​អនីតិជន​ត្រូវ​រាយការណ៍​ជូន​ព្រះរាជអាជ្ញា​ភ្លាម។ ការ​អនុវត្ត​ការ​ចាប់​ខ្លួន​ទៀត​សោត គឺ​នគរបាល​យុត្តិធម៌ ត្រូវ​ចៀសវាង​ការ​ធ្វើ​ឲ្យ​អាម៉ាស់​មុខ និង​បាត់បង់​សេចក្ដី​ថ្លៃថ្នូរ​របស់​អនីតិជន និង​ត្រូវ​បញ្ជូន​អនីតិជន​ទៅ​ឲ្យ​ផ្នែក ឬ​អង្គភាព​ដែល​មាន​នគរបាល​យុត្តិធម៌​ជំនាញ​ទទួល​បន្ទុក​ការងារ​អនីតិជន​ដែល​ជិត​បំផុត៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល