អាជ្ញាធរចាប់ផ្ដើមសាកសួររកប្រភពបោះពុម្ពអាវពណ៌ខ្មៅសម្រាប់យុទ្ធនាការ "ថ្ងៃច័ន្ទពណ៌ខ្មៅ" កាលពីថ្ងៃច័ន្ទ ទី៩ ខែឧសភា។ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ ជាទិសដៅដែលត្រូវបានអាជ្ញាធរហៅចូលសាកសួរមុនគេ។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ អះអាងថា លោកត្រូវបាននគរបាលរាជធានីភ្នំពេញ និងក្រសួងមហាផ្ទៃ សាកសួរនៅព្រឹកថ្ងៃទី១១ ខែឧសភា ដោយសង្ស័យថា លោកពាក់ព័ន្ធនឹងការបោះពុម្ពអាវពណ៌ខ្មៅសម្រាប់យុទ្ធនាការ "ថ្ងៃច័ន្ទពណ៌ខ្មៅ"៖ «រឿងផ្ទាល់ខ្លួន គឺរឿងគ្រួសារប្ដីប្រពន្ធអីអ៊ីចឹង តែដល់ពេលសួរ សួររឿងយុទ្ធនាការអាវពណ៌ខ្មៅ នោះវិញ ហើយសួរតាំងពី ១ ឧសភា កន្លងមក។ តើយើងរៀបចំរបៀបម៉េច ? ហើយបានជំនួយមកពីណា ? សួរដេញដោលតាំងពីរៀបចំបុណ្យថ្ងៃ ១ ឧសភា កន្លងទៅថ្មីៗហ្នឹងក៏សួរដែរ ហើយសំខាន់សំណួរគេសួរចង់បានថា តើអាវពណ៌ខ្មៅអ្នកណាជាអ្នកផលិត? គេចង់បានអាហ្នឹង។ ថ្ងៃទី៩ ខ្ញុំអត់បានចូលរួមទេ ដោយសារខ្ញុំឈប់សម្រាករក្សាសុខភាព។ ខ្ញុំឈឺមួយសប្ដាហ៍ ហើយខ្ញុំមានការងារនៅផ្ទះត្រូវថែរក្សាគ្រួសារខ្ញុំ គាត់មានជំងឺដែរ។ ខ្ញុំអត់បានចូលរួមមែន។ ខ្ញុំឆ្លើយតាមការពិតអ្វីដែលខ្ញុំដឹងខ្ញុំឮ ហើយនិងសកម្មភាពរបស់ខ្ញុំ »។
លោក វន់ ពៅ បញ្ជាក់ថា នៅមុនពេលជួបគ្នាជាមួយមន្ត្រីនគរបាលមួយថ្ងៃ លោកបានទទួលលិខិតកោះហៅពីប៉ុស្តិ៍នគរបាលទឹកថ្លា មួយច្បាប់ ឱ្យលោកចូលទៅបំភ្លឺបញ្ហាផ្ទាល់ខ្លួន។ ប៉ុន្តែលោកត្រូវបានសាកសួរដោយស្នងការរងនគរបាលរាជធានីភ្នំពេញ លោក ស៊ឹម វុទ្ធី និងមន្ត្រីនាយកដ្ឋានកណ្ដាលសន្តិសុខ នៃក្រសួងមហាផ្ទៃ លោក ព្រាប បុរី។
ឆ្លើយតបបញ្ហានេះ ស្នងការរងរាជធានីភ្នំពេញ លោក ស៊ឹម វុទ្ធី មានប្រសាសន៍ថា ការសាកសួរលោក វន់ ពៅ នៅប៉ុស្តិ៍នោះ មិនពាក់ព័ន្ធរឿងអាវខ្មៅទេ៖ «អត់មានសាកសួរទេ។ ខ្ញុំអត់មានទេ។ ខ្ញុំមិនហ៊ានសាកសួររឿងហ្នឹងផង ព្រោះ វន់ ពៅ ហ្នឹង ខ្ញុំទំនាក់ទំនងធម្មតាជាមួយគាត់។ អត់មានហៅទៅសួរអីផង។ វន់ ពៅ ហ្នឹងខ្ញុំស្គាល់គ្នាហើយ។ ជួបគ្នាគ្រាន់តែសំណេះសំណាលសួរសុខទុក្ខធម្មតា ព្រោះគាត់ឈឺ ដូចជាអត់មានពាក់ព័ន្ធអីផង»។
មន្ត្រីនាយកដ្ឋានកណ្ដាលសន្តិសុខនៃក្រសួងមហាផ្ទៃ លោក ព្រាប បុរី ថ្លែងថា ការជួបលោក វន់ ពៅ នៅព្រឹកថ្ងៃទី១១ ខែឧសភា គ្រាន់តែជាការសំណេះសំណាលធម្មតា៖ « អត់មានអីទេ គ្រាន់តែជួបសំណេះសំណាលមិត្តភ័ក្ដិចាស់ហ្នឹងណ៎ា មានស្អី !»។
ការចាប់ផ្ដើមសាកសួររបស់អាជ្ញាធរអំពីប្រភពបោះពុម្ពអាវខ្មៅនេះ គឺធ្វើឡើងមួយថ្ងៃបន្ទាប់ពីការព្រមានរបស់លោកនាយករដ្ឋមន្ត្រី ហ៊ុន សែន ដែលធ្វើសេចក្ដីថ្លែងការណ៍ពាក់ព័ន្ធនឹងយុទ្ធនាការតវ៉ារបស់អង្គការសង្គមស៊ីវិល ដែលស្លៀកពាក់ខ្មៅទាមទារឱ្យដោះលែងសកម្មជន និងមន្ត្រី គ.ជ.ប មួយរូប កំពុងជាប់ឃុំនៅពន្ធនាគារព្រៃស៖ «ហើយសុំម្នាក់ដែលផ្ដល់លុយបោះអាវនោះ ប្រយ័ត្នប្រយែង។ គេស្គាល់មុខច្បាស់ណាស់រួចទៅហើយៗ»។
ដូចគ្នានេះដែរ អនុប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា អ្នកស្រី អ៊ូ ទេពផល្លីន ឱ្យដឹងថា អ្នកស្រីក៏ត្រូវបាននគរបាលស៊ើបសួរខ្លះៗដែរ កាលពីថ្ងៃទី១០ ខែឧសភា ទាក់ទងនឹងការបោះពុម្ពអាវខ្មៅ និងការចូលរួមទាមទារឱ្យដោះលែងសកម្មជនសិទ្ធិមនុស្ស និងមន្ត្រី គ.ជ.ប មួយរូប ដែលកំពុងជាប់ឃុំនៅពន្ធនាគារព្រៃសនោះ៖ « គាត់យកអាវនោះមកបង្ហាញយើងថា តើយើងមានបោះពុម្ពឬអត់ ? ខ្ញុំថាយើងអត់មានការបោះពុម្ពការចែកអាវអីទេ ពីព្រោះវាគ្រាន់តែការចូលរួមចំណែករបស់បងប្អូនប្រជាពលរដ្ឋទេ ហើយអត់មានជាការចំណាយទៅលើការបោះពុម្ពអីទាំងអស់។ អ៊ីចឹងគេថា ប៉ុន្តែគេឲ្យការណ៍មកថា ផ្ទះសាមគ្គីហ្នឹងមានការបោះពុម្ពអាវ មានការចែកអាវ។ ខ្ញុំថា បើបោះពុម្ពអាវ យ៉ាងម៉េចបានជាពួកខ្ញុំមិនដឹង ពីព្រោះខ្ញុំបានចូលរួមនៅក្នុងរឿងហ្នឹងដែរ។ ហេតុបានពួកខ្ញុំអត់ដឹង ហើយសួរថា ចុះពួកខ្ញុំហ្នឹងពាក់អាវយ៉ាងម៉េច ? ខ្ញុំថា អាវខ្មៅដែលពួកខ្ញុំមានកន្លងមកហ្នឹង ខ្ញុំចេះតែទាញយកមកពាក់មក ពីព្រោះអត់មានការចែកអាវ អត់មានការបោះពុម្ពអាវទេ។ អ៊ីចឹងខ្ញុំបង្ហាញសារមួយនេះ ព្រោះគេព្យាយាមលាបពណ៌ឲ្យពួកយើងថាពាក់ព័ន្ធទៅនឹងរឿងបដិវត្តន៍ ហើយខ្ញុំថាអ្វីដែលយើងពាក់អាវខ្មៅហ្នឹង គឺពាក់ព័ន្ធនឹងរឿងទាមទារឲ្យមានការដោះលែងអ្នកការពារសិទ្ធិមនុស្ស ដែលជាប់ពន្ធនាគារទាំង ៥នាក់ហ្នឹង។ អ៊ីចឹងខ្ញុំថា តើសារហ្នឹងពូគិតថាជាសារបដិវត្តន៍ ឬក៏សារពាក់ព័ន្ធនឹងសិទ្ធិមនុស្ស ?»។
ប្រធានផ្នែកបច្ចេកទេសស៊ើបអង្កេតនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត យល់ឃើញថា ការកោះហៅលោក វន់ ពៅ ទៅសាកសួរជាការគំរាមកំហែងមួយ៖ «ការហៅទៅសួរនាំនេះ ភាគច្រើនគឺផ្ដោតទៅលើរឿងអាវខ្មៅអីហ្នឹងថា អាវខ្មៅចេញពីប្រភពណា? អ្នកណាបោះពុម្ពអ្នកណាអីហ្នឹង? ខ្ញុំគិតថា អានេះវាជាការគំរាមកំហែង បំភិតបំភ័យ»។
កាលពីថ្ងៃទី៩ ខែឧសភា បុគ្គលិកអង្គការសមាគមមិនមែនរដ្ឋាភិបាល និងសកម្មជន ៨រូប ត្រូវបានអាជ្ញាធរខណ្ឌដូនពេញ និងខណ្ឌដង្កោ ឃាត់ខ្លួនសាកសួរមួយថ្ងៃ ក្នុងពេលធ្វើយុទ្ធនាការស្លៀកពាក់អាវខ្មៅ ទាមទារឱ្យដោះលែងសកម្មជនសិទ្ធិមនុស្ស ៤រូប និងមន្ត្រី គ.ជ.ប មួយរូប ដែលកំពុងជាប់ឃុំនៅពន្ធនាគារព្រៃស។
អភិបាលរងរាជធានីភ្នំពេញ លោក ឃួង ស្រេង ហៅការរារាំងការតវ៉ាស្លៀកពាក់អាវខ្មៅនោះថា ជាវិធានការការពាររដ្ឋាភិបាល និងទប់ស្កាត់អំពើមិនគោរពច្បាប់របស់ក្រុមសង្គមស៊ីវិលដែលលោកចាត់ទុកថា ជាពួកអនាធិបតេយ្យ ដែលប្រុងធ្វើបដិវត្តន៍ពណ៌។
លោកនាយករដ្ឋមន្ត្រី ហ៊ុន សែន ថ្លែងថា លោកបានប្រាប់ទៅរដ្ឋមន្ត្រីក្រសួងមហាផ្ទៃ លោក ស ខេង ឱ្យប្រាប់ទៅថ្នាក់ដឹកនាំដទៃទៀតថា កុំខ្វល់ពីរឿងពណ៌ ទោះជាពណ៌ទឹកក្រូច ពណ៌ក្រហម ឬពណ៌ខ្មៅក៏ដោយ ឲ្យតែធ្វើខុសច្បាប់ត្រូវដាក់ទាំងអស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។