ម្ចាស់បទឈាមបាតុករព្រួយបារម្ភក្រោយពីក្រសួងវប្បធម៌ស្នើសមត្ថកិច្ចចាត់វិធានការ
2023.01.07
អ្នកចម្រៀងរ៉េប (Rapper) លោក គា សុគន្ធ។
រូប៖ ហ្វេសប៊ុកលោក គា សុគន្ធ
ម្ចាស់បទចម្រៀងរ៉េប ''ឈាមបាតុករ'' ព្រួយបារម្ភពីសុវត្ថិភាពផ្ទាល់ខ្លួន បន្ទាប់ពីរដ្ឋមន្ត្រីក្រសួងវប្បធម៌ស្នើឲ្យមេប៉ូលិស ចាត់វិធានការច្បាប់ចំពោះការផ្សព្វផ្សាយបទចម្រៀងរបស់គាត់។ សង្គមស៊ីវិលចាត់ទុកថា ការចោទប្រកាន់ និងការព្រមានរបស់ក្រសួងវប្បធម៌ គឺជាការគំរាមកំហែង និងរឹតត្បិតសិទ្ធិសេរីភាព។
អ្នកចម្រៀងរ៉េប (Rapper) លោក គា សុគន្ធ លើកឡើងថា បទចម្រៀងលោក ដែលមានចំណងជើងថា ''ឈាមបាតុករ" មិនមានខ្លឹមសារញុះញង់ ឬបង្កចលាចល ក្នុងសង្គម ដូចការចោទប្រកាន់របស់ក្រសួងវប្បធម៌នោះទេ។
លោកបញ្ជាក់ថា មុននឹងចេញផ្សាយបទចម្រៀងនេះលោកបានពិនិត្យខ្លឹមសាររួចរាល់ទៅហើយ។ លោកយល់ថា ការដែលក្រសួងវប្បធម៌ ស្នើឲ្យអគ្គស្នងការនគរបាលជាតិ ចាត់វិធានការទប់ស្កាត់ការផ្សព្វផ្សាយបទចម្រៀងរបស់លោកនេះ បណ្តាលឲ្យលោកព្រួយបារម្ភពីសុវត្ថិភាព។
លោក គា សុគន្ធ៖ «ខ្ញុំគ្រាន់តែចង់ស្នើឲ្យថា ឲ្យគាត់ពិនិត្យទៅលើខ្លឹមសារចម្រៀងហ្នឹងម្ដងទៀត មួយទៀតហើយបើសិនជាគាត់ពិនិត្យហើយម្ដងទៀត ហើយមានគាត់យល់ថា វាជាការញុះញង់បង្កចលាចលហ្នឹងមែន ហើយគាត់កោះហៅ ឬក៏គាត់ឃាត់ខ្លួនខ្ញុំ ខ្ញុំនឹងទៅជួបហើយបំភ្លឺ ឬក៏តាមចំណាត់ការដែលគាត់បានដាក់ឲ្យអ៊ីចឹងទៅ»។
កាលពីថ្ងៃទី៦ ខែមករា រដ្ឋមន្ត្រីក្រសួងវប្បធម៌ និងវិចិត្រសិល្បៈ អ្នកស្រី ភឿង សកុណា បានចេញលិខិតស្នើសុំឲ្យអគ្គស្នងការនគរបាលជាតិ លោក នេត សាវឿន ចាត់វិធានការតាមផ្លូវច្បាប់ចំពោះការផ្សព្វផ្សាយបទចម្រៀងដែលមានចំណងជើងថា ឈាមបាតុករ។ អ្នកស្រី ចោទប្រកាន់ថា បទចម្រៀងនេះថា មានខ្លឹមសារញុះញង់ អាចបង្កជាអសន្តិសុខ និងសណ្ដាប់ធ្នាប់សង្គម។ ការស្នើសុំរបស់អ្នកស្រី ភឿង សករុណា នេះ គឺបន្ទាប់ពីក្រុមអង្គការសង្គមស៊ីវិលរួមមានអង្គការលីកាដូ និងអង្គការសង់ត្រាល់ បានផ្សព្វផ្សាយវីដេអូបទចម្រៀងឈាមបាតុករនៅលើបណ្ដាញសង្គមហ្វេសប៊ុក (Facebook) ក្នុងឱកាសខួប៩ឆ្នាំនៃការបាញ់បង្ក្រាបបង្ហូរឈាមពីសំណាក់រដ្ឋាភិបាលទៅលើក្រុមបាតុករនៅលើផ្លូវវេងស្រេង។ បទចម្រៀងនេះនិពន្ធ និងច្រៀងដោយលោក គា សុគន្ធ។
វីដេអូបទចម្រៀង ''ឈាមបាតុករ'' មានរូបភាពក្រុមបាតុករកំពុងតែធ្វើការដង្ហែក្បួនបាតុកម្មលើដងផ្លូវ ត្រូវបានសមត្ថកិច្ចបាញ់និង វាយបង្ក្រាបដោយហិង្សាដើម្បី បំបែកហ្វូងបាតុករ ដែលតវ៉ាទាមទារដំឡើងប្រាក់ខែ កាលពីឆ្នាំ២០១៤។ បទចម្រៀង "ឈាមបាតុករ" មានអត្ថន័យ រំលឹកដល់វីរភាពរបស់សហជីព និងអ្នកតស៊ូដើម្បីសិទ្ធិការងារ និងទាមទារតំឡើងប្រាក់ឈ្នួល ដោយយកសាច់ស្រស់ឈាមស្រស់ទៅតទល់ដោយមិនខ្លាចដំបងដែក គ្រាប់កាំភ្លើងដើម្បីមនុស្សជំនាន់ក្រោយមានប្រាក់ខែសមរម្យ។
ខ្លឹមសារបទចម្រៀង៖ «អតីតកាលកន្លងផុត បញ្ចប់ដោយឈឺចាប់ អ្នកណាខ្លះដែលបានឃើញ អ្នកណាខ្លះដែលបានស្ដាប់ អ្នកណាខ្លះដែលចងចាំ អ្នកណាខ្លះដែលបានភ្លេច ស្រក់ទឹកភ្នែកស្រែកទាមទារ ដើម្បីចង់បានសិទ្ធិ ៩ឆ្នាំកន្លងផុត បន្សល់ទុក្ខយ៉ាងគ្រាំក្រៀម តថភាពដ៏អនិច្ចាកាយា ពោរពេញដោយឈាមអ្នកខ្លះបាត់ខ្លួនស្ងាត់ស្ងៀមទាំងគ្មានដំណឹង រសាត់អណ្ដែតដល់ទីណាក៏គ្មានអ្នកណាដឹង រង់ចាំយុត្តិធម៌៩ឆ្នាំកន្លងទៅ អស់រយៈពេលជាយូរ គ្មានអ្នកទទួលខុសត្រូវ ទន្ទឹមនឹកមមៃ ចង់បានដំណោះស្រាយ ព្យាយាមរកគ្រប់វិធី ស្នើសុំនិងផ្សព្វផ្សាយ...»។
ពាក់ព័ន្ធនឹងរឿងនេះមន្ត្រីជាន់ខ្ពស់សមាគមការពារសិទ្ធិមនុស្សអាដហុក (Adhoc) លោក យី សុខសាន្ត និយាយថា ក្រុមអង្គការសង្គមស៊ីវិលធ្វើការរំលឹកខួប៩ឆ្នាំនៃការឈឺចាប់ និងបានបង្ហោះបទចម្រៀង ឈាមបាតុករ មិនមែនជាការញុះញង់អ្វីនោះទេ ព្រោះព្រឹត្តិការណ៍នោះបានកើតឡើងពិតមែន។ លោកថា កាលឆ្នាំ២០១៤ អាជ្ញាធរប្រើហិង្សា ធ្វើបាបចាប់ដាក់គុក និងបាញ់កម្មករបណ្ដាលឲ្យរងរបួសនិងស្លាប់ជាដើម។ លោកបន្ថែមទៀតថា ការរំលឹកការឈឺចាប់មិនមែនជារឿងញុះញង់នោះទេ។
លោក យី សុខសាន្ត៖ «អ្វីដែល គា សុគន្ធ លោកបាននិយាយជួនកាលវាជាការពិត រឿងការពិតវាមិនអាចទៅជារឿងញុះញង់នោះទេ ខ្ញុំឧទាហរណ៍ថា ការបាញ់សម្លាប់ប្រជាពលរដ្ឋស្លាប់មែន ដូចការទាមទាររបស់កម្មករហ្នឹង វាមានស្លាប់មែន ដូច្នេះការដែលគាត់និយាយរំលឹកឡើងវិញវាមិនមែនជារឿងញុះញង់ទេ ហើយដូចជាការបូមពន្លិចផ្ទះប្រជាជននៅបឹងកក់ បឹងអ៊ីហ្នឹងគឺមានការពន្លិចមែន បូមមែន អ៊ីចឹងបើយើងយករឿងហ្នឹងមកនិយាយ វាមិនមែនជារឿងញុះញង់នោះទេ»។
កាលពីឆ្នាំ២០២០ លោក គា សុគន្ធ ធ្លាប់ត្រូវបានតុលាការចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋជាអាថ៌ និងកាត់ទោសឲ្យជាប់ពន្ធនាគារ រយៈពេល១ឆ្នាំ៦ខែ ហើយលោកត្រូវតុលាការដោះលែងកាលពីខែកញ្ញាឆ្នាំ ២០២១។ កាលណោះ លោកបានច្រៀងចម្រៀង រិះគន់ បញ្ហាកើតឡើងក្នុងសង្គមក្រោមការដឹកនាំរបស់លោកនាយករដ្ឋមន្ត្រី ហ៊ុន សែន។ បទចម្រៀងទាំងនោះ រៀបរាប់ពីរឿងរ៉ាវឈឺចាប់នៅក្នុងសង្គមដូចជា អំពើអយុត្តិធម៌ បញ្ហាសេដ្ឋកិច្ចធ្លាក់ចុះ កំណើនពលរដ្ឋធ្វើចំណាកស្រុក និងពលរដ្ឋក្រីក្រដើរសុំទាន បញ្ហាព្រំដែន អំពើពុករលួយ និងការធ្លាក់ចុះគុណធម៌សង្គមជាដើម។ វីដេអូចម្រៀង ដែលមានចំណងជើងថា «ដីខ្មែរ» មានអ្នកចូលទស្សនារាប់លានដង និងចែករំលែកយ៉ាងច្រើនតាមបណ្ដាញសង្គម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អតិថិជនផ្ទុះការតវ៉ាករណីគម្រោងឧកញ៉ា ឡេង ណាវ៉ាត្រា ដែលបង់លុយច្រើនឆ្នាំមិនបានផ្ទះ
- ព្រះភិក្ខុ សាន សុជា ដែលជាព្រះសង្ឃល្បីល្បាញខាងទូន្មានបែបពុទ្ធសាសនាលាចាកសិក្ខាបទ
- នគរបាលយុត្តិធម៌បញ្ជូនសំណុំរឿងលោក ថេង សាវឿន និងសហការីទៅតុលាការ
- គ.ជ.ប ថា ខ្លួនមិនអាចឆ្លើយពីមូលហេតុដែលភ្លើងទៀនមិនអាចចូលរួមបោះឆ្នោតជាតិបានទេ ទោះបានចូលរួមបោះឆ្នោតឃុំសង្កាត់ក៏ដោយ
- លោក ហ៊ុន សែន ចោទមន្ត្រីទូតលោកខាងសេរីថា ព្រហើន និងប្រមាថកម្ពុជា
អត្ថបទពេញនិយម
សិទ្ធិមនុស្ស
