ឯកអគ្គរដ្ឋទូត​អាមេរិក​ថា អាមេរិក​ត្រៀម​ផ្តល់​កិច្ច​សហប្រតិបត្តិការ​ជាមួយ​កម្ពុជា​ជានិច្ច​ប្រឆាំង នឹង​អំពើ​ជួញដូរ​មនុស្ស

ដោយ យន់ សាមៀន
2022.11.06
Share on WhatsApp
Share on WhatsApp
ឯកអគ្គរដ្ឋទូត​អាមេរិក​ថា អាមេរិក​ត្រៀម​ផ្តល់​កិច្ច​សហប្រតិបត្តិការ​ជាមួយ​កម្ពុជា​ជានិច្ច​ប្រឆាំង នឹង​អំពើ​ជួញដូរ​មនុស្ស លោក ស ខេង រដ្ឋមន្ត្រី​ក្រសួងមហាផ្ទៃ​ (ស្ដាំ) ជួប​ឯកអគ្គរដ្ឋទូត​អាមេរិក​ប្រចាំ​នៅ​កម្ពុជា​លោក បាទ្រីក ម័រហ្វី (Patrick Murphy) កាលពីថ្ងៃទី៥ ខែ​វិច្ឆិកា ឆ្នាំ​២០២២។
រូប៖ Twitter Ambassador W. Patrick Murphy

លោក ស ខេង រដ្ឋមន្ត្រី​ក្រសួងមហាផ្ទៃ​ជួប​ឯកអគ្គរដ្ឋទូត​អាមេរិក​ប្រចាំ​នៅ​កម្ពុជា​លោក បាទ្រីក ម័រហ្វី (Patrick Murphy) ជជែក​រឿង​ប្រយុទ្ធ​ប្រឆាំង​នឹង​ឧក្រិដ្ឋកម្ម​ជួញដូរ​មនុស្ស​នៅ​កម្ពុជា។ មន្ត្រី​សង្គម​ស៊ីវិល យល់​ថា កម្ពុជា​មិន​ទាន់​មាន​វិធានការ​ទប់ស្កាត់​ឧក្រិដ្ឋកម្ម​ជួញដូរ​មនុស្ស​ឱ្យ​មាន​ប្រសិទ្ធភាព​នៅឡើយ។

លោក ស ខេង រដ្ឋមន្ត្រី​ក្រសួង​មហាផ្ទៃ ក្នុង​ជំនួប​ទ្វេភាគី​ជាមួយ​ឯកអគ្គរដ្ឋទូត​អាមេរិក​ប្រចាំ​នៅ​កម្ពុជា​លោក ប៉ាទ្រីក ម័រហ្វី អះអាង​ថា កម្ពុជា​ប្ដេជ្ញាចិត្ត​ប្រយុទ្ធ​ប្រឆាំង​នឹង​បទល្មើស​ជួញដូរ​មនុស្ស​។ លោក​បញ្ជាក់​ថា បញ្ហា​ឧក្រិដ្ឋកម្ម​ជួញដូរ​មនុស្ស​នេះ គឺ​គ្មាន​ប្រទេស​ណា​អាច​អនុវត្ត​តែម្នាក់ឯង​នោះ​ឡើយ ពោល​គឺ​ទាមទារ​ឱ្យ​មាន​កិច្ច​សហប្រតិបត្តិការ​ទាំង​ក្នុង​កម្រិត​តំបន់ និង​សកលលោក ជាពិសេស​គឺ​រវាង​កម្លាំង​ក្នុង​ការ​អនុវត្ត​ច្បាប់។

លោក បាទ្រីក ម័រហ្វី បាន​សរសេរ​លើ​ទំព័រ​ធ្វី​ស​ទ័​រ (Twitter) របស់​លោក​ថា ជំនួប​រវាង​រដ្ឋមន្ត្រី​ក្រសួងមហាផ្ទៃ​ដើម្បី​ជំរុញ​កិច្ច​ខិតខំ​ប្រឹងប្រែង​ក្នុង​ការ​ប្រយុទ្ធ​ប្រឆាំង​នឹង​ការ​ជួញដូរ​មនុស្ស ឲ្យ​ប្រសើរ​ឡើង និង​ពិភាក្សា​ការងារ​អនុវត្ត​ច្បាប់​របស់​សហរដ្ឋអាមេរិក និង​កម្ពុជា​ក្នុង​ការ​ដោះស្រាយ​បញ្ហា​ឧក្រិដ្ឋកម្ម និង​ពង្រឹងគុណភាព។

ទាក់ទង​នឹង​រឿង​នេះ​ដែរ អនុប្រធាន​អចិន្ត្រៃយ៍​នៃ​គណៈកម្មាធិការ​ជាតិ​ប្រយុទ្ធ​ប្រឆាំង​អំពើ​ជួញដូរ​មនុស្ស អ្នកស្រី ជូ ប៊ុនអេង ទទួលស្គាល់​ថា ឧក្រិដ្ឋកម្ម​ជួញដូរ​មនុស្ស​ពិត​ជា​បាន​កើត​ឡើង​នៅ​កម្ពុជា ហើយ​រដ្ឋាភិបាល​បាន​អនុវត្ត​គោលនយោបាយ​ក្នុង​ការ​បង្ក្រាប​ជា​បន្តបន្ទាប់។ ទោះជា​យ៉ាងណា អ្នកស្រី​ថា កម្ពុជា​មិន​មាន​មនុស្ស​រាប់​ម៉ឺន​នាក់​រង​ការ​ជួញដូរ​ដូចជា​ការចោទប្រកាន់​នោះ​ទេ។​

អ្នកស្រី ជូ ប៊ុនអេង៖ «យើង​បាន​ប្រមូល​បាន​មនុស្ស​រាប់​ពាន់​នាក់​ហើយ​។ ប៉ុន្តែ មនុស្ស​រាប់​ពាន់​នាក់​នោះ​គឺ​មិនមែន​ជា​អ្នករងគ្រោះ​ដោយ​អំពើ​ជួញដូរ​មនុស្ស​ទាំងអស់​នោះ​ទេ​។ យើង​រក​ឃើញ​មាន​មនុស្ស​ដែល​រងគ្រោះ​ដោយ​បទល្មើស​មួយចំនួន​ទាក់ទង​នឹង​ការ​ចាប់​ជំរិត ទាក់ទង​នឹង​អំពើ​ជួញដូរ​មនុស្ស ឬមួយ​អ្នក​ដែល​ធ្វើ​ល្បែង [​អ្នក​បោក​ប្រាស់​] (Scammer) អីហ្នឹង ហើយក៏​មិន​មាន​ដល់​រាប់រយ​រាប់ពាន់​ដែរ​។ អ្នក​ដទៃទៀត​សួរ​ថា អ្នក​ទាំងអស់​ហ្នឹង​ម៉េច​មិន​ជួយសង្គ្រោះ​មក ពេល​ដែល​យើង​យក​ចេញ​មក​សួរ​គាត់​ថា តើ​វា​មានការ​ធ្វើបាប​ទណ្ឌកម្ម​អី​អត់ គេ​ប្រកែក​។ គេ​ថា​អត់​មាន​ផង។ គេ​សុំ​ទៅ​ធ្វើ​ការ​នៅ​កន្លែង​ហ្នឹង​វិញ ប៉ុន្តែ​យើង​មិន​អនុញ្ញាត​ទេ។ យើង​ចង់​សង្គ្រោះ​ពួកគាត់​ឱ្យ​ផុត​ពី​តំបន់​គ្មាន​សុវត្ថិភាព»

ក្រសួងមហាផ្ទៃ​ឲ្យ​ដឹង​ថា រយៈពេល​៩​ខែ ឆ្នាំ​២០២២ សមត្ថកិច្ច​បង្ក្រាប​អំពើ​ជួញដូរ​មនុស្ស និង​អាជីវកម្ម​ផ្លូវភេទ បាន​ចំនួន ១២២​ករណី គឺ​ថយ​ចុះ​ជាង ៥០% បើ​ធៀប​រយៈពេល​ដូចគ្នា កាលពី​ឆ្នាំ​២០២១ ដែល​មាន​ចំនួន​២៦៩​ករណី។ គេហទំព័រ​ក្រសួង​មហាផ្ទៃ​ចេញផ្សាយ​នៅ​ថ្ងៃទី​១ ខែវិច្ឆិកា ឲ្យ​ដឹង​ថា សមត្ថកិច្ច​បាន​ជួយសង្គ្រោះ​ជនរងគ្រោះ​ចំនួន ២៥៤​នាក់ ក្នុង​នោះ​ស្រី​១៩០​នាក់​។ ក្នុង​ចំណោម​ជនរងគ្រោះ​ទាំងនោះ មាន​ក្មេង​អាយុ​ក្រោម ១៥​ឆ្នាំ ចំនួន​១០០​នាក់ និង​ក្មេង​អាយុ​ចន្លោះ ពី​១៥​ទៅ​១៧​ឆ្នាំ ចំនួន​២៩​នាក់​។ សមត្ថកិច្ច​ក៏បាន​ចាប់ខ្លួន​ជនសង្ស័យ​បញ្ជូន​ទៅ​តុលាការ​ចំនួន ១៤៧​ករណី ក្នុង​នោះ ជនសង្ស័យ​ជា​ជនបរទេស​ចំនួន ២២​នាក់ មាន​៤​សញ្ជាតិ រួមមាន​ចិន ថៃ វៀតណាម និង​បង់ក្លាដេស។

ពាក់ព័ន្ធ​នឹង​ការ​ជួញដូរ​មនុស្ស​នេះ​ដែរ អ្នកនាំពាក្យ​សមាគម​ការពារ​សិទ្ធិមនុស្ស​អាដហុក (ADHOC) លោក ស៊ឹង សែនករុណា មានប្រសាសន៍​ថា ជួប​ទ្វេភាគី​នេះ​គឺ​បង្ហាញថា​អាមេរិក​នៅតែ​ព្រួយបារម្ភ​ចំពោះ​កំណើន​នៃ​ឧក្រិដ្ឋកម្ម​ជួញដូរ​មនុស្ស​នៅ​កម្ពុជា ខណៈ​ដែល​ការ​បង្ក្រាប​របស់​សមត្ថ​កិច្ច​ហាក់​គ្មាន​ប្រសិទ្ធភាព​នៅឡើយ។

លោក ស៊ឹង សែនករុណា លើកឡើង​បន្ត​ថា បើ​អាជ្ញាធរ​បង្ក្រាប​បទល្មើស​ជួញដូរ​មនុស្ស​ក្នុង​កម្រិត​តូចតាច គឺ​មិនអាច​លុបបំបាត់​ឧក្រិដ្ឋកម្ម​ជួញដូរ​មនុស្ស​នេះ​បាន​ទេ​។ លោក​ជំរុញ​ដល់​រដ្ឋាភិបាល​បង្ហាញ​ឆន្ទៈ​ពិតប្រាកដ ដោយ​ស្ថាប័ន​ជំនាញ​ត្រូវ​បើក​ការស៊ើបអង្កេត​លើ​មេខ្លោង​ធំៗ​នៅ​ពីក្រោយ​ឧក្រិដ្ឋកម្ម​ជួញដូរ​មនុស្ស​នេះ។

លោក ស៊ឹង សែនករុណា៖ «​ដូចដែល​ខាង​សហរដ្ឋអាមេរិក​បាន​បង្ហាញ​អ៊ីចឹង គឺ​យើង​មានការ​ព្រួយបារម្ភ​ណាស់ ប្រសិនជា​ការ​បង្ក្រាប​ហ្នឹង​វា​មិនអាច​ធ្វើ​បាន ផល​ប៉ះពាល់​នឹង​ជះ​មកដល់​កម្ពុជា​។ សហគមន៍​អន្តរជាតិ នឹង​អាច​ចោទប្រកាន់​ប្រទេស​កម្ពុជា ជាទី​តាំង​មួយ​ដែល​ពោរពេញ​ទៅ​ដោយ​បទល្មើស​អំពើ​ជួញដូរ​មនុស្ស​នេះ​។ សហគមន៍​អន្តរជាតិ ប្រទេស​អន្តរជាតិ​មួយចំនួន​នឹង​មាន​វិធានការ​ផ្សេងៗ​បន្តបន្ទាប់​ទៀត​មក​លើ​កម្ពុជា»

របាយការណ៍​ស្ដីពី​ការ​ជួញដូរ​មនុស្ស​ឆ្នាំ​២០២២ របស់​ក្រសួងការបរទេស​អាមេរិក​ចេញផ្សាយ​កាលពី​ខែកក្កដា បាន​ទម្លាក់​ចំណាត់ថ្នាក់​កម្ពុជា មក​កម្រិត​ទី​៣ ដែល​មាន​ន័យថា ស្ថានភាព​នៃ​អំពើ​ជួញដូរ​មនុស្ស​នៅ​កម្ពុជា​មាន​លក្ខណៈ​អាក្រក់​បំផុត និង​ពុំ​ធ្លាប់​មាន​ចាប់តាំងពី​ឆ្នាំ​២០១៥ មក។ អាមេរិក​រក​ឃើញ​ថា កម្ពុជា​ដើរ​ថយក្រោយ និង​គ្មាន​ឆន្ទៈ​ក្នុង​ការ​លុបបំបាត់​ការ​ជួញដូរ​មនុស្ស​នេះ​ទេ ដោយសារ​បញ្ហា​អំពើពុករលួយ​ជា​ប្រព័ន្ធ ដែល​បាន​រារាំង​ដល់​ការអនុវត្ត​ច្បាប់​លើ​ក្រុម​ឧក្រិដ្ឋជន​ដែល​ប្រព្រឹត្ត​នូវ​អំពើ​ជួញដូរ​មនុស្ស​នៅ​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។