សាលាដំបូងខេត្តតាកែវគ្រោងប្រកាសសាលក្រមសំណុំរឿងញុះញង់របស់ លោក ភុន យុទ្ធ នៅថ្ងៃទី១២ វិច្ឆិកា
2024.10.31
លោក ភុន យុទ្ធ ជាជនពិការស្វិតជើងកំពុងជាប់ពន្ធនាគារ ដោយសារការបង្ហោះសាររិះគន់រដ្ឋាភិបាលលើបណ្ដាញសង្គមហ្វេសប៊ុក។
Photo: RFA
សាលាដំបូងខេត្តតាកែវ នៅព្រឹកថ្ងៃទី៣១ តុលា បានបើកសវនាការជំនុំជម្រះលើសំណុំរឿងញុះញង់របស់អ្នករិះគន់បញ្ហាសង្គម និងជាជនមានពិការភាព លោក ភុន យុទ្ធ ដែលត្រូវបានសមត្ថកិច្ចចាប់ខ្លួនដាក់ពន្ធនាគារតាំងពីខែមីនា។ មន្ត្រីសង្គមស៊ីវិលស្នើឱ្យតុលាការទម្លាក់ការចោទប្រកាន់លើលោក ភុន យុទ្ធ និងដោះលែងរូបលោកឱ្យមានសេរីភាពឡើងវិញ។
មន្ត្រីអង្កេតជាន់ខ្ពស់នៃសមាគមការពារសិទ្ធិមនុស្សអាដហុក (Adhoc) លោក គឹម ពិសិដ្ឋ ដែលបានឃ្លាំមើលសវនាការនេះ ថ្លែងប្រាប់វិទ្យុអាស៊ីសេរី នៅថ្ងៃទី៣១ តុលា ថា ចៅក្រម និងតំណាងអយ្យការសាកសួរ លោក ភុន យុទ្ធ ជាច្រើនជុំវិញការប្រើប្រាស់ពាក្យសម្ដីរិះគន់តាមរយៈទំព័រហ្វេសប៊ុករបស់លោកទៅលើក្រុមគ្រួសារនាយករដ្ឋមន្ត្រី ហ៊ុន ម៉ាណែត។ លោកថា លោក ភុន យុទ្ធ លើកឡើងក្នុងសវនាការថាមូលហេតុដែលលោករិះគន់នៅលើបណ្ដាញសង្គមដូច្នេះ គឺដោយសារតែលោកមើលឃើញពីភាពអសកម្មរបស់រដ្ឋាភិបាល ជាពិសេស បញ្ហាគ្រឿងញៀនបន្តកើតឡើងក្នុងសហគមន៍របស់លោក។
លោក គឹម ពិសិដ្ឋ លើកឡើងថា សិទ្ធិនៃការបញ្ចេញមតិ គឺជាសិទ្ធិមូលដ្ឋានយ៉ាងសំខាន់ដែលមានចែងក្នុងរដ្ឋធម្មនុញ្ញ ដើម្បីឱ្យពលរដ្ឋគ្រប់រូបមានសិទ្ធិលើកឡើងពីភាពអសកម្មរបស់រដ្ឋាភិបាល និងជំរុញឱ្យមានការដោះស្រាយបញ្ហាក្នុងសង្គម ឱ្យមានភាពប្រសើរឡើង។ ដូច្នេះ លោកយល់ថា រដ្ឋាភិបាលមិនគួរប្រើប្រាស់ការកាត់ទោសឱ្យជាប់ពន្ធនាគារទៅលើពលរដ្ឋនោះទេ បើទោះជាពួកគាត់និយាយលើសលស់យ៉ាងណាក្ដី។
លោក គឹម ពិសិដ្ឋ៖ «ប៉ុន្តែបើក្នុងករណីណាមួយមានការបញ្ចេញមតិលើសលស់ ទៅប៉ះពាល់ឈ្មោះទៅប៉ះពាល់បុគ្គលណាមួយ គួរណាស់អាជ្ញាធរធ្វើវិធានការអប់រំ ណែនាំ ជាជាងយើងប្រើប្រាស់វិធានការធ្ងន់ធ្ងរទៅលើបុគ្គលនោះ ពីព្រោះការនិយាយរបស់ពលរដ្ឋ ចំណេះដឹងមិនស្មើគ្នាទេ។ ដូច្នេះការនិយាយតែងមានការលើសលស់ខ្វះខាត ហើយកាលណាយើងប្រើវិធានការធ្ងន់ធ្ងរទៅលើច្បាប់ ពន្ធនាគារ និងតុលាការច្បាស់ណាស់ ការចូលរួមបញ្ចេញមតិក្នុងសង្គមប្រជាធិបតេយ្យ មិនអាចធ្វើទៅបានទេដោយសារមានការភ័យខ្លាច»។
ក្រោយសវនាការ ចៅក្រមជំនុំជម្រះ លោក តូច មានរិទ្ធិ សម្រេចថា តុលាការនឹងប្រកាសសាលក្រមលើសំណុំរឿងនេះ នៅថ្ងៃទី១២ ខែវិច្ឆិកា ខាងមុខ។
ប្រពន្ធរបស់លោក ភុន យុទ្ធ គឺលោកស្រី មុំ វិត លើកឡើងថា អស់រយៈពេល ២២៦ថ្ងៃហើយ ដែលអាជ្ញាធរបានយកប្ដីលោកស្រីទៅឃុំឃាំងឱ្យបែកពីប្រពន្ធ និងកូន។ លោកស្រីថា ជីវភាពគ្រួសារបានជួបការលំបាកជាខ្លាំងជាពិសេសលោកស្រី និងកូនប្រឈមនឹងការរើសអើង។ លោកស្រីថា បើទោះជាប្ដីលោកស្រីពិការមែន ប្ដីលោកស្រីអាចចិញ្ចឹមមាន់នៅផ្ទះ និងមើលថែកូនបាន។
លោកស្រី មុំ វិត បន្តថា ប្ដីលោកស្រីជាមនុស្សស្លូតត្រង់ ចេះឈឺឆ្អាលពីបញ្ហាសង្គមជាតិ ដោយលោកមិនដែលប្រព្រឹត្តបទល្មើសអ្វីនោះទេ។ លោកស្រីបារម្ភពីសុខភាពរបស់ប្ដី និងការរស់លំបាកក្នុងពន្ធនាគារ ដោយសារប្ដីលោកស្រីពិការជើង។ ដូច្នេះលោកស្រីស្នើឱ្យតុលាការដោះលែងប្ដីឱ្យមានសេរីភាពវិញ។
លោកស្រី មុំ វិត៖ «ខ្ញុំស្នើសុំឱ្យតុលាការខេត្តតាកែវ សុំឱ្យដោះលែងគាត់ទៅ ឱ្យមានសេរីភាពជួបជុំគ្រួសារ រស់នៅវេទនាណាស់ ហើយយើងរស់នៅផ្ទះគេ នៅដីគេវាមិនស្រួល ដូចនៅផ្ទះខ្លួនឯងទេ ខ្ញុំចង់ឱ្យប្ដីខ្ញុំមកវិញជួបជុំកូន ប្ដីខ្ញុំមកវិញ រកស៊ីទៅមុខទៀត ខ្ញុំនៅពីនាក់កូនវេទនាណាស់»។
វិទ្យុអាស៊ីសេរីមិនអាចទាក់ទងអ្នកនាំពាក្យសាលាដំបូងខេត្តតាកែវលោក ង៉ែត ដាវុធ ដើម្បីឆ្លើយតបបន្ថែមជុំវិញរឿងនេះបានទេ នៅថ្ងៃទី៣១ ខែតុលា។
លោក ភុន យុទ្ធ បច្ចុប្បន្នវ័យ ៣៩ឆ្នាំ ជាជនពិការស្វិតជើងពីកំណើត រស់នៅក្នុងភូមិត្រពាំងឈូក ឃុំត្រឡាច ស្រុកទ្រាំង ខេត្តតាកែវ។ លោក ភុន យុទ្ធ ធ្លាប់ជាប់ពន្ធនាគារចំនួន ៥ខែម្ដងរួចមកហើយ កាលពីឆ្នាំ២០១៩ ពាក់ព័ន្ធនឹងបទចោទប្រកាន់ «ញុះញង់ និងជេរប្រមាថជាសាធារណៈ» បន្ទាប់ពីលោកបានបង្ហោះសាររិះគន់រដ្ឋាភិបាលលើបណ្ដាញសង្គមហ្វេសប៊ុករបស់ខ្លួនឈ្មោះថា «ខ្ញុំចង់បាននាយករដ្ឋមន្ត្រីថ្មី»។ កាលនៅមានសេរីភាពលោកធ្លាប់ប្រាប់ថា មូលហេតុដែលលោកបន្តនិយាយរឿងអយុត្តិធម៌ក្នុងសង្គម ដោយមិនខ្លាចជាប់ពន្ធនាគារសាជាថ្មី ពីព្រោះលោកចង់បានអ្នកដឹកនាំប្រទេសល្អ ដែលគោរពសិទ្ធិពលរដ្ឋ និងសង្គមមានប្រជាធិបតេយ្យពិតប្រាកដ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
អត្ថបទពេញនិយម
សិទ្ធិមនុស្ស
